Read Kambera LUKAHU 18 Bible Online

LUKAHU 18 - Kambera bible

LUKAHU 18

¹Hàlaka nu i Yehu napeka-nja hau pangerangu ba na-ajaru-ha da makiku-nya ka peku hamayangu mànuda dàngu ka àmbu dambàta yàdu.

²I Yehu napeka-nja, “La hau paraingu ninya haàtu-na na hakimu na manda mangàdatu-nya i Ala dàngu na manda wàrihu anguna patau jiapa nda nggamuya.

³La paraingu lai nu nimbunya haàtu-na na kawini meti lei, na-pambira wundangu biaka ihu pamai la hakimu pakarai-ya ka napanii wànya na palakara-nggu ba wàna. ‘Ndula àruka ka kuhangga-nya na papa palakara-nggu,’ wànanya.

⁴Mandai-maka nuna na hakimu ba nda na-tanggidangu pandula-ya nuna na kawini meti lei. Tàka la malamiri nuna na hakimu na-kanandi-nya, ‘Jiapa ka nda ku-mangàdatu-nya i Ala dàngu ka nda ku-wàrihu angunggu patau,

⁵tàka na kawini meti lei yiana ba nutakungu-mananya pa-kumilu-ka ku-pakawana-yaka bàdi. Jàka ndia, napa nua naingu-mana ba namai hi na-pahanduka-ka,’ ” wànaka.

⁶Hàla i Miri panii-nanyaka, “Kai tàngaru-ya jàka nggàra wàna na hakimu na manda padeningu!

⁷Na, màla i Ala nda na-pakawana-aya na palakara-na na banjaru wikina na mawara-nya Nyuna rudungu lodu? Jia pa-mangenahu-nanya-kaka la pandula-ha nyuda?

⁸Iwai-ya: Nyuna napa nalu pa-kawana-maha duda la palakara-da! Tàka jàka namai na Ana Tau na-tomangu-pa ihu tau mawaiya Nyuna la pinu tana yiana?” wàna.

⁹I Yehu napeka-mbunja na pangerangu yiana, na pa-patuba-nanya na tau na ma-pawawa-ya na tau hawiangu, na ma-kawana-nya ba didi-aya nyuna na tau hàmu.

¹⁰Napanii i Yehu, “Ninja da tau madua da malua la Umana i Miri la pa-hamayangu. Na haàtu tau Parihi-ya tàka na haàtu tau ma-pahurungu hilu katiku-ya.

¹¹Na tau Parihi ndolaku meha-mananya ba na-hamayangu,[25] ‘Dou Ala, ku-pamalangu-nggau, nadu nyungga ba nda hama tuna na tau hawiangu na ma-manganga eti, na ma-palapingu, jàka ndia na ma-njuraku. Ku-pamalangu-nggau nyungga ba nda hama tuna na ma-pahurungu hilu katiku nina.

¹²Nyungga ku-puaha pa-nduangu la hau minggu, dàngu ku-maraku-nggau hangia la hakambulu welingu la pangala-ngguka,’ wàna.

¹³Tàka na ma-pahurungu hilu katiku duna na-ndolaku mara - rauma, nda natoru mbenimbu pa-tangara la awangu. Dàngu odahu-nanya na kuruna, ‘Dou Ala, mila àrungga eti, nyungga yia tau njala yia!’ wàna,” wàna.

¹⁴“Iwaiya!” wàna i Yehu, “ba dabeli-ka la uma, jiaya na ma-pahurungu hilu katiku na payema-na i Ala ndia-a na tau Parihi. Nadu jiapa nggamuya na ma-pajangga wikina napa pawawa-ya; dàngu ka nggamu biaya na ma-pawawa wikina napa pa-pajangga-ya,” wàna.

¹⁵Ninja da tau da mangàndi-ha da anakeda kudu lai Yehu, ka naràma-ha dàngu ka na-pakanyuru-nja wàda. Ba daita-yaka na matuna nu paraï da makiku-nya i Yehu, mbeni-danjaka da tau nuda.

¹⁶Tàka i Yehu hi napaau-nja nuda da anakeda, hàla hi napeka-nja da makiku-nya, “Pulinja da anakeda ka damai lai Nyungga! Àmbi hiri-dunja, nadu ba da tau da matuda yiadu da ràka angu banjàru-na i Ala.

¹⁷Pangàda-nya! Na tau na manda mai lai Ala hama tuna anakeda-ya, napa nda jia njadi-ana banjaru-na i Ala,” wàna.

¹⁸Na haàtu na ama bokulu Yahundi na-paàra-nya i Yehu, “Umbu Ngguru mahàmu, nggiki wàngguka bàdi nyungga ka peku ngala-nggunya na luri na ma-langatàka dàngu na ma-palupangu?” wànanya.

¹⁹“Ka nggikina hiu panii ba mahàmuka Nyungga?” wàna i Yehu ba na-paàra-nya. “Nda ningua mahàmu didi-aya i Ala.

²⁰Nyumu mbàda pi-mamu-njaka da pareta-na i Ala: ‘Àmbu njuraku, àmbu pameti tau, àmbu manganga, àmbu hakahii kambàliku, dàngu tembiha da amamu da inamu,’ ” ba wàna.

²¹Nahema na tau nuna, “Nudaka da pareta ba wàmu mbàda nunju weli pabidi mini-manggu-njaka,” wàna.

²²Narongu-yaka nuna, panii-nanyaka i Yehu, “Hangia-kidu-anaka na pawàmu bàdi: Dangga hàlanja da bandamu, da àmahu wilida kau paberi-nja la mamila, tàka nyumu ngalangu-munyaka banda la awangu. Hàlaka nu mai kau kikungga Nyungga,” wànanya.

²³Tàka na tau nuna ba narongu-yaka nuna, biti-nanyaka nadu ba lalu wuluna.

²⁴I Yehu napi-manya na tau nuna ba handuka-nanya, jia-duyaka hi napanii, “Harui langatàka na mawulu panjadi angu banjaru-na i Ala!

²⁵Namuda ningu na heu ota patama la kubu utu welingu la tau wulu patama la Pinu Tana Bidina i Ala,” wàna.

²⁶Da tau da marongu-ya i Yehu ba napanii tuna nu paàrangu-danyaka, “Jàka tuna nu ka nggamu-ayaka na mapeku la pa-mànangu?” wàdanya.

²⁷Nahema i Yehu, “Na manda peku ba wàna na tau, napeku lai Ala!” hi wàna.

²⁸Ka panii-nanyaka i Peturu, “Tàngaru! Nyuma yia ma-dunjaku-njaka da kuru umama la pakiku-nggau Nyumu,” wàna.

²⁹Napaya i Yehu, “Waiya! Na tau na ma-dunjaku-nya na umana, jàka ndia papaha-na, jàka ndia angu dedina, jàka ndia inana amana, jàka ndia anana paraï palumu-nya i Ala,

³⁰na tau nuna napa na-ngalangu himbalu-na nda pira wunda bia la rehi nàhu, dàngu la rehi na manàmu-nya nyuna pa-wuangu-ya luri langatàka dàngu luri pa-lupangu,” hi wàna.

³¹I Yehu na-pauhi mehanja da tau makiku-nya, hàla hi napanii-nja, “Rongu! Nàhu nyuta hanggangu-ndanya la Yeruhali. Lai nu, napa patutungu-danyaka da pa-tulihu-da da wunangu rukuna na Ana Tau.

³²Nyuna napa pa-pakatangu-yaka la tau nda Yahundi, napa da-pajulu wànya, da-pamakia-ya dàngu da-pangànji-ya.

³³Napa da-pamayila-ya dàngu hi da-pameti-ya, tàka la lodu pa-tailu wàna Nyuna napa na-hadangu beli,” wànanja.

³⁴Mbuu ndàbana nuna nda hawutu hàmburu ndoku-danya paraï da makiku-nya i Yehu. Na àndada da papanii-na i Yehu pa-kàpingu-yapa lai nyuda. Nda dapinya jàka nggàraya na papanii-na.

³⁵Ba mareni tàka-naka i Yehu la Yeriku, na haàtu na tau poki mandapu-na-padua pakarai pa-ndemangu la hingi ànda.

³⁶Ba narongu-yaka na tau dangu na manàhu-nya, paàrangu-nanyaka, “Nggàraya nàhu?” wàna.

³⁷“Jiaya i Yehu tau Naharitu na manàhu-nya,” hi wàdanya.

³⁸Ka kaladaku-madua-nanyaka na mapoki, “Dou Yehu, anana i Ndautu, mila àrungga eti!” wàna.

³⁹Da tau la ngaba dambeni-nya hi da-paràha-nya pakandii. Tàka nyuna manaü kaladaku pa-kodungu-ma-ana, “Dou Anana i Ndautu! Mila àrungga eti!” wàna.

⁴⁰Ka pànjangu-nanyaka i Yehu, hi na-paràhangu pangàndi-ya nuna na mapoki lai Nyuna. Ba ninyaka hi na-paàra-nya paraïna i Yehu,

⁴¹“Màla ka nggàraya nu na pambuha-mu welingu lai Nyungga?” hi wànanya. “Miri, ka kuita àru wànggu,” hi wàna na mapoki.

⁴²Ka panii-nanyaka i Yehu, “Jàka tuna nu, itawa! Jia bau waika Nyungga, jia hiu màlaru,” wànanya.

⁴³La mbàdiku-na nunama-a ba naita, ka kiku-nanyaka i Yehu ba dàngu pa-malangu-nanya i Ala. Ba naita-yaka tau dangu na matuna nu, wotu hàla-danyaka i Ala.