Read Kambera LUKAHU 15 Bible Online

LUKAHU 15 - Kambera bible

LUKAHU 15

¹La hau na lodu, dangu tau kei hilu katiku dàngu tau hawiangu, da tau nda hàmu ba wànanja madangu, da mamai pa-patingi-nya i Yehu,

²Da tau Parihi dàngu da ngguru anggama pa-kiringu-danyaka pa-pulungu. Dapanii, “Yi, na tau nina nayema biaha da tau nda hàmu, màlai nanga dambunja!” wàda.

³Ruku tuna nu i Yehu hi napeka-nja na pangerangu yiana:

⁴“Ngera hama tuna jàka ningu lai nyimi haàtu maningu mbimbingu hangahu, hàla hi na-mbulangu na heu — màla nggàra ulana-ka? Jiangu-maka duna napa ba na-dunjaku-nja da mbimbina da hiwa kambulu hiwa la maràda pa-rumbangu, hi nalua pahimbu-ya na ma-mbulangu lundu nangala-nya.

⁵Ba nangala beli-nyaka nuna na mbimbi, paraï pa-nggaüru na etina duku-nanyaka na mbimbina,

⁶hàla ngàndi beli-nanyaka. Tunaka nu paau-nanjaka da anguna dàngu da angu kotaku-na, hi napanii, ‘Maiwa ka ta-hawola! Na mbimbinggu na ma-mbulangu ba hunggu beli-nggunyaka!’ wàna.

⁷Jia duya, tuna numbudu la awangu ba nambabu bokulu rukuna na haàtu na tau njala na ma-panjilungu welingu la njalana, nda tu biana da tau hiwa kambulu hiwa da mambàda hàmu dàngu da manda jàra pa-panjilungu,” wànanja.

⁸“Jàka ndia ngera hama tuna ningu haàtu kawini na maningu àmahu barangu hakambulu, hàla na-mbulangu na hau — màla nggàra ulana-ka? Nyuna napa na-paketingu palita dàngu hi na-kanjeku-ya na umana, hi nahimbu-ya la nggi - nggi hi lupa nahunggu-ya nuna na àmahu.

⁹Ba nahunggu-yaka nuna na àmahu, paau-nanjaka da anguna hamanai da angu kotaku-na hi napanii, ‘Lalu mbana hàmuya na etinggu ba kuhunggu beli-yaka na àmahu-nggu na ma-mbulangu. Maiwa ka ta-hawola!’ wàna.

¹⁰Tuna numbu da papalewa-na i Ala ba da-hawola jàka ningu haàtu tau akatu na ma-panjilungu welingu la njalana. Pawaiwa!” wàna.

¹¹Hili peka-nanyai pangerangu i Yehu, “Ninya na haàtu ama na maningu anangu mini tau madua.

¹²Na ma-kamuri napanii dànya na amana, ‘Ama, wuangga-hawa nàhu da kangeha-nggu welingu la bandanda,’ wàna. Tàka na amada hi na-paberi-nja da pawulu-na la anana da tau madua.

¹³Ndedi pira mbua lodu nuna na ana kamuri nadangga-nja da banda tangguna hàla hi nalaku la tana namarau. Lai nàhu hiru hàru-nanjaka da àmahu-na ba nambambu wànja.

¹⁴Ba danjàpu hàlaka da àmahu-na, jia pàkuyai na tunguna na rimba bokulu la tana lai nu, ka handànga-nanyaka.

¹⁵Ka lua-nanyaka paràma la tau ma-ngiangu lai nu, na ma-paràha-nya la woka padaiha da weina.

¹⁶Paraï pamanjuu halawàla ka mangàbangu-nanyaka panganja da uhuda da wei ka ningu ihina na kambunggu ba wàna. Ka jiapa nda nggiki manjuuna nda ningumbu haàtu mawua-nya pangangu.

¹⁷La malamiri ka hina-duka hi na-pàdangu wikina hi napanii, ‘Da tau da maràma la amanggu dapabundungu da pangada, tàka nyungga pàku-ayaka lai yiahu kutika pameti rimbangu! wànaka.

¹⁸Napa ku-hadangu ka kulaku la amanggu, ka kupeka-nya: Ama, kunjala-ka hanggangu lai Ala dàngu hanggangu lai nyumu ama.

¹⁹Nda ràka-anapa duku bau anangga. Reki biaka ba tau maràma-ka lai nyumu, ka wànggunya na amanggu, ‘wànaka.

²⁰Ka hadangu nanyaka hi nabeli la amana. Namarau biapa welingu la uma, mbàda ita-nanyaka paraïna amana. Nawàngu pamila mumuhu na etina na amana hi napalai pahàmburu-ya, hi narohu-ya dàngu hi na-puduku-ya.

²¹‘Ama,’ wànaka na anana, ‘kunjala-ka lai Ala dàngu lai nyumu ama. Nda ràka-anapa nyungga bau anangga,’ wàna.

²²Tàka na amana manyamalu paau-ma-ananja da atana hi napanii-nja, ‘Parenggangu! Pitinda paki ma-mandangu halawàla, kai papaki-nya nyuna. Panggàna-nya tawuru na wua limana, dàngu halapa la wihina.

²³Hàlaka nu kai piti heu ana hapi mboka, kai rupuya. Màta ka tangaa pa-mbabungu ka ta-hawola.

²⁴Nadu na ananggu yiana ba mbàda meti-naka, nàhu luri beli-nanyaka; nyuna mbàda mbulangu-naka, nàhu hunggu beli-ndanyaka’. Ka pakiringu-danyaka paremi pambabu.

²⁵Ba talànga tunaka nu, na ana ma-maaya ninya la woka. Ba nabeli-ka dàngu ba na-mareni-nyaka na uma, rongu-nanyaka lingu anamongu dàngu remi marenja.

²⁶Hi na-paaungu haàtu welingu la atana, hi na-paàrangu, ‘Nggàra ula-yaka nu la uma?’ hi wàna.

²⁷Nahema na atana, ‘Ni beli-nyaka na erimu, miri! Tàka na amamu hi na-paràhangu parupu heu ana hapi mboka, nadu ba ngala beli-nanyaka na anana dàngu nda nggàra ehina!’ wàna.

²⁸Mbeni nda ukuya na ana ma-maaya hi lupa nda nabihu patama la uma. Ka luhu-nanyaka na amana pa-pamanda-nya ka natama ba wàna.

²⁹Tàka napaya nyuna, ‘Pira mbua ndau bia-ngguka ba kutika pameti paràma lai nyumu. Nda ku-handàkangu-ma duku pawàhi-ya la ngarumu. Màla nggàraka nu pawua-mungga nyungga? Mili heu-aka ana kamàmbi kau wuangga ka kumbabu dànja duku da angu lànggi-nggu. Ndedima!

³⁰Tàka na anamu na ma-pambuta-ha da bandamu la kawini pahunda, ba hina-kaka natàka beli, manyamalu rupu-ma-amunya ana hapi mboka nyuna!’ wàna.

³¹Napaya na amana, ‘Ananggu, nyumu ni mànu-manggau la lihinggu. Da bandanggu nyungga bandamu nyumu-maha.

³²Tàka nàhu tambabu ta-hawola bàdi, nadu na erimu na mambàda meti, tàka nàhu luri beli-nanyaka; nyuna mbàda mbulangu-naka, tàka nàhu hunggu beli-ndanyaka,’ ” wànanya.