Read Kambera MÀRUKU 10 Bible Online

MÀRUKU 10 - Kambera bible

MÀRUKU 10

¹Tunaka nu hadangu-nanyaka i Yehu welingu lai nu, hi nalaku la tana Yundia dàngu la tana hapapa Luku Yorundangu. Ka hili mai-mananyai na tau dangu pa langgungguru-nya i Yehu. Ka papeka-nanjaka hama tuna na pakàli wàna.

²Damaimbu da manda pirada da tau Parihi la pa-kahili-ya i Yehu, hi da-paàra-nya, “Pekuna ihu la uku anggama-nda la pa-wàrungu papaha?” wàdanya.

³Nanapa-ya i Yehu, “Nggikina wànanggai i Muha la hupu liina?” wànanja.

⁴“Na-pahiangu-ma i Muha la pa-wàrungu papaha mili tulihu mangilu pàku huratu pahewa,” wàda ba dahema-ya.

⁵Tàka i Yehu, “Ruku katiku watu dimi hi na-tulihu-nggainya nu na hupu liina i Muha,” wànanja.

⁶Tàka weli mulangu-ma duna, ba nawulu tau i Ala, ‘mini kawini-maha ba nawulu-ha paraïna i Ala.

⁷Tuna nu duka na mini ka na-dunjakungu inana amana, hi na-pambulu dànya na papaha-na,[16]

⁸hi hau tolu-ahaka pa-kadua-da,’ ba wàna daa. Ba tuna, nda tau madua-ahapa, tàka haàtu-ahaka.

⁹Nuna-duyaka na pakiri-na, jàka nggàraya na pambàda pambulu-na i Ala, nda peku-ana ka na-pahewa-nja tau!” hi wànanja.

¹⁰Ba datama-ka la uma, paàrangu-danyaka da papanau-na na rukuna nuna.

¹¹I Yehu napanii-nja, “Jàka nggamu ma-wàrungu papaha-na hi nahili pahai haàtu, njuraku-nanya ba ni-dunyapa na papaha memana.[17]

¹²Tuna numbui na kawini na ma-wàrungu leina hi na-leingui haàtu, njuraku-mbunanya,” wànanja.

¹³Ninja da tau da mangàndi anada lai Yehu ka naràma-ha dàngu ka napeka-nja mahàmu. Tàka hi dambeni-nja paraï da papanau-na i Yehu.

¹⁴Ba naita-ya nu, mbeni-nanjaka paraïna i Yehu hi napanii-nja, “Puli bianja da anakeda ka damai lai Nyungga. Àmbi hiri-dunja, maa ba tau tungu yiadu manjadi ana banjaru-na i Ala.

¹⁵Ngàdaya yiana! Jàka nggàmuya na manda hurungu hama tuna haàtu anakeda la hanggana i Ala, nda jia njadi-ana ana banjaru-na i Ala,” wànanja.

¹⁶Ba panii tunaka nu, rohu-nahaka da anakeda i Yehu, hi na pa-dambaku-nja lima, hi napeka-nja mahàmu.

¹⁷Ba nahili laku i Yehu, manyamalu-nanyaka na haàtu nàhu la ngarangia, hi na-marubuku la hanggana i Yehu hi na-paàra-nya, “Màla nu Umbu Ngguru mahàmu, nggàraka bàdi pawunda-nggu ka peku ngala-nggunya na luri ma-langatàka dàngu na ma-palupangu?” wànanya.

¹⁸Nanapa-ya i Yehu, “Ka nggikina mahàmu hi wàmungga? Nda ningua mahàmu, hinggilu-na i Ala-a.

¹⁹Ba pi-madumu-nja da hupu liina i Ala, ‘Àmbu pameti tau, àmbu njuraku, àmbu manganga, àmbu hakahii kambàliku, àmbu palapingu, tembiha da amamu da inamu,’ da mawàda,” wànanya.

²⁰“Umbu Ngguru,” wàna nu na tau, “mbuu ndàbada nuda da hupu lii mbàda nunju weli pa-anakeda-ma-nggunjaka,” wànanya.

²¹Tàka i Yehu hi napanau-ya ba dàngu mila-nanya eti, “Hangia-anaka na majapu-nggau. Luawa kau dangga ndàbanja da pawùlu-mu; da àmahu wilida kau wuanja da mamila, napa ungalangu banda la awangu. Hàlaka nu, maiwa kau kikungga,” wànanya.

²²Ba narongu-yaka panii tuna nu i Yehu, hala-nanyaka na etina, hi nabeli mangu handukangu, maa ba dira wùlu-duya.

²³Tàka i Yehu, hi napanau-ha da papanau-na hi napanii-nja, “Lalu nda mudaya na tau mawùlu panjadi ana banjaru-na i Ala.

²⁴Ngàtaru wàda biaka da papanau-na ba darongu-ya nu na paniina i Yehu. Tàka hi nahili panii i Yehu, “Ai, dimi ananggu, manda muda-maya duna panjadi ana banjaru-na i Ala.

²⁵Narihi muda ningu-mapa na heu ota patama la mambowa utu welingu la haàtu mawùlu patama la Tana Bidina i Ala,” wànanja.

²⁶Nu da papanii-na i Yehu na pa-hangàtaru-ha da papanau-na, hi da-maràngga paàrangu dàngga anguda, “Jàka tuna nu nggamu-ayaka ihu na mamara?” wàda.

²⁷Ka panau-nahaka paraïna i Yehu hi nahema, “Nda peku-manaka duna la tau, tàka nda ningua manda peku lai Ala; napeku ndàbama duna lai Ala,” wànanja.

²⁸Hi napanii i Peturu, “Màla nyuma yia, mbàda dunjaku ndàba-manjaka hi makiku-nggau Nyumu,” wànanya.

²⁹Nanapa-ya i Yehu, “Langatàka-manggunya ka kupeka-nggai, na tau na mambàda dunjakungu umana, jàka ndia anguna paluhu, jàka ndia ana winina, jàka ndia inana, jàka ndia amana, jàka ndia anana, jàka ndia làtangu-na, wokana, lumunggu Nyungga, dàngu lumuna na Lii Mànangu welingu lai Ala,

³⁰narihi dangu na pangala-na na tau nuna la rehi nàhu. Na pa-hangahu wundangu parihi dangu ba na-ngalangu uma, angu paluhu, ana wini, ina, ana, làtangu woka, — dàngu mayila-mbu. Tàka napa la rehi na manàmu-nya, nangala-nya na luri na ma-langatàka dàngu na malundu nu.

³¹Na nyuna nadangu na tau na ma-mangilu la rehi nàhu, napa na-malamiri-ya; dàngu nadangu na tau na ma-malamiri la rehi nàhu, napa na-mangilu-ya,” wànanja.

³²Hanàhu-da la Yeruhali i Yehu dàngu da papanau-na. Nàhuya la mangilu i Yehu, tàka da-hondaru ndàba da papanau-na. Tàka na tau dangu da makiku-nja da ma-malamiri da-mangàdatu-mbu. Tunaka nu hili paau pameha-nanjaka da papanau-na i Yehu, hi napanii-nja jàka nggàraya napa na manggàna-ya Nyuna.

³³“Kai rongu,” wànanja, “nàhu lua-ndanya la Yeruhali. Napa lai nu pa-pakatangu la ra - ratu pangora dàngu la nggu - ngguru anggama-ya na Ana Tau. Napa darata-nya hukungu-na la pa-pameti-ya, hi damangu pa-pakata-nya la tau nda Yahundi.

³⁴Napa da-paaka-nya, da-pangànji-ya, da pajàra-ya, dàngu hi da-harika-nya. Tàka la patailu wàna na lodu hi na-hadangu beli,” wànanja.

³⁵Ka hurungu-danyaka lai Yehu i Yakombu dàngu i Yuhani da anana i Hambandiu, “Umbu Ngguru,” wàda, “hangia-na na-pakarai-ma, ka tuna-nggama nu i Umbu Ngguru, wàmanggau làti,” wàdanya.

³⁶“Ka nggàraya-nu na parinju-mi, màta ka tunanda nu, ba wàmi,” hi wàna i Yehu ba na-paàra-nja.

³⁷Danapa-ya nyuda, “Ma-mbuhangu pa-mandapu la kawana la kalaimu, jàkau mandapu-ka la ngia pa-bunjuku-mu, Umbu,” wàdanya.

³⁸Nanapa-ya i Yehu, “Ndai pi-anya jàka nggàra-ya na pakarai-mi,” wànanja. “Itorungu-du pa-unungu la kaba wai mayila na paunu-nggu napa dàngu la patama-nya na mayila nda najaru na ngia patama-nggu napa?” wànanja.

³⁹“Ma-torungu,” wàda ba dahema. Nahili paninja i Yehu, “Iunungu-ma nyuna la kaba wai mayila na paunu-nggu napa, dàngu itamama nyuna la mayila nda najaru na ngia patama-nggu napa.

⁴⁰Na nyuna, jàka nggamu napa ma-mandapu la kawana la kalainggu, nda ngabanggu Nyungga-aya duku la pa-kawuku-ya. I Ala duna na ma-kawuku-ya nuna jàka nggamuha napa da ma-mandapu-nja nuda,” wànanja.

⁴¹Ba darongu-yaka nu paraï da pa-panaungu hawiangu nu da ma-hakambulu-da, hoputu-danjaka i Yakombu dàngu i Yuhani.

⁴²Tuna nuduka hi kiri paau ndàba-nanja paraïna i Yehu, hi napanii-nja, “Bai pi-madunja da liku uruda da banjaru manda tandaya i Ala ba da kapidihu rayatu-da. Tàka da tau boku - tau bokulu-da jia mayai duda ba da-roduku-nja nyuda.

⁴³Na nyuna àmbi timi nudu nyimi! Hauya duna, na tau na ma-mbuhangu pa-bokulu lai nyimi jia-maya bàdi na malumu-nggai.

⁴⁴Tàka na tau na ma-mbuhangu pangia ngaba lai nyimi jia-maya bàdi na ata ndàbami.

⁴⁵Nadu na Ana Taumbu, hi kiri maina nda jia-aya keha ka nalumu-nya tau. Tàka mainanya pa-lumungu tau duna dàngu mainanya pa-pajàma-nya na lurina keha ka pahàla tau madangu,” wànanja.

⁴⁶Ka tàka-danyaka la Yeriku. Ba daluhu-haka welingu la paraingu nuna i Yehu dàngu da papanau-na hamanai na tau dangu, ninya na haàtu tau poki mandapu-na padua pakarai pandemangu la hingi ànda. Na tamuna Mbàratimiu-ya anana i Timeu.

⁴⁷Ba narongu-yaka ba jiaya i Yehu tau Naharitu na manàhu-nya, ka wara-madua-nanyaka, “Dou Umbu Yehu, anana i Ndautu! Namu àruka!” wàna.

⁴⁸Ka mbeni-danyaka paraï tau dangu, kandii ba wàdanya. Ba tuna hama huka pa-kodungu-mana ba nawara, “Dou anana i Ndautu namu àru-kika,” wàna.

⁴⁹Ka pànjangu-nanyaka i Yehu, “Paaunya,” hi wàna. Ba tuna paau-danyaka nu na mapoki. Hi dapanii-nya, “Kamàndalu-wa nu! Paau-nanggau i Yehu, hadangu-wa!” wàdanya.

⁵⁰Lumbatu wàna-ma-duaka ba na-dunjaku-nyaka na kalembi malaina, hi nalua lai Yehu.

⁵¹Hi na-paàrangu i Yehu, “Màla, nggàraka pambuha-mu nu pawunda-nggunggau?” wànanya. Nahema na mapoki, “Màta ka kungita wànggu làti, Umbu Ngguru,” wàna.

⁵²“Lakuwa,” wàna i Yehu, “rukuna bau pawai lai Nyungga, hàmu-munyaka,” wànanya. Ka ngita-madua-nanyaka la rehi nu. Hi natundu-nya i Yehu la ngarangia.