Read Kambera LUKAHU 17 Bible Online

LUKAHU 17 - Kambera bible

LUKAHU 17

¹I Yehu napeka-nja da makiku-nya, “Màtu - màtu ma-pawitingu hi kiri tuna manjala na tau ningu-maka duna napa. Tàka pàda pàku-nanyaka na ma-pawiti-nya hi kiri njala tuna nu!

²Làti nahàmu-pa ka hondunya watu nggihu na nggoruna ka puhaya la tehiku, nggàrai nyuna ba na-pawiti-nya hi nanjala wàngu na haàtu na makudu tungu yia.

³Jiaya nu rimangu! Jàka nanjala na angu dedimu, kanyànginya. Jàka na-manjaria-du, jàmanya.

⁴Jàka na-papihu wundangu panjala lai nyumu la hau lodu, tàka handàka - handàka ka namai lai nyumu papeka njalana, jàma-manya,” wàna.

⁵Da ngara pa-pahurungu dapanii lai Miri Yehu, “Miri, pamàndu àrunya na pawaima,” wàda.

⁶Nahema i Miri, “Nyimi jàka ninya na pawaimi mili ana hama karohu hawiya, pekuna nyimi kai paràha-nya yiana na pingi murumbai, ‘Tambuta-wa kau tumbu ningu la tehiku,’ jàka wàminya, napa na pingi ai nuna na-patundu-manya duna na pareta-mi,” wànanja.

⁷“Era ningu lai nyimi maningu atangu na malua paluku la woka jàka ndia na malua pa-pawangu mbimbi. Ba nabeli-ka nuna na tau ata, màla, ‘Luma mai kau ngangu,’ wàna-nyaka nu na atana?

⁸Ndia-a, na-panjàngangu-na, napa paràha-mana-nyaka duna, ‘Paloku-ha da pangangu-nggu. Pakiha da pakimu da maili, kau tutuka ba kungangu ba ku-ngunungu; hàla nu kau nganguka nyumu,’ nda wànanya-kapa.

⁹Jia wotu-nanya-kaka nu na atana, ba na-patutu hàla-nyaka na pareta-na na mirina, ndia wàngguka?

¹⁰Tuna numbu nyimi. Nyimi jàka mihàla ndàba-haka da pa-paloku da pa-pareta-nanggai, màtawa, ‘Nyuma ata nda ningu lingungu-kama; nyuma patutu-manya na wai ngerama-ama,’ kawàmi,” wànanja.

¹¹Nàhu la ànda ba nalaku la Yeruhali i Yehu nali la padira Hamaria dàngu Nggalilia.

¹²Ba natama-nyaka na hau na kotaku, mai-danyaka lai Nyuna ba tau hakambulu-ha da mahidu manula pa-mayitangu.[22] Da-ndolaku marauma,

¹³hi da-warangu, “Yehu, Miri! Mila àru-nggama eti!” wàda.

¹⁴Ba naita-haka paraïna i Yehu, panii-nanyaka, “Iluawa la ratu - ratu, karaiha ka da-pareha-ha da ihimi,” wànanja. Nàhu ba talànga laku-daka, munangu-danyaka da mahidu-da.[23]

¹⁵Na haàtu welingu lai nyuda, ba na-pàdangu-ka wikina ba màlaru-nanyaka, beli hawola-nanyaka ba dàngu wotu-nanya i Ala.

¹⁶La hanggana i Yehu, patika-nanyaka ba na-pamalangu-nya i Yehu. Na tau nuna tau Hamaria-ya.

¹⁷Tunaka nu i Yehu hi napanii, “Ka nda tau hakambulu-aha da pa-pamàlaru? Nggihaka da tau mahiwa?” hi wàna.

¹⁸Nggikina hi jia-aya yiana na tau hangàdangu-ma-a na mabeli la pa-pamalangu-nya i Ala?” wànaka.

¹⁹Hàla i Yehu hi napanii-nya nuna na tau, “Hadangu-wa dàngu luawa. Rukuna na waimungga Nyungga jia hiu màlaru,” wànanya.

²⁰Ba mapira-ha da tau Parihi dapaàra-nya i Yehu, pirangu-ka natàka i Ala la pa-pareta, wàdanya. Nahema i Yehu, “Na pareta-na i Ala nda na-pakiri wàngua tanda - tanda paita tau,

²¹hi lupa ningu mapanii, ‘Mai iluya, yiana-ya!’ jàka ndia, ‘Lai nuya!’ ka wàna. Nadu i Ala ba mbàda pareta-manaka la hongami nyimi,”[24] wànanja.

²²Hàlaka nu i Yehu hi napanii-nja da makiku-nya, “Napa nàmunya na rehina bai rinjungu nyimi paita-ya na haua na lodu welingu la lodu - loduna na Ana Tau, tàka ndai ngalangu-a paita-ya.

²³Napa ngeru ningu tau mapanii-nggai, ‘Tàngaru lai nu!’ jàka ndia, ‘Tàngaru lai yiahu!’ na mawàna-nggai. Tàka màtangu àmbi luhudu pa-tàngaru-ya.

²⁴Hama tuna na kabilaku na ma-tapanangu la awangu, dàngu na ma-kajilaku welingu la hupu lundu la hupu, tuna numbu napa na hadana na Ana Tau jàka jiaya na rehina.

²⁵Tàka la kawu - wungana na-pàdangu-mapa bàdi mayila dangu, dàngu ba nda nainga-ya paraï tau la rehi nàhu.

²⁶Napa la rehi pawuwa-ya na Ana Tau, na hadana beri hamana la rehina i Nuhu la handàka-na.

²⁷Na tau ngangu ngunungu-nanya, lalei mangoma-nanya na pangalangu-na lundu natama i Nuhu la kapalu, ka tàka-nanyaka na iwa, hi nameti hàla na tauka mbuu ndàbana.

²⁸Hama-mbunai la rehina i Lòtu. Na tau ngangu ngunungu-nanya, danggangu kei-nanya, tondungu-nanya dàngu wulu-nanya uma.

²⁹Tàka ba naluhu-ka i Lòtu welingu la Hondumu, la lodu nunama ba napuru na epi dàngu na tana lira welingu la awangu, na ma-patàlaru hàlaha nyuda mbuu ndàbada.

³⁰Tuna numaka na hadana ngeru, la lodu pawuwa-ya na Ana Tau.

³¹La lodu nuna na tau na ma-talànga ninya la toku ndidu umana àmbu napuru-dupa papiti-ha da malanja-na da maninja la kuru uma. Tumbunai na tau na ma-talànga ninya la woka àmbu nabeli-dupa la umana.

³²Namuya jàka nggàraya na madedi na rukuna na papaha-na i Lòtu!

³³Na tau na ma-kunjangu pa-pamara-ya na lurina, napa na-yàmihu-ya na lurina. Tàka na tau na ma-yàmihu-ya na lurina napa pamara-nanya.

³⁴Iwaiya: La rudungu nuna, da tau madua da ma-katuda la hau nggala, na haàtu pangàndi-ya tàka na haàtu pa-màtangu-ya.

³⁵Da tau kawini da madua da manggihu uhu nggàndumu, na haàtu pangàndi-ya tàka na haàtu pa-màtangu-ya. [

³⁶Da tau madua da ma-talànga ràma la woka, napa na haàtu pangàndi-ya tàka na haàtu pa-màtangu-ya,”] wàna.

³⁷Ka paàrangu-danyaka da makiku-nya i Yehu, “Ka nggika nu nadedi ningu, Miri?” wàdanya. Nahema i Yehu, “La nggiya na maningu ma-metingu, lai numaha da ma-hawurungu da makàli ngangu meti banda,” wànanja.