Read Kambera LUKAHU 22 Bible Online

LUKAHU 22 - Kambera bible

LUKAHU 22

¹Na Lodu Remi Roti Nda Patai Wolungu, na Paha ba wàdanya mareni-ama-naka.

²Da ratu kapala dàngu da ngguru anggama himbu pàku-danya ànda la pa-pameti kangunduhu-nya i Yehu, nadu ba da-mangàdatu-nya na tau dangu.

³Tunaka nu ka huruku-nanyaka wàndi Kambàliku i Yundahu, Ihikariu ba wàda-mbunya, nyuna anguda da tau hakambulu madua da makiku-nya i Yehu.

⁴Jia-duyaka i Yundahu hi nalua pa-pahama dànja da ratu kapala dàngu da ngora kapala manggangu la Umana i Miri rukuna jàka nggiki hama pakata-nanya i Yehu lai nyuda.

⁵Dira hàmuha da etida hi daràndi-ya la pawua-nya àmahu.

⁶I Yundahu na-orangu-mbu hi nahimbu rehi ma-manggawangu la pa-pakata-nya i Yehu lai nyuda, dàngu nda pinanya tau.

⁷Toma-nanyaka na loduna na Lodu Remi Roti Nda Patai Wolungu, ba rupuya na mbimbi ndumana na pangangu la lodu Paha.

⁸I Yehu na-paràha-nja i Peturu dàngu i Yuhani, “Luawa kai payema-nya na pamangu Paha ndumanda nyuta,” wànanja.

⁹“La nggi ma-payema ninya Umbu?” hi wàda.

¹⁰Nanapa-ya i Yehu, “Bai toma-nyaka na paraingu, napa na-jàngapu-kai paraï haàtu tau mini na mangàndi kadihi ningu waingu. Tundunya nyuna la uma ngia patama-na,

¹¹kai panii-nya na mangu umangu: Napanii i Umbu Ngguru, ‘Nggiya na pa-ngiangu ngia panganguma pamangu Paha dàngu da makiku-ngga? wàna, wàminya.

¹²Na mangu umangu napa na-paita-nggai hau kuru bokulu mangia dita, màtu kanaingu-mana. Payema hàlanya lai nu,” wànanja.

¹³Ka laku-danyaka i Peturu dàngu i Yuhani, datàka-nya jia pawingungu-maya hama tuna ba wàna i Yehu. Ka payema-danyaka na pamangu Paha.

¹⁴Ba jia-yaka na rehina na pamangu Paha, mandapu-nanyaka i Yehu dàngu da makiku-nya la ngia pa-pamangu.

¹⁵Hàla panii-nanjaka, “Lalu mbana rinjungu-aka la pangaa danggainya yiana na pamangu Paha ba ndedi ku-pàdangu mayila!

¹⁶Nadu, iwai biayawa: Nda kungaa da-anggai-nyapa na pangangu yiana, lupa tomaya na mamaü-nya na pamangu yiana ba pawuwa-ya la Pinu Tana Bidina i Ala,” wàna.

¹⁷Hàlaka nu i Yehu hi na-jakaru-nya na kaba wai angguru, hi na-pamalangungu lai Ala, tunaka nu hi napanii, “Keiya yiana kai pabe - berinya;

¹⁸nadu kai pinya: piti welingu nàhu nda kuhili unungu-apa angguru yiana, lupa tomaya ba na-pareta lundungu i Ala,” wàna.

¹⁹Hàlaka nu i Yehu hi napiti-ya na roti. Ba nahàla-ka pa-pamalangungu hi nakawita - witaya na roti wànya limana, hi nawua-nja nyuda, “Yiana-yaka na taunggu [na pa-pajàmangu ndumami nyimi. Wànyawa yiana kai namu wàngga,” wàna.

²⁰Tumbuna ba dahàla pangangu, napakei-nja na kaba wai angguru, “Na kaba wai yiana jia-yaka na pa-ràndingu-na i Ala na mabidi, na pa-karàngi wàngu wai rianggu — na ria na mambungu ndumami nyimi]” wànanja.

²¹“Na nyuna tàngaru! Na tau na ma-kaleka-ngga ninya lai yiahu angu-manggunya!

²²Na Ana Tau jiangu-maka duna nameti hama tuna na pambàda kawuku-na i Ala; na nyuna pàda pàku-ana-nyaka na tau na ma-kaleka-nya!” wàna.

²³Ka pa-kiringu-danyaka pa-kanuturungu dàngga anguda, jàka nggamuya la hongada nyuda na mawunda-ya nuna.

²⁴La hongada da makiku-nya i Yehu natumbu na pa-lumungu rukuna jàka nggamu welingu lai nyuda ba dakaka-ya na marihi pa-bokulu.

²⁵I Yehu hi napanii-nja, “Da hanganji banjaru manda tandaya i Ala, da-panyàku-ya na rayatu, tàka da ma-katangu kuaha ‘Ma-katindi rayatu,’ wàdanja.

²⁶Nyimi dimi àmbi timi nu. Na panjàngangu-na, na tau na marihi bokulu la hongami màtawa ka hama tuna tau marihi màrahu-ya dàngu na ma-pairungu màtawa ka hama tuna ma-paloku-ya.

²⁷Nggamuya na marihi bokulu: Na tau na ma-mandapu pangangu la menja jàka ndia hi natau na ma-paloku-nya pangangu? Na tau na ma-mandapu-maka duna. Nyungga nu ba ningga la hongami nyimi hama ma-paloku-ka.

²⁸La dalu handuka - handuka-ngguka, ni - nimanggai nyimi bai angungga Nyungga.

²⁹Hama tuna na Amanggu ba nawua-ngga hàku la pa-pareta, tuna numbu Nyungga napa ba kuwua-nggai hàku tungu nu.

³⁰Ba tuna nu nyimi napa mbabu dàminggaka la rehi jàka ku-hanganji. Tàka nyimi napa mandapu-minjaka da hakambulu dàmbu kanjàka pareta la pa-pareta-ha da hakambulu dàmbu kabihu Ihirailu,” wàna.

³¹“Himungu, ha Himungu, rongu! I Kambàliku pa-pahiangu-yaka la pakama-nggai nyimi; hama tuna na uhu nggàndumu na pa-kahaungu welingu la tàdana, hi kahaunya na mahàmu welingu la maànga.

³²Tàka Nyungga duku ku-hamaya-manggauka ndumamu nyumu, Himungu, ka àmbu na-talungguru na pawaimu. Dàngu jàka muhili njànga belika lai Nyungga, màta nyumu kau pa-kapànduku-ha da angu dedimu,” wànanya.

³³Nanapa-ya i Peturu, “Miri, wai rehingu-manggunya duku la patama la uma kapàtangu dàngu la pameti karia-nggau Nyumu Miri!” wàna.

³⁴“Uwaiya, hi Peturu,” hi wàna i Yehu, “ndedimbu da-hakuku da manu la lodu nàhu, nyumu mbàda pandailu wundangu-muka pa-pahini-ngga,” wànanya.

³⁵Hàlaka nu i Yehu hi napanii-nja, “La àmangu ba jiaya na pahuru-nggunggai, kuhiri-nggai pangàndi kanai àmahu, kanai bàlangu dàngu halapa, màla ningu nu manjaka-nggai ngga - nggàra?” hi wànanja. “Ndia-a,” wàda.

³⁶“Tàka nàhu,” wàna i Yehu, “nggamu na maningu kanai àmahungu jàka ndia kanai bàlangu, nangàndi bàdi; dàngu jàka nggamu na manda ningu hapandangu, nadangga-nya na kalembi liuna ka nakei wàngu hapanda.

³⁷Nadu, iwaiya, ninya na handalaru la Huratu Matua, ‘Nyuna dareki-ya hama tau akatu,’ ba wàna, jiangu-maka bàdi nuna ba na-pajàngapungu la wikinggu Nyungga. Nadu nggàraya na pa-tulihu la Huratu Matua na ngeranggu Nyungga nàhu jia-mayaka na pa-tutungu-na,” wànanja.

³⁸“Miri,” hi wàda da makiku-nya i Yehu, “tàngaru, yiada ninja dua mbunguda da hapanda,” wàdanya. “Jiaka-wa,”[28] hi wàna i Yehu.

³⁹I Yehu naluhu welingu la paraingu, hi nalaku la kàli ngia palua-na la Palindi Haitungu, tàka da makiku-nya lua karia-madanya.

⁴⁰Ba datàka-ka lai nu, hi napanii-nja, “Ihamayangu-wa, ka àmbu peku njalami, jàka ningu makama-nggai,” wàna.

⁴¹Tunaka nu laku marau-nanyaka hawutu Nyuna welingu lai nyuda, ningu handàka patuku-ya marauna tunaka nu patika-nanyaka hi na-hamayangu.

⁴²“Dou Ama, pa-marau àruya làti yiana na mayila na pa-hambeta-nggu. Ba tuna àmbu tundunya na pambuha-nggu, tàka tundunya na pambuha-mu Nyumu bia Ama,” wàna. [

⁴³Na haàtu papalewa namai lai Nyuna hi na-pakapingatu-ya.

⁴⁴I Yehu lalu mbana mayila-ya ba napàda-nya la eti, jia-duyaka hi manaü pa-rukangu-na pa-hamayangu. Na hanggobungu-na hama wai ria ma-kambàtiku la tanaya.]

⁴⁵Nahàla pa-hamayangu, i Yehu nahili beli la makiku-nya. Natàka-nja mahuru-da padua ba lalu hawina-da.

⁴⁶Hi napanii-nja, “Nggikina hi mi-katuda? Hadangu kai hamayangu ka àmbu nanggàna-kai ma-pakamangu,” wànanja.

⁴⁷Ba talànga kareuku-inapa i Yehu, tàka-danyaka ba hau pa-dundilu bia-daka da tau. Na mairu ngàndiha jiaya i Yundahu, na haàtu welingu la makiku-nya i Yehu. Tunaka nu i Yundahu hi nalua tomaya i Yehu hi na-puduku-ya.

⁴⁸Tàka i Yehu hi napanii-nya, “Ha Yundahu, kuwànya puduku ba ku-kaleka-nya na Ana Tau wàmuka?” wànanya.

⁴⁹Nu da makiku-nya i Yehu da maninja lai nu ba daita-yaka nuna na madedi, hi dapanii, “Miri, màta làti ka ma-làndahu wànja hapanda!” wàda.

⁵⁰Tàka na haàtu welingu la anguda hi na-làndahu wànya hapanda na atana na ratu bokulu, nahàpu-maya na kahilu kawana-na.

⁵¹Tàka i Yehu, “Jiaka-wa!” hi wàna. Hàla hi nadàma-ya na kahilu-na nuna na tau hi na-pamàlaru-ya.

⁵²Tunaka nu hi napanii-nja da ratu kapala dàngu da parawira manggangu la Umana i Miri, hamanai da ama -bokulu Yahundi da mamai lai nu payàpa-ya nyuna, “Màla ka tau akatu-ka Nyungga yia, hi mingàndi hapanda dàngu kadipu ai bai mai payàpa-ka?

⁵³Hau lodu - hau lodu ni mànu-mangga dàngu nyimi la Umana i Miri, tàka nyimi ndai yàpakai. Na nyuna nàhu jia-mayaka na rehimi nyimi bai pa-luangu limami ba rehi-manaka na kapàtangu ba na-kitangu rapa,” wànanja.

⁵⁴Ka yàpa-danyaka i Yehu, hi dangàndi-ya la umana na ratu bokulu. I Peturu natundu maraungu.

⁵⁵La padua talora paroka-danyaka epi patini, tàka i Peturu lua hi na-mandapu dànja da tau da ma-winggiru-nya.

⁵⁶Na haàtu na tau ata kawini naita-ya i Peturu ba na-mandapu la lihi epi patini; hi na-kanundaru-ya i Peturu, tunaka nu panii-nanyaka, “Na tau yiana kawai karia-mbuda i Yehu!” wàna.

⁵⁷Tàka i Peturu na-pahiningu, “Nda kutanda ndoku-maya duku na tau nuna!” wàna.

⁵⁸Ndedi pira mbàdiku-na ninyai na haàtu na maita-ya i Peturu hi napanii, “Nyumumbu dumu angu hàla-madumi dàngu nyuda!” wàna. Tàka nahema i Peturu, “Ndia-a, nda nyungga-a!” wàna.

⁵⁹Ningu hau njàmuki ma-làpahu, hili ninyai na haàtu na mapanii pa-kodungu, “Deningu-mana na tau yiana ma-kikungu lai Yehu-maya, nadu ba tau Nggalilia-maduya!” wàna.

⁶⁰Tàka nahema i Peturu, “Nggàraya na pawuku-mu, nda kupi-anya duku!” wàna. Nu nu ba talànga panii-inapa i Peturu, hakuku-danyaka da manu.

⁶¹I Yehu nambaili hi na-tàngaru-ya i Peturu. Ka namu-nanyaka i Peturu, ba mbàda panii-nanyaka nyuna paraïna i Miri, “Ndedi da-hakuku-mbu da manu tiangu, mbàda pandailu wundangu-muka pa-pahini-ngga Nyungga,” ba wànanya.

⁶²Ka luhu-nanyaka i Peturu welingu lai nu, hi nahii ba ngi - ngibana.

⁶³Da tau da madaiya i Yehu, dajulu-ya dàngu dapalu-ya.

⁶⁴Da-panggàbi-nja da matana hi da-paàra-nya, “Màla deka-nyapa jàka nggamuya na mapalu-kau?” wàdanya.

⁶⁵Dangu-mapa kareuku paakangu pa-ndaiha-danya.

⁶⁶La mba - mbaru da ama bokulu Yahundi, da ratu kapala dàngu da ngguru anggama pauhi-danyaka, hàla hi dangàndi-ya i Yehu la hangga Bata Bokulu Anggama-da.

⁶⁷“Peka-nggama nu, màla Nyumuka nu Hanganji Pamànangu?” wàdanya. Nahema i Yehu, “Jàka kupeka-a-nggai nda jia pawai-ami.

⁶⁸Dàngu jàka ku-paàra-nggai, jia-mayaka duna ba ndai hema.

⁶⁹Tàka piti welingu nàhu, na Ana Tau napa mandapu-nanyaka la kawana[29] -na i Ala Hupu Mambiha,” wàna.

⁷⁰Ka panii-danyaka, “Jàka tuna nu Nyumu na, Ana Alakau?” wàda. Nahema i Yehu, “Ka ba wàmi-maduka,” hi wàna.

⁷¹Ka panii-danyaka, “Nggàra ihi wànguipa hakahii! Ba rongu-madunda-nyaka welingu la ngaruna!” wàda-madua-ka.