Read Kambera LUKAHU 19 Bible Online

LUKAHU 19 - Kambera bible

LUKAHU 19

¹Ba natàka-ka i Yehu la Yeriku, laku pa-ngalangu-nanyaka ba nali la paraingu lai nu.

²Lai nu la paraingu ninya haàtu-na na kapala kei hilu katiku na mawulu. Na tamuna Hekeu-ya.

³Na-rinjungu paita-ya i Yehu, tàka ba lalu danguna na tau tàka nyuna wiki tau kendaru-ya, nda nawàngu papeku-ma paita-ya i Yehu.

⁴Jia hi napalai mangilu-nya na tau dangu, hàla hi nahei la hareti pingi ai, ka peku ita-nanya i Yehu napa tiangu ba nali lai nu.

⁵Ba natàka-ka i Yehu lai nu la pingi ai, hi na-tangara-ya hi napanii dànya i Hekeu, “Hekeu, puru pa-renggangu! Nadu ba linggunya la umamu la lodu nàhu,” hi wànanya.

⁶Ka puru pare - renggangu-nanyaka i Hekeu hi na-hàmburu mbaha etiya i Yehu.

⁷Mbuu ndàbana na tau na maita-ya nuna hoputu-nanyaka. Dapanii, “Yi! Ka ni hi linanyai pambawa la uma tau nda hàmu!” wàda.

⁸Tunaka nu la umana, i Hekeu ndolaku-nanyaka hi napanii lai Yehu, “Miri, hawiangu da bandanggu ka kuhunggu-nja la tau mila wànggu; dàngu jiapa ka nggamuya na palapi-nggu handàkangu, napa kuwua belinya papatu wundangu!” wàna.

⁹Hàla hi napanii i Yehu, “La lodu nàhu nyumu dàngu na kuru umamu mbuu ndàbana pamàna-nanyaka paraïna i Ala dàngu napa wua-nanggauka luri bidi, nadu nyumu ba wàlana i Ambarahàmu-madukaui dumu.

¹⁰Na Ana Tau maina pahimbu-ya dàngu pa-pamàna-nya na tau njàrangu,” wàna.

¹¹Ba talànga patingi-nanyaka tau na paniina i Yehu, peka-nanyaka na hau na pangerangu. Nadu, la rehi nu mareni-mana-nyaka la Yeruhali, dàngu ba nakaka-ya tau i Ala napa lu pareta-nanyaka ba Hanganji-ya la pinu tana.

¹²I Yehu napanii, “Ninya na haàtu na maràmba na malaku la tana mamarau la pa-katua-ya ka na-hanganji, jàka hàlaka hi namangu pabeli.

¹³Ba ndedi nalaku napaau-nja ba tau hakambulu-ha da atana, hàla hi na-maràngga wuanja hau àmahu rara. ‘Idanggangu wànjawa yiada da àmahu ba talànga nàhuka,’ wànanja.

¹⁴Tàka da tau da ma-mandapu-nya nuna na tana nda da-mbuhanya. Jia ba taliu-naka hi dapalewa tau papanii, ‘Nda mambuha-anya duma na tau nuna la pa-hanganji-nggama,’ wàda.

¹⁵Ba tuna na maràmba nuna pa-katua-yaka la pa-hanganji, tunaka nu beli-nanyaka la tanana. Hi na-paau parengga-nja da atana pahurungu, ka kupinja jàka pira utu pangala-da, wàna.

¹⁶Na ata na mamai mangilu napanii, ‘Miri, na àmahu-mu ba hauna na pawua-mungga, ku-patoma-njaka hakambulu,’ wànanya.

¹⁷‘Hàmu,’ wàna na mirina, ‘nyumu ata hàmukau! Nyumu ba pa-monungu-kau la maana hakudu - hakudu-na, napa kutukau ma-kuaha-ha da hakambulu mbua paraingu,’ wànanya.

¹⁸Na ata na padua wàda hurungu-nanyaka hi napanii, ‘Miri, na hau na marara na pawua-mungga, ku-patoma-njaka lima,’ wànanya.

¹⁹Na hanganji napanii-nya na atana, ‘Nyumuka ma-kuaha-ha da lima mbua paraingu,’ wànanya.

²⁰Na ata na haàtu namai hi napanii, ‘Miri, yiana-yaka na àmahu-mu, ku-pahàmu-maya duku la hapu tanganggu.

²¹Ku-mangàdatu-nggau Miri, nadu nyumu ba tau mbana etikau. Nyumu mupiti biaha da panda mangumu, nyumu bau muti biaha da panda tondumu,’ wàna.

²²Napaya na hanganji, ‘Nyumu ata akatu-kau! Pa-jàngapu-nja da papanii dumu, nyumu napa kuhuku-nggau. Nyumu mupingga ba tau mbana etika ba kupiti-ya na nda mangunggu dàngu ba kumuti-ya na panda tondunggu.

²³Jàka tuna nu ka nggikina dumu hi ndau patama-nya nuna na àmahu-nggu la mbàngu, làti jàka kubeli ka kungala-nja da anana?’ wànanya.

²⁴Tunaka nu, nyuna na hanganji hi napanii-nja da tau da ma-ndolaku lai nu, ‘Pitiya nana na àmahu welingu lai nyuna ka wuanya na ata na maningu ma-rarangu hakambulu,’ wànanja.

²⁵Tàka nyuda da tau, ‘Miri, nyuna ba ningu-maduka hakambulu-na,’ wàdanya.

²⁶Nahema na hanganji, ‘Ngàdaya: Na tau na mambàda ningungu, napa ba hili wua pada-manyaipa. Tàka na tau na manda ningu ndokungu ngga - nggàra, jàka nggàra-kiya na mani-kinya lai nyuna, napa ba papiti beli-duyaipa welingu lai nyuna.

²⁷Tàka nàhu ngàndi-hawa nàmu da papanggu da manda mbuhangu pa-hanganji-ngga. Pameti hàlaha la hangganggu!’ wànaka na hanganji,” wàna.

²⁸Ba nahàla i Yehu papeka ndàbaya nuna, mangilu-nanjaka nyuda ba dalaku la Yeruhali.

²⁹Ba datàka-ka la lihina la Mbetupanggi dàngu la Mbetani la Palindi Haitungu, na-paràha-nja da tau madua da makiku-nya pa-mangilu.

³⁰“Iluawa la kotaku ni lua la hangganda,” wànanja paraïna i Yehu, “jàkai tamaka lai nu, napa miita-ya na heu na ana kalandai na pahondu. Na kalandai nuna ndedi ningu handàkangu ma-kaliti-ya. Wàkahu-ya nuna na kalandai kai ngàndiya nàmu.

³¹Jàka ningu tau ma-paàra-nggai, ‘Nggikina hi mi-wàkahu-ya nana na kalandai?’ jàka wànanggai, ‘Ningu ihi wàngu wàna i Miri,’ ”[26] wàminya.

³²Nuda da tau da makiku-nya i Yehu lua-danyaka, na-jàngapu hàlama hama tuna ba wànanja.

³³Ba talànga wàkahu-danyaka nu na ana kalandai, panii-nanjà paraina mamangunya “Ka ni nyimi hi mi-wàkahu-ya nana na kalandai?” wànanja.

³⁴Dahema nyuda, “Ningu ihi wàngu wàna i Miri,” wàdanya.

³⁵Ka ngàndi-danyaka nuna na ana kalandai lai Yehu. Tunaka nu hi da-wàlahu-ha da kalembi bokulu-da la kajia kalandai dàngu hi ndulaya i Yehu pa-kaliti-ya nuna na kalandai.

³⁶Ba talànga nàhu-nyaka ba na-kaliti kalandai, na tau dangu wàlahu-danjaka da kalembi-da la ànda.

³⁷Ba mareni tàka-ama-naka i Yehu la Yeruhali, la ànda pa-kamburungu la Palindi Haitungu, mbuu ndàbada da makiku-nya da madangu pakiringu-danyaka pa-warangu ba dawotu-nya i Ala dàngu ba da-pamalangu-nya Nyuna, nadu lumuda da pa-hangàtarungu da pambàda hakahii-da.

³⁸Dawara, “Oha-anaka na Hanganji na mamai la tamuna i Miri! Mànjaku-nanyaka la awangu dàngu pa-wotungu-yawa i Ala!” wàda.

³⁹Ba mapira-ha da tau Parihi welingu la honga tau dangu dapanii dànya i Yehu, “Umbu Ngguru, paràha-nja da makiku-nggau ka da-kamàndalu,” wàna.

⁴⁰Nahema i Yehu, “Iwaiyawa! Jàka da-kamàndalu nyuda, da watuka yiada da mawara,” hi wànanja.

⁴¹Ba namare - reni-nyaka la Yeruhali dàngu ba naita-yaka na paraingu, hii-nanyaka,

⁴²“Hai-a-ai, nahàmu-kadua-ka làti la lodu nàhu jàka upinya nggàraya na ma-patàka-nggau mapeku! Tàka nàhu nyumu nda peku ita-munya.

⁴³Nyumu napa hunggu-munyaka na hau rehi, na ngia papeku-na na muhumu ba natunggau ma-pahàmbarungu la weli winggiru-mu; napa nyuda da-nggupulu-kau dàngu da-kadohaku-kau lai nu - lai nu.

⁴⁴Nyuda napa da-palàjaru karia-nggau dàngu mbuu ndàbana na ma-mandapu-nggau; hi lupa nda haumbu watu pamàta-da napa ma-panunggulungu la pangia-da, nadu nyumu ba ndau eti wànya na rehi rapa tàkana i Ala la pa-pamàna-nggau!” wàna.

⁴⁵I Yehu natama la Umana i Miri, hi nawàngga hàlaya na ma-danggangu lai nu.

⁴⁶“Daa la Huratu Matua,” wàna ba napeka-nja, “ninya na pa-tulihu, ‘Na Umanggu, uma ngia pa-hamayangu-ya!’ wàna i Ala. Tàka nyimi tuminyai hibu tau rambangu!” wànanja.

⁴⁷Hau lodu - hau lodu i Yehu na-ajaru daa la Umana i Miri. Da ratu kapala, dàngu da ngguru anggama, lupa da ama bokulu Yahundi da-patikingu pa-pameti-ya Nyuna,

⁴⁸tàka nda dahunggu ànda la palaku-nya nuna, nadu mbuu ndàbana ba pa-nuangu-mananya la pa-patingi-nya paraï tau dangu, ka ba na-pamataru etidu na panii-naka.