Read Kambera MÀRUKU 2 Bible Online

MÀRUKU 2 - Kambera bible

MÀRUKU 2

¹Ndedi pira mbua lodu ma-palàngangu beli-nanyaka la Kapinaumu i Yehu. Ka kada-nanyaka tau ba ninya Nyuna la uma.

²Hi nadangu na tau na mamai. Da-langgungguru lai nu hi lupa nda ningu-mbupa pa-ngiangu. Na-pukangu-mbu la pindu na tau. Tàka i Yehu hi napeka-nja Lii Mànangu welingu lai Ala.

³Nu ba talànga paniina ninja da tau mapatu da maduku ma-kaliparu ka lua ngàndiya lai Yehu.

⁴Na nyuna ba lalu pa-dàhiku-na na tau, nda peku toma-ada la lihina i Yehu. Tuna nuduka, hi da-weharu toku ndidungu la tubana i Yehu. Hàla, hi da-duluru mangu topunya na ma-kaliparu la hanggana i Yehu.

⁵Ba naita-yaka ba kanjupu pawaiha, ka panii dàna-nyaka na ma-kaliparu, “Dou na ananggu, da njalamu pa-jàmangu-haka,” wàna.

⁶Da ngguru anggama da ma-mandapu lai nu, dapanii la etida,

⁷“Ai, natoru mbeni pàku papanii tuna nu na tau yiana! Paaka-nanya i Ala. Nda ningu làti mapeku la pa-jàmangu njala, mbulungu i Ala-a duna,” wàda.

⁸La rehi nunama ba napiinya na kanandingu-da paraïna i Yehu. Hi napanii, “Ka nggikina dimi hii paàrangu timi nu la etimi?

⁹Nggàraya dimi na marihi muda papanii-ya, ‘Da njalamu pa-jàmangu-haka,’ wànggu-nyaka bàdi jàka ndia, ‘Hadangu, dandanya na topumu kau laku,’ wànggunya? wàna.

¹⁰Na nyuna nàhu kutunggai tanda kai pi wànya ba ningu kawaha-na la pinu tana na Ana Tau la pa-jàmangu njala,” wàna. Hàla hi napanii dànya na ma-kaliparu,

¹¹“Hadangu-wa pitiya na topumu kau beli!” wànanya.

¹²Ka hadangu piti madua-nanyaka na topuna hi naluhu ba dàngu ita hàla-nanya tau. Ngàtaru wàda biaka da tau hi dawotu-nya i Ala. “Ndedima ta-itangu ma-hamangu,” wàda.

¹³Nahili mai la hingi Tàma Nggalilia i Yehu. Nadangu na tau na mamai lai Nyuna, hi na-papeka-nja.

¹⁴Ba nàhunya lai nu i Yehu, naita-ya na haàtu matanggu pa-hurungu hilu katiku na ma-tamungu Lewi, anana i Àlapiu, ba mandapu-na padua la katuru hilu katiku, “Kikungga” hi wànanya. Ka hadangu-nanyaka i Lewi hi nakiku-nya i Yehu.

¹⁵Nu ba talànga nganguna i Yehu la umana i Lewi,[6] dadangu da tau matanggu pa-hurungu hilu katiku dàngu da tau nda hàmu ba wàdanja tau Yahundi mamai pangaa dànja i Yehu dàngu da makiku-nya. Maa ba dadangu-du nyuda makiku-nya i Yehu.

¹⁶Ninja da ngguru anggama welingu la kaloka Parihi da maita-ya i Yehu ba nangaa dànja da tau matanggu pa-hurungu hilu katiku dàngu nu da tau nda hàmu ba wàdanja. Ka paàra-danjaka da makiku-nya i Yehu, “Ka nggikina na nggurumi hi nangaa daa bianja nida da tau matanggu pa-hurungu hilu katiku dàngu da tau nda hàmu?” wàda.

¹⁷I Yehu narongu-ya na paàrangu-da hi nahema, “Nda nggàra naihi wàngua ndotiru na tau ma-hayandalu; mbulungu na tau mahidu-a duna. Hi kumai nda jia-aya ka paaunya na makaka wikina ba tau hàmu-yaka, tàka mainggunya papaau-nya na tau manda ràkana ba wànanja tau,” wàna.

¹⁸Handàkangu puaha-danya da tau makiku-nya i Yuhani Ma-parunungu dàngu da ma-kikungu tau Parihi. Hala, ningu tau mamai pa-paàra-nya i Yehu, “Ka nggikina hi da-puaha bia da tau makiku-nya i Yuhani Ma-parunungu dàngu da tau ma-kikungu tau Parihi, tàka da makiku-nggau Nyumu hi ndia bia?” wàda.

¹⁹Nahema i Yehu, “La mbabu li lalei li mangoma ka nda dangangu-a da ariyaa? Jàka ninyapa na bidi papa mini la hongada, jiangu-ma ba dangangu.

²⁰Na nyuna ninya napa na rehi pitiya na bidi papa mini welingu lai nyuda. Hina duka la rehi nu hi nda dangangu.

²¹Nda ningua tau ma-kadapu wànya tera bidi na kalembi ndai. Nadu ba na-yudutu napa na tera kadapu-na hi nahira-ya na kalembi hi kiri rihi danguna na kahira-na.

²²Tuna numbu nda ningua tau maburi wai angguru bidi la taneku manulangu ndai. Nadu na wai angguru bidi nuna na-pawiti-nya napa na pambera wàna nu na taneku manulangu ndai. Ka padima ndàba-daka nu na wai angguru dàngu na taneku manulangu. Na wai angguru bidi buriya la taneku manulangu mabidi-mai bàdi!” wànanja.

²³La hau lodu Hangahu, ba nalii ningu la hau woka uhu nggàndumu i Yehu, laku muti-danyaka wili uhu nggàndumu da makiku-nya.

²⁴Ka panii-danyaka da tau Parihi lai Yehu, “Ka nggikina da makiku-nggau hi dapangga-ya na uku anggama-nda, ba datuya na manda uku la lodu Hangahu?” wàdanya i Yehu.

²⁵Nahema i Yehu, “Ka ndedi-mapa dimi idihaya na pawunda-na i Ndautu, ba jia-yapa i Àpuyataru na maratu bokulu? Ba namanjuu i Ndautu dàngu da tauna, ba jiaya nanjaka-nanja pangangu, natama la umana i Miri, hi nanganja da roti pambàda mangejingu lai Ala. Hi nawua-mbunja da tauna. Tàka pa-namatu-nya na uku anggama-nda, mbulungu da ratua duda làti da manganja da roti nuda,” wànanja.

²⁷Hi nahili panii i Yehu, “Nduma tau-maya duna hi kiri kawuku-ya na lodu Hangahu; nda nduma lodu Hangahu-aya na tau.

²⁸Jia ba tuna, ningu kawaha-na na Ana Tau, dàngu na kawaha-mbuya na lodu Hangahu,” wànanja.