Read Kambera MÀRUKU 15 Bible Online

MÀRUKU 15 - Kambera bible

MÀRUKU 15

¹La mba - mbaru hada rudungu, ri - ringa-daka ba da-pahamangu nggubulu-na na Timbangu Anggama papohu-nja da ratu pangora, da liku uru Yahundi dàngu da ngguru anggama. Dahondu-ya i Yehu, hi dalaku ngàndiya, hi da-pakata-nya lai Pilatu.

²Na-paàra-nya i Yehu paraïna i Pilatu, “Deningu-na dumu ba Hanganji tau Yahundi-kau?” wànanya. Nanapa-ya i Yehu, “Hama tuna ba wàmu, jia-makaka,” wànanya.

³Dadangu-ma da pa-panjala wàdanya i Yehu na pa-patàka-da da ratu pangora.

⁴Hi nahili paàrangu i Pilatu lai Yehu, “Ndau bihua pahema? Tàngaru dira dangu-maha da pa-panjala wàdanggau!” wànanya.

⁵Tàka nda ana hili hema-manapa i Yehu, hi kiri hangàtaru-na i Pilatu.

⁶Kàli wàngu-mana la nimbihu Mbabu Paha ba na-pahàla haàtu tau pa-tahangu i Pilatu, pa-namatu-nya na papindi tau dangu.

⁷Nu la uma kapàtangu ninya na haàtu na ma-tamungu Mbaramba la hongada da ma-patula ngganggangu, da mambàda pameti tau ba jiaya na pariu raüngu.

⁸Ka pauhi-nanyaka na tau dangu hi dakarai-ya i Pilatu, ka na-pahàla haàtu tau pa-tahangu hama tuna na pakàli wàngu.

⁹Na-paàra-nja paraïna i Pilatu, “Màla, imbuhangu-nu ka ku-pahàla-nggainya na Hanganji tau Yahundi?” wànanja.

¹⁰Maa ba pi-mananya paraïna i Pilatu ba ruku malara-danya eti i Yehu hi da-pakata-nya lai nyuna paraï da ratu pangora.

¹¹Tàka da ratu pangora da rundaya na tau dangu la pakarai-ya i Pilatu, ka jiaya i Mbaramba na pa-pahàla-nanja.

¹²Ka hili panii-nanyaka na tau dangu i Pilatu, “Jàka tuna nu, nggiki-nggunyaka bàdi na Hanganji tau Yahundi ba wàminya?” wànanja.

¹³Ka wara-danyaka, “Harika-nya,” wàda.

¹⁴Nanapa-ya i Pilatu, “Ka nggàra-mayaka na akatu-na?” wàna na paàra-nanja. Tàka parukangu-madanya pawara parihi pa-kodungu, “Harika-nya!” wàda.

¹⁵Kukiku-nyaka bàdi na pambuha-da, ka nahàmu wàngu na etida ba wànaka la eti i Pilatu, ka pahàla-nanyaka i Mbaramba. Tunaka nu paràhangu-nanyaka tau la pa-ràmbahu-ya i Yehu, hi namangu papuli-nya ka harika-nya.

¹⁶Tàka da panjuri hi dalaku ngàndiya i Yehu la talora uma timbangu la uma nggumbunuru. Hi paau ndàbanya pa-pauhi na pamba panjuri.

¹⁷Hi dapahau-nya kalembi malai mbaü atu, i Yehu, dauna-nya tubuku rii madàka, hi da-patàngapu-nya la katiku-na i Yehu.

¹⁸Hàlaka nu hi datembi-ya, “Oha-amuka dumu ou Hanganji tau Yahundi,” wàdanya.

¹⁹Dapalu wànya tokungu na katiku-na i Yehu hi da-pangànji-ya, hi damangu pa-patika la hanggana pa-marubuku-nya.

²⁰Ba dahàla-ka pa-pajulu wànya kalàba-danyaka na kalembi malai mbaü atu hi dapahau belinya da paki-mana duna. Tunaka nu hi dangàndi-ya la hambeli ka harika-nya.

²¹Nàhu la ngarangia dahàni-ya na haàtu la paduku-ya na ai harika-na i Yehu. Nuna na tau talànga belina welingu la ndeha, laku-nanya la paraingu (Na tamuna Himungu-ya — tau Kireni-ya — Amana i Alihandaru dàngu i Rupuhu.)

²²Dangàndi-ya i Yehu la hau pangia ma-tamungu Nggolunggota jia-duyaka la “Kaba Kotu” ba wàna, jàka haleli-ya.

²³Lai nu dawua-nya wai angguru pa-pakorungu muru, tàka nda nabihu-a i Yehu paunu-nya.

²⁴Tunaka nu harika-danyaka, hi dapabe - berinja da pakina ba dawàngu patunya undi ka pinya na ndumada haàtu - haàtu.

²⁵Njàmu hiwaya la mbaru ba da-harika-nya.

²⁶La ai harika-na mbara dita patuya na pa-tulihu nu na pa-panjala wànya, “Na Hanganji tau Yahundi,” wàna.

²⁷Anguna i Yehu da-harika-mbunja da madua da tau rambangu; haàtu la kawana-na, haàtu la kalaina. [

²⁸Ba tuna nu hàrangu duna-nyaka na pa-tulihu la Huratu Matua, “Padiha pa-pohungu la tau akatu-ya,” ba wàna.]

²⁹Da tau da mali lai nu dapi - pimbilungu katiku-da[26] hi da-paaka-nya i Yehu, “Ha dumu, ma-mbuhangu pa-nyungguru Uma Ala, ka ku-pahada belinya la tailu mbua lodu ba wàmu ànga.

³⁰Kamangu nu papuru weli la ai harikangu kau pamara wikimu!” wàdanya.

³¹Jia-mayai duda da ratu pangora dàngu da ngguru anggama ba dayiki-ya i Yehu. Dapanii dàngga anguda, “Na tau hawiangu na-pamara biaya, tàka nda namàka-ai pa-pamara wikina.

³²Jàka Hanganji tau Ihirailu-duya, Jàka Hanganji Ma-pamànangu-duya, màtawa nàhu ka napuru pàku welingu la ai harikangu, ka maita-ya ka peku waimanya!” wàda. Da tau, angu harikangu-na da-paaka-mbunya i Yehu.

³³La tidu lodu, tailu mbua njàmu mandaina ba na-kapàtangu ndàba na tana lai nu.

³⁴Tàka la njàmu tailu la maringu lodu, nawara pa-kodungu i Yehu, “Eloi, Eloi lama sabakhtani?” wàna, jia-duyaka, “Dou Alanggu, Dou Alanggu nggikina hiu dunjaku-ngga?” wàna jàka haleli-ya.

³⁵Hawiangu da maninja lai nu darongu-ya nu na warana hi dapanii, “Patingi-nya, paau-nanya i Elia” wàda.

³⁶Ka manyamalu-nanyaka na haàtu la hongada hi nahàbu lumutu la wai angguru mayilu. Hàlaka nu hi natuya la hupu ai, hi na-pajola-nya la ngaruna i Yehu, ba dàngu paniina, “Màta ka ta-patia wànya jàka namaidu i Elia pa-papuru-nya welingu la ai harikangu,” wàna.

³⁷Ka wara-nanyaka i Yehu, nu mbota wàngu madua-nanyaka.

³⁸Na tera padira daa la Umana i Miri na-kahira padua weli ditangu lundu hu wawa-maya.

³⁹Na ngora tanatara na ma-ndolaku la tuba ai harikangu, naita-ya jàka nggiki hama metina[27] i Yehu. Hi napanii, “Ai, deningu-mana ba Ana Alaya na tau yiana,” wàna.

⁴⁰Nimbunja lai nu da kawini da maita marauya mbuu ndàbana nuna na matumbu. La hongada nyuda nu jiaha i Halomi, i Maria Mandalena, i Maria inada i Yakombu kudu dàngu i Yohi.

⁴¹Jiaha nyuda-maka da makiku-nya dàngu da mainga-ya i Yehu ba la Nggalilia-yapa. Dàngu dadangu-mapa da kawini hawiangu lai nu da mamai karia-nya i Yehu la Yeruhali.

⁴²Rudungu-ama-nanyaka ba natàka i Yuhupu na tau welingu la Arimatia. Anggota Timbangu Anggama paràka patembi-maya nyuna. Nedi-mananyai duna na rehi pareta-na i Ala ba Hanganji-ya. Na lodu nu lodu Hawanjiru-ya (nu na lodu pandutu-na na lodu Hangahu). Jia-duyaka hi natoru mbenima palua la hanggana i Pilatu pakarai-ya na metina i Yehu.

⁴³

⁴⁴Nawàngu pa-hangàtaru biaka i Pilatu ba narongu-ya ba mbàda meti-naka i Yehu. Ba tuna paràhangu-nanyaka tau palua papaau-nya na ngora pamba tanatara ka paàra-nya jàka mbàda mandai-naka pameti i Yehu.

⁴⁵Ba narongu-yaka la ngaruna nu na ngora tanatara paraïna i Pilatu, pamàja-nanyaka na metina i Yehu ka napiti-ya paraïna i Yuhupu.

⁴⁶Ka kei-nanyaka yubuhu tera linangu malunyaru i Yuhupu, tàka ba na-papuru-nyaka na metina i Yehu kayubuhu wàna-nyaka nu na tera. Hàlaka hi na-bànjalu-ya la reti pa-toraku la tandula watu. Tunaka nu hi nakilu-nya watu bokulu ndàbina na ngaru reti.

⁴⁷Nu nu, hamata-madanya paraï da i Maria Mandalena dàngu i Maria inana i Yohi, jàka nggiya na ngia pa-bànjalu-danya na metina i Yehu.