Read Kambera MÀRUKU 11 Bible Online

MÀRUKU 11 - Kambera bible

MÀRUKU 11

¹Ba da-mareni-nyaka la Yeruhali, tàka-danyaka la paraingu Mbetupanggi dàngu Mbetani, la karaha Tandula Hiungu. Paràha mangilu-nanjaka welingu lai nu da tau madua papanau-na paraïna i Yehu.

²“Iluawa la kotaku nina na pahangga-nda,” wànanja paraïna i Yehu. “Tamangu ba wàmi-kinyaka na kotaku, ita-ma-aminya na heu kamboka kalandai la hondu, na pandedi kaliti ndoku. Wàkahu-ya kai ngàndiya nàmu.

³Jàka ningu ma-paàra-nggai nggikina hii wàkahu-ya na kalandai, paniinya, ‘Ningu ihi wàngu wàna i Miri,[18] napa naluu pabeli-manya duna,’ wàminya,” wànanja.

⁴Ka laku-danyaka nu da tau madua papanau-na i Yehu, hi datàka-nya na heu kamboka kalandai pahondu la pindu uma la hingi ngarangia. Hi da-wàkahu-ya.

⁵Ka paàra-danjaka paraï da tau da ma-ndolaku lai nu, “Ha, nggàra ulami hiana? Ka nggikina hii wàkahu-ya na kamboka kalandai?” wàdanja.

⁶Ka hema-dahaka hama tuna na pambàda panii-nanja i Yehu. Ka màta-danjaka hi dangàndi-ya na kalandai.

⁷Ba datàka-ka lai Yehu, wàlahu-dahaka da kalembi malaida la kajia kalandai, hi na-kaliti i Yehu.

⁸Dadangu da tau ma-wàlahu kalembi malaida la ngarangia, ningumbu ma-wàlahu raungu papiti-da la woka.

⁹Da tau ma-mangilu dàngu da ma-malamiri, dawara ndàba, “Wotunya i Ala! Na-mànjaku maringu-wa Nyuna na mamai wànya na tamuna i Miri!

¹⁰Na-mànjaku maringu-wa na pareta-na la rehi na-manàmu-nya — na pareta-na i Ndautu na boku la mangilu-nda! Wotunya i Ala Hupu Majangga!” wàda.

¹¹Tunaka nu tàka-nanyaka la Yeruhali i Yehu, hi natama la Umana i Miri. Hi na-pawilikungu matana lai nu. Tàka ba kapàtangu-ama-nanyaka laku-nanyaka la Mbetani karia-da da tau ha-kambulu madua da papanau-na.

¹²Hadangu harii, ba daluhu-ha welingu la Mbetani, manjuu-nanyaka i Yehu.

¹³Naita marauya na hareti kapilitu na ma-marumbingu rauna. Ka lua-nanyaka pa-tàngaru-ya jàka ningu wuana. Nu ba natàka-nyaka nda nggàra-a pahunggu-na, rau jua-ma-aya, maa ba ndedi rapa wua kapilitu-duya.

¹⁴Hi napanii-nya na pingi kapilitu i Yehu, “Piti welingu nàhu nda haàtu-apa mangaanya na wuamu!” wànanya. Nu rongu-madanya da papanau-na.

¹⁵Tunaka nu tàka-danyaka la Yeruhali, hi nahili lua i Yehu la Umana i Miri. Ka wàngga ndàba-duna-haka da makei da ma-danggangu lai nu. Nakabe - beliha da menjada da manjepa àmahu dàngu da nggalada da ma-danggangu kulundiha.

¹⁶Nda haàtu-a pa-pahia-na mangàndi ngga - nggàra palii ningu la talora Umana i Miri.

¹⁷Hàlaka nu hi na-papeka-nja da tau lai nu, “Tuna nu na pa-tulihu la huratu Matua: Napanii i Ala, ‘Na Umanggu uma ngia pa-hamayangu nduma mbutana na banjaru-ya, wànanya tau ngeru,’ wàna. Tàka nyimi dimi tu bia-minyai hibu tau rambangu!” wànanja.

¹⁸Da ratu pangora dàngu da ngguru anggama darongu-maya na kareuku nuna. Hi dahimbu-nya wihuna ka pameti-ya i Yehu. Tàka da-mangàdatu-nya, nadu ba na-hangàtaru ndàbanya tau na pa-pekangu-na.

¹⁹Ba na-malinguka luhu-danyaka welingu la paraingu nuna i Yehu dàngu da papanau-na.

²⁰Hadangu harii, ba dalii la pingi kapilitu, daita-ya ba mbàda meti pa-ràpangu-naka la amuna.

²¹Ka namu-nanyaka paraïna i Peturu na manjadi kangeu. Hi napanii-nya i Yehu, “Tàngaru-ya Umbu Ngguru! Mbàda meti-naka na pingi kapilitu na pahara-mu kangeu!” wànanya.

²²Nanapa-ya i Yehu, “Pawaiwa lai Ala.

²³Langatàka-manggunya ka kupeka-nggai, ‘Tabunggahu-wa kau kawulangu wikimu la tehiku!’ jàka wàminya yiana na palindi jiangu-ma ba pawunda-nggainya nuna; mili àmbi ndua ndandi àru nyuna dàngu kai waimaya ba nanjadi langatàka-ma nu na papanii-mi.

²⁴Jia ba tuna ingàda-maya yiana: Jàka nggàra pakarai-mi bai hamayangu, iwai-maya ba mbàda wua-nanggai-nyaka paraïna i Ala nu na pakarai-mi, napa ingala-manya duna.

²⁵Tàka jàka hamayangu-minya ba dàngu ningu padua kudu etimi hanggangu la haàtu, jàma pàkunya bàdi na njalana, ka najàma-mbunja da njalami paraïna Amami la awangu. [

²⁶Jàka ndai jàmanya na njala tau hawiangu, nda najàma-mbunja da njalami paraïna Amami la awangu,]” wànanja.

²⁷Hili beli-danyaka la Yeruhali. Ba talànga longga maina i Yehu la Umana i Miri, mai-danyaka lai Nyuna da ratu pangora, da ngguru anggama dàngu da liku uru tau Yahundi.

²⁸Da paàra-nya, “Nggàraya na latana bau wunda ndàbaha nuda? Nggamu mawua-nggau kawaha tungu nu?” wàdanya.

²⁹Nanapa-ya i Yehu, “Paàrangu-manggunyai duku Nyungga; hema pàkuya bàdi na paàrangu-nggu Nyungga ka kumangu papanii-nggainya, jàka nggamu kawaha-nanya na pawunda wànggunja nuda.

³⁰Nggàra kawaha-ya duna na pawàna i Yuhani ba na-parunungu tau? Kawaha welingu lai Alaya jàka ndia ma-welingu la tauya?” wànanja.

³¹Ka pa-hamangu-danyaka da ratu pangora da liku uru tau Yahundi, “ ‘Kawaha welingu lai Alaya,’ jàka wàndanya. ‘Ka nggikina hi ndai waiya i Yuhani?’ wàna-dundai, wàda.

³²Tàka, ‘Ma-welingu la tauya,’ ” nda jia wàda ànga-apa. Maa ba da-mangàdatu-nya na tau dangudu, haàtu wunangu-ya i Yuhani ba wàna ndàbadui na tau.

³³Ba tuna, ka hema-danyaka, “Nda mapi-anya duma,” wàdanya. Napanii i Yehu, “Jàka tuna nu nda kubihu-mbui duku Nyungga papanii-nggainya jàka nggamu kawaha-nanya na pawunda wànggunja nuda mbuu ndàbada,” wànanja.