Read Kambera LUKAHU 20 Bible Online

LUKAHU 20 - Kambera bible

LUKAHU 20

¹La hau na lodu i Yehu talànga ajaru-na dàngu bobaru-nanya na Lii Mànangu welingu lai Ala la tau - tauka na maninya daa la Umana i Miri, da ratu kapala, da ngguru anggama dàngu anguda pa-ama bokulu Yahundi-ka, damai

²hi dapanii dànya i Yehu, “Màla kamangu kau peka-nggama nyuma, nggàra-yaka na latana hi mu-palaku hàlaya yiana yia? Nggamu mawua-nggau hàku nyumu?” wàdanya.

³Nahema i Yehu, “Nyunggai duku ka ku-paàra-nja wànggunggai, Kamangu kai pekangga,

⁴i Yuhani ba na-parunungu, nggamu hàku-naka? I Ala jàka ndia tau?” wànanja.

⁵Ka pa-hamangu-danyaka, “Hàkuna i Alaya,” jàka wànda, “ka ni hi ndai waiya, wàna-dundai?”

⁶Tàka jàka “hàku tauya,” jàka wànda, napa hadangu ndàba-nanyaka na tau pa-hàhaku-nda watu, nadu nyuda ba dawaiya i Yuhani ba haàtu wunangu-ya wàda.

⁷Jia-duyaka hi da-pambulu-nya ba dahema, “Nda mapi-anya,” hi wàda.

⁸Nanapa-ya i Yehu, “Jàka tuna nu nda kupeka-anggai duku jàka nggamu hàkuna na pawànggu hi kutuya nuna mbuu ndàbana,” wànanja.

⁹I Yehu napeka-nja da tau na pangerangu yiana, “Ninya na haàtu na tau na ma-pamulanya angguru na hau na wokana. Nahewa-nya tau nu na woka ba tau mapira-ha da matanggu ràmaya, hàla laku-nanyaka la hau tana, lai nàhu ndàdiku mandai-mananya.

¹⁰Ba jia-yaka na rehi pàpu wua angguru, na mangu wokangu paràha-nanyaka na atana la tau da maràma woka la pakeiha da kangeha-na. Tàka nuda da maràma woka hi palu-ma-adanya nuna na atana, hi da-paràha-nya pabeli lima jua.

¹¹Ka hili paràha-nanyaka na atana na haàtu na mangu wokangu; tàka jia-mayai na ata nuna ba dapalu-ya ba da-pamakia-ya paraï da maràma woka dàngu hi da-paràha-nya pabeli lima juana.

¹²Tunaka nu na mangu wokangu hili paràha-nanyaka na atana na padua haàtu wàda. Tàka na ata nunambu dapalu-ya paraï da maràma woka hi da-kawuka-nya la hambeli woka.

¹³Ka ndia-dupa na mangu wokangu, ‘Hilu nggikina wàngguka bàdi?’ wànaka. ‘Napa ku-pangàndi bia-nyawa na ana wikinggu na pambuha-nggu. Jiangu-manguka duna ba datembi-ya!’ wànaka.

¹⁴Tàka da maràma woka nuda ba daita-yaka na anana na mangu wokangu, hi panii-ma-adanya dàngga anguda, ‘Yiana jia-yaka na mangu mangungu. Màlawa ka ta-pameti-ya, ka tamàngi-nya na manguna,’ wàdaka.

¹⁵Ka ruruhu-madua-danyaka la hambeli woka, hi da-pameti-ya,” wànanja. Hàla i Yehu hi na-paàrangu, “Nu, jàka nabeli-ka duna na mangu wokangu, màla nggàra ula-naka hangganja nuda da maràma woka?

¹⁶Napa nàmu-manyaka duna hi na-pameti-ha nuda da maràma woka, tàka nuna na woka pakata-nanyaka la tau maràma hawiangu,” wàna. Darongu-yaka nuna, panii-danyaka da tau lai Yehu, “Ndia-a-pa nyuna nuna!” wàdanya.

¹⁷I Yehu napanau-ha nyuda hi napanii, “Jàka tuna nu nggàra-yaka na àndana na maninya la Huratu Matua la ndalaru yiana? ‘Na watu na panda wàda da tukangu wulu uma, jia bia-yaika na patuu watu la hanamba’ ba wàna.

¹⁸Mbuu ndàbada da tau da manjoru la watu nuna napa da-làjaru; dàngu nggamuya na pa-pinjalu-na na watu napa kabu tana-haka,” wàna.

¹⁹Da ngguru anggama dàngu da ratu kapala dapi-manya ba jiaha nyuda da palangu na pangerangu nuna na papeka-na i Yehu lai nyuda. Jia-duyaka hi da-patikingu payàpa-ya i Yehu la rehi nunama, tàka da-mangàdatu-nya na tau dangu.

²⁰Jia-duyaka hi dawàngu pahimbu ngia papeku-na. Nyuda da hewa tau ka da-pahada tau ma-patànjingu, hi da-paràha-nja la pa-kahili-ya i Yehu, ba dawàngu pa-paàrangu hangia - hangia, ka peku yàpa-ndanya, ka pakata-nya la lima tau maningu ngerangu dàngu kuahangu, lai nggumbunuru, wàda.

²¹Nuda da tau pahewa ka panii-danyaka lai Yehu, “Umbu Ngguru, nyuma mapi-manya mbuu ndàbada da papanii-mu dàngu da pa-ajaru-mu ba da-deningu. Mapi-mbunya Nyumu bau ajaru ba pa-ailulu-ma-amunya na pawuku-na i Ala la tau, nadu nyumu ba ndau tàngaru kaba mata tau.

²²Jiaya nu màlapa kau peka-nggama, tundunya na kalaratu anggama-nda nyuta pekuna nu ba ta-wuangu hilu katiku la Hanganji Bokulu napa hi ndia?” wàdanya.

²³Tàka i Yehu napi-manya na kahili-da nyuda. Jia-duyaka hi napanii,

²⁴“Màla paita-ngga hau àmahu bara. Nggamu nggàmbaru dàngu nggamu tamu-naka yiana yia?” hi wàna. “Na Hanganji Bokulu,” hi wàda.

²⁵“Jàka tuna nu, wua-nyawa na Hanganji Bokulu, na mangu-mana duna na Hanganji Bokulu, dàngu lai Ala na mangu-mana duna i Ala,” hi wànanja.

²⁶Nu la hangga tau dangu nda da-ngalangu-pa pahunggu-nya hau manjala lai Yehu. Hi ndii wàda-ma-aka dàngu maratangu-danya na hemana i Yehu.

²⁷Ba mapira-ha da tau welingu la kalibaru Handuki damai lai Yehu. (Nyuda jiaha da kalibaru da makata-nya na panii, ba nda nahili hadangu-apa na tau na mameti.) Da-paàra-nya i Yehu,

²⁸“Umbu Ngguru, i Muha na-tulihu-ndanya na uku yiana: Jàka ningu haàtu tau mini mameti tàka hi nda ningu anana, na anguna paluhu na-kanoma-ya bàdi nuna na kawini pameti wàruna, ka natunya anana nuna na tau na mameti, wàna.

²⁹Handàka ninja da tau mapihu da ma-paangu paluhu. Na ma-maaya hupu nalalei, tàka nameti dàngu nda ningu anana.

³⁰Tunaka nu na padua wàda, na kanoma-ya nuna na kawini, tàka jia-mbuyai na meti dàngu nda ningu anana.

³¹Hili hama-mbunai na anguda paluhu na padua haàtu wàda, tuna nu pa-ngalangu lundu tomaya na papihu wàda.

³²La malamiri meti-nanyaka nuna na tau kawini.

³³Nu la lodu hadangu belina na mameti, nggamu papaha-nanyaka napa nuna na tau kawini? Nadu ba tau mapihu-ha ba mbàda kanoma-duda-nyaka,” wàda.

³⁴Nahema i Yehu, “Na tau na maluri nàhu nalalei na-mangoma,

³⁵tàka na tau - tauka na ràka pa-pahadangu beli welingu la metina, tàka hi dahuri la rehi na manàmu-nya nda dalalei nda da-mangoma-apa.

³⁶Na hadada hama papalewa-haka, nyuda nda peku-adapa la pameti. Nyuda ana Ala-haka, nadu nyuda ba mbàda pahadangu beli-haka welingu la meti.

³⁷I Muha wiki na-wàlahu pa-habola-mayaka na tau meti napa ba pa-pahadangu beliya. Na pa-tulihu-na na rukuna na wuku rii madàka na maroka ba natiki-ya i Miri, ‘Alana i Ambarahàmu, Alana i Ihàku, Alana i Yakupu,’ ba wàna.

³⁸I Ala nda Ala tau meti-aya! Ala tau luriya duna! Maa ba lumuna i Aladu, hi naluri na tau mbuu ndàbana,” wàna.

³⁹Ba mapira-ha da ngguru anggama dapanii, “Na-jàngapu-madu na hemamu, Umbu Ngguru,” wàdanya.

⁴⁰Jia-duyaka hi nda dahili toru mbeni pa-paàra-nya ngga - nggàra i Yehu.

⁴¹I Yehu na-paàra-nja nyuda, “Nggiki peku-naka na Hanganji Pamànangu wàlana i Ndautu, hi wàndanya? wàna.

⁴²“Nadu i Ndautu wiki ba napanii daa la huratu Ludu Pamalangungu, ‘I Miri napanii-nya na Miringgu: Mandapu-wa la kawana-nggu,[27]

⁴³ka lupa ku-panyàku ndàbaha da muhu - muhu-muka,’ wànanya.

⁴⁴Jia ba tuna i Ndautu wiki ‘Miri’ jàka wànanya na Hanganji Pamànangu, nggiki pekuna wàlana i Ndautu hi wàndanya?” wàna.

⁴⁵Ba talànga pa-tingingu-naka na tau ba napanii i Yehu, napeka-nja da makiku-nya,

⁴⁶“Irimanja da ngguru anggama. Nyuda ba dambawa ngàndiha da kalembi malaida nàhu la ànda, dàngu ka natembi-kama tau nàhu la paràngga - parànggangu ba wàda. Nyuda da-mbuhangu pangia pawiri la uma bungguru dàngu la ngia paremi.

⁴⁷Nyuda da-panyonga-ha da kawini meti lei dàngu ba dawàhi-ha da umada. Dàngu ka hungguru-nya na akatu-da ba da-hamaya pamala - laingu! Na hukungu-da nyuda ngeru nambotu!” wànanja.