Read Kambera MÀRUKU 14 Bible Online

MÀRUKU 14 - Kambera bible

MÀRUKU 14

¹Dàmbu lodu kinaka na rapa remi Lodu Paha dàngu na Mbabu Roti Nda Patai Wolungu. Tàka da ratu pangora dàngu da ngguru anggama himbu pàku-danya wihuna la payàpa kangunduhu-nya i Yehu, dàngu ka pameti-ya ba wàda.

²“Na nyuna àmbu la lodu remidu na yàpa-ndanya, ka àmbu natumbu na kanyaüru,” wàda.

³Ba la Mbetani-ya i Yehu, la umana i Himungu na mahidu manula pa-mayitangu àmangu, namai na haàtu kawini lai Nyuna. Nu na kawini nangàndi hau boti pualamu mina mbii kati mambotu wilina, papandoi welingu la amu mbii kati. Ba talànga mandapu-na pangangu i Yehu, bera-nanyaka na boti paraïna nu na kawini, hi naburi-ya na mina mbii kati la katiku-na i Yehu.

⁴Tàka ninjai duda hawiangu lai nu da mapulu hoputu hi dapanii dàngga anguda, “Nggara lingu-naka ba padima-nya ni na mbii kati?

⁵Jàka dangganya làti narihi welingu la tailu ngahu àmahu bara[23] wilina, tàka da àmahu wilina ka wuanja da tau mamila,” wàda. Ka mbeni-danyaka nu na kawini.

⁶Nanapa-ya i Yehu, “Màta bianya! Ka nggikina hii paratahu-nya? Ba tunangga mahàmu duku na papanii wànya.

⁷Jàka jiaha da tau mamila ni mànu-manja duda lai nyimi. Jàkai mbuhangu pandula-ha, peku mànu biami duna la pandula-ha. Tàka Nyungga yia nda ni mànu-angga lai nyimi.

⁸Yiana na kawini tuda ràka pamàka-mana duna na pawunda-na. Tuu haha-nangga mbii kati ndumana ba taningga la ndedi rehina.

⁹Langatàka ka kupeka-nggai, la nggi - nggini la pa-nggubulu awangu, la ngia pa-bobaru-ya na Lii Mànangu welingu lai Ala, jiangu-ma paniiya na pawunda-na na kawini yiana, hi pangàda wànya,” wànanja.

¹⁰Tàka i Yundahu Ihikariu, na haàtu la hongada da ha-kambulu madua papanau-na i Yehu, lua toma-nahaka da ratu pangora, ka ku-kaleka-nya i Yehu lai nyuda ba wàna.

¹¹Dira hàmuha da etida da ratu pangora ba darongu-yaka nuna hi daràndi-ya la pawua-nya àmahu i Yundahu. Ka himbu-nanyaka rehi ma-manggawangu i Yundahu na rapa kaleka-nanya i Yehu.

¹²La lodu kawunga-na na Mbabu Roti Nda Patai Wolungu — na rapa rupuya na mbimbi Paha — paàrangu-danyaka lai Yehu da papanau-na, “La nggini wàmu Umbu na ngia pa-paloku-manggaunya na pangangu Paha?” wàdanya.

¹³Ka paràha-nanjaka paraïna i Yehu da tau madua la hongada nyuda, “Iluawa la paraingu, napa na-hàmburu-kai lai nu na haàtu mini na mangàndi kadihi maningu waingu, kai tundunya

¹⁴la uma ngia patama-na kai paàra-nya na mangu umangu, ‘Nggii-yaka na kurungu ngia pangangu-ma pangangu Paha dàngu da papanau-nggu, wànanggau i Umbu Ngguru’, wàminya.

¹⁵Napa na-paita-nggainya na hau kuru dita ma-bokulu. Nuna na kurungu pambàda àhalu-mayaka, dàngu nggànapu ihi manaka. Paloku ndàba-yawa lai nu ndumanda nyuta,” wànanja.

¹⁶Ka laku-danyaka la paraingu nu da tau madua papanau-na i Yehu. Ba datàka-ka la paraingu jia ndàba-maya hama tuna na papanii-na i Yehu na patoma-da, hi da-paloku-ya lai nu na pangangu Paha.

¹⁷Ba na-rudungu-ka, mai-nanyaka i Yehu dàngu da ha-kambulu madua papanau-na.

¹⁸Ba da-mandapu-ka pangangu, panii-nanyaka i Yehu, “Màla ipatingingu: napa na-kaleka-ngga na haàtu la hongami nyimi, na angu ngangunggu nàhu,” wànanja.

¹⁹Ba darongu-yaka nu, dira hawina-ha da papanau-na i Yehu. Hi da-nimbihu wikida pa-paàra-nya i Yehu, “Nda nyunggaki nu hiana palaamu Umbu?” maràngga wàdanya.

²⁰Nanapa-ya i Yehu, “Jiaya na haàtu la hongami nyimi ma-hakambulu madua-mi, na angu ngangunggu la hau kawinga.

²¹Jiangu ba nameti-ma duna na Ana Tau hama tuna na pa-tulihu la Huratu Matua. Naa-aka nyuna, hanggàmaru nda najaru-na na tau ma-kaleka-nya na Ana Tau! Nahàmu-mapa duna jàka nda pa-paana-nya làti na tau nuna!” wànanja.

²²Nu ba talànga nganguda, piti-nanyaka na roti i Yehu hi na-pamalangu-nya i Ala. Hàlaka nu, hi nakawi - wita wànya limana hi nawua-nja da papanau-na ba dàngu paniina, “Keiya kai ngaanya, yiana jiaya na ihinggu,” wànanja.

²³Ba hàlaka nu, piti-nanyaka hau kaba wai angguru. Na-hamaya pamalangu-nya i Ala, hi napakei-nya nu na kaba wai la papanau-na. Hi daunu-nya nu na wai angguru nyuda mbuu ndàbada.

²⁴Ba tunaka nu, panii-nanyaka i Yehu, “Yiana jiaya na wai rianggu na ma-pamàndu-nya na panjanji-na i Ala, na wai ria na pabungu ndumana i madangu.

²⁵Langatàka ka kupeka-nggai: Nda kuhili unu-anyapa yiana na wai angguru, lundu toma la rehi unungu-nggu angguru bidi dàngu nyimi, la Tana Bidina na Amanggu,” wànanja.

²⁶Tunaka nu ludungu-danyaka hau ludu wotungu. Hàla, hi dalaku la Tandula Haitungu.

²⁷Tunaka nu panii-nanjaka paraïna i Yehu, “Napa nyimi ipalai wàrungga mbuu ndàbami. Maa ba nimanya la Huratu Matua, ‘Napa i Ala na-pameti-ya na mini pawangu, hi napai - ihangu na kabàba mbimbina,’ ba wàna.

²⁸Na nyuna ba pahada beli-nggaka, kulaku mangilu-nggai napa la Nggalilia,” wànanja.

²⁹Nanapa-ya i Peturu, “Nyungga duku ndia-a, jiapa ka da-dunjaku ndàbanggau kadu Umbu, nyungga duku nda hidama,” wànanya.

³⁰Tàka i Yehu, “Nàhu kau pinya wànggunggau ba ndedi na-panduangu pa-hakuku na manu, pandilungu-munyaka pa-pahini-ngga,” wànanya.

³¹Hema handàkangu-ma-ananya i Peturu, “Jiapa ka lupa kumeti karia-nggau-kai nda hidama duku Umbu, la papanii ba nda kutanda-kau!” wànanya. Jia-mayai duda na paniida da pa-panaungu hawiangu.

³²Nu ka tàka-danyaka la hau pangia ma-tamungu Nggehimani, hi napanii i Yehu la papanau-na, “Imandapu-kawa yiahu, ba lua-nggunyapa pa-hamayangu,” wànanja.

³³Tàka hi nawànda-ha i Peturu, i Yakombu dàngu i Yuhani palua-karia-nya Nyuna. Ka hawina-nanyaka ba dira nda nguduya na etina.

³⁴Hi napanii-nja, “Dira hawina-ya na etinggu,” wàna, “kutika pameti-ka-amangu. Indàdiku-kawa lai yiahu kai pawàla!” wànanja.

³⁵Ba nalaku-kika hakudu marubuku-nanyaka la tana i Yehu hi na-hamayangu. Nu la hamayangu-na nakarai-ya jàka pekuna làti ka àmbu naera-nya nu na rehi mayila.

³⁶“Ama! Dou Ama!” wàna. “Nda nggàra-a manda peku dumu lai Nyumu. Ba tuna payila-ngganya làti yiana na mayila. Na nyuna àmbu namatu niduya na pa-mbuhanggu Nyungga, mbulungu na pambuha-mu Nyumua dumu Ama,” wàna.

³⁷Hàlaka nu beli-nanyaka i Yehu, hi natàka-nja ba katuda-da padua-ka da papanau-na. Hi napanii dànya i Peturu, “Katuda bia munya Himungu? Ndau màkama nu papawàla ana hau njàmu?” wànanya.

³⁸Hàla hi napanii-nja paraïna i Yehu. “Pawàla-ma dàngu kai hamayangu ka àmbu naera-nggai ma-pakamangu. Na-mbuhangu-maka duna pawunda ma-deningu na ngahumi, tàka ndai dàdungu-a ba nda namàka-a na huri tolu,” wànanja.

³⁹Hili laku-nanyaka i Yehu pa-hamayangu ba hili jia-mayai na hamayangu-na kawai.

⁴⁰Hàlaka nu, nahili belinja da papanau-na. Hi natàka-nja ba katuda-mada-nyapa, maa ba tàtiku hawàla-madanya. Hi nda dapinya jàka nggikina wàda bàdi nahema-danya i Yehu.

⁴¹Ba nabeli-nja i Yehu la pandilungu wàna napanii dànja, “Katuda-mami-nyapa dàngu hangahu-mami-nyapa? Jiaka-ka duna! Toma-nanyaka na rehina la pa-pakata-nya na Ana Tau la limada da tau njala.

⁴²Hadangu-wa, màla-ndawa ka talaku. Tàngaru! nàmu-nyaka na ma-kaleka-ngga!” wànanja.

⁴³Nu ba talànga paniina i Yehu, tàka-nanyaka i Yundahu na haàtu la honga ha-kambulu madua papanau-na. Dadangu-ma da karia-na da mangàndi hapanda dàngu kadipu ai. Papalewa-da da ratu pangora, da ngguru anggama dàngu da liku uru Yahundi-ha.

⁴⁴Mbàda pambulu-nanjaka tanda paraïna ma-kaleka, “Na pa-puduku-nggu taï, jia-mayaka kai yàpa niya, dàngu kai mangga pahàmu-manya bai karia-nya,” mbàda wàna-njaka.

⁴⁵Ba natàka-ka i Yundahu, pangalangu-mananya lai Yehu, “Ai, Umbu Ngguru!” wàna, hàla hi na-puduku-ya i Yehu.

⁴⁶Ka yàpa-danyaka i Yehu paraï da karia-na i Yundahu hi dahondu-ya.

⁴⁷Tàka na haàtu na maninya lai nu na-binjiru hapanda-na hi na-làndahu-nya na atana na ratu bokulu, nahàpu-maya na kahilu-na.

⁴⁸Hi napanii i Yehu, “Ka tau kajàliku-makaka Nyungga yia, hii wàngu pangàndi-ma-aka hapanda dàngu kadipu ai la payàpa-ka?

⁴⁹Nimbihu lodu ba ku-papekangu la Umana i Miri, la hanggami, tàka ndai yàpa-aka. Na nyuna ràka-manaka ba tuna nu, ka na-hàrangu na pa-tulihu la Huratu Matua,” wànanja.

⁵⁰Mbuu ndàbada da papanau-na dapalai wàrunya i Yehu.

⁵¹Ninya na haàtu bidi mini, na matundu-nya i Yehu. Hawàla-ma-ana na tera pa-maringgi juana pa-pandàdangu wàna wikina. Ka yàpaya ba wàna-nyaka tau,

⁵²nggepi pahàla-ma-ananya nu na tera pa-maringgi-na, hi napalai kalulu.

⁵³Nu laku ngàndi-danyaka i Yehu la umana na ratu bokulu. Pauhi ndàba-danya lai nu da ratu pangora, da liku uru Yahundi, dàngu da ngguru anggama.

⁵⁴I Peturu duna natundu maraunya i Yehu lundu natama-ma la talora umana na ratu bokulu. Lai nu na-mandapu padiru epi anguda da tau madai.

⁵⁵Da ratu pangora dàngu mbutana na ma-mandapu la Timbangu Anggama, himbu-madanya wihuna la pa-ngalangu mbuti pa-panjala wànya i Yehu ka peku ratanya hukungu meti. Tàka nda ana haumbu mbuti pangala-da.

⁵⁶Dangu hakahii papaau-da la pa-wuangu taranga kambàliku hangganya i Yehu, tàka da maràngga pahili da taranga-da.

⁵⁷Ka hadangu-danyaka ba nda pirada da hakahii da ma-wuangu taranga kambàliku rukuna i Yehu,

⁵⁸“Marongu-ya na paniina na tau yiana, ‘Napa ku-nyungguru-ya yiana na Uma Ala na ruku lima tau, tàka palàngangu tailu mbua lodu, kuhili pahadangu haui, na nda ruku lima tau,’ wàna,” wàda.

⁵⁹Tàka na taranga-da nuda da tau da maràngga pahili dua wikida.

⁶⁰Ka hadangu-nanyaka na ratu bokulu la hanggada mbuu ndàbada hi na-paàranya i Yehu, “Ndau hema-aha na pakàla wàdanggau?” wànanya.

⁶¹Tàka pàdi wàna bia i Yehu nda ana hema-mana. Hi nahili paàrangui na ratu bokulu, “Jiakau-dumu na Hanganji Ma-pamànangu, Anana i Ala Mahupu Matua?” wànanya.

⁶²Nanapa-ya i Yehu, “Jia-maduka,” wàna. “Napa nyimi mbuu ndàbami mi-itaya na Ana Tau ba na-mandapu la kawana[24] -na i Ala Hupu Mambiha dàngu ba namai la karumangu welingu la awangu,” wànanja.

⁶³Ka bàriku madua-nahaka da pakina[25] na ratu bokulu hi napanii, “Nda nggàra taihi wàngu-apa hakahii!

⁶⁴Mbàda rongu wiki-mami-nyaka na papeka-na ba nalapi-ya i Ala. Màla nggikina wàmika nàhu bai rataya?” wànanja. Mbuu ndàbada nyuda, darata-ya ba nanjala i Yehu, dàngu ba ràka-mana ka ratanya hukungu meti.

⁶⁵Ba tuna hawiangu da tau lai nu da-pangànji-ya i Yehu, da pandàbi-nya na matana hi da-nàhaku-ya, “Màla kamangu-nu kau katutu-ya jàka nggamu ma-nàhaku-kau?” wàdanya. Màlamai duda da tau madai ba datàba-ya i Yehu.

⁶⁶Ba la talora-yapa i Peturu, lua-nanyaka lai nu na haàtu tau kawini ma-paloku la uma ratu bokulu.

⁶⁷Ba naita-yaka diruna epi i Peturu, kinju kanàndaru-nanyaka na matana i Peturu hi napanii, “Hi anguna i Yehu tau Naharitu-mbudukau nyumu, wàngguka?” wànanya.

⁶⁸Ka pahiningu-nanyaka i Peturu, “Nda kupi-anya dàngu nda ku-jàngapu-aya na pawuku-mu,” wànanya. Ka luhu-nanyaka i Peturu la pindu talora-na na ratu bokulu. [La rehi nu hakuku-nanyaka na manu.]

⁶⁹Ka hili ita-mananyai i Peturu paraïna nu na kawini ma-paloku, hi napanii-nja da tau lai nu, “Yiana anguda nyuda-maya dimi!” wànanja.

⁷⁰Nu, ka hili pahiningu-mananyai Peturu. Ndedi nggi tuna mandaina, dahili panii da tau lai nu, “Langatàka angu-madanggau nyumu, ba tau Nggalilia-madukau,” hili wàdanya i Peturu.

⁷¹Nu ka-harangu-madua-nanyaka i Peturu, “Nda kutanda-aya duku nu na tau papanii-mi,” wàna.

⁷²La rehi nuna hakuku-nanyaka na manu la panduangu wàna. Nu ka namu-nanyaka paraïna i Peturu na pambàda paniina i Yehu. “Ndedi na-panduangu pa-hakuku na manu, pandilungu-munyaka pa-pahini-ngga,” ba mbàda wànanya. Ka ngi - ngiba-madua-naka pahii i Peturu.