Read Kambera MÀRUKU 12 Bible Online

MÀRUKU 12 - Kambera bible

MÀRUKU 12

¹Tunaka nu panii wàngu-nanyaka lii pangerangu i Yehu, ba napanii dànja da ratu pangora, da ngguru anggama dàngu da liku uru tau Yahundi. Napanii i Yehu, “Ninya na haàtu na matungu woka angguru, hi natuu winggiru-nya okana. Hàlaka nu hi na-toraku-nya karaba ngia pa-parina wua angguru hi namangu pawulu-nya lewatu ngia padaiya. Ba tunaka nu pajau-nanyaka nu na woka angguru la tau da matanggu daiya, hi namangu pa-pàlaku la tana hau paraingu.

²Ba jia-yaka na rapa pàpu wua angguru, paràhangu-nanyaka haàtu tau papalewa la matanggu daiya na woka, palua pakeiha da ndumana.

³Tàka nu da madai woka nggepi yàpa-ma-adanya nu na tau papalewa hi dapalu-ya, hi damangu pa-pabeli juanya.

⁴Ka paràhangu-nanyaka hili haàtui tau papalewa nu na mangu wokangu. Tàka nu da madai woka hili yàmaku-madanya na papalewa ba dapalu weli katiku-ya, hi da-wànggaya ba dàngu tola pairaku-danya.

⁵Hili paràhangu-mananyai haàtui tau papalewa-na nu na mangu wokangu. Tàka nggepi pameti-madanya paraï da madai woka. Dadangu-mapa da pa-paràha pandutu - pandutu-na nu na mangu wokangu. Tàka tu mànu-mada nu da madai woka ba da-palua-nja lima nu da tau papalewa hawiangu: ningu papalu-da dàngu ningumai pa-pameti-da.

⁶Hili nggamu yaipa nàhu na ràka papalewa-na nu na mangu wokangu? Mbulungu haàtu-ma-anaka, nu jiaya na ana wikina na pambuha-na. Hupu hàla luana, paràha-du-nanyaka nu na anana la madai woka. ‘Jiangu-ma duna datembi-ya na ananggu,’ wàna la etina.

⁷Ka panii madua-danyaka dàngga anguda nu da madai woka, ‘Yiana jia-yaka ngeru na ma-kangeha-nya. Màla ka ta-pameti-ya ka nyutaya na kangeha-na!’ wàda.

⁸Ka yàpa madua-danyaka hi da-pameti-ya, hi dawàru-nya la hambeli woka,” wànanja.

⁹Nu, paàrangu-nanyaka i Yehu, “Màla nggikina wànaka napa na mangu wokangu? Jiangu-maka duna nalua pa-pameti-ha nu da madai woka, hi napajau-nya nu na woka la tau hawiangu ka da tanggu daiya.

¹⁰Jiangu-maka ba mbàda diha-minya yiana na maninya la Huratu Matua, ‘Na watu panda ihili-da da tukangu uma nanjadi-yaka watu tunggulu.

¹¹Yiana pawunda-na i Miriya; ai kanjupu manandangu-aya!’ ba wàna,” wànanja.

¹²Tàka da ngora tau Yahundi da marongu-ya nuna na lii pangerangu, himbu-danyaka wihuna payàpa i Yehu, maa ba pi-madanya ba jiaha nyuda dapalaa-na i Yehu la lii pangerangu nuna. Tàka da-mangàdatu-nya na tau dangu. Ba tuna, laku wàru-danyaka i Yehu.

¹³Ninja ba nda pirada da tau Parihi dàngu ba nda pirada da tau lai Harondi da pa-paràhangu la pa-kahili wànya paàrangu i Yehu.

¹⁴Damai lai Yehu hi dapanii, “Umbu Ngguru, mapinggau ba haàtu tau tànjikau dàngu ba ndau kawela nianya na pa-tandangu tau hawiangu. Bau papekangu upa-habola pahàmu-manya dumu na ngarangia patàka wàna lai Ala na tau pinu tana, ba ndau pindia dumu kaba mata tau. Ba tuna, màla làti kau panii-nggama, pa-namatu-nya na kalaratu anggama-nda, pekuna ihu la pa-mbayaru hilu katiku la Hanganji Bokulu jàka ndia? Lupangu-maka bàdi nu ta-mbayaru-ha jàka ndia?” wàdanya.

¹⁵Ba pi-mananya paraïna i Yehu na màhi-danya, ka hema-nahaka, “Ka nggikina dimi hii kahili-ka? Ngàndingga nàmu hau àmahu bara ka ku-tàngaru-ya,” wànanja.

¹⁶Ka wua-danyaka hau àmahu bara, hi na-paàra-nja, “Nggamu hada-nanya dàngu nggamu tamu-nanya yiana?” wànanja. “Na Hanganji Bokulu,” wàda ba dahema.

¹⁷“Ka nii, jàka tu-maduna nu,” wàna i Yehu, “wuangu-wa la Hanganji Bokulu na mangu-mana duna, dàngu lai Ala na mangu-manai duna,” wànanja. Ngàtaru wàda biaka ba darongu-ya na hemana.

¹⁸Ninja ba nda pirada da tau la kaloka tau Handuki da mamai lai Yehu. (Nyuda jiaha welingu la kaloka ma-pamàndu-nya ba nda ningua hadangu beli welingu la meti, na mawàda.)

¹⁹“Umbu Ngguru,” wàdanya i Yehu, “I Muha na-tulihu-ndanya na uku: ‘Jàka nameti na haàtu mini tàka hi nda ningui anana, na-kanoma-maya bàdi anguna paluhu na papaha pameti wàruna, ka natunya wàlana na mameti,’ wàna.

²⁰Ninja da tau mapihu ma-paangu paluhu. Na ma-maaya hupu nalalei, hàla nameti dàngu nda ningu anana.

²¹Tunaka nu na padua wàda na-kanoma-ya na papaha pameti wàruna, tàka nameti dàngu nda ningumai anana. Na padua haàtu wàda hama-manai,

²²lundu na papihu wàda. La malamiri dehi meti-mananyai duna na kawini.

²³Màla nu, la rehi hadangu belida da mameti, nggamuka duna ma-papaha-nya nuna na kawini? Nadu ba mbàda kanoma ndàba-mada-nyaka ba tau mapihu-ha!” wàdanya.

²⁴Nanapa-ya i Yehu, “Kambura halawàla-maminya nyimi. Ba ndai jàngapu-duya na Huratu Matua hamanai na mbihana i Ala.

²⁵Nadu jàka da-hadangu belika da tau mameti nda dahili lalei mangoma-apa, tàka na lurida hama tuna papalewa la awangu-haka duda.

²⁶Tàka jàka jia-yaka na ngera pahada belinja da mameti, ka ndedi-mapa dimi idihaya la huratu-na i Muha rukuna na wuku rii madàka na maroka? Ninya na pa-tulihu la ndalaru nuda ba napanii i Ala lai Muha, ‘Nyungga yia jiaka Alana i Ambarahàmu, Alana i Ihàku dàngu Alana i Yakupu,’ ba wàna.

²⁷Nu i Ala, nda Ala tau meti-aya, tàka Ala tau luriya duna. Kambura halawàla-maminya nyimi yia!” hi wànanja.

²⁸Ka tàka-nanyaka na haàtu ngguru anggama hi narongu-ha pahema ngaruda i Yehu dàngu da tau la kaloka tau Handuki. Narongu na ngguru anggama ba nahàmu nahema-naha paraïna i Yehu nuda da tau. Ka paàra-nanyaka i Yehu, “Nggàra ukuya duna na ma-papingi halawàla welingu la mbuu ndàbada?” wàna.

²⁹Nanapa-ya i Yehu, “Na uku na ma wungangu na matuna yia: ‘Ronguwa dumu ha banjaru Ihirailu! I Miri na Alanda, Miri kamehangu-ya.[19]

³⁰Màtawa kau pambulu-nya na etimu, na hamangu-mu na pangàdangu-mu, na àtalu-mu la pambuha-nya i Miri na Alamu,’ na ma wàna.

³¹Na uku na padua wàna, ‘Màtawa kau mbuhanya na angumu patau, hama tuna bau mbuhangu wikimu,’ na mawàna. Nda ningu-apa uku hawiangu marihi papingi welingu la uku nuda ba dàmbuda,” wàna.

³²Tàka na ngguru anggama hi napanii-nya i Yehu, “Jia hàmu-maya nu Umbu Ngguru. Ma-deningu-maya na paniimu: I Miri, Ala kamehangu-maya, dàngu nda ningua anguna pa-Ala.

³³Dàngu ba lupangu-ma na tau na-pambulu-nya etina, pangàdangu-na, àtalu-na la pambuha-nya i Ala. Dàngu ba lupangu-mbu nambuha-nya na anguna patau hama tuna ba na-mbuhangu wikina. Nu, narihi-pa pahàmu welingu la kameti maraku patunu dàngu da kameti maraku hawiangu da pawotu lai Ala,” wàna.

³⁴Nu ba narongu-ya paraïna i Yehu ba kanjupu hàmuya na hemana na ngguru anggama, ka panii-nanyaka, “Mareni njadi-ama-muka ana banjaru-na i Ala,” hi wànanya. Ba tunaka nu nda ana haàtu-mbupa matoru mbeni pahili paàra-nya i Yehu.

³⁵Ba talànga pa-pekangu-na la Umana i Miri i Yehu paàrangu-nanyaka, “Nggikina duna da ngguru anggama wàlana i Ndautu-ya na Hanganji Ma-pamànangu hi wàda?

³⁶Tàka duna làti napanii wiki i Ndautu — ruku juju-nanya Ngahuna i Ala — , ‘I Miri napanii-nya na Miringgu: mandapu-wa la kawana-nggu[20] lupa ku-panyàku-ha da muhumu lai Nyumu,’ ba wàna.

³⁷Ba tuna ‘Miri’ jàka wànanya na Hanganji Ma-pamànangu paraïna i Ndautu, nggiki hamana duna hi wàlana i Ndautu-yai?” wànanja. Nu da tau dangu da maninja la Umana i Miri da-mbuhangu parongu-ya ba na pa-pekangu i Yehu.

³⁸Napanii-nja, “Pananjarungu-ma la ngguru - ngguru anggama. Da-mbuhangu pambawa wàngu kalembi malai dàngu darinju-nya ka natembi-ha tau la parànggangu.

³⁹Dapindi ngia pa-mandapu ma-bunjuku la uma ngia pa-lumungu dàngu la ngia pambabu.

⁴⁰Dalapi-ha da kawini meti lei hi dawàhi-ha da umada. Dàngu da-pandàbingu akatu-da wàngu hamaya pa-malaingu-da. Nambotu-ma napa na-hukungu-da!” wànanja.

⁴¹Ba na-mandapu i Yehu la tubana na pàti hunggu maraku la Umana i Miri, na-tàngaru-ya na tau na mapuhi àmahu-da nu la pàti. Nadangu na mawulu na mapuhi padangu àmahu.

⁴²Hi nàmunyai duna na-haàtu kawini meti lei na mamila. Hi napuhi dàmbu ndui rara, nu da ndui kamàraku da mahupu ngia wawa wilida.

⁴³Ka paau-nanjaka da papanau-na i Yehu hi napanii-nja, “Tàngaru-ya ni: Na papuhi-na nina na kawini meti lei na mamila la pàti, narihi dangupa welingu la papuhi-da mbuu ndàbada da tau hawiangu.

⁴⁴Nadu ba da-wuangu nyuda hawiangu, marihi-ha duda welingu la pa-bànjalu-da. Tàka nina na kawini meti lei, jiapa ka namila kadu na-wuangu ndàba-maha duna da tuda da maninja lai nyuna ma-a — hi jiama-aha làti da ana paluri wàna,” wànanja.