Read Kambera MÀRUKU 3 Bible Online

MÀRUKU 3 - Kambera bible

MÀRUKU 3

¹Nahili beli i Yehu la uma bungguru. Lai nu ninya na haàtu na mameti hapapa limana.

²Ninja lai nu da tau da ma-pandapu-nya na njalana i Yehu, ka kàlaya ba wàda. Tuna nuduka hi dabuti mànunya padua, jàka jia pamàlaru biana tau la lodu Hangahu.

³I Yehu napanii dànya na tau na mameti hapapa limana, “Mai kau ndolaku yiahu la ngaba,” wànanya.

⁴Hi na-paàra-nja da tau da maninja lai nu, “Nggikina wàna na anggama-nda? Nggàraka pawunda-nda la lodu Hangahu? Tawunda mahàmu jàka ndia manjala? La pa-pamara tau jàka ndia la pa-pameti tau?” wànanja. Pàdi wàda bia.

⁵Ba dàngu mbenina i Yehu na-pawiliku-nya mata na tau ma-winggiru-nya, pa-kariangu hawina-mbuna, rukuna ba lalu katiku watuha. Hi napanii dànya nuna na tau, “Pajola-ya na limamu,” wànanya. Ka pajola-nanyaka, hi na-màlaru na limana.

⁶Ka yilangu-danyaka da tau Parihi welingu la uma bungguru nuna, hi daluu pahama dànja da tau da maangu-nya i Harondi, ka pameti-ya i Yehu ba wàda.

⁷Ka pa-yilangu-nanyaka i Yehu dàngu da makiku-nya hi dalaku la tàma Nggalilia. Dira danguya na tau welingu la Nggalilia malua pakiku-nya i Yehu. Nadangu-mbu na tau na mamai welingu la Yundia,

⁸welingu la Yeruhali, welingu la tana Indumia, dàngu welingu la tana la pahunga loduna na Luku Yorundangu, dàngu welingu la winggiru-da da paraingu la Tiruhu dàngu Hindungu. Damai ndàbama lai Yehu, maa ba darongu-duhaka da pawunda-na.

⁹Dira danguya na tau, hi lupa napanii i Yehu la tau makiku-nya ka da-payema-nya padua tena, hi jia dàhiku biana-ngga tau ba wàna.

¹⁰Kanjupu danguya na tau pa-pamàlaru-na, hi na-pa-ngguharungu ndàba na tau mahidu la palihi-nya Nyuna ka peku ràma-ndanya ba wàda.

¹¹Tàka jàka handàka ita - handàka ita-danya Nyuna paraï da tau pa-huruku wàndi akatu, ailulu marubuku-madanya la hanggana ba dàngu kaladaku-da, “Jiakau Nyumu-maka na Anana i Ala,” wàdanya.

¹²Na nyuna dira hiri-nanja da wàndi akatu paraïna i Yehu, ka àmbu jia paniida jàka nggamuya Nyuna.

¹³Tunaka nu hei-nanyaka i Yehu la hau tunduna, hi napaau-nja da tau da paora-na eti. Hi damai nuda da tau,

¹⁴ka pindi-nanyaka tau ha-kambulu madua welingu lai nyuda. Hi napanii-nja, “Kupindi-kai nyimi, ka hanii mànunggai la lihinggu wànggu, ka ku-palewa-kai pa-pakada-nya na Lii Mànangu welingu lai Ala,

¹⁵tàka napa ingalangu kawaha la pawàngga wàndi akatu,” wànanja.

¹⁶Yiada-ha da tamuda nuda da tau ha-kambulu madua: i Himungu (I Peturu ba wàna-mbunya),

¹⁷i Yakombu dàngu i Yuhani na anguna paluhu, nu da anana i Hambandiu (nyuda yiada na-patamu-nja Mbuanenggiru jia-duyaka “da ana kanduruku,” wàna-duka nu),

¹⁸i Andaria, i Pilipu, i Mbàratolumiu, i Matiu, i Tomahu, i Yakombu anana i Àlapiu, i Tandiu, i Himungu i Kahiri Tana,

¹⁹dàngu i Yundahu Ihikariu na ma-kaleka-nya i Yehu.

²⁰Tunaka nu beli-nanyaka la uma i Yehu. Tàka hili mai beli-mananyai pa-pauhi na tau dangu, hi lundu nda ana peku ndokuda pangangu i Yehu dàngu da papanau-na.

²¹Ningu tau mapanii, “Katoba-nanyaka” wàdanya. Ba darongu-yaka nuna paraï da kalembi-na, lua-danyaka ka pitiya ba wàda.

²²Dapanii da ngguru anggama da mamai welingu la Yeruhali, “Huruku-nanya paraïna i Mbeluhembulu duna! Jiaya na ngorada da wàndi akatu nuna-maka na mawua-nya kawaha la pawàngga wàndi akatu,” wàda.

²³Ka paau-nanyaka na tau dangu paraïna i Yehu, hi napeka-nja lii pangerangu ba nda pirada. “Nggiki hama peku-naka dimi na wàndi akatu la pawàngga wàndi akatu,” wànanja.

²⁴Na hau nanggara jàka na-pabàriku dua wikina, hi da pakawa - wàringu ba da-maràngga pa-muhungu, nda jia peku pa-dàdungu-ana nuna na nanggara.

²⁵Dàngu jàka nda ningu ka-haungu-na na ihi uma daa la hau kuru uma, tàka hi maràngga pa-muhungu bia-danya, na-taweharu-ma duna napa na kuru uma nuna.

²⁶Jàka ninya na-pakawàringu dàngu na pa-muhungu la pa-hanganji-na i Kambàliku, nda jia mandai-ana na pa-hanganji-na, jiangu-ma ba na-molungu.

²⁷Nda jia ningua haàtu tau mapeku patama-nya na umana na haàtu tau ma-kapàru la paramba-nja da banda da malanja-na, jàka nda nahondu mangilu pàkuya nu na tau kapàru. Hàlaka nu hina-duka hi peku ramba-nanja da banda da malanja-na.

²⁸Kai pinya! Jàka nawunda manjala na haàtu tau dàngu ka natiki-ya na pa-pawawa wànanya na tau hawiangu,[7] peku ngalangu-na jàmangu njala.

²⁹Na nyuna jàka na pawawa-ya na Ngahuna i Ala, nda na-ngalangu-a jàmangu njala. Nadu na njala nuna ba njala ma-palupangu-ya wàna. (

³⁰Hi kiri panii tuna nu i Yehu rukuna ba ningu tau mapanii huruku-nanya wàndi akatu i Yehu ba wàda-dunya.)

³¹Tunaka nu mai-nanyaka na inana i Yehu dàngu da anguna paluhu. Da-patiangu la hambeli hi da-paràhangu tau papaau-nya i Yehu.

³²La rehi nu nadangu na tau ma-mandapu winggiru-nya i Yehu. Dapanii-nya, “Ninya la hambeli na inamu dàngu da angumu paluhu, dàngu da ana winimu Umbu. Himbu-danggau,” wàdanya.

³³Nahema i Yehu, “Nggamuya dimi na inanggu? Nggamuha dimi da angunggu paluhu?” wàna.

³⁴Tunaka nu pa-wiliku-nanjaka mata da tau ma-mandapu winggiru-nya hi napanii, “Hi yiada-ha duku da inanggu dàngu da angunggu paluhu!

³⁵Na tau na mawunda-ya na pambuha-na i Ala, jiaya duku na angunggu paluhu, na ana wininggu, dàngu na inanggu,” wànanja.