Read Kambera LUKAHU 24 Bible Online

LUKAHU 24 - Kambera bible

LUKAHU 24

¹La lodu Minggu, la mba - mbaru hada rudungu, da kawini dalua la reti pangàndi rungu pambàda payema-da.

²La reti, datàka-nya na watu ndàbina mbàda tanggilungu-naka.

³Hàla hi datama hu daa la reti, tàka nda daita-ayapa na metina i Miri Yehu lai nu.

⁴Ba talànga ndumuru-daka lai nu, dàngu ba da-hondaru pa-pangàda-nya na ngerana nuna, hi jia ni bianja da madua da mapaki ma-kajilaku da ma-ndolaku la lihida.

⁵Mangàdatu nda ukuha, hi da-maràbaku tàka la tana, ba talànga paniida nuda da madua lai nyuda, “Nggikina hi mihimbu-ya na tau luri la honga tau meti?

⁶Nyuna nda ni-anya yiahu. Na-hadangu-ka! Namuya jàka nggàra wànanggai ba ninyapa Nyuna la Nggalilia,

⁷‘na Ana Tau pa-pakata-manya bàdi la tau njala, hi da-harika-nya, tàka napa la lodu patailu wàna na-hadangu beli,’ ba wàna,” wànanja.

⁸Ka namu-danjaka nuda da tau kawini da panii - panii-naka i Yehu.

⁹Ba dabeli-ka welingu la reti, wàlahu hàla-danyaka na rukuna nuna la pa-pahurungu tau hakambulu haàtu dàngu mbuu ndàbada da ma-kikungu hawiangu.

¹⁰Da kawini da mapeka hàlaya nuna la makiku-nya i Yehu, jiaha: i Maria Mandalena, i Yuhana dàngu i Maria inana i Yakombu dàngu da kawini hawiangu da karia-da.

¹¹Tàka da pa-pahurungu ba dareki-ya nuda da tau kawini panii a-ànga-danya wàda bia. Nda dawai-aya na papanii-da nuda da kawini.

¹²Tàka i Peturu hada lumbatu-nanyaka hi napalai la reti. Ba dàngu muduku-na hi na-kahinu hu daa, na-itangu jiaha da tera yubuhu-aka da maninja. Hangàtaru ailulu i Peturu, ka beli-nanyaka dàngu màtu - màtu pa-pangàda-na la eti na ngerana jàka nggàraya na mambàda dedi.[31]

¹³Nu la lodu nunama, tau madua-ha da ma-kikungu lai Yehu da ma-talànga lua la kotaku Emaü, ràkangu hakambulu hau kiluna welingu la parai Yeruhali.

¹⁴Nàhu ba dalaku pa-banjaru-danya na rukuna na matumbu - matumbu-ka mbuu ndàbana.

¹⁵Ba talànga paba - banjarungu-daka ba da-panjepa kanandingu, ni wiki-ma-anyaka i Yehu, ba nalaku pera dànja.

¹⁶Daita-maduya i Yehu, tàka ningu hawutu na panda tanda wàdanya.

¹⁷Hàla panii-nanyaka i Yehu, “Nggàra-yaka nu na pabata-mi la padua ànda ni?” wànanja. Ndaudaku wàda ba dàngu tamaï-da da matada.

¹⁸Tàka na haàtu welingu lai nyuda, na ma-tamungu Kaliopa, hi na-paàra-nya i Yehu, “Ka jia-ma-akauka nyumu nu umbu tau pàlaku la Yeruhali na mandedi pinya na matumbu kangeu anamodu lai nu?” wànanya.

¹⁹“Ka nggàraya nu na matumbu?” hi wàna i Yehu. “Ka na rukuna i Yehu, tau welingu la Naharitu-du,” hi wàda ba dahema. “Nyuna wunangu-ya. Da kareuku-naka dàngu da paruku-naka — ba kanjupu patahu-duha la pa-tandangu-na i Alakai tumbuna la patandangu taukai.

²⁰Da ratu kapala dàngu da ama bokulu angu banjaru-nda dapuli-nyaka la pahuku pameti-ya, ba dawàngu pa-harika-nya!

²¹Làti ma-monungu-maka ba nyunaka napa na ma-pahàla-ya na Ihirailu. Tàka nàhu tailu mbua lodu wànguka ba natumbu nuna.

²²Hinggilu-nai nu, ni kawai ninja ba tau mapira-ha da kawini anguma da ma-pakatàtaku-kama. La mba - mbaru hada rudungu dalua la reti,

²³tàka nda dahunggu-yapa na metina lai nu. Dabeli-ka hi dapanii ba daita-ha da papalewa da mapanii ba naluri-ka i Yehu, wàda-nggama, wàda.

²⁴Ba tau mapira-ha welingu la anguma nyuma daluma lua la reti, datàka-nya na-padeningu-ma hama tuna ba wàda da tau kawini, ba tuna nu langatàka-ma, jia-aya ba nda daitaya i Yehu,” hi wàda.

²⁵Hàla ka panii-nanyaka i Yehu lai nyuda, “Minduba-madu nyimi! Lalu mbana kangilangu-kai pawaiya mbuu ndàbana na papanii-da da ngara wunangu-ka!

²⁶Ka nda napàda pàkunya bàdi na mayila wàmi dimi na Hanganji Pamànangu, hi namangu pakeulu-ya na pa-bunjuku wàngu?”

²⁷Tunaka nu i Yehu hi na-wàlahu-nja nggàraya na pa-tulihu la nggubulu-na na Huratu Matua na maliya na wikina Nyuna, piti welingu la mbuku - mbukuna i Muha lupa tomaha da mbukuda da ngara wunangu-ka.

²⁸Ba talànga tunaka nu mareni-danyaka na ndeha ngia pa-hanggangu-da. Nyuna i Yehu hama tuna malaku pa-ngalangu-ya,

²⁹tàka nyuda dapàtu-ya. “Ndàdiku kàdi naa la pangia-ma nyuma,” wàdanya, “nàhu rudungu-ama-yaka ba mbàda lamaru-manaka,” wàdanya. Ka tama-nanyaka i Yehu la patodu karia-nja la pangia-da.

³⁰Ba da-mandapu-ka ka tangangu ba wàdaka, i Yehu napiti roti hi na-pamalangu-nya i Ala, hi na-kawita - wita wànya limana na roti, hàla hi napakei-nja nyuda.

³¹Tunaka nu pàda-danyaka la eti Nyuna ba jiaya i Yehu. Tàka munangu-madua-nanyaka la matada.

³²Ka panii-danyaka dàngga anguda, “Làti rinjungu nda ukuha da etinda, ba napanii dànda nàmu la ànda, ba na-wàlahu-ndanya na ihina na Huratu Matua lai nyuta ai?” wàdaka.

³³La mbàdiku-na nuna-madua-ka ba da-hadangu hi dabeli la Yeruhali. Lai nu datàka-nja da ma-hakambulu haàtu-da da ma-kikungu lai Yehu ba talànga pauhi hàlada dàngu hawiangu.

³⁴Ba dapanii, “Tuba langatàka-manaka i Miri ba naluri beli! Nyuna na-paitangu-maka wikina lai Himungu!” wàda.

³⁵Nuda da madua ma-kikungu da mabidi tàka, peka-danyaka na pangala-da nàhu la padua ànda ba hanàhu-da dàngu jàka nggikina ba datanda-ya i Miri ba talànga kawita - witana roti.

³⁶Ba talànga pa-banjarungu-idapa nu, hi jia ndumuru wàna bia i Yehu la padua-da nyuda, napeka-nja, “Mànjaku-wa nyimi!” wànanja.[32]

³⁷Da-katàtaku dàngu da-mangàdatu, na pareki-da ita-ndanya wàndi duna, wàda bia.

³⁸Tàka i Yehu, “Ka nggikina hi mangàdatu? Nggikina hi dali lua da etimi?

³⁹Tàngaru-ha da limanggu dàngu da wihinggu. Kai pinya jiaka Nyungga wiki-maka yia! Dàmaka dàngu kanàndaru-ka, nadu da wàndi nda ningu-a toluda dàngu rinada, hama tuna nu bai itaka Nyungga,” wànanja.

⁴⁰I Yehu ba napanii tuna nu dàngu pajiliku-mananja da limana da wihina.[33]

⁴¹Nu ba ndedi peku pawai-madapa, ba lalu nggaüru dàngu ba lalu hangàtaru-da, i Yehu na-paàra-nja, “Ningu nu lai nyimi pangangu?” wànanja.

⁴²Hi dawua-nya hakatiri-na na iya pahongu.

⁴³I Yehu nakeiya nu na iyangu, hi nanganya la hanggada nyuda.

⁴⁴Hàlaka nu hi napanii-nja, “Yiada-haka da hangia - hangia da pambàda pekanggunggai ba ni hàlanda-pa Nyungga dàngu nyimi: nimbihu-da da pa-tulihu na rukunggu Nyungga daa la Mbuku - mbukuna i Muha, da Ngara Wunangu dàngu na Ludu Pamalangungu, ba lupa na-patutungu hàlama bàdi” wànanja.

⁴⁵Tunaka nu i Yehu hi na-pahabola-ha da kanandingu-da, hi peku pidanya na pawuku-na na Huratu Matua.

⁴⁶Hàla hi napanii-nja nyuda, “Nu daa la Huratu Matua ni-manyaka na pa-tulihu: na Hanganji Pamànangu napa na-pàdangu-mapa bàdi mayila, dàngu napa na-hadangu belima bàdi welingu la meti la lodu patailu wàna.

⁴⁷Dàngumbu wànya na tamuna na Hanganji Pamànangu pa-bobaru-maya bàdi la mbuu ndàbana na banjaru, ba na-panjilungu-mapa bàdi na tau hi namangu pajàma-nja da njalana paraïna i Ala. Na lii yiana bobaru-maya bàdi piti welingu la Yeruhali.

⁴⁸Nyimi-duka ma-hakahii-nya nunaka mbuu ndàbana.

⁴⁹Dàngu Nyungga wikima duku napa ma-pangàndi-nggainya na paràndi-na i Ama. Na nyuna nyimi ipa-daingu bàdi panapa-ya la paraingu yiana hi lupa na-panggàbalu-nggai na kuaha welingu lai Ala,” wànanja.

⁵⁰Hàlaka nu i Yehu hi nakaria-nja nyuda la hambeli paraingu tàka la Mbetani. Lai nu Nyuna na-jakaru-nja da limana, hi na-pakanyuru-nja.

⁵¹Nu ba talànga tunaka nu, dita-nanyaka la awangu, hi[34] na-pahewa welingu lai nyuda.

⁵²Ka patika-danyaka ba da-marubuku-nya, tunaka nu ka beli-danyaka la Yeruhali dàngu nggaüru nda ukuha da etida,

⁵³dàngu wotu panua nai-danyaka i Ala la Umana i Miri.