Read Kambera MÀRUKU 6 Bible Online

MÀRUKU 6 - Kambera bible

MÀRUKU 6

¹Welingu lai nu, beli-nanyaka la kotaku wikina i Yehu dàngu da papanau-na.

²La lodu Hangahu pa-pekangu-nanyaka tau la uma bungguru. Nadangu na tau lai nu. Ba darongu-yaka na pa-pekangu-na i Yehu, dira hangàtaru-ha, hi dapanii, “Nggi nangala ninja ihu ni mbuu ndàbada? Nggàra manggàna-mayaka ihu na maninya lai Nyuna? Ka nggiki biana ihu hi peku wunda biana pa-hangàtarungu?

³Ka nda jiaya ni na tukangu, na anana i Maria na anguda paluhu i Yakombu i Yohi, i Yundahu dàngu i Himungu? Tàka da ana winina lai yiahu-mbuha da-ndàdiku ningu,” wàda. Tuna nuduka hi da-tulaku-ya.

⁴Hi napanii-nja paraïna i Yehu, “Na haàtu wunangu natembi-maya tau la nggi - nggini, hinggilu-na la kotaku wikina dàngu la kalembi-na dàngu la uma wikina,” wànanja.

⁵Nda peku ndoku-ana i Yehu patuu tanda pa-hangàtarungu lai nu, hinggilu-na na pamàlaru-na tau mahidu da manda pira-ada ba nawàngu pa-padambaku-nja limana.

⁶Nawàngu pa-hangàtaru-nja ba nda dapawai. Tunaka nu laku-nanyaka i Yehu la ko - kotaku la winggiru-na lai nu hi na-papekangu tau.

⁷Napaau-nja da ma-hakambulu madua-da da papanau-na, hi tau madua - tau madua-naha ba na-paràha-nja dàngu nawua-nja kawaha la pawàngga wàndi akatu.

⁸Ka panau-nanjaka, “Àmbu nggàradu pangàndi-mi nàhu bai laku, mbulungu tokungu-a. Àmbu ngàndi bàlangu jàka ndia mboha hunggu, jàka ndia àmahu-kai.

⁹Tungu halapa na nyuna àmbu ngàndi kadua mbàlangu kalembi,” wànanja.

¹⁰Napanii-mbunja, “Jàkai tama la hau uma, ndàdiku-ma lai nu lundu rehi luhumi welingu la paraingu nuna.

¹¹Na nyuna jàkai tàka la hau pangia, tàka hi nda dabihu da tau lai nu payema-kai dàngu pa-patingi-nggai, iyilangu bia welingu lai nu. Dàngu kàmbahu-maya na kumburu tana la wihimi ka hau tandaya la pa-panamu wànja!” wànanja.

¹²Ka laku-danyaka nu da tau ha-kambulu madua da papanau-na i Yehu. Da-pakada-nya na lii langu ba lupangu-ma bàdi na-panjilungu na tau welingu la njalana.

¹³Dadangu da wàndi akatu da pawàngga-da da papanau-na i Yehu, daruhi-nja mina haitungu da tau mahidu, hi da-pamàlaru-ha.

¹⁴Na rukuda nuda mbuu ndàbada da matumbu narongu-mbuka i Hanganji Harondi,[10] maa ba kada ndàba-ma-nanyaka tau la nggi - nggini na tamuna i Yehu. Ninya hawiangu na mapanii, “Mbàda luri beli-naka i Yuhani Ma-parunungu! Tuna nuduka hi ningu kawaha-na la patuha nuda da pa-hangàtarungu, wàda,” wàda.

¹⁵Tàka da tau hawiangu, “Jiaya i Elia duna,” wàda. Ningumbu mapanii, “Wunangu-ya duna, hama tuna na haàtu wunangu anguda da wunangu-ka welingu la handàka-na,” wàda.

¹⁶Ba narongu-yaka nuna i Harondi, “Nda hili nggamu-aya, jia-mayaka i Yuhani Ma-parunungu na pambàda katiku-nggu àmangu. Nàhu luri beli-nanyaka,” wàna.

¹⁷Ba ndedipa nuna i Harondi na palewa tau paàpa-ya i Yuhani hi patama-nya la uma kapàtangu. Hi tuna nu na pawunda-na i Harondi, kirina i Harondia papaha-na i Pilipu na anguna paluhu. Nadu ba na-kanoma-duyaka i Harondia paraïna i Harondi.

¹⁸Tàka na rukuna nuna nakàli tendanya i Harondi paraïna i Yuhani, “Nda uku-aya bau kanoma-ya na papaha-na na angumu paluhu!” kàli wànanya.

¹⁹Tuna nuduka hi kiri paumbi-nanya i Yuhani paraïna i Harondia ka pameti-ya ba wàna, tàka nda peku pameti-ananya i Yuhani ba na-pabeta mànu-dunya paraïna i Harondi.

²⁰Mbàda palewa-naka tau i Harondi ka mangga pahàmu-nya i Yuhani la uma kapàtangu ba na-mangàdatu dunya i Yuhani. Napinya ba haàtu tau tànji papalewa-na i Alaya. Dàngu na-mbuhangu-mai parongu-ya jàka napanii i Yuhani, jiapa ka dira hondaru-yakai rukuna nuna.

²¹Hupu hàla luana hunggu-nanyaka rehi mapeku i Harondia la lodu dedina i Harondi. La rehi nu i Harondi nangaa pambabu dànja da tau bokulu-na da liku uru tanatara lupa da tau pangora la Nggalilia.

²²Ka renja-nanyaka na anana kawini i Harondia[11] nu la mbabu, hi na-panggaüru-ya na etina i Harondi lupa da angu mbabuna. Ka panii-nanyaka la anakeda kawini i Harondi, “Karai bia jàka nggàra pambuha-mu ka kuwua-nggau,” wànanya.

²³Ka harangu-nanyaka i Harondi ba na-panjanjingu la anakeda kawini, “Nggàra bia pakarai-mu jiangu-ma duku kuwua-nggaunya, jiapa ka nda jiaya kadu na ha-kabika pareta-nggu,” wànanya.

²⁴Ka lua-nanyaka na anakeda pa-paàra-nya na inana, “Nggàraka bàdi pakarai-nggu ina?” wànanya. Nahema na inana, “Karaiya na katiku-na i Yuhani Ma-parununungu,” wàna.

²⁵Ka lu beli-madua-nanyaka lai Harondi nu na anakeda kawini hi napanii, “Wua mema-mangganya bàdi nàhu na katiku-na i Yuhani Ma-parunungu la hau kaba julangu,” wànanya.

²⁶Dira hawina-ya i Harondi ba narongu-ya nuna. Tàka nda peku hinggilu-anapa ba mbàda harangu-dunaka la hanggada da ariyaa-na.

²⁷Ka ailulu paràhangu-madua-nanyaka haàtu welingu la ma-karaha-ya, palua papiti-ya na katiku-na i Yuhani Ma-parunungu. Ka lua-nanyaka la uma kapàtangu nu na panjuri, hi na-katiku-ya i Yuhani Ma-parunungu.

²⁸Tunaka nu ngàndi-nanyaka na katiku-na la kaba julangu hi nawua-nya na anakeda kawini. Tàka na anakeda kawini hi nawua-nya na inana.

²⁹Ba darongu-yaka nuna paraï da papanau-na i Yuhani, lua-danyaka papiti-ya na kayumbu-na i Yuhani, hi datani-nya.

³⁰Tunaka nu beli-danyaka da pa-pahurungu papalewa-na i Yehu hi da-pamàtungu la lihina. Da patàka-nya mbuu ndàbana na pawunda-da dàngu na pa-pekangu-da tau.

³¹Dira danguya na tau na malua dàngu na mabeli, hi lupa nda peku ndokuda pangangu i Yehu dàngu da makiku-nya. Tuna nuduka, “Màla-ndawa ka talaku ningu la ma-hinggilu ka didi meha-ata ka peku ana hangahu-kimi,” hi kiri wànanja da makiku-nya.

³²Ka hei-danyaka la tena hi dalaku la ma-hinggilu.

³³Na nyuna nadangu na tau maita-ha dàngu dapinja ba jiaha nyuda. Hi dali ningu la mara ba dalu bàlatungu lai nàhu welingu la hau parai - hau paraingu hi da-mangilu-nya i Yehu dàngu da makiku-nya.

³⁴Ba napuru-yaka welingu la tena i Yehu, naita-ya na tau dangu. Dira mila-nanya eti, ba beri hama tuna mbimbi manda ninguma-pawangu bia-haka. Ka pakiringu-nanyaka pa-papeka-nja hangia - hangia.

³⁵Ba na-malingu-ka panii-danyaka Nyuna paraï da makiku-nya, “Rudungu-ama-naka, tàka hi na-malinggitu-mbu lai yiahu.

³⁶Paràha-nyawa làti pabeli na tau, Umbu, ka peku keida pangangu la nde - ndeha dàngu la ko - kotaku la winggiru-nda” wàda.

³⁷Na nyuna nahema i Yehu, “Nyimi biawa naa hi kai wuanja pangangu,” wànanja. “Ai inai, ka malua-ka bàdi pakei roti ma-bilangu dua ngahu àmahu bara[12] kawua-nja pangangu?” wàdanya i Yehu paraï da papanauna.

³⁸Na napaya i Yehu, “Kamangu kai tàngaru-ha hiana da roti jàka pira mbuada,” wànanja. Ba dalua-ka pa-tàngaru-ha, “Lima mbuada da roti dàngu ningumbu iyangu dua ngiu,” wàdanya.

³⁹Ka paràha ndàba-nanyaka na tau paraïna i Yehu ka da-mandapu pakangu - nguhurungu la rumba muru.

⁴⁰Nu ka àhalu-nanyaka wikina na tau hi na-mandapu pakangu - nguhurungu. Ningu ma-hangahu-na ningu malima kambulu-na hau kanguhuru.

⁴¹Tunaka nu piti-nahaka i Yehu nu da roti da malima mbuada dàngu nu da iyangu da madua ngiuda, hi na-tangara la awangu hi na-pamalangu-nya i Ala. Hàlaka nu hi nakawi - witaha da roti wàngu limana hi napakei-nja da papanau-na ka dapabe - berinya na tau dangu. Hamanai da dua ngiu iyangu, na paberi-mbunja lai nyuda mbuu ndàbada.

⁴²Ka ngangu-danyaka lundu mbihuda.

⁴³Hàlaka nu pauhi-danjaka da pangangu da marihi paraï da makiku-nya i Yehu — ha-kambulu dàmbu mbola mbinuda mbuu ndàbada.

⁴⁴Rakangu 5.000-ya na mini da manganja da roti.

⁴⁵Hàlaka nu lu paràha-nanjaka da makiku-nya paraïna i Yehu ka dahei la tena ka dapala mangilu padua la hapapa tàma la Mbetuhaida. Tàka Nyuna duna puli-nanyapa pabeli na tau dangu.

⁴⁶Ba taliu-naka na tau dangu kandekalu-nanyaka i Yehu la tunduna palua pa-hamayangu.

⁴⁷Ba na-rudungu-ka toma-nanyaka la padua tàma na tenada da papanau-na i Yehu, tàka i Yehu duna la mara-yapa.

⁴⁸Naita-ha paraïna i Yehu ba dira jàraha pabuhi, nadu ba ngilu pa-ndubakungu maya. Jia ba tuna, ba ràkangu marai romu-yaka lua toma-nahaka ba nawàngu palaku la pinu wai. Hi nalaku pangalangu hi hama tuna laku làpahu-nanja.[13]

⁴⁹Ba daita-yaka lakuna la pinu wai, patau tehiku-ya wàda ba dakaka-ya,

⁵⁰hi lupa la - ladada paraï pa-mangàdatu. Maa ba ita ndàba-madanya dàngu ba katàtaku halawàla-madanya. Ka ailulu panii dana-njaka paraïna i Yehu, “Kamàndalu naa! Jiaka Nyungga ni. Àmbi mangàdatu-du!” wànanja.

⁵¹Ka hei toma-nahaka la tena, tàka hi na-wadaru na ngilu. Dira hangàtaru-ha da papanau-na i Yehu.

⁵²Na pa-hangàtarungu rukuda da lima mbua roti ndedi mbupa dadeni-nya. Na mbotuma nyuda la pajàngapu-ya la kanandingu-da.

⁵³Ba datàka-ka la hapapa tàma, hiwi-danyaka la Nggeniharitu.

⁵⁴Ba dapuru-ka welingu la tena, tanda-nanyaka tau ba jiaya i Yehu na mapuru.

⁵⁵Ka ri - ringga-daka ba danjada-nya nggubulu-na na tana lai nu, hi dangàndi mangu topunja lai Yehu da tau mahidu. Ba darongu-yaka ba ninya i Yehu la hau pangia lua ngàndi-dahaka lai nu da tau mahidu.

⁵⁶Jiapa ka nda nggiya natàka ningu i Yehu, — ka la kotaku-ya, ka la paraingu-ya jàka ndia ka la ndehaya-kai — mai mànu-mananya na tau lai nu hi da-banjalu-ha da tau mahidu-da la talora. Hàlaka hi dira pamanda-danya i Yehu ka na-pahia-nja da tau mahidu pa-jonggaru-ya na kalembi malaina, ka jiapa mili na hupu-ana. Mbutana na tau na ma-jonggaru-ya na-màlaru-ma.