Read Kambera LUKAHU 14 Bible Online

LUKAHU 14 - Kambera bible

LUKAHU 14

¹La hau lodu Hangahu, nalua pangangu i Yehu la umana na haàtu amabokulu Parihi. Lai nu da tau buti-danya padua i Yehu.

²Ka mai-nanyaka na haàtu na tau na mahidu mbua mbàha, da wihi da limana dambua hàla.

³Hàla paàra-nanjaka da ngguru anggama i Yehu dàngu da tau Parihi da maninja lai nu, “Màla tundunya na uku anggama-nda nyuta, pekuna nu ba ta-pamàlaru tau hidu la lodu Hangahu jàka ndia?” wàna.

⁴Pàdi wàda bia da ngguru anggama dàngu da tau Parihi. Hàla i Yehu hi napaau-nya nuna na tau hi na-pamàlaru-ya, tunaka nu hi na-paràha-nya palaku.

⁵Hàlaka nu i Yehu hi napanii-nya na tau dangu, “Ngera hama tuna na haàtu la hongami nyimi ka ningu haàtu anana jàka ndia heu hapina na ma-kanabu la humuru la lodu Hangahu, ndai luma rengga-a pa-padita memaya na anakeda jàka ndia na hapi la lodu nunama?” wànanja.

⁶Ba tuna nda ningu haàtu mapeku pahema-ya i Yehu na rukuna nuna.

⁷Naita-ha da ariyaa i Yehu da mapindi pa-ngiangu marihi hàmu. Jia-duyaka hi nawua-nja panii ba na-ajaru-ha nyuda mbuu ndàbada,

⁸“Era ningu madunda-nggai la remi pamaü papa, àmbi luadu pa-mandapu ningu la kanjàka nduma tau la ngora. Napa hi ningu bia tau parihi tembi welingu lai nyumu padunda-na,

⁹tàka na mangu umangu na madunda-nggai, ka lupa mai lerangu-nanyaka lai nyumu papanii-nggau, ‘Malangu-mu, na pa-ngiangu yiana pa-payemangu-ya na ariyaa nuna,’ wàna-nggauka. Ka makia nda uku-kimunyaka dumu bau lelingu pa-mandapu ningu hu lua la kajia halawàla.

¹⁰Jia-duya nu, era ningu madunda-nggai, pindima ngia pa-mandapu la kajia halawàla, napa duna na mangu umangu ka namai tomakau, ‘Ai angu mbuha, mai lai luakau la ngaba na,’ ka wànanggau. Nuya duna hi natembi-kau tau la mbabu ariyaa dangu.

¹¹Nadu na tau na ma-pajangga wikina, napa pa-pawawa-ya, tàka na tau na ma-pawawa wikina, napa pa-pajangga-ya,” wàna.

¹²Hàla i Yehu hi napanii-nya na mangu umangu, “Jàka era dundangu-mu tau pangangu la pamangu-mu ka lodu-yakai ka rudungu-yakai, àmbu dundangu ningudu angumu, angu dedimu, jàka ndia kalembi-mu, jàka ndia tau lihi umamu na mawulu. Nadu napa nyuda dahili dunda-dunggau, ba tuna nu ngala-madua-munyaka hiluna na dundangu-mu.

¹³Jia ba tuna jàka wulu-munya remi, dundanya na mamila, na ma-manjurangu, na ma-kaliparu, dàngu na mapoki.

¹⁴Nyumu ngalangu-munyaka dumu kanyuru, nadu da tau tungu nu ba nda damàka-a patunggau hilu hàmumu. Na hàmumu nyumu napa i Alaka duna na matunggau hiluna la rehi pahada belinya na tau hàmu welingu la meti,” wàna.

¹⁵La rehi nu na haàtu na tau na angu nganguda lai nu ba narongu-ya na paniina i Yehu, panii-nanyaka, “Wàngu langatàka-naka na tau napa na mangaa dànya i Ala jàka natàka ba hanganji-ya!” wàna.

¹⁶Tàka napanii i Yehu la tau nuna, “Tuna handàka ninya na tau na mawulu remi bokulu hi na-dundangu tau dangu.

¹⁷Ba jia-yaka na rehi ka pakiri-nya nuna na remi, paràha-nanjaka da atana palua papeka-nja da tau pa-dundangu, ‘Maiwa nu, màtu hàla-daka!’ wàdanja.

¹⁸Tàka nyuda mbuu ndàbada kawàra peka-danyaka ma-pabetangu ba da-pamalangu-nya na ma-dundangu. Na ma-wungangu napanii, ‘Nyungga bidi kei-ma-anggu tana, jia kuluma luaka bàdi pa-tàngaru-ya. Malangu-mu, àmbu tuduka la eti,’ wàna.

¹⁹Na haàtu napanii, ‘Nyungga bidi kei-ma-anggu hapi lima pahangu, kama pàkunja nuda da hapi wànggu. Malangu-mu, àmbu tuduka la eti,’ wàna.

²⁰Na haàtui napanii, ‘Nyungga bidi lalei-ma-anggu, jia hi nda peku luanggu,’ wàna.

²¹Ka beli-nanyaka na tau ata, hi na-patàka-nya na rukuna nuna na mirina. Lalu mbeniya nuna na maràmba, hi napeka-nja da atana, ‘Parenggangu-kai lua la ànda - ànda dàngu la kanjili - kanjilitu la paraingu. Karia-nja nàmu da tau mila, da tau manjurangu, da tau poki dàngu da tau kaliparu,’ wàna.

²²Tunaka nu da tau ata peka-danyaka na mirida, ‘Miri, ma-pajàngapu-nyaka na pareta-mu, tàka dangu biapa pa-ngiangu,’ wàdanya.

²³Hàla ka panii-nanyaka na maràmba, ‘Luawa la ngarangia bokulu dàngu la kanjilitu la hambeli paraingu, pambana-ya na tau ka namai, ka nambinu na umanggu.

²⁴Namuya! Nda ningu ndoku-apa haàtu welingu la ariyaa pa-dundangu-ka napa da mapàda-nja hàmuda da pangangu la reminggu nyungga!’ ” hi wàna.

²⁵Dangu tau malaku karia-nya i Yehu. I Yehu nambaili-nja hi napanii-nja nyuda,

²⁶“Na tau na mamai lai Nyungga, tàka narihi mbuha-nyapa na inana, na amana, na papaha-na, da anana, da angu dedina, màlambu na tàda ihi wikina, nda peku-ana nyuna la pakiku-ngga.

²⁷Na tau na manda bihu paduku-ya na harika-na ka nakiku-ngga, nda peku-ana la pakiku-ngga.

²⁸Jàka ningu haàtu welingu lai nyimi na ma-mbuhangu pawulu uma lewatu, jiangu-maka duna ba na-mandapu hi nadiha pàkuya jàka pira pawulu wànguya, ka napinya na tomada da àmahu-na la pa-panjàpu-ya ba nawulu-ya nuna na uma lewatu napa hi ndia.

²⁹Nadu jàka nda peku panjàpu-nanya, tàka hi mbàda hàla-nanyaka na watu umana, nariki-nya tau na maita-ya napa nuna na paràma.

³⁰Nyuda napa panii-danyaka duda, ‘Yi, na tau nina na-pakakangu ànga pawulu ma-hamangu tàka nda màka-nanyai pa-palundu-nya!’ wàdaka.

³¹Na haàtu hanganji na maningu tanatarangu hakambulu rata ka na-patikingu paberaya na hanganji haàtu na maningu tanatarangu dua kambulu rata, jiangu-maka duna na hanganji nuna ba na-mandapu la patimba-nya toma nda tomana na kapingatuda la pa-ndubaku-ya na muhuna.

³²Jàka napi-nyaka na nda màkana, ba dàngu marau biana-pa na papana, jiangu-maka duna ba na-palewa tau la pakarai ka pa-papeku,” wàna.

³³Tunaka nu panii-nanyaka i Yehu: “Tuna numbu nyimi. Nda haàtu-mbu welingu lai nyimi mapeku pakiku-ngga, jàka nda na-dunjaku hàlanja da maninja lai nyuna,” wàna.

³⁴“Na mehi nahàmu, tàka jàka nalua-yaka pakàba, peku-naipa la pa-pambàru beliya?

³⁵Nda hili ningu-apa linguna, jàka tuya la woka jàka tuya pa-kamboka wàngu tanakai. Jia la wàru-kia-nyaka duna. Jàka ningudu kahilu mirongu-wa!” wàna.