Read Kambera LUKAHU 23 Bible Online

LUKAHU 23 - Kambera bible

LUKAHU 23

¹Nggubulu-da da ma-batangu, hadangu-danyaka, hi dalua ngàndiya i Yehu la hanggana i Pilatu.

²Lai nu nyuda pakiringu-danyaka pakàla-ya, “Nyuma ma-hàluku-yaka na tau yiana ba na-panjàra-nya na rayatu. Narunda-ya na tau ka àmbu na-wuangu hilu katiku la Hanganji Bokulu, nadu Nyuna ba Karitu-ya, hanganji-ya,” wàda.

³Hàla i Pilatu hi na-paàra-nya i Yehu, “Tubana dumu Nyumu ba hanganji tau Yahundi-kau?” wànanya. Nahema i Yehu, “Jia-duya ba wàmu,” hi wàna.

⁴Ka panii-nanyaka i Pilatu la ratu - ratu kapala dàngu la tau dangu, “Nyungga nda kuhunggu-anya manjala la tau yiana ka peku hukunya,” wànanja.

⁵Tàka manaü pa-ndàharungu-madua-daka, “Nawàngu lii pa-ajaru-na na tau yiana, ba narunda-ya na tau la nggubulu Yundia; la kawunga-na la Nggalilia, tàka nàhu tàka-mbuna-nyaka lai yiahu,” wàda.

⁶Ba narongu-yaka nuna i Pilatu, hi na-paàrangu, “Ka tau Nggalilia-ya yiana yia?” wàna.

⁷Ba dapanii-nyaka, i Yehu ba ma-pawelingu la Nggalilia-ya la wawa kuaha-na i Harondi, paràha-nanjaka paraïna i Pilatu pangàndi-ya i Yehu lai Harondi, nu ba talànga ninya la Yeruhali.

⁸Nahàmu na etina i Harondi la paita-ya i Yehu, nadu ba mbàda mandai-manaka parongu-ya na rukuna i Yehu, jia hi na-rinjungu paita-ya. Na-monungu paiti wikiya i Yehu ba na-patumbu pa-hangàtarungu.

⁹Jia-duyaka i Harondi hi natika pa-paàra pada - dangu lai Nyuna, tàka i Yehu duna nda nahema ndoku hau.

¹⁰Da ratu kapala dàngu da ngguru anggama da-hurungu-mbu lai nu, hi da-panjala pa-mbangatu-nya i Yehu.

¹¹I Harondi dàngu da angu tanatara-na julu-danyaka dàngu pamakia-danyaka i Yehu, hàla hi da-papaki-nya paki tau bokulu, tunaka nu hi da-pangàndi belinya lai Pilatu.

¹²La lodu nuna-maka i Harondi dàngu i Pilatu, da ma-papapangu làti la mangilu-na, ba da-paariyaa beli memangu.

¹³I Pilatu na-pauhi-nja da ratu kapala, da ngara ama bokulu dàngu na rayatu.

¹⁴Hi napeka-nja, “Nyimi bai ngàndi-ya na tau yiana lai nyungga bai panii, Nyuna na-panjàra-nya na tau dangu, wàmi. Nàhu la hanggami nyimi mbàda pareha-nggunyaka, tàka nyungga nda ningu ndoku hau panjala-na hama tuna na pakàla wàminya.

¹⁵Jia-mayai duna i Harondi, hi na-pangàndi beli bianya lai nyungga i Yehu. Nda ninguma duna rukuna hau na ràka pa-hukungu wànya hukungu meti.

¹⁶Jiaduya nu nyungga màta ku-paràmbahu-nya, hàlaka napa hi ku-pahàla-ya,” wàna. [

¹⁷Handàka mbabu - handàka mbabunya na pamangu Paha, i Pilatu nakàli pahàla haàtu tau pa-tahangu ndumana na rayatu.]

¹⁸Mbuu ndàbada da tau da ma-pauhi lai nu warangu-danyaka, “Pameti-ya! Pahàla-nggamanya i Mbaramba!” wàda. (

¹⁹I Mbaramba natama la uma kapàtangu ruku pa-konggalungu-na la paraingu dàngu ruku pameti-na tau.)

²⁰I Pilatu duna ka pahàla-ya i Yehu ba wànama, jia-duyaka hi nahili paniinya handàkangu na tau dangu.

²¹Tàka nyuda warangu-ma-adanya, “Harika-nya Nyuna! Harika-nya Nyuna!” wàda.

²²Hàla na pandailu wundangu wàna i Pilatu ba nawara-nja, “Tàka ka nggàra njalana? Nyungga nda kuhunggu-anya hau panjala-na na ràka pahuku wànya hukungu meti! Napa ka ku-paràmbahu-nya ka pahàla-ya,” hi wànanja.

²³Tàka manaü kaladaku pa-kodungu-madua-daka harika-manya bàdi i Yehu ba wàda. Tàka la njàpuna na warangu-da nyudaka da matalu.

²⁴Ka puha-nanyaka i Yehu hukungu meti paraïna i Pilatu tundunya na pambuha-na na tau dangu,

²⁵dàngu hi na-pahàla-ya na tau pakarai-da, nu na tau na matama la uma kapàtangu ruku pa-konggalungu dàngu pameti tau. Tunaka nu ka pakata-nanyaka i Yehu lai nyuda ka dawàngu pambuha-da.

²⁶Ka ngàndi-danyaka i Yehu paraïda nyuda. La padua ànda, tàbuku-danyaka na haàtu na tau, Himungu-ya na tamuna, na ma-pawelingu la Kireni, ba talànga tamana la paraingu. Dayàpa-ya hi da-pambana-ya paduku-ya na ai harika-na i Yehu.

²⁷Dangu tau ma-tundungu la kajia-na i Yehu — la hongada nyuda nimbunja da tau kawini ba mapira-ha. Nuda da kawini hii-danya ba da-paduduru-nya i Yehu.

²⁸Tàka i Yehu nambaili-nja hi napanii-nja, “Ha kawini Yeruhali! Àmbi hii-dungga Nyungga. Mihingu-ka wikimi dàngu da anami.

²⁹Nadu ba nàmunya na rehina napa na tau ba napanii, ‘Wangu-manaka duna da kawini da manda liya na woru ihi, da manda handàkangu paningu anangu dàngu da manda pahuhu ndoku anarara!’ ba wàna.

³⁰Nu la rehi nuna-duka napa ba dapeka-nja da palindi, ‘Pinjalu-nggamawa!’ Dàngu da tandula, ‘Hungguru-nggamawa!’ ba wàda.

³¹Nadu ka jiapa na ai na maluri ba mbàda tudanya hama tuna yia, hilu nggàra-yaipa napa na patuda-nya na ai na mbàda meti!” wànanja.

³²Nimbu-njapa da tau madua, — da tau akatu — da pahuku pameti, da angu paharika-danya i Yehu.

³³Ba datàka-ka la pa-ngiangu, ‘Kaba Kotu’ ba wàdanya, harika-danyaka i Yehu dàngu nuda da tau akatu da madua — na haàtu la kawana tàka na haàtu la kalaina i Yehu.

³⁴Hàla hamayangu-nanyaka i Yehu, “Dou Ama, jàma àrunja! Ba nda pi-ma-adanya nyuda jàka nggàra ulada,” wàna. Da pakina i Yehu pabe - beri-danjaka la dàngga anguda ba dawàngu patunja undi.[30]

³⁵Da tau da ma-ndolaku lai nu tàngaru-danyaka, ba talànga paaka-danya paraï da ama bokulu Yahundi, “Nyuna na-pamàna-nyaka na tau hawiangu; màlawa nu ka na-pamànangu wikina, jàka tuba Hanganji Pamànangu-duya na papindi-na i Ala!” wàdanya.

³⁶Da panjuri-mbu da-paaka-nya Nyuna. Damai hi dawua-nya angguru mayilu,

³⁷hi dapanii, “Nyumu jàka hanganji tau Yahundi-dukau, màlawa kau pamànangu wikimu!” wàdanya.

³⁸La dita ai harika-na i Yehu ninya na pa-tulihu, “Yiana Hanganji Tau Yahundi-ya,” na mawàna.

³⁹Na haàtu na tau akatu welingu la angu harikangu-na i Yehu, na-paaka-mbunya, “Nyumu Hanganji Pamànangu-kau wàngguka? Na, pamànangu-wa wikimu dàngu nyumambu,” wàna.

⁴⁰Tàka na tau akatu haàtu, nahàngga-nya na anguna, “Ka ndau mangàdatu-anya nyumu i Ala? Nyumu pa-hukungu meti-makau hama tuna Nyuna.

⁴¹Na hukungu-nda nyuta tau madua na-patopangu na paruka-nda. Tàka Nyuna nda ningu-maki duna panjala-na!” wàna.

⁴²Hàla panii-nanyaka, “Yehu, namu àruka, jàka umaika dumu ba Hanganji-kau!” wànanya.

⁴³Nanapa-ya i Yehu, “Uwai-yawa! La lodu nàhu-maka napa ba ta-kariangu la Pirundau,” wànanya.

⁴⁴Ràkangu njàmu hakambulu dàmbu-yaka la tidu lodu, na mata lodu ba nda na-handaraku, dàngu la nggubulu tana lai nu na-kapàtangu ailulu lundu la njàmu tailu la maringu lodu.

⁴⁵Na tera dimbaku na pa-tiwalungu daa la Umana i Miri, na-kahira padua.

⁴⁶Hàla wara pa-kodungu-nanyaka i Yehu, “Ama! La limamu Nyumu-yaka ku-pakata ninya na wikinggu!” wàna. Ba napanii tunaka nu meti-madua-nanyaka.

⁴⁷Na parawira panjuri ba naita-yaka nuna na madedi, wotu-nanyaka i Ala, “Langatàka, Nyuna nda nanjala-a!” wàna.

⁴⁸Na tau dangu na mamai lai nu pa-imingu, daita-mayaka nuna na madedi. Nyuda mbuu ndàbada ba dabeli, hala nda ukuha da etida.

⁴⁹Dàngu mbuu ndàbada da pandàma-na i Yehu jia-mbuha da tau kawini da matundu-nya welingu la Nggalilia, ba da-ndolaku marau ita hàla-madanya nunaka na madedi.

⁵⁰Ninya na tau, Yuhupu-ya na tamuna, na ma-pawelingu la paraingu Arimatia la tana Yundia. Nyuna tau hàmuya, natembi-ya tau, dàngu patia-nanya-padua na rehina i Ala ba na-pareta ba Hanganji-ya. Jiapa ka angu ma-mandapu la Bata Bokulu Anggama-ya nyuna, nda naora-anya na pabota-na dàngu na pa-luangu-na lima na batangu.

⁵¹

⁵²Yiana i Yuhupu nalua pa-hurungu lai Pilatu pakarai-ya ka peku wua-nyaya nyuna na metina i Yehu.

⁵³Tunaka nu papuru-nanyaka na metina i Yehu welingu la ai harikangu, hàla hi na-kawuhuku wànya tera yubuhu tera linangu. Hàlaka nu hi na-bànjalu-ya daa la reti na pa-toraku la palindi watu — na reti nuna reti bidi-maya ndedi ningu ihina.

⁵⁴Na lodu nuna lodu Njumatu-ya; tàka na lodu Hangahu pa-kiringu-ama-naka.

⁵⁵Da kawini da mamai karia-nya i Yehu welingu la Nggalilia, datundu-nya i Yuhupu hi daita-ya na reti. Daita-mbuya jàka nggikina na metina i Yehu ba bànjalu-ya daa la reti.

⁵⁶Tunaka nu beli-danyaka hi da-payema-nja da rungu dàngu da mina mbi kati na paburi-nya napa na metina i Yehu. La lodu Hangahu, hangahu-danyaka la paràma ba danunju-ya na uku anggama.