Read Kambera MÀRUKU 4 Bible Online

MÀRUKU 4 - Kambera bible

MÀRUKU 4

¹Ka hili pa-pekangu-nanyaka tau i Yehu la hingi Tàma Nggalilia. Dira danguya na tau na ma-kambukuru-ya. Tuna nuduka hi na-mandapu ningu la hau tena la wai, tàka hi na-ndolaku la hingi tàma na tau dangu.

²Dadangu-ma na pa-papeka nanja paraïna i Yehu ba nawànja lii pangerangu. Tuna yia na papeka-nanja.

³“Ipatingingu! Ninya na haàtu mini raïngu na malua pa-hàbarungu wini.

⁴Nu ba na-hàbarungu, ningu wini ma-kanabu la ngarangia. Ka mai-danyaka da ma-hawurungu hi da-nàhiku pambuta-ya.

⁵Ningumbu ma-kanabu la ma-pawatungu la ma-manipa tanana. Ka rengga tumbu-danyaka nuda da wini ba nda natimbi-du na tanana.

⁶Tàka ba najangga-ka na lodu, malaï-danyaka da tumbuda tàka ba nda da-tanjiku hàmu da amuda ka meti ma-rokutu-danyaka.

⁷Ningumbu wini ma-kanabu la wuku rii madàka. Ka tumbu-danyaka da rii madàka hi da-kapidihu-ha da tumbu wini hi lupa nda dawua.

⁸Tàka ningumbu wini ma-kanabu la tana mboka. Ka tumbu-nanyaka na wini, hi na-bokulu hi nawua, ningu ma-patailu kambulungu, ningu ma-panomu kambulungu, dàngu ma-pahangahungu,” wànanja.

⁹Ba nahàla-ka papeka-ya na lii pangerangu nuna, napanii i Yehu, “Ningu madu kahilu-mi màtawa kai rongu,” wànanja.

¹⁰Ba didi-kiyaka i Yehu, mai-danyaka da tau da mambàda pamàndu-nya na pa-papeka wànanja, karia-da da ha-kambulu madua da papanau-na. Da karaiya ka na-kaloka-ya na ihina na lii pangerangu.

¹¹Ka panii-nanjaka nyuda paraïna i Yehu, “Nyimi dimi pawua juangu-kaika la papinya na pa-winingu jàka nggiki hamana ba na-pareta i Ala. Tàka da tau la hambeli, wàngu lii pangerangu bia ba papeka-nja,

¹²màtawa, ‘Napa da-nutakungu pa-patarakungu matada, tàka nda daera-a la papinya jàka nggàraya na manjadi, napa da-nutakungu pa-talelingu kahilu-da, tàka nda daera-a pa-jàngapu-ya la kanandingu-da, nu hi tuna nu ka àmbu daita dàngu ka àmbu da-jàngapu-ya la kanandingu-da dàngu ka àmbu da-hurungu lai Ala hi najàma-nja da njalada paraïna i Ala,’ ” wànanja.

¹³Tunaka nu hi napanii-nja paraïna i Yehu, “Jàka ndai jàngapu-ya na lii pangerangu kawai nggiki hama pi-minjaka da pangerangu hawiangu?

¹⁴Na ma-hàbarungu wini jiaya na tau na ma-pakada-nya na lii langu welingu lai Ala.

¹⁵Na wini na ma-kanabu la ngarangia, beri jia-duhaka da tau da marongu-ya na lii langu jàka nggiki hamana ba na-pareta i Ala. Ba darongu-kiyaka, mai-nanyaka i Kambàliku hi napiti-ya na pambàda hàbaru daa la etida.

¹⁶Na wini na ma-kanabu la ma-pawatungu beri jia-duhaka da tau da marongu-ya na lii langu, hi ailulu kataku mbaha eti-madanya.

¹⁷Na nyuna nda na-paamu-a na lii langu daa la etida, hi nda ana torungu-na. Ba da-pàdangu-kika mayila jàka ndia jàka na-pajàra-ha tau lumuna na lii langu, ailulu kandulingu-ma-adanya.

¹⁸Na wini na ma-kanabu la wuku rii madàka beri jia-duhaka da tau da marongu-ya na lii langu,

¹⁹tàka na nyuna da kaduku-nya na ngera lurida dàngu da-mbuhangu paluri borakungu. Na-itirungu-da hangia - hangia natama-nja da etida. Rukuna nuna pa-kapidihu-yaka na lii langu welingu lai Ala daa la etida, hi nda nawua.

²⁰Tàka na wini na ma-kanabu la tana kamboka, beri jia-duhaka da tau da marongu-ya na lii langu hi da-kataku-ya, dawua padangu, ningu ma-patailu kambulungu, ningu ma-panomu kambulungu, dàngu ningu ma-pahangahu wundangu ihina.”

²¹Ka hili panii-nanyaka i Yehu, “Màla ninguka nu tau ma-paketingu palita hi na-pangguru-nya mbàlu jàka ndia hi na-bànjalu-ya la lumbu nggala? Ka nda natuu-aya na palita la tandai palita?

²²Nda ningua ma-kawiningu na majia nda wuwa; dàngu nda ningua pa-kàpingu na majia nda luaya pa-habukaru.

²³Ba tuna, jàka ningu kahilu-mi, màtawa kai rongu,” wànanja.

²⁴Hi nahili panii i Yehu, “Tuu eti-maya jàka nggàraya ni na parongu-mi. Na hukutu na pa-hukutu wàminya na angumi jia-maya napa na pawàna i Ala ba na-hukutu kai nyimi — jiapa narihi dangu kipa.

²⁵Nadu na tau na mambàda ningungu, napa pahili wua padangu-mayaipa; tàka na manda ningungu, tuda na mani-inyapa lai nyuna napa pahili piti-mbuyaipa,” wànanja.

²⁶Nahili panua-nya na kareuku-na i Yehu, “Ba na-pareta i Ala ba Hanganji-ya beri hamana na tau ma-hàbarungu wini la wokana.

²⁷Na-katuda la rudungu; na-pawàla la lodu. Nu ba tuna tumbu pangalangu-madanya duda da wini hi lupa dajangga. Na nyuna jàka nggiki hama tumbuda nuda da wini hi lupa dajangga nda napi-anya paraïna nuna na tau.

²⁸Na tanama duna na ma-paluhu wikiya na ihina: na pa-mangilu-ya na kaleki-na, hi na-pandàki-nya na wilina, hi lupa natunya wuana.

²⁹Tàka jàka naihi-ka na uhu nggàndumu, kaü-duna-nyaka, maa ba rehi muti-mayaka,” wànanja.

³⁰“Nggàra-aka pa-pangera wàndanya ba na-pareta i Ala?” hili wàna ba na-paàrangu i Yehu. “Nggàra ngerangu-ka ihu pawànda ba ta-pakaloka-nya?

³¹Jàka na-pareta i Ala hama tuna na lii pangerangu yiana: Na hau karohu hawi[8] napiti-ya tau hi natuya la tana. Marihi màrahu halawàla-maya na karohu hawi welingu la mbuu ndàba winika la pinu tana.

³²Na nyuna jàka na bànda tumbuka, marihi halawàla-maya welingu la maninja la woka. Paraï pambewa dàngu marumbingu-da da kahanga-na, lupa damai pawulu hibuda da ma-hawurungu la laina da ma-pawukungu,” wànanja.

³³Tuna nudu ba na-papekangu tau i Yehu ba dadangu da lii pangerangu tungu nu pawàna, tuda ràka pa-jàngapu-da la kanandingu-da.

³⁴Lii pangerangu mànuma pawàna jàka na pa-pekangu tau i Yehu. Tàka jàka didi meha-ahaka dàngu da papanau-na pa-kaloka hàla-duna-njaka.

³⁵La malingu lodu nuna, napanii-nja da makiku-nya paraïna i Yehu, “Màla-ndawa ka tapala la hapapa tàma,” wànanja.

³⁶Ka hei-nanyaka i Yehu la tena, tàka da papanau-na puli-danyapa na tau dangu la hingi tàma, hàlaka hi damangu pahei la tena nunambu. Nimbunja da tena hawiangu lai nu. Tunaka nu ka pa-lirungu-danyaka Nyuna i Yehu dàngu da papanau-na.

³⁷Ndedi nggi mandai tungu-nanyaka na ngilu mbangatu. Nàhaku-nanyaka ngalingu na tena hi natama-nya wai lupa natika pambinu-ka-amangu.

³⁸Tàka i Yehu duna mahuru pàku-ananya la kamuri tena ba na-nulangu nulangu. Ka bengi-danyaka paraï da papanau-na. Dapanii, “Umbu Ngguru, ka ni hi ndau kawelangu bia? Tambulu-ndanyaka ni,” wàdanya.

³⁹Ka hadangu-madua-nanyaka i Yehu, hi na-kayàmbaku-nya na ngilu, tàka hi napanii dànya na tàma, “Kandii kahàna-wa,” wànanya. Ka wadaru-madua-nanyaka na ngilu, dàngu dira kahàna-ya na tàma.

⁴⁰Hi napanii dànja da papanau-na, “Nggikina dimi hi imangàdatu? Nggikina hi ndai waika Nyungga?” wànanja.

⁴¹Ka mangàdatu wàngu-danyaka hi dapanii dàngga anguda, “Nggamu-mayaka ihi yia na tau yiana, hi lupa na-karadaku-nya ngalingu dàngu ngilu,” wàda.