Read Kambera MÀRUKU 7 Bible Online

MÀRUKU 7 - Kambera bible

MÀRUKU 7

¹Ka mai-danyaka lai Yehu ba hajuru-da da tau Parihi dàngu ba nda pirada da ngguru anggama welingu la Yeruhali.

²Daita-ha hawiangu da papanau-na i Yehu ba dangangu dàngu nda ili limada pa-namatu-nya na pawàngu ba wàna na anggama, nu ba nda dabaha mangilu pàku limada kikunya na kalaratu anggama.

³Da tau Parihi dàngu mbuu ndàbada da tau Yahundi da-pamàndu pahàmu-manya na huri boku la mangilu-da. Nda jia ngangu-ada, jàka ndedi dabaha limada hama tuna na pawàngu-ma duna.

⁴Jàka nggàraha da pakei la pahangu nda jia ngaa-adanja, jàka ndedi pabaha-ha.[14] Da - daa-madapa hawiangu da huri lawiti welingu la boku la mangilu-da na pakata undu-mada, hama tuna na huri baha kaba wai, maku dàngu kanaingu ma-welingu la wudu.[15]

⁵Tuna nuduka hi kiri paàra-danya i Yehu paraï da tau Parihi dàngu da ngguru anggama, “Ka nggikina duna hi dangangu dàngu nda bahada limada da papanau-mu? Ka nggikina hi nda da-pa-namatungu la huri lawiti-da da boku la mangilu-nda?” wàdanya.

⁶Nahema i Yehu, “Tau kapilandu-kai nyimi! Na padeni hàmungu-ma na panyura-na i Yahaya na rukumi nyimi, ‘Tuna yia na hupu liina i Ala, Wàngu ngaru-ada da tau nida ba dalumu-ngga Nyungga, tàka da etida marau bia-dangga.

⁷Kahewa-ma-ana ba dalumu-ngga, nadu ba beri kalaratu-nggu Nyungga-yaika na kalaratu tau la lii pa-pekangu-da!’ ba wàna.

⁸Ipa-halela-ha da hupu liina i Ala, tàka hii kata undu ninja da kalaratu tau,” wànanja.

⁹Hi nahili paniinja, “Lalu màhikai la pa-jukarungu hupu liina i Ala, ka peku pamàndu-minya na pa-pekangu-mi nyimi.

¹⁰Mbàda wuangu-nayaka na pareta yiana i Muha, ‘Tembiha da amamu da inamu,’ wàna dàngu, ‘Jàka nggamu ma-pahàru-nja da amana da inana, lupangu pameti-maya na hukungu-na,’ wàna, wànanja.

¹¹Tàka na pa-pekangu-mi nyimi: Jàka ningu tau mapanii-nja da amana da inana, ‘Na pawua-nja ba wànggunggai làti, mbàda maraku wànggu-nyaka lai Ala, jàka wànanja,’ toma-mana-nyaka, wàmi.

¹²Nu pa-hinggilu dimi-nyaka na tau nuna welingu la wai ngerana pandula-ha da amana da inana.

¹³Ba tuna panda-dimi-nyaka nu na hupu liina i Ala wàngu pa-pekangu-mi na pa-papeka wàminya na tau. Dadangu-mapa da matungu nu da pawàmi,” wànanja.

¹⁴Ka hili paau-nanyaka na tau dangu paraïna i Yehu hi napanii-nja, “Patingingu kai pinya!

¹⁵Nda ningua ngga - nggàra matama-nya na tau welingu la hambeli majia ngalangu pa-pairaku-ya na tau, tàka da maluhu welingu la tau jiaha duda da ma-pairaku tau. [

¹⁶Ba tuna, jàka ningu kahilu-mi, màtawa kai pa-tingingu]” wànanja.

¹⁷Ba natama-ka la uma i Yehu welingu la tau dangu paàrangu-danyaka da papanau-na na rukuna nu na lii pangerangu.

¹⁸Ka panii-nanjaka paraïna i Yehu, “Ndedi-mapa nu ijàngapu-ya? Nda peku-mbumi nu la pa-jàngapu-ya, ba nda na-pairaku-a tau duna jàka nggàraya na matama la tau?

¹⁹Nadu nu na matama nda la eti-aya nali ningu, hi la kambuya duna nali ningu, hi namangu paluhu la hambeli,” wànanja. Ba napanii tuna nu mahida ndàbaha da pangangu wàna duka nu i Yehu.

²⁰Nahili panii i Yehu, “Na maluhu welingu la tau jiaya duna na ma-pairaku-ya.

²¹Nadu ba weli dalungu, welingu la eti taudu natumbu ningu na kanandingu akatu na ma-pawiti-nya na tau pa-kajari pa-manganga, pa-pameti tau,

²²pa-njuraku, pa-palapingu, papawau tau hawiangu dàngu la pawunda hàlaya na ma-akatu, la pa-manganga eti, nda patembi, mangàba eti, ngànjangu, dàngu nduba.

²³Mbuu ndàbana nu na ma-akatu luhu weli daluna, dàngu nunaya duna na ma-pairaku-ya na tau,” wànanja.

²⁴Tunaka nu hadangu-nanyaka welingu lai nu i Yehu hi nalaku la tana la lihina na paraingu Tiruhu. Hi natama la hau uma, màta ka àmbu ningu mapingga wàna làti, na nyuna nda peku kawiningu-ana.

²⁵Na haàtu ina, na-pahuruku wàndi akatu na anana kawini, narongu-ya na rukuna i Yehu. Ka mai-nanyaka lai Yehu hi na-maràbaku la hanggana i Yehu,

²⁶ba dàngu karai-nanya i Yehu ka nawàngga-ya na wàndi akatu welingu la anana. Nuna na tau kawini nda tau Yahundi-aya, dedina la tana Pinihia la Hiria.

²⁷Napanii i Yehu, “Pawua mangilungu pangangu-mahapa duda da anakeda. Nda nahàmu-a la papiti-ha da pangaada da anakeda ka nduhanja da ahu,” wànanya.

²⁸“Umbu,” wàna na tau kawini, “da ahu la lumbu menja dangangu kadu ma-kawàraku welingu la anakeda,” wàna.

²⁹Ka panii-nanyaka i Yehu, “Rukuna nuna na hemamu, belikau-wa; mbàda luhu-naka na wàndi akatu welingu la anamu,” wànanya.

³⁰Nu ka beli-nanyaka na tau kawini hi natàka-nya na anana la uma, ba ta-nggilungu-na padua la ngia pamahuru, dàngu mbàda luhu langatàka-manaka na wàndi akatu welingu nu la anakeda.

³¹Tunaka nu luhu-nanyaka i Yehu welingu la Tiruhu hi nali ningu la Hindungu ba na-pangalangu la Tàma Nggalilia. La ngarangia mali la tana Ha-kambulu Paraingu-ya nali ningu.

³²Lai nu dangàndi-nya haàtu tau kambànga ma-kawanga. Dakarai-ya i Yehu ka na-padambaku-nya lima nuna na tau.

³³Ka karia meha-nanyaka paraïna i Yehu nuna na tau welingu la tau dangu hi napuhi-nja wua limana da kahilu-na nuna na tau. Hi na-pangànji, hàlaka hi naràma-ya na làmana.

³⁴Ka tangara-nanyaka la awangu i Yehu, hi na-kayeku pa-malaingu, “Epata,” hi wànanya; nu “tabunggahu-wa,” wàna duka.

³⁵Ka tabunggahu-danyaka da kahilu-na dàngu malijangu beli-nanyaka na làmana hi napanii pa-hàmungu.

³⁶Hi na-hirinja nyuda mbuu ndàbada paraïna i Yehu ka àmbu ningudu ngia papanii-da. Na nyuna ba hama huka ràndi-naha hama huka pakada-madanya.

³⁷Hi na-hangàtaru ndàba na tau na marongu-ya, “Dahàmu ndàbama da pawunda-naka! Jiapa na ma-kawanga na-ngalangu parongu dàngu na ma-kambànga na-ngalangu pa kareuku!” wàda.