Read Kambera LUKAHU 12 Bible Online

LUKAHU 12 - Kambera bible

LUKAHU 12

¹Handàka, pa-ngguharungu-nanyaka na tau dangu ba nda pira rata biaya, hi lupa ningu patarohaku weli wihingu. Ba talànga langgungguru tunaka nu na tau, i Yehu napanii-nja da makiku-nya, “Ipa-nanjarungu la muru tau Parihi, na-pawuku-nggu, na kapelu-da.

²Nda ningua pa-winingu napa na manda wuwa, dàngu nda ningua pa-kàpingu napa na manda ta-lunggaru.

³Na papanii-mi la rudungu, napa parongu-ya la harii; dàngu na pa-kanguruku-mi la kahilu tau daa la kuru pa-kàpitu, napa na-hamboka la nggi - nggi,” wànanja.

⁴“Namuya, angunda! Àmbi mangàdatu-dunja nyuda da ma-pameti-ha da taumi hàla-ka nu ba nda hilu nggikina wàda-apa.

⁵Màta ka kupeka-nggai jàka nggamuya bàdi na ràka pa-mangàdatu-mi. Mangàdatu-nyawa i Ala! Nadu jàka nahàla pa-pameti, ba na-kuaha-mbui pawàru-nggai la naraka! Iwaiya, Nyuna-a bàdi kai mangàdatu-nya.

⁶Kai tàngaru-ha da manginu, ba lima ngiuda ana dàmbu ndui-a wilida. Ba tuna nda heu-a pa-maromba-na i Ala.

⁷Na lunggi la katiku-mbumu mbàda diha hàla-nanyaka, jia àmbi mangàdatu; nyimi marihi raumipa la pa-pawilingu welingu la manginu dangu!” wànanja.

⁸“Namu pahàmu-nya: Na tau na mapeka la hangga mbabu tau, nyuna ba ma-kikungu lai Nyunggaya, nyuna napa napeka-mayai duna paraïna Ana Tau la hanggada da papalewa-na i Ala.

⁹Tàka na tau na ma-pahini-ngga la mbabu tau ba ma-kikungu lai Nyunggaya, napa nyuna na-pahini-manyai duna paraïna Ana Tau la hanggada da papalewa-na i Ala.

¹⁰Era ningu mapulu-nya na Ana Tau peku-napa la pajàma-nya; tàka era ningu malapi-ya i Ngahuna i Ala nda pa-jàmangu-ayapa.

¹¹Jàka ningu mangàndi-kai nyimi la uma bungguru ka patanda-nggai ngera la hangga ma-pareta jàka ndia ma-kuaha, àmbi kadiku-dunya jàka nggikina wàmi bai kahiri wikimi jàka ndia jàka nggàra wàmika bàdi bai kareuku.

¹²Nadu jàka nggàraka bàdi papanii-mi, napa i Ngahuna i Ala duna na mapuru pekanggai la rehina,” wànanja.

¹³Na haàtu na tau la honga tau dangu napanii lai Yehu, “Umbu Ngguru, kamangu làti kau paràha-nya na angunggu paluhu, ka nawua-ngga duku hawiangu banda pa-bànjalu amama,” wàna.

¹⁴Nahema i Yehu, “Angu mbuha, ka nggamuka mawotu-ka Nyungga pa-hakimu jàka ndia matanggu paberi-nggai banda kangeha nyimi tau madua?” hi wàna.

¹⁵Tunaka nu i Yehu hi napanii-nya na tau mbuu ndàbana na maninya lai nu, “Pananjarungu dàngu rimangu, ka ambi tàka la pa-manganga eti. Nadu na lurina na tau nda jiaya na pawulu wàngu pàku na pa-monungu, jiapa ka dabundu làndangu da pawulu-na.”

¹⁶Hàla i Yehu hi napeka-ya yiana na pangerangu, “Ninya na haàtu na tau wulu. Nyuna ningu tanana na madangu ihina.

¹⁷Nuna na tau wulu kanandingu-nanyaka daa la etina, ‘Nda ningupa pa-ngiangu ngia pa-bànjalu-nggunja da ihi tananggu. Nggàra ngarangia-ka bàdi pawànggu?’ wàna.

¹⁸Tunaka nu hilu kanandingu-nanyaka daa la etina: Ninguka ngarangia pawànggu; da uma uhunggu napa ku-paràhangu pa-nyànggaru-ha, ka kuhili pahadangu marihi bokulu. Lai nu napa ku-pahàmu niha da uhu nggàndumu-nggu dàngu da malanja-nggu hawiangu.

¹⁹Tunaka nu napa kupanii la eti wikinggu, ‘Wangu-manaka dumu! Mbuu ndàbana na mahàmu lai nyumu hàla-yaka, nda palu hàla-ahapa jiapa nda pira mbua ndaungu mandaina. Hangahu kàdiwa nu nàhu! Ngangu ngunungu-wa, kau pàdanya na hàmuna na lurimu, ka wànggunya na wikinggu,’ wànaka.

²⁰Tàka i Ala napanii-nya, ‘Ha manduba! La rudungu ni-ma-aka napa bau meti, hàla nggamuka mangala-nja mbuu ndàbada da pawùlu-mu, da pambàda pauhi-mu nduma wikimu?’ wànanya.

²¹Tuna nuduka na hupu njàpuna na tau - tauka na ma-pamukarungu la pawùlu nduma wikina, tàka nda na-pamukarungu la pawulu la matana i Ala,” wàna.

²²Hàla i Yehu napanii-nja da makiku-nya, “Jia-duya hi ku-pekanggai, ‘Àmbi kadiku-dunya na lurimi, nggàra-aka panganda jàka ndia nggàra-aka papaki-nda ba wàmi.’

²³Na luri narihi-pa welingu la pangangu, dàngu na taumi narihi-pa welingu la paki.

²⁴Tàngaru-ha da nggangga! Nyuda nda da-tondungu, nda damuti, dàngu nda ningumbu kuru pangada jàka ndia uma uhuda. Tàka i Ala rada-nanja padua! Nyimi mi-pawilingu-pa welingu la ma-hawurungu!

²⁵Nggamu-yaka lai nyimi ba ruku kadiku-na na-ngalangu pamalai-ya na lurina ka luka ana hawutu?[19]

²⁶Ka jiapa na maana hakudu tungu nu ndai màkadu palaku-nya, nggikina hi mi-kadiku-nya rukuna hangia - hangia hawiangu?

²⁷Tàngaru-ha da wàla mangàta ba datumbu; nda daràma, nda da-tinungu-mbu. Tàka jiapa i Hanganji Halomu na mambana wuluna nda jia paki-mbuna ngaü manandangu hama tuna nuda da wàla ai!

²⁸Da rumba la maràda da matumbu la lodu nàhu tàka haromu da patunu palàpu la epi. Ba tuna i Ala nawotu-nja ngaüda da rumba ma-manandangu tungu nu. Ka rihi-aipa dimi nyimi! Tàka nyimi najapu na pawaimi!

²⁹Jia ba tuna àmbi kadiku dàngu àmbu hondaru-du na ngerana jàka nggàra pangami dàngu pangunu-mi.

³⁰Jiaha da matuda numaka da pakeha-na na tau na manda tandaya i Ala. Làti duna na Amami napi-manya nuda nu mbuu ndàbada ba jiaha da pa-kalana-mi.

³¹Tàka màtawa nu kai pa-mukarungu ka jiaya i Ala na ma-pareta-ya na lurimu, jàka jia-haka nuda hawiangu, napa nawua-manggainja duna paraïna i Ala,” wànanja.

³²“Nyimi maana hawutu-ana na dangumi, àmbi mangàdatu! Nadu na Amami ba nahàmu-ma na etina la pawua-nggainya na kanyuru-na na pareta-na.

³³Dangganja da mangumi tàka da àmahu wilida paberi-nja la mamila. Pandoi nduma wikimi halopa nda mobu, nu da banda da pa-pahàmu la awangu. Da banda nuda nda da-mbulangu-a paraï ruku ma-manganga dàngu nda ningumbu manganii ma-paruha-ha.

³⁴Nadu nggiha da bandamu, lai nuya na etimu!” wàna.

³⁵“Imangga rima mànungu padua pa-hanobaku-ya na lii hangia - hangia. Màta kai rimangu padua la pawotu pakimi dàngu na palita-mi ka naroka mànu,

³⁶hama tuna da ata da ma-patia-nya-padua na mirida ba nabeli welingu la remi pamaü papa. Jàka na belika na mirida dàngu ka na-tundungu pindu, ka bunggahu parengga-mada-nyaka duna na pindu.

³⁷Wangu langatàka-na da ata ba natàka na mirida ba dàngu rimangu-da-padua. Iwaiya: nuna na mirida napa na-hawanjiru, hi na-paràha-nja da atana pa-mandapu, hàla hi natanggu paloku-nja pangangu.

³⁸Wangu langatàka-manaka da ata jàka natoma-nja paraïna mirida ba dàngu rimangu-da-padua panedi-nya, jiapa ka natàka wàngu mandalora jàka ndia ka na-làpahu-aipa!

³⁹Inamu-maya yiana! Làti na mangu umangu jàka napinya njàmu pira rapa tàkana na ma-manganga, napa na-manggangu-maka duna ka àmbu peku tamana na ma-manganga la umana.

⁴⁰Jia-duya nyimi màta kai mangga rimangu, nadu na Ana Tau ba jia tàkangu wàna bia la rehi panda mbutimi,” wàna.

⁴¹“Miri, nu na lii papekangu-mu, jia-kama nyumaka palamu, jàka ndia hi lamunya na tau mbuu ndàbana?” wàna i Peturu.

⁴²Nahema i Yehu, “Nggamuya na ata na ma-tuturu dàngu na ma-manggàna hi lupa nawotu-ya paraï na mirina la pa-kapala-nja da anguna paata hi peku paberi-nanja pangangu jàka jiaya na rehina?

⁴³Oha pàku-anaka na ata nuna, era belina na mirina ba natoma-nya ba dàngu paloku-nanya-padua na wai ngerana!

⁴⁴Iwaiya: Na maràmba nuna napa na-pahangga hàla-manja duna da bandana la atana nuna na ma-tuturu.

⁴⁵Tàka na ata nuna jàka na-kanandingu la etina, ‘Na mandai-mapa duna hi namangu pabeli i miri,’ jàka wànaka, hi napalu hàlaha da anguna paata, dàngu hi nangangu ngunungu hi lupa na-maüku,

⁴⁶kau napa tàka-nanyaka na mirina la lodu dàngu la njàmu panda mbutina. Ka pàjara halawàla-duna-nyaka[20] paraï na mirina, hi na-pahama ngeranya la tau na manda manundu lai Ala.

⁴⁷Na ata na mapinya na pambuha-na na mirina, tàka hi nda na-hawanjiru dàngu hi nda na-paloku-yai na pawuku-na na mirina, napa na-pawàhiku pa-langatàka-manyaka duna.

⁴⁸Tàka na ata na manda pinya na pambuha-na na mirina, hàla hi natuu hau manjala, na ràka pa-pawàhiku wànguya, napa ràka-anaka ba pa-wàhiku-nya. Nadu na tau na pawua padangu, nadangu-maka duna na pa-karuhi lai nyuna. Dàngu na tau na pamonu padangu, nadangu-maka duna na pa-karuhi lai nyuna,” wàna.

⁴⁹“Na mainggu, jiaya la pa-patumbu-ya na pa-mutungu wàna na pinu tana yiana. Hàmu-maka làti jàka jia mbàda roka-naka na epi!

⁵⁰Ni-manyapa na mayila bokulu ba lupa ku-hambeta-maya bàdi. Jia hi nda nangudu na etinggu ba ndedi ku-palundu-nya nuna.

⁵¹Màla bai kakaya na mainggu nu ngàndi-nanya papeku wàngu la pinu tana wàmingga? Ndia-a, nda papeku-aya, tàka pa-papangu-ya.

⁵²Piti welingu nàhu, na kuru uma na matau malima-na pa-papangu-danyaka, da madua haàtu-da dapapa-nja da tau madua, jàka ndia da madua dapapa-nja da tau madua haàtu-da.

⁵³Na ama napa napapa-nya na anana mini, na anana mini napa napapa-nya na amana. Na ina napa napapa-nya na anana kawini, na anana kawini napa napapa-nya na inana. Na ina yenu napa napapa-nya na rii anana, tàka na rii anana napapa-nya na ina yenuna,” wàna.

⁵⁴I Yehu napanii-mbunya na tau dangu, “Jàkai itaya na karumangu na mahei la patama lodu, ‘Nàmunya na urangu,’ wàmi-madua-ka. Na urangu langatàka-ma.

⁵⁵Jàka mipàda-nya na ngilu na ma-maruru weli lurungu, ‘Pa-mbanahungu wànaka,’ wàmi-madua-ka. Na-pambanahungu langatàka-ma.

⁵⁶Nyimi makàli kapilandu! Mipingu pa-pakaka-nya na awangu bai itaya na hadana na awangu dàngu na pinu tana. Nggikina da tanda rehi nàhu hi ndai pingui pa-pakaka-nja?” wàna.

⁵⁷“Nggikina nyimi hi ndai bota wikiya jàka nggàraya na ma-deningu?

⁵⁸Jàka ningu tau makàla-kai la ma-timbangu palakara, pamukarungu bàdi ka lupa mi-panjàpu-ya na palakara nuna dàngu na ma-pakàla nàhu ba la ànda-kaipa. Jàka ndia, napa nayila-makaika duna la hangga hakimu, tàka na hakimu hi na-pakata-nggai la palihi, tàka na palihi hi napuhi-kai la uma kapàtangu.

⁵⁹Iwaiya! Napa ndai luhu-mapa duna welingu la uma kapàtangu, jàka ndedi dalundungu da ndàndami,” wàna.