Read Kambera MÀRUKU 9 Bible Online

MÀRUKU 9 - Kambera bible

MÀRUKU 9

¹“Nàhu kai pi hahanya wànggunggai,” wàna i Yehu. “Ninja hena la hongami nyimi da manda pàdanya na meti, jàka ndedi madu daita-ya ba na-pareta wàngu kawaha-na i Ala!” wànanja.

²Pa-làngangu nomu mbua lodu karia-nanjaka i Peturu, i Yakombu dàngu i Yuhani anguna paluhu i Yakombu paraïna i Yehu, hi da-pamehangu la hau palindi jangga. Ka pa-njilungu-nanyaka na hadana i Yehu la hanggada nyuda.

³Kanjupu bara kalilangu-ha da pakina. Nda jia ningua haàtu tau la pinu tana la honga tau ma-kalorungu la pabaha paki, mapingu pa-pahama baranja nuda.

⁴Tunaka nu ita-danyaka i Yehu paraï da madua haàtu-da da makiku-nya ba na-pabanjaru dànja i Elia dàngu i Muha.

⁵Ka panii-nanyaka i Peturu lai Yehu, “Ai Umbu Ngguru. Mahàmu langatàka-maya ba lai yiahu-ta. Màta làti ka mawulu kàmbungu tailu mbua; hau Nyumu, hau i Muha dàngu hau i Elia,” wànanya.

⁶Hi kiri panii tuna nu i Peturu, nda pima-ananya tubana jàka nggikina wàna bàdi, ba mangàdatu halawàla-madanya dàngu da anguna da madua.

⁷Tunaka nu pa-nggàbalu-nanjaka karumangu hi ronguya na ma-kareuku welingu la karumangu, “Yiana-ya duku na Ana pambuha-nggu. Patingi-nyawa Nyuna!” wàna.

⁸Ka ri - ringa-daka pa-pawilikungu matada, hinggilu-na i Yehu nda haàtu-apa paita-da lai nu la lihida.

⁹Nu ba talànga kamburungu-da welingu la pinu palindi naràndi-ha paraïna i Yehu, “Àmbu jia ningudu ngia papanii-minya na paita-mi kawai, jàka ndedi pahada-nya na Ana Tau welingu la meti,” wànanja.

¹⁰Nuna nu da-pamàndu-manya, na nyuna maràngga paàrangu-madanya dàngga anguda ba hapajia-ha, jàka nggàraya na pawuku-na i Yehu, “na luri beli welingu la meti,” ba wàna.

¹¹Ka paàra-danyaka, “Nggikina duna namai mangilu-mapa bàdi i Elia hi kiri wàda da ngguru anggama?” wàdanya.

¹²Nahema i Yehu, “Deningu-mana, ba namai mangilu i Elia pa-palànyapu ndàbaya. Tàka nggiki-naka duna na ngerana na Ana Tau? Nggikina duna hi ninya la Huratu Matua, napa Nyuna na-pàdangu mayila dangu dàngu na-paaka-nya tau, ba wàna?

¹³Na nyuna ka kupeka-nggai: Mbàda mai-manaka i Elia, hi nawàngu eti biana na tau papalua-nya lima. Nu na pa-tangangu-ma na pa-tulihu la Huratu Matua na rukuna nyuna,’ ” wànanja.

¹⁴Ba nabeli-yaka i Yehu dàngu da tau matailu papanau-na la honga papanau-na hawiangu, daita-ya ba nadangu na tau lai nu. Tàka da ngguru anggama da manda pirada da-patayaku dànja da papanau-na i Yehu.

¹⁵Ba daita-kiyaka i Yehu, ngàtaru wàna biaka na tau dangu, hi da-manyamalu palua pa-tàbuku-ya.

¹⁶“Nggàra-yaka nu na pabàti-mi dàngu da ngguru anggama?” wàna i Yehu ba na-paàra-nja da papanau-na.

¹⁷Nahema na haàtu la honga tau dangu, “Ngàndi-nggunggaunya na ananggu Umbu Ngguru. Na-kambànga paraï pa-huruku-ya wàndi akatu.

¹⁸Jàka na-ràkapu-ya wàndi, nanda - ndakilu-nya la tana, nawura na ngaruna, ke - kehuda da parua-na, hi na-halata ndàba na ihina. Kukarai-mahaka làti da papanau-mu ka dawàngga-ya na wàndi akatu, tàka nda damàka-a,” wànanya.

¹⁹Nanapa-ya i Yehu, “Ai ha lalu-mananggai nyimi yia. Kanjupu nda pawai-makai. Lundu pirangu-mapa bàdi ba kututu-kai dàngu ba ku-patoru-nggai? Ngàndiya nàmu na anakeda!” wànanja.

²⁰Ka ngàndi-danyaka na anakeda lai Yehu. Ba naita-kiyaka i Yehu paraïna wàndi, pa-hayinda-madua-nanyaka na anakeda hi lupa nanjoru, nanggi - nggilungu la tana ba dàngu wurana na ngaruna.

²¹Ka paàra-nanyaka na amana paraïna i Yehu, “Pira mandai-manaka ba tuna nu?” wànanya. “Weli pa-anakeda-manaka,” wàna na amana.

²²“Naingu-mana na-jukaru-nanya la epi jàka ndia la wai, ka pameti-ya ba wàna. Na nyuna ba tuna jàkau peku làti pa-pandulangu, mila àru-nggama eti dàngu ndula àru-kama làti Umbu,” wànanya.

²³“Nggàra wàmu? Jàkau peku làti wàmungga?” wàna i Yehu. “Napeku ndàbama duna, mili pawai àru nyuna,” wànanya.

²⁴Ka wara-madua-nanyaka na amana na anakeda, “Miri kupawai-ma duku, na nyuna najapu na pawainggu. Ndula àruka ka na-bonjangu-ki na pawainggu,” wàna.

²⁵Ba naita-yaka maina pa-langgungguru na tau dangu paraïna i Yehu, kayàka-nanyaka na wàndi akatu, “Ha wàndi kawanga ma-kambànga, luhukau welingu la anakeda yiana, àmbu hili tama-dunyapa wànggunggau,” wànanya.

²⁶Ka kaladaku-nanyaka na wàndi akatu hi na-pahayinda-nya na anakeda, hàla hi naluhu-ya. Hama mameti bia-yaka ba itaya na anakeda, “Meti-nanyaka,” hi wàna ndàbanya tau.

²⁷Tàka i Yehu nayàpa-ya na limana hi na-pahada-nya. Ka hadangu-nanyaka na anakeda.

²⁸Ba la uma-yaka i Yehu, mai meha-danyaka da papanau-na hi da-paàra-nya, “Nggikina ihu nyuma hi nda peku wàngga-manya na wàndi akatu?” wàdanya.

²⁹Nahema i Yehu, “Nda peku-ana la pawàngga-ya na wàndi akatu tungu yia, jiapa ka nggàrakai pawàngu mbulungu wàngu hamayangu-ma-a,” wànanja.

³⁰Ka laku-nanyaka welingu lai nu i Yehu dàngu da papanau-na hi dali ningu la Nggalilia. Tàka nda nabihu-a i Yehu ka napinya tau jàka ngginiya Nyuna,

³¹nadu ba papeka-nanjapa da papanau-na ba tuna yia na papeka-na, “Pa-pakatangu la lima tauya napa na Ana Tau, hi da-pameti-ya, tàka la patailu wàna na lodu na-hadangu beliya,” wànanja.

³²Nda da-jàngapu-aya na pa-pekangu-na i Yehu paraï da papanau-na, tàka nda datoru mbeni pa-paàra-nya.

³³Ka tàka-danyaka la Kapinaumu. Ba la uma-haka, paàrangu-nanyaka i Yehu la papanau-na, “Nggàra pàkuya na pa-palumu-mi nàmu kawai la ngarangia?” wànanja.

³⁴Nda dahema-a, maa ba pa-lumungu-dudanya nàmu kawai la ngarangia jàka nggamu marihi.

³⁵Mandapu-nanyaka i Yehu hi napaau-nja da ma-hakambulu madua-da da papanau-na hi napanii-nja, “Na tau na ma-mbuhangu pangia ngaba, la malamiri dehi-maya bàdi dàngu ka nalumu ndàba-manya bàdi na tau,” wànanja.

³⁶Tunaka nu piti-nanyaka haàtu anakeda kudu i Yehu, hi na-pandolaku-ya la hanggada mbuu ndàbada. I Yehu narohu-ya na anakeda hi napanii-nja da papanau-na,

³⁷“Na tau na mainga haàtu anakeda tungu yia lumunggu Nyungga, inga-nangga Nyunggama. Tàka na tau na mainga-ka Nyungga, nda didi meha-aka Nyungga painga-na, inga-mbunanya na ma-palewa-ka,” wànanja.

³⁸Ka panii-nanyaka i Yehu paraïna i Yuhani, “Umbu Ngguru ma-itaya na haàtu na mawàngga wàndi ba nawànya na tamumu. Tàka hi mahiri-nya maa ba nda na-paoringu-a lai nyuta,” wànanya.

³⁹Nanapa-ya i Yehu, “Àmbi hiri-dunya, nadu ba nda jia ningua haàtu tau mawunda wànya pa-hangàtarungu na tamunggu, hi jia pulu wa ma-anangga.

⁴⁰Nadu na tau na manda papanda, angu-nanda nyuta.

⁴¹Ngàda-maya! Na tau na mawua-nggai wai pa-unungu rukuna ba jiakai tauna na Hanganji Ma-pamànangu, jiangu-ma ba na-ngalangu wundana,” wànanja.

⁴²“Jàka nggamu ma-pawiti-nya hi jia nda hili wai bia-nangga paraïna haàtu jua-a welingu la anakeda màrahu yiada, narihi hàmu-mapa ka hondunya watu nggihu na nggoruna ka mangu panduha-ya la tehiku.

⁴³Jàka lima-munya na ma-pawiti-nggau panjala, kadipu biaya! Narihi hàmupa jàkau luri lai Ala dàngu nda ningu lima hapapa-mu, welingu bau tama mangu dua mbungu limamu la naraka, nu na epi lundu nu. [

⁴⁴Lai nu nda nambàda-a na epi dàngu nda dameti-a da kataru.]

⁴⁵Jàka wihi-munya na ma-pawiti-nggau panjala, kadipu biaya. Narihi hàmu-mapa jàkau luri lai Ala dàngu nda ningu wihi hapapa-mu, welingu ba wàru mangu kadua mbungu wihinggau la naraka. [

⁴⁶Lai nu nda nambàda-a na epi dàngu nda dameti-a da kataru.]

⁴⁷Jàka wua mata-munya na ma-pawiti-nggau panjala, ruki biaya. Narihi hàmu-mapa jàkau tamanya na Tana Bidina i Ala dàngu nda ningu wua mata hapapa-mu, welingu ba wàru mangu kadambu wua matanggau la naraka.

⁴⁸Lai nu nda nambàda-a na epi dàngu nda dameti-a da kataru.

⁴⁹Nimbihu biana na tau jiangu-ma napa ba paili wànya epi, hama tuna ba paili wànja mehi da kameti maraku.

⁵⁰Na mehi nahàmu-ma, na nyuna jàka nalua-yaka pakàba, peku-napa nu pa-pambàru beliya? Ba tuna, màtawa nyimi ka hama tuna mehikai — màtawa kai luri mambiru dàngga angumi,” wànanja.