Read Kambera MÀRUKU 13 Bible Online

MÀRUKU 13 - Kambera bible

MÀRUKU 13

¹Ba naluhu i Yehu welingu la Umana i Miri, ka panii-nanyaka na haàtu papanau-na, “Ai, Umbu Ngguru, tàngaru-ha nida da uma, hamangui da watuna kanjupu manandangu-ha!” wànanya.

²Nanapa-ya i Yehu, “Uita-duha ni da uma da ma-bokulu, wàngguka? Nda ana haua watuda napa da uma nida da ma-padaingu pa-panunggulungu la pangia-da. Pa-nyungguru ndàba-maha,” wànanya.

³Tunaka nu lua-nanyaka la Tandula Haitungu i Yehu, hi na-mandapu[21] la tubana na Umana i Miri. Ka mai meha-danyaka i Peturu, i Yakombu, i Yuhani dàngu i Andaria papanii dànya i Yehu ba hapajia-aha.

⁴“Màla panii nggamanya làti Umbu, jàka pirangu nu na rapa njadina mbuu ndàbana? Dàngu jàka nggàraha da tandana, mareni-nanyaka na rehina ka wànda wàngu?” wàda.

⁵“Rimangu-ma!” wàna i Yehu, “Ka àmbu jia ningu bia ma-panyonga-kai, wàna.

⁶Nadangu napa na tau na mamai wànya na tamunggu na mapanii, ‘Jiaka Nyuna-maka yia!’ na mawàna; tàka hi nadangu na tau pa-panyonga-na.

⁷Jàkai rongu lii pa-kabungu dàngu na katururu-na na ma-pakabungu, àmbi mangàdatu-du. Maa ba lupangu datumbu-ma bàdi nuda, tàka ndedi jia-aya na rehi hupu njàpuna.

⁸Napa na hau banjaru nabera-ya na hau banjaru. Na hau nanggara na-kaluluku-nya na hau nanggara. Natungu na upungu dàngu na rimbangu la nggi - nggini. Nuda mbuu ndàbada pakiri-ana-nyapa, hama tuna na katiu na paera-na na haàtu kawini ma-habola.

⁹Ipananjarungu-ma bàdi ba payàpa-kai napa, hi ruruhu-kai la hangga ma-timbangu. Napa papalu-kai la uma bunggu - uma bungguru. Napa dangàndi-kai la hanggada da ma-pareta dàngu da hanganji, mulana ba papanau-nggunggai. Nuna nu rehi manggawangu-mayaka ndumami nyimi la pa-hakahii-ngga Nyungga lai nyuda.

¹⁰Lupangu pakada-manyapa bàdi na Lii Mànangu welingu lai Ala, la mbuu ndàbana na banjaru-ka.

¹¹Tàka jàka dayàpa-kai hi dangàndi-kai la ma-patandangu ngera àmbu da-kadukungu da etimi, nggikina wànda-aka bàdi taï àmbi jia wàmika. Jàka jiaya-yaka na rehi kareuku, panii biaya duna na pa-paniingu-kai nu la rehina. Nadu na kareuku patiki-mi nda kareuku wiki-aminya, tàka ma-welingu la Ngahuna i Ala-maya.

¹²Ningu napa ma-kalekangu anguna paluhu ka pameti-ya ba wàna. Tuna numbu napa na manjadi la haàtu ama dàngu anana. Napa da anada da-ndubaku-ha da inada da amada, hi da-pakata-nja ka pameti-ha ba wàda.

¹³Napa mbuu ndàbana na tau na-karaünggai eti mulana ba papanau-nggunggai. Tàka na ma-torungu lundu hupu njàpuna, jiaya duna na pa-pamara,” wànanja.

¹⁴“Napai itaya ‘na Akatu Ma-patàlaru’ ba na-ndolaku la pangia manda hida lai nyuna. (Na madiha-ya yiana, màtawa ka naeti wànya jàka nggàraya na ihina.) La rehi nu na tau na maninya la Yundia napalai-ma bàdi la ma-palindingu.

¹⁵Na tau na maninya la bangga àmbu natama-dupa papiti ana ngga - nggàra la uma.

¹⁶Na tau na maninya la woka àmbu nabeli-dupa papiti pakina.

¹⁷Kanjupu pa-haringgingu hamangu-ha da lodu nuda la kawini mbotu ihi dàngu la kawini ma-pahuhu ana rara!

¹⁸Hamayangu-ma ka àmbu da-hanggànangu la wula urangu nuda.

¹⁹Nu la lo - lodu ma-pa-haringgingu hamangu, natungu na mayila mandedi ningu hamangu, piti weli mulangu ba na-padikangu tana i Ala lundu nàhu, dàngu nda hili ningu-mbupa ngeru matungu nu.

²⁰Jàka nda na-padànggitu-ya nu na rehi i Ala, nda jia ningua haàtu mamara. Tàka lumuna na banjaru-na, na-padànggitu-maya duna na rehi i Ala.

²¹Jàka ningu tau mapanii-nggai la rehi nu, ‘Tàngaru, yiahu-ya ni na Hanganji Ma-pamànangu’ jàka ndia, ‘Tàngaru, lai nuya ni’ jàka wànanggai — àmbi waiduya na tau nuna.

²²Nadu ba nàmunja napa da kabuka ma-pamànangu dàngu da kabuka wunangu. Napa da-patumbu manda ningu hamangu dàngu pa-hangàtarungu pa-panyonga wàngu tau, jàka pekuna ka panyonga-mbuya na banjaru-na i Ala.

²³Ba tuna rimangu-ma! Mbàda panii haha-nggunggai-njaka nuda mbuu ndàbada ba ndedi danjadi,” wànanja.

²⁴“Jàka na-làpahu-ka na mayila, kapàtangu-nanyaka na mata lodu, dàngu nda nahambila-apa na wulangu.

²⁵Damunju da kandunu welingu la awangu, dàngu na pa-haürungu hàla na pa-kapingatu wàna na kuru awangu-ka.

²⁶Hi itaya la rehi nu na Ana Tau ba namai nàmu la karumangu, wàngu kodi màka dàngu mangunju-na.

²⁷Napa na-paràha-nja da papalewa-na ka da-pauhi-nya na tau papindi-na, welingu la pahunga la patama, weli dia weli lurungu, welingu la hupu tana lundu la kiri awangu,” wànanja.

²⁸“Pitiwa ngerangu la pingi kapilitu. Jàka damuru dàngu da-kanguraku da laina dàngu ba da-kahulaku da kalunga-na, pi-madua-minyaka ba mareni wandu-nanyaka.

²⁹Tuna numbudu nyimi, jàkai ita-haka njadida nuda, pi-madua-minyaka ba mareni halawàla-mana-nyaka na rehina.[22]

³⁰Kai pinya! Napa danjadi ndàba nuda ba ndedi dameti ndàba da tau da maluri la rehi nàhu.

³¹Na awangu dàngu na tana napa na-molungu, tàka na pulu-ngguka na-padaingu lundu nu - nu,” wànanja.

³²“Na nyuna ba tuna, nda jia haàtu-a mapinya jàka pirangu nu na loduna jàka ndia pirangu nu na njàmuna. Da papalewa la awangu nda dapi-mbunya, na Anakai, ndiambu, mbulungu i Ama-a duna na mapinya.

³³Ba tuna, lupangu imangga rimangu dàngu ibutingu mànu-maka bàdi, nadu ba ndai pianya jàka pirangu nu na rehina.

³⁴Na ngerana hama tuna na tau na ma-dunjakungu umana hi na-pàlaku la tana mamarau. Na-paràha-nja da tau papalewa-na ka da-paloku-ya na umana, dàngu na maràngga wua-manja ngerada. Dai pa-hàmungu-ma, wànanya na madai pindu.

³⁵Jia ba tuna, lupangu-maka bàdi imangga rimangu, ba ndai pianya na rapa belina na mangu umangu — jàka malingu, jàka mandalora, jàka marai romu, jàka ndia la honga lodu.

³⁶Jàka era tàka harabàndangu-na, ka àmbu natoma-nggai katuda-mi.

³⁷Na papanii-nggunggai nàhu nyimi, panii-mbunggunya la mbuu ndàbana na tauka: mangga rimangu-ma ba wànggu!” wànanja.