Read Kambera LUKAHU 16 Bible Online

LUKAHU 16 - Kambera bible

LUKAHU 16

¹I Yehu napeka-nja da makiku-nya, “Ninya na haàtu na tau wulu. Nyuna ningu haàtu matanggu paloku-nya àmahu dàngu na ma-tàngaru-ha da pawulu-na. Ningu ma-patàka-nya nuna na tau wulu, na tau na ma-paloku àmahu ba nahiru hàruha da àmahu-na.

²Jia hi napaau-nya nuna na ma-paloku àmahu hi napeka-nya, ‘Nggàraya nu na parongu-nggu na rukumu nyumu? Nàhu, pamàtu-hawa da huratu dihada da bandanggu da pa-paloku-mu. Nyumu nda peku-anapa pakatangu ma-paloku àmahu lai nyungga,’ wànanya.

³Ka pa-ngàdangu-nanyaka nuna na ma-paloku àmahu, ‘Nggikina wànggu-aka bàdi nàhu? Na miringgu nda na-pakata-anggapa pa-paloku àmahu. La paràma woka nda kumàka, tàka la pakarai hunggu ku-makia.

⁴Ninguka wulu akanggu, era pahàla-nanggaka na miringgu, kutuuka bàdi ariyaa dangunggu, ka peku pahia-dangga umada!’ wàna.

⁵Jia-duyaka, nuna na ma-paloku àmahu hi napaau-nja da maningu wutangu la mirina. Na ma-wungangu na-paàra-nya, ‘Pira nyumu wutamu la miringgu?’ wànanya.

⁶Nahema na tau nuna, ‘Hangahu mbàlu mina haitungu,’ wàna. Na ma-paloku àmahu napanii, ‘Yiana na huratu wutamu. Mandapu kau tulihu lima kambulu-a,’ wànanya.

⁷Tunaka nu hi na-paàra-nya na tau na padua wàna, ‘Nyumu angu dedi pira wutamu?’ wàna. Nahema na tau nuna, ‘Harata karungu uhu,’ wàna. Napanii na ma-paloku àmahu, ‘Yiana na huratu wutamu. Tulihu: walu ngahua,’ wànanya.

⁸Tàka na mirina nuna na ma-paloku àmahu nda patutungu na wotunya ba namàhi tuna nu la paràma-na, nadu na tau pinu tana ba namàhi-dupa la pa-paloku-ya na lurida welingu la tau na maluri la hambila,” wàna.

⁹Hàla i Yehu hi nahili panii, “Rongu! Wànjawa da pawulu pinu tana yiana ka ngalangu wàngu angu, napa tiangu era nda ningupa linguda da pawulu pinu tana, nyimi napa payema-kaika dimi la pangia ma-palupangu.

¹⁰Na tau na pa-monungu la maana haku - kuduna, peku pa-monungu-ya la mabo - bokulu. Tàka na tau na panda peku monungu la maana hakudu-na, nda peku monu-mbunya la mabo - bokulu.

¹¹Jia ba tuna, jàka nda pamonu-manggaipa la pawulu pinu tana yiana, nggamuipa na mamonu-nggai la pawulu pangahu?

¹²Dàngu da ngera malanja mangu tau hawiangu, ba itakai jàka nda pa-monungu-kai, nggamuipa na mawua-nggai malanja wikimi làti?

¹³Nda ningua haàtu tau mapeku parama la tau madua pa-tangara-na; nadu napa narihi mbuha-nyapa na haàtu tàka na haàtu ndia-a jàka, ndia napa narihi tuturu-nyapa na haàtu tàka na haàtu ndia-a. Tuna numbu nyimi. Nyimi nda peku-ana la palumu-nya i Ala dàngu la palumu-nya na pawulu wàngumbu,” wànanja.

¹⁴Da tau Parihi darongu hàla-maha da papeka-na i Yehu. Hàla ka riki-danyaka, nadu ba da-kabàlikungu àmahu.

¹⁵Tàka i Yehu hi napanii-nja nyuda, “Nyimi-maka naa la hangga tau hawiangu ba itakai bai pa-deningu, tàka i Ala napi-manya na ihi etimi. Nadu nggàraya na majangga ba nakaka-ya tau, tàka nawawa-ma-a ba naita-ya paraïna i Ala.

¹⁶Da uku da pawua-na i Muha dàngu da pa-ajaru-da da wunangu, pa-daingu ninguma linguda lundu tomaya la rehina i Yuhani Parunungu. Piti welingu nu na Lii Mànangu rukuna i Ala napa ba na-pareta ba hanganji-ya pa-bobaru pa-ngalangu-mayaka. Tàka na tau hi na-pamukarungu wikina patama la angu banjaru-na i Ala.

¹⁷Tàka namuda ningupa na awangu dàngu na tana la pa-munangu, welingu la hau kadutulu la Ukuna i Ala la pa-maromba.

¹⁸Nggamuya na ma-pahewa dànya na papaha-na hàla hi na-kanoma kawini haàtu, na tau nuna njuraku-nanya. Dàngu jàka nggamu na ma-kanoma-ya na kawini na pambàda pa-hewangu, njuraku-mbunanya,” wàna.

¹⁹“Ninya na haàtu na tau wulu. Da pakina mambana wili juaha, dàngu na-mbokaru mànu na lurina hau lodu - hau lodu.

²⁰La ngaru pindu umana pa-bànjalu-ya na haàtu na tau mila, Laharu-ya na tamuna. Napongu hàla na ihina.

²¹Na-mangàbangu pa-paihi-nya na kambuna ana kamumu ma-kanabu welingu la menjana nuna na tau wulu. Tàka da ahu maidanyai pajàli-ha da ponguna.

²²Tunaka nu meti-nanyaka nuna na tau mila, hi dangàndi-ya papalewa la pangia mahàmu la karaha-na i Ambarahàmu la awangu. Na tau wulu meti-mananyai duna, hi taninya.

²³La pangia tau meti pàda-nanyaka na mayila langatàka. Tàka ba na-tàngaru-ka welingu lai nu hu dita, ita marau-nanyaka i Ambarahàmu la pangia mahàmu dàngu i Laharu ninya la karaha-na.

²⁴Ka kaladaku-nanyaka nuna na tau wulu, ‘Dou Ama Ambarahàmu! Mila àrungga eti. Paràha àrunya i Laharu ka nahàbu-ya na wua limana la wai, ka namai àru pa-pambaha-ya na làmanggu. Lalu mbana mayila-mangguka yia daa la epi!’ wàna.

²⁵Tàka nahema i Ambarahàmu, ‘Dou na ananggu: namuya ba talànga luri-mupa ba mbàda ngala hàla-munyaka na mahàmu jua, tàka i Laharu duna manda hàmu jua-ma-aya na pangala-na. Nàhu nyuna hàmu-nanyaika duna, tàka nyumu mayila-munyaka.

²⁶Hinggilu-nai, la manggawa-mi nyimi dàngu nyuma mbàda ni-manyaka na njuruku manjolungu, hi nda pekuna na tau lai yiahu palua lai hiana dàngu na tau lai hiana nda pekuna pamai lai yiahu!’ wàna.

²⁷Nanapa-ya na tau wulu, ‘Jàka tuna nu ama kukarai weli etinggau, kau paràha àrunya i Laharu la umana na amanggu.

²⁸Lai nu ninjapa ba tau malima-ha da angu dedinggu. Màla àru i Laharu ka nalua pa-panamu-nja, ka àmbu da-kanabu la pangia mayila yiana,’ wàna.

²⁹Nahema i Ambarahàmu, ‘Ka ba ni-madu-njaka lai nyuda da mbukuna i Muha dàngu da wunangu dangu! Màta bia ka da-patundu-nja da ihida da mbuku nuda!’ wàna.

³⁰Tàka nahema na tau wulu, ‘Nda da-jàmungu-a ama Ambarahàmu. Hau-mayapa jàka ningu tau meti maluri beli ka nalua papanii-nja, napa da-panjilungu-ma duda welingu la njalada,’ wàna.

³¹Tàka na-napaya i Ambarahàmu, ‘Jàka ndia-madu da-wàrihu-ha da pareta-na i Muha dàngu da wunangu, jiangu-maka duda ba nda dawaiya, jiapa-kadu ka ningu tau meti maluri beli,’ hi wànanya,” wàna.