Read Kambera LUKAHU 10 Bible Online

LUKAHU 10 - Kambera bible

LUKAHU 10

¹Hàlaka nu i Miri hi nahili pindiha da makiku-nya da tau pihu kambulu,[14] hi na-pahuru-nja tau madua - tau madua pa-mangilu-nya Nyuna la hau parai - hau paraingu, la ngia palua-na Nyuna.

²Napanii-nja, “Nadangu na pamuti, tàka na tau na mamuti ana hawutu-ana. Jia ba tuna, karai-ya na mangu wokangu ka na-paràhangu tau paràma la pamuti-ya na ihi wokana.

³Màla hadangu-wa! Ba ku-pahuru-nggai nu beri hama mbimbi la panga ahu rumba.

⁴Àmbi ngàndidu halopa jàka ndia kanai hunggu, jàka ndia halapa. Àmbi pànjangu-du la padua ànda la papulu dàngu tau.

⁵Jàka mitama la hau uma, ‘Napeku hamu àruwa la uma yiana,’ wàmi pàku.

⁶Lai nu jàka ningu ana peku ana hàmu, jia-yaka hi na-pa-engangu nu napeku hàmu ba wàminya; tàka jàka ndia, binda beliya napeku hàmu ba wàminya.

⁷Pa-daingu-ka la hau uma. Keiyaka jàka nggàraya na pa-pahangga-nanggau, nadu na maràma ningu hàkuna la pakei wundana. Àmbu haleli-du welingu la hau uma laku la hau uma.

⁸Era tàkami la hau paraingu, lai nu ka na-kataku dàngu hàmunggai, nganguka jàka nggàraya na pa-pahangga-nanggai na tau lai nu.

⁹Pa-màlaru-ya na tau mahidu lai nu la paraingu, dàngu kai bobaru-ya la tau lai nu, ‘I Ala rengga-nanyaka pa-pareta ba Hanganji-ya la padua-mi nyimi,’ wàminja.

¹⁰Tàka nyimi jàka mitàka la hau paraingu dàngu lai nu ka nda ningu mainga-kai, luhuwa la ànda kai peka,

¹¹‘Jiapa na aü la paraimi na ma-karitaku la tàbalu wihima, nàhu kàmbahu-manyaka, ka tandaya lai nyimi kai pa-ngàdangu. Na nyuna kai pinya, jia-ama-yaka na rehi pareta-na i Ala ba Hanganji-ya la padua-mi nyimi wàmi!’ wàna.

¹²Namuya, la lodu mulungu, napa na tau Hondumu namuda ningupa ba najàma-nya paraïna i Ala welingu la tau la paraingu yiana, wàminja!” wànanja.

¹³“Ura pàku-amu-nyaka ha Korahimu! Dàngu ura pàku-amu-nyaka ha Mbetuhaida! Làti da tanda pa-hangàtarungu da pa-patumbu la padua-mi nyimi ka tungu-kaawa matumbu la paraingu Tiruhu dàngu Hindungu, mbàda pa-mbelingu mandai-daka làti welingu la njalada, dàngu ba dapaki tanda hawina dàngu ba daburi-nja aü da katiku-da.

¹⁴La lodu mulungu, napa da tau Tiruhu dàngu Hindungu namuda ningupa ba najàma-nja paraïna i Ala welingu lai nyimi.

¹⁵Dàngu nyumu, ha Kapinaumu! Bau kakaya, napa nyumu pa-pajangga-makauka lundu tàka la awangu? Ndia-a! Manaü-naka nyumu napa ba pa-wàrungu-kauka la naraka!” wàna.

¹⁶Hàla i Yehu hi napeka-nja da makikunya, “Na tau na marongu-kai nyimi, rongu-nangga Nyungga-maka. Na tau na ma-jukaru-nggai nyimi, jukaru-nangga Nyunggamaka. Tàka na tau na ma-jukaru-ngga Nyungga, jukaru-nanya Nyuna-maka na ma-palewa-ka Nyungga,” wàna.

¹⁷Da tau pihu kambulu[15] da ma-kikungu, beli mbaha eti-danyaka. Da-paihi-nya Nyuna, “Miri, da wàndi akatu da-patundu-ma-nggamaka jàka ma-pareta-ha wànya na tamumu Nyumu!” wàda.

¹⁸Nahema i Yehu, “Ku-ita-mayaka i Kambàliku ba na-kanabu welingu la awangu hama tuna kabilaku.

¹⁹Kai pinya! Nyimi kuwua-nggaika kuaha ka peku dili-minja da ularu da tamihiku dàngu la pa-poraku-ya mbuu ndàbana na kapàru-na na muhu, dàngu nda ningu ngga - nggàra mapahanggàmaru-kai.

²⁰Jiapa ka tuna nu àmbi nggaüru wadunya, da wàndi akatu ba da-patundu-nggai. Rihingu hàmu kai nggaüru eti wànya, ba pa-tulihu-haka da tamumi la awangu,” wànanja.

²¹La rehi nuna-maka, i Yehu ba nanggaüru na etina paraï pa-harua-ya Ngahuna i Ala.[16] Napanii, “Dou Ama, Miri ma-kuaha-ya na awangu dàngu na tana! Ku-pamalangu-nggau nadu Nyumu bau kàpinya nuna mbuu ndàbana welingu la tau manggàna dàngu tau pingu, tàka bau pawuwa bianja da tau panda ajaru. Maa ba nuna-duya na pahàmu wàna ha etimu Nyumu Ama.

²²Mbuu ndàba-daka Nyumu Ama mu-pakata-ngganjaka lai Nyungga. Nda ningua haàtu matanda-ya na Ana, mbulungu na Ama. Nda ningumbu na matanda-ya na Ama mbulungu na Ana; dàngu da tau màta nyuda ka datanda-ya na Ama jàka wàna na Ana,” wàna.

²³Hàla i Yehu hi nambaili-nja da makiku-nya, tunaka nu hi napanii daa mehanja, “Wangu-manaka nyimi nadu bai ita-yaka na paita-mi nàhu.

²⁴Nadu kanandi-nya: Dangu wunangu dàngu hanganji àmangu da ma-rinjungu paita-ya na paita-mi nyimi nàhu, tàka nda daita-ayapa. Nyuda da-rinjungu parongu-ya na parongu-mi nyimi nàhu, tàka nda darongu-ayapa,” wànanja.

²⁵Tunaka nu na haàtu ngguru anggama na-ndàharungu pa-kahili-ya i Yehu. Na-paàrangu, “Umbu Ngguru, nggikina wàngguaka bàdi ka kungala-nya na luri langatàka dàngu na ma-palupangu?” wàna.

²⁶Nahema i Yehu, “Nggàraya na pa-tulihu la Huratu Matua? Nggikina wàmu nyumu na rukuna nuna?” wàna.

²⁷Nahema na tau nuna, “ ‘Mbuhanya i Miri Alamu wàngu mbulungu etimu, mbulungu hamangu-mu, dàngu mbulungu àtalu-mu, hamanai nggubulu-na na pa-ngàdangu-mu,’ dàngu, ‘Mbuhanya na angumu patau hama tuna bau mbuhangu tàda ihi wikimu,’ wàna,” hi wàna.

²⁸“Na-deningu na hemamu,” hi wàna i Yehu. “Wànyawa nuna, jiaya napa hi muluri,” wànanya.

²⁹Tàka na ngguru anggama nuna na-pamànangu wikina. Hi na-paàrangu, “Nggamuyaka nu na angunggu patau?” wàna.

³⁰Nahema i Yehu, “Ninya na haàtu na tau mini na mapuru welingu la Yeruhali la Yeriku. La padua ànda dahada lumbatu-nya tau rambangu, da mawàhi hàlaha da malanja-na, hi dapalu pameti widiya, hi da-dunjaku-nya la padua ànda dàngu manua mandàkangu-na.

³¹Jia pàkuyai duna ba nàhunya na haàtu na ratu na mali la ànda nuna. Ba naita-yaka na tau nuna, hiliru-nanyaka la hapapa ànda, hi nalaku pa-ngalangu.

³²Tumanai na haàtu na tau Lewi na malaku li lai nu; ba naita-yaka na tau nuna, hi nalua lihinya pa-tàngaru-ya, tàka wiliru-ma-ananya la hapapa ànda, hi nalaku pangalangu.

³³Tàka la malamiri na haàtu tau Hamaria na maningu ngia palua-na nalimai duna lai nu. Ba naita-yaka na tau nuna, ka mila nda ukuya na etina paraï panamu-ya.

³⁴Ka lua toma-nanyaka hi na-paili wànya wai angguru da manua-na dàngu hi perinja mina muru, hàla hi na-kamburu-nja da ma-manua. Hàlaka nu, hi nawotu-ya la kajia kalandai wikina, hàla nangàndi-ya la uma ngia patodu hi na-paloku-ya.

³⁵Hadangu harii piti-nanyaka dàmbu àmahu bara hi na-pakata-nya na mangu umangu, napeka-nya, ‘Paloku àruya yiana yia, jàka pi - pira hewa paloku-munya napa ku-mbayaru-maha duku jàka kubeli yiahu,’ ” wànanya.

³⁶Tunaka nu panjàpu-nanyaka i Yehu na lii pangerangu-na, hi na-paàrangu, “Welingu nuda ba tau madua haàtu-ha, bai kakaya nggamuya wàmi nyimi na mahada angunya patau nuna na tau pa-rambangu?” wàna.

³⁷Na ngguru anggama na pa-paàrangu nahema, “Na tau na matulu-dunya,” wàna. Napaya i Yehu, “Màla, luawa kau wànya na ma-hamangu tungu nu!” hi wànanya.

³⁸Tunaka nu i Yehu dàngu da makiku-nya pangala-danyaka na lakuda, hi datàka la hau ndeha. Lai nu ninya na kawini, na ma-tamungu Màrata nyuna na mapaau-nya i Yehu pamai la umana.

³⁹I Màrata ninya na anguna kawini, na ma-tamungu Maria. I Maria hani-mana ba na-mandapu la lihi wihina i Miri Yehu, ba na-patingi-nja da lii pa-ajaru-na.

⁴⁰I Màrata duna karinggatu pàku-nanya la pa-paloku-ya la kuru umana. Nalua lai Yehu papanii, “Miri, ndau kawelangu-ma Nyumu, nana i Maria ba napuli biangga pa-paloku meha? Paràha-nya làti ka naràma dàngga!” wàna.

⁴¹“Màrata, Màrata!” hi wàna i Miri. “Nyumu lalu kadiku-munya dàngu lalu karinggatu-mu la pa-pangàda-nya na mada - dangu,

⁴²làti na ma-mbàtingu hangia-ana. I Maria duna napindi-yaka na mahàmu, na panda hili piti welingu lai nyuna,” hi wàna.