Read Kambera LUKAHU 11 Bible Online

LUKAHU 11 - Kambera bible

LUKAHU 11

¹La hau na lodu i Yehu hamayangu-nanya la hau pa-ngiangu. Nahàla pa-hamayangu, na haàtu welingu la makiku-nya napanii dànya, “Màla làti Miri kau ajaru-kama pa-hamayangu hama tuna i Yuhani ba na-ajaru-ha da makiku-nya,” wàna.

²Ka panii-nanjaka paraïna i Yehu, “Ka ma-hamayangu jàka wàmi, màta kai wunda timi yia, ‘Ama, Nyumu Ala Ma-kamehangu-kau. Mili àru Nyumu ka maraku-nggau dàngu ka tembikau.

³Wua-nggama hau lodu - hau lodu ràka pangangu pangunu-ma.[17]

⁴Jàmanja da njalama, hamana nyumai duma ba majàma-nya na tau na matuu manjala lai nyuma. Àmbu pahia àru-nggama la pa-yàmihu na wai-manggau jàka ningu ma-pakamangu,’ ” wàmi.

⁵I Yehu napanii-nja da makiku-nya, “Era ningu haàtu welingu lai nyimi malua la uma anguna la padua-ka rudungu, ka napanii, ‘Ai, wuanda màla àru làti angu lu wua kàdinda roti tailu mbua,

⁶ba ninya na angunggu na ma-talànga laku rudungu, bidi li-ma-ana la umanggu, tàka nyungga nda ningu pangangu pawua-nggunya!’ ka wàna.

⁷Era hemana nuna na tau ngia pamaimu, ‘Àmbu paharui-ka na! Na pindu pakuhi-yaka tàka nyungga dàngu da ananggu mahuru-manyaka. Nda peku hadangu-nggu la pawua-nggau nyumu ngga - nggàra,’ ” wànaka.

⁸“Ka màla nggiki-naka?” wàna i Yehu ba na-pangala-nya. “Ka kupeka-nggai! Jiapa ka angu-nanggau nyumu, nda jia hadangu-ana la pawua-nggau ngga - nggàra. Na nyuna ba ngahamu panda makia la pa-karai pa-nutakungu lai nyuna, napa ka lupa na-hadangu-maka duna la pawua-nggaunya na pa-kalana-mu.

⁹Jia ba tuna, ka kupeka-nggai: Karaiwa, napa nyimi pa-wuangu-kai; himbuwa, napa nyimi mi-ngalangu; tundunguwa pindu, napa pa-bunggahungu-makai pindu.

¹⁰Nadu na tau na makarai napa nakei; na tau na mahimbu napa na-ngalangu, dàngu na tau na ma-tundungu pindu napa pa-bunggahu-nya pindu.

¹¹Màla la hongami nyimi ningu nu ama mawua-nya ularu na anana, jàka nakarai-ya iyangu?

¹²Jàka ndia na mawua-nya tamihiku, jàka nakarai-ya tilu manu?

¹³Nyimi kaluka tau akatu-kai mipingu-ma pa-wuangu mahàmu la anami. Ka narihi-aipa duna na Ama la awangu! Nyuna napa na-wuangu-ya na Ngahuna lai nyimi na makarai-ya Nyuna!” wànanja.

¹⁴La hau na lodu i Yehu nawàngga-ya na wàndi akatu welingu la haàtu tau kambiu. Ba naluhu-ka nuna na wàndi akatu, ka kareuku-nanyaka nuna na tau. Dangu na tau na ma-hangàtaru,

¹⁵tàka ninya hawiangu na mapanii, “Nyuna hi peku wànggana wàndi akatu ba wàngu-nanya kuaha-na i Mbeluhembulu, na kapala wàndi akatu-du,” wàna.

¹⁶Nimbunjai hawiangu da tau ma-patikingu pakahili-ya i Yehu, hi dakarai-ya patuu hau pa-hangàtarungu ka nanjadi tanda ba ma-pawelingu lai Alaya Nyuna.

¹⁷Tàka i Yehu napi-manya na pawuku-da. Hi napanii-nja nyuda, “Na hau nanggara jàka nambera, na-pabiwangu la ba - banjaru da ma-maràngga pa-muhungu, nda na-torungu-a nuna na nanggara. Dàngu na hau na kuru uma na ma-paihangu, hi da-pamuhungu dàngga anguda, làjaru-nanyaka duna.

¹⁸Tuna numbu na pa-hanganji-na i Kambàliku; jàka na hau kalibaru na-palumungu dàngu na hau kalibaru, tanyànggaru-nanyaka duna na pa-hanganji. Na paniimi nyimi, wàngu-nanya kuaha-na i Mbeluhembulu duna hi nawàngga wàndi akatu, wàmingga.

¹⁹Jàka tuna nu, nggamu kuaha-daka da makiku-nggai nyimi ba dawàngga wàndi akatu? Da makiku-nggai nyimi wikima-a da ma-pakaràngi-ya ba njala-minya nyimi!

²⁰Nyungga duku ba kuwàngga wàndi akatu wànggunya na kuaha-na i Ala, tàka nuna tandana i Ala ba pakiringu-nanyaka pa-pareta la hongami nyimi.

²¹Na haàtu tau kapàru, ka màtu madàka-mana ba namangga-nya na uma wikina, damara ndàbama napa da manguna.

²²Tàka jàka ningu tau marihi kapàru na mahada lumbatu-nya ka natalu-ya, na tau na marihi kapàru nuna ramba-nanjaka duna mbuu ndàbada da ma-dàkana da pamonu-na làti na mangu umangu, hàla paberi hàla-danjaka da malanja-na.

²³Na tau na manda wai angungga, langatàka ndubaku-nangga Nyungga, dàngu na tau na manda pambapa dàngga Nyungga, langatàka paruha-nanya na paràma-nggu!” wàna.

²⁴“Era dunjaku-nanya wàndi akatu na haàtu na tau, wenangu-nanyaka la hau pangia - hau pangia nuna na wàndi ba nahimbu mamàdu ngia pa-hangahu-na, tàka nda na-hunggungu. Jia ba tuna, panii-nanyaka, ‘Napa ka kubeli la uma memangu na pa-dunjaku-nggu!’ wànaka.

²⁵Ba natàka-ka lai nu, ita-nanyaka na uma ba nabulu dàngu ba na-àhalu.

²⁶Hàla lua-nanyaka pawànda mapihu anguna pawàndi marihi akatu welingu lai nyuna. Tunaka nu tama-danyaka la tau nuna hi da-engangu lai nu. La malamiri na ngerana na tau nuna rihi iraku-naka welingu la wungana!” wàna.

²⁷Ba nahàla-ka papanii tuna nu i Yehu, na haàtu na kawini la honga tau dangu napanii lai Yehu, “Oha langatàka-na na kawini na ma-paana-nggau Nyumu dàngu na ma-pahuhu-kau!” wànanya.

²⁸Tàka nahema i Yehu, “Rihi oha-napa na tau na marongu-ya na puluna i Ala dàngu ba nawa-manya!” wàna.

²⁹Ba talànga langgungguru-nanyaka tau i Yehu, pangala-nanyaka na kareuku-na, “Ma-akatu langatàka-ya na tau la rehi nàhu. Nyuda karai-danya hau pa-hangàtarungu ka peku wai-dangga Nyungga, tàka nyuda nda pa-wuangu-aha ana haumbu pahangàtarungu, mbulungu-ana na pa-hangàtarungu rukuna i Wunangu Yunuhu.

³⁰Hama tuna i Wunangu Yunuhu ba pa-hangàtaru wàdanya da tau la paraingu Naniwa, tumbuna na Ana Tau napa ba pa-hangàtaru wànanya na tau la rehi nàhu.

³¹La lodu njàpu awangu tana, napa na Maràmba kawini welingu la tana mbara luru nahada pa-kariangu da tau la rehi nàhu, hi na-panjala-ha nyuda. Nadu keha ka kurongu-ha da pa-ajaru-na i Halomu na ma-manggàna ba wàna, nahadangu palaku-nya na ngarangia na mambana marauna welingu la hupu tana. Tàka nàhu lai yiahu ninya na haàtu na marihi bokulu welingu lai Halomu!

³²La lodu njàpu awangu tana, na tau na ma-mandapu-nya la Naniwa napa hada pa-kariangu-danyaka da tau la rehi nàhu, hi da-panjala-ha nyuda, nadu na tau Naniwa duna ba da-pambelingu welingu la njalada ba jiaya na pa-bobarungu-na i Yunuhu lai nyuda. Tàka nàhu lai yiahu ninya na marihi bokulu welingu lai Yunuhu!” wàna.

³³“Nda ningua tau ma paketingu epi palita, tàka hi nawini-nya jàka ndia hi na-panggàbi-nya mbàlu.[18] Nyuna natu-maya duna nuna na palita la tandai palita, ka peku ita-nanya na hariina paraina tau na matama.

³⁴Da wua matanda palita tau-ndanja. Jàka da-kahingiru da wua matamu, jia hi na-hambila hàla na ihi daamu. Tàka jàka da-hambala da wua matamu, jia hi na-kapàtangu hàla na taumu.

³⁵Jia ba tuna nu, pananjarungu, na harii na maninya lai nyumu ka àmbu jia kapàtangu-na.

³⁶Jàka naharii na ihi daamu, ka àmbu ningu ndoku hawutu ma-kapàtangu, jia hi nahabola hàla na taumu hama tuna ba na-handaraku-nya hambila palita,” wàna.

³⁷Ba na-panjàpu-yaka na kareuku-na i Yehu, na haàtu na tau Parihi nawànda-ya i Yehu pangangu la umana. Ka lua-nanyaka i Yehu pangangu lai nu.

³⁸Na-hangàtaru na tau Parihi ba naita-ya i Yehu ba nda nabaha pàku limana, hama tuna na kalaratu anggama.

³⁹Jia-duyaka i Miri hi napanii-nya, “Tubana nyimi tau Parihi bai kàli bahaha da kaba dàngu da kawinga la liuda, tàka daa la kuru wikimi mbinu wànguna padua ma-pajànggilu dàngu ma-akatu.

⁴⁰Minduba nyimi! Màla i Ala ba nawulu-ya na liuna, nda nawulu mbuya na kuruna?

⁴¹Na maninya daa la kuru kaba dàngu kawinga-mu, nudaha bàdi kai wuanja da tau mila. Ba timi nu jia hi naili hàla lai nyimi.

⁴²Ura-amika nyimi tau Parihi! Nyimi bai wotuha lai Ala da hangia la hakambulu da ihi wokami, hama tuna da kandangu, da wàla hanggi, dàngu da rungu hangia-hangia, tàka pehaku-minyai na pa-deningu dàngu na mbuhangu lai Ala. Làti nuna-yapa bàdi na pawàngu, tàka hawiangu nda pa-pehaku-mbunjai.

⁴³Ura-amikia nyimi tau Parihi! Nyimi ma-matarungu pangia tau patembi la uma bungguru, dàngu ka natembi-ta tau ba wàmi la parànggangu.

⁴⁴Ura-amika nyimi tau Parihi! Nyimi beri hama tuna na reti panda tungu tanda, na pa-kalijaku tau dàngu nda pambuti-nya,” wàna.

⁴⁵Na haàtu na ngguru anggama napanii lai Yehu, “Umbu Ngguru, nudaka da papanii-mu paaka-mu-nggama nyuma-mbuduka!” wàna.

⁴⁶Nahema i Yehu, “Ura-amika nyimi-mbu ngguru anggama! Nyimi mi-karuhi-ya na hangia - hangia na ma-kalutu dàngu bai wuangu-ha da kalaratu mambotu, tàka nyimi ndai pa-ndulangu-mbu ka napingu pawànja tau.

⁴⁷Ura-amika nyimi! Bai pandoi-nja reti da wunangu, tàka hi jia-madu-hai da boku wikimi la mangilu da ma-pameti-ha.

⁴⁸Jia ba timi nu mangaku wiki-ma-ami-nyaka bai oranya na paraï rukuda da boku la mangilumi; ka ba tuba nyudadu da ma-pameti-ha da wunangu, tàka hi nyimi ma-pandoi-nja retida.

⁴⁹Jia-duyaka hi nalara liinya na manggàna-na i Ala, ‘Napa ku-paràha-nja da wunangu dàngu da papalewa-nggu; hawiangu da-pameti-ha tàka hawiangu da-pamayila-ha!’ wàna.

⁵⁰Hi nalaku-nya nuna i Ala, ka peku hukunya na tau la rehi nàhu, rukuna ba pameti-ha da wunangu mbuu ndàbada piti welingu ba padika-nya na tana,

⁵¹piti welingu ba pameti-ya i Hambilu lupa tomaya ba pameti-ya i Hakaria, na matumbu la manggawa ngia pawotu maraku dàngu Umana i Miri. Iwaiya: Da tau la rehi nàhu jiangu-maka duna ba hukunya kirina nuna mbuu ndàbana.

⁵²“Ura-amika nyimi, ngguru anggama! Na kuhi na pa-bunggahu wànya na pindu papingu wàngu ba nyimidu makata-nya, tàka nyimi wiki ndai bihu patama la pahimbu papingu wàngu. Na-panjàngangu-na nyimi wikimai mapara - ratahu-nya na tau na ma-pamukarungu patama lai nu!” wànanja.

⁵³Ba na-dunjaku-nyaka i Yehu lai nu, da ngguru anggama dàngu da tau Parihi panjàla nda uku-danya i Yehu. Da-kamangu pairu - irunya kareuku ka màtu - màtu papanii-na ba wàda.

⁵⁴Nu ba talànga tuna nu hamata-madanya ka peku yàpa-ndanya jàka ningu ma-hanjàliru papanii-na ba wàda.