Read Kambera LUKAHU 21 Bible Online

LUKAHU 21 - Kambera bible

LUKAHU 21

¹La Umana i Miri, i Yehu naita-ha da tau wulu ba da-patamangu àmahu daa la pàti hunggu.

²Naita-mbuyai na haàtu na kawini meti lei na mambana milana, ba na-patamangu dàmbu àmahu wudu.

³Hàla i Yehu hi napanii, “Rongu: na kawini meti lei yiana dadangu ningupa da pa-patama-na welingu lai nyuda hawiangu.

⁴Nadu nyuda ba patamangu-danya rihi-ana duda welingu la pawulu-da. Tàka na kawini meti lei yiana, jiapa ka nambana milana, wua hàla-ma-ana-njaka, da pawàngu-ki ba wàna làti la nduma lurina,” wàna.

⁵Ningu tau mapanii-ya jàka nggikina na manandangu-na na Umana i Miri, ba pa-mananda wànya watu manandangu dàngu malanja da pa-maraku wàna na tau lai Ala. Hi napeka-nja paraïna i Yehu,

⁶“Napa ningu rehina, mbuu ndàbada yiada da paita-mi napa pa-nyànggaru-ha; nda hili ningu-apa napa lai yiahu hau watu ma-panunggulu pa-daingu la pangia-na!” wàna.

⁷Da-paàranya i Yehu, “Umbu Ngguru, pirangu-ka nu na ngerana nuna napa ba nadedi? Dàngu nggàra-yaka na tandana ba jia-yaka na rehina na ngerana nuna ba nadedi, ka wànda?” wàda.

⁸Napaya i Yehu, “Irimangu, napa ka àmbu ningu ma-panyonga-kai. Dangu na tau napa na mamai wànya na tamunggu da mapanii, ‘Jia-makaka Nyungga!’ dàngu ‘Jia-yaka na rehina,’ na mawàna. Tàka àmbi tundu-dunja nyuda.

⁹Àmbi mangàdatu-mbu jàka mirongu lii pabera dàngu ma-patula ngganggangu. Nadu mbuu ndàbada matumbu mangilu-aha. Tàka nuna nda jia-aya na tandana ba jia memayaka na rehi mulungu,” wàna.

¹⁰Hàla hi na-pangala-nya na paniina i Yehu, “Na hau banjaru napa nalawa-nya na banjaru hau dàngu hau nanggara napa na-ndàlahu-nya na nanggara hau.

¹¹La nggi - nggi napa natungu na upungu bokulu, na rimba pa-nggàbalungu dàngu na tàparu. Napa nadedi na hangia - hangia na pa-mangginggitungu dàngu manda najaru la awangu.

¹²Tàka ba ndedipa nadedi nuna mbuu ndàbana, nyimi napa dayàpa-kai dàngu da-pamayila-kai. Nyimi napa da patanda-nggai ngera la uma bunggu - uma bungguru dàngu hi dapatama-nggai la uma kapàtangu. Nyimi napa dabinda-kai la hangga hanganji - hanganji dàngu la makata - ma-katangu kuaha, lumuna bai kikungga Nyungga.

¹³Nu ngia papeku-madua-naka nyimi bai bobaru-ya na Lii Mànangu welingu lai Ala.

¹⁴Màtawa kai kita etimi ba ndai kadiku-nya jàka jiaya na papanii wàmi bai kahiri wikimi.

¹⁵Nyungga duku mawua-nggai kareuku dàngu kaminaku, hi lupa nda ningu haàtu papami matara palawa-nggai jàka ndia na manda pajia-ya jàka nggàraya na papanii-mi.

¹⁶Nyimi napa da-kaleka-nggai inami amami, angu dedimi, nua kalembi-mi, dàngu angu lànggimi. Hawiangu welingu lai nyimi, nyudambu da ma-pameti-ha.

¹⁷Nyimi napa da-karaü-nggai eti paraï tau mbuu ndàbana, lumuna bai kikungga Nyungga.

¹⁸Tàka napa nda hawàla-mbu ruu lunggi la katiku-mi ma-maromba.

¹⁹Jàkai pa-jàrungu dàngu jàkai pa-torungu nyimi, napa mi-mànangu,” wàna.

²⁰“Jàkai ita-yaka ba na-nggupulu-ya tanatara na Yeruhali pi dimi-nyaka ba nda namandai-apa la pa-molungu na paraingu.

²¹La rehi nu màtawa na tau na maninya la Yundia ka napalai la ma-palindingu. Nyuda da maninja la paraingu màta ka da-dunjaku-nya na paraingu, dàngu nyuda da maninja la hambeli paraingu àmbu datama-dupa la paraingu.

²²Nadu da lodu - lodu nuda jia-haka ‘Da Lodu Panabu Hukungu,’ nu ba tuna nu ka peku dedina na pambàda tulihu la Huratu Matua.

²³Lalu pa-mangginggitungu-ha da lodu nuda la kawini ma-pa-anakedangu, dàngu da ina da ma-talànga pahuhu anarara! Na tana yiana hunggu-nanyaka handuka bokulu, dàngu i Miri napa ba huku-nanyaka na banjaru yiana.

²⁴Ninja napa da pa-pameti wàngu hapanda, nimbunjai da pangàndi pa-tanawangu la ta - tana tau; dàngu napa na tau manda tandaya i Ala kalija - lijaku-danyaka la Yeruhali hi lupa nanjàpu na lodu na pambàda kawuku-nanja nyuda paraïna i Miri,” wàna.

²⁵“Napa paita-ha la mata lodu, wulangu dàngu da kandunu da ta - tanda. La pinu tana, da ba - banjaru da-mangàdatu dàngu dambingu ba dahangga-nya na kawoku-na dàngu na-hadumbalu-na na ngalingu tehiku.

²⁶Na tika pameti na tau paarï pa-mangàdatu ba nahangga-nya jàka nggàraya na madedi la pa-nggubulu pinu tana yiana, nadu ba nariu raü hàla-duka na pa-kapingutu wàna na kuru awangu-ka.

²⁷La rehi nuna-duka na Ana Tau ba namai la kuru karumangu wàngu kuaha dàngu kanjupu mangarangu-na.

²⁸Jàka na-pakiringu-ka padedi nudaka, hadangu-wa dàngu wulaku-wa katiku-mi, nadu napa tiangu-ki ba pa-pamànangu-kaika,” wàna.

²⁹Hàla i Yehu peka-nanjaka pangerangu yiana, “Tàngaru-ha da pingi ai kapilitu dàngu mbuu ndàbada da pingi ai hawiangu.

³⁰Ba itaha ba pa-kiringu-danyaka pa-kalunga, pi-madua-minyaka ba pa-kiringu-nanyaka na wandu.

³¹Tuna numbu nyimi jàka miita-haka ba dadedi nuda mbuu ndàbada, pi-ma-ami-nyaka napa i Ala ba lu pareta-nanyaka ba Hanganji-ya.

³²Kai pinya! Nudaka ba wànda napa dadedi ba ndedi nameti hàla na tau na maluri nàhu.

³³Na awangu dàngu na tana napa na-munangu, tàka na pulunggu-nggu na-padaingu lundu nu - nu,” wàna.

³⁴“Manggangu wikimi, ka àmbi tika pàku pa-kangguhaku la pambabu dàngu la pa-unungu ma-maüku jàka ndia la palalu patanda-nya na ngera lurimi, hi lupa ndai rimangu ba jia mumuku wàna bia nuna na lodu.

³⁵Nadu na lodu nuna ba natàka hama tuna okia kahili-ya la tau mbuu ndàbana la pinu tana yiana.

³⁶Mangga rimangu-wa, dàngu hamayangu mànuwa, ka peku màkami pangia ditanya mbuu ndàbana ngeru na madedi, nyimi hi mi-ngalangu pa-hurungu la Ana Tau,” wàna.

³⁷I Yehu na-ajaru la Umana i Miri la lodu, tàka la rudungu laku-nanyaka la Palindi Haitungu hi na-ndàdiku lai nu.

³⁸Hau mbaru - hau mbaru mbuu ndàbana na tau namai la Umana i Miri pa-patingi-nya i Yehu ba na-paajaru.