Read Kambera LUKAHU 4 Bible Online

LUKAHU 4 - Kambera bible

LUKAHU 4

¹I Yehu na-harua-ya Ngahuna i Ala la rehi ba na-dunjaku-nya la Luku Yorundangu. I Ngahuna i Ala nairu ngàndiya nyuna la maràda telangu.

²Lai nu kama-nanyaka paraïna i Kambàliku patu kambulu lodu mandaina. Na mandai tuna nu nda nggàra ndoku pangana. Jia ba nanjàpu-ka manjuu-nanyaka.

³Ka panii-nanyaka i Kambàliku, “Màla Nyumu Ana Alakau wàngguka? Paràha-nya yia na watu ka nadedi roti,” wàna.

⁴Nahema i Yehu, “La Huratu Matua ninya na pa-tulihu, ‘Na tau nda roti pàku paluri wàna,’ wàna”, hi wànanya.

⁵Hàla i Kambàliku karia-nanyaka i Yehu la pangia majangga, la ha-kambàdiku wua mata-a i Kambàliku ba na-pajiliku-nya mbuu ndàbana na pareta hanganji la pinu tana.

⁶“Mbuu ndàbana na kuaha dàngu na wulu yiana napa ku-pakata-nggaunja lai nyumu,” wàna i Kambàliku lai Yehu. “Nadu yiana-ka mbuu ndàbana ba pa-wuangu-ka nyungga-duka, tàka nyungga pekuna la pawua-nya na tau, jàka nggamuya nyuna bàdi na pa-wuangu jàka wànggu nyungga.

⁷Yiada-ka mbuu ndàbada mangumu nyumu-haka, mili kau marubuku pa-maraku-ngga,” wàna.

⁸Nahema i Yehu, “La Huratu Matua ninya na pa-tulihu, ‘Marubuku-nya i Miri Ala-amu dàngu lumunya nyuna-a,’ wàna,” hi wàna.

⁹Hàla i Kambàliku karia-nanyaka i Yehu la Yeruhali, hi natuya dita la kawuku Umana i Miri, hi napanii dànya, “Nyumu Anana i Alakau wàngguka? Jia ba tuna linjungu-wa nu weli yiahungu.

¹⁰Nadu la Huratu Matua ninya na pa-tulihu, ‘I Ala napa na-paràha-nja da papalewa-na hi damangga paha - hàmunggau,’ wàna.

¹¹Dàngu-mbu, ‘Da papalewa napa da-kataku wànggau limada, hi nda peku tunjuru-da da wihimu la watu,’ wàna,” hi wàna.

¹²Nahema i Yehu, “La Huratu Matua ninya na pa-tulihu, ‘Àmbu kamanya i Miri Alamu’, na mawàna,” hi wàna.

¹³Ba nahàla-ka i Kambàliku pakama-nya i Yehu ba nawàngu màtu - màtu kahili-na, dunjaku-nanyaka i Yehu hi na-patiangu hili handàka rehi mapeku.

¹⁴Tunaka nu beli-nanyaka i Yehu la Nggalilia; Nyuna na-harua-ya paraï Ngahuna i Ala. Na lii rukuna Nyuna wewarungu-nanyaka la nggubulu ngabana lai nu.

¹⁵Nyuna na-ajaru la uma bunggu - uma bungguru, dàngu mbuu ndàbana na tau dawotu-nya Nyuna.

¹⁶Ka hili lua-nanyaka i Yehu la Naharitu, la ngia pa-matua-ya. La lodu Hangahu, tundunya na pakàli wàna lua-nanyaka la uma bungguru. Na-hadangu pambaha Huratu Matua,

¹⁷dawua-nya na mbukuna i Wunangu Yahaya. Na-wàlahu-ya na kuluru-na na mbuku, hi nahunggu-ya na ndalaru yiana:

¹⁸“Na Ngahuna i Miri ninya lai Nyungga, nadu ba mbàda katua-duna-nggaka la pa-bobaru-ya na Lii Mànangu la tau mila. Na-palewa-ka la pa-pakada-nya na marandeka-na na tau ma-tanawangu dàngu na hàmuna na tau poki; la pa-pahàla-ya na tau pa-kapidihu

¹⁹dàngu pa-bobaru-ya na rehi tàkana i Miri la pa-pamàna-nya na banjaru-na,” wàna.

²⁰I Yehu na-kuluru belinya na mbuku, hi na-pabeli-nya la ma-paloku, hàla hi na-mandapu.[4] Mbuu ndàbana na tau la uma bungguru dapanau-ya Nyuna.

²¹Ka pakiringu-nanyaka pa-kareuku i Yehu lai nyuda, “Da ndalaru la Huratu Matua ni kawai, la lodu nàhu patutungu-nanyaka la rehi rongu-minya,” wàna.

²²Na panii - paniina-ka na pawunda-na nahàmu langatàka, da-hangàtaru hi dawai angunya. Dapanii, “Ka nda jiaya ni na anana i Yuhupu?” wàda.

²³Ka panii-nanyaka i Yehu lai nyuda, “Talànga wanguna miwà-manyaka duna na pangerangu yiana lai Nyungga, ‘Ha ndotiru, pamàlaru pàku bàdi wikimu. Da pa-hangàtarungu da parongu-ma da patumu la Kapinaumu, tumbuya bàdi la kuru kotaku wikimu,’ wàmi-maka dimi,” wàna.

²⁴Nahili panii i Yehu, “Pangàda-nya, nda ningua wunangu patembi la kuru kotaku wikina.

²⁵Tàka na nyuna ronguya: la rehina i Elia, ba nda napuru na urangu tailu mbua ndau ha-kawita mandaina, patumbu wànaka na rimba nda palàda la nggubulu tana. La rehi nuna dangu kawini meti lei la Ihirailu.

²⁶Nu ba tuna, i Ala nda na-paràha-anya i Elia la haàtu welingu la kawini meti lei nuda, tàka mbulungu la haàtu kawini meti lei la Hàrapàtu-a la ngaba Hindungu.

²⁷Tuna numbu la rehina i Wunangu Eliha dangu tau la Ihirailu mahidu manula pa-mayitangu, ba tuna nda haàtu-mbu welingu lai nyuda pa-pamàlaru, mbulungu-ma-ana i Naamàngu tau Hiria,” wàna.

²⁸Mbuu ndàbada da tau la uma bungguru dambeni langatàka ba darongu-ya na rukuna nuna.

²⁹Da-hadangu hi dawàngga-ya i Yehu la hambeli paraingu, dàngu hi dangàndi-ya la ngambangu palindi, la ngia pawulu-danya na paraingu-da. Patikingu-danya ka jukaru-nya hu wawa la kela wàda làti.

³⁰Tàka i Yehu nali honga-ma-aha da tau dangu hi nalaku.

³¹Tunaka nu laku-nanyaka i Yehu la paraingu Kapinaumu la Nggalilia. Lai nu ajaru-nanyaka tau la lodu Hangahu.

³²Da-maratangu ba daita-ya na huri ajaru-na, nadu ba wàngu pa-mahumbarungu-ya ba na kareuku Nyuna.

³³Lai nu la uma bungguru ninya na haàtu na tau pa-huruku wàndi akatu. Na tau nuna la - ladana,

³⁴“Ha Yehu, tau Naharitu, nggiki-nggunja wàmu-nggamaka nu? Bau mai nu maimu pa-palàjaru-kamaka? Kupi-manggau jàka nggamukau: Nyumu ba papalewa matua-na i Alakau!” wàna.

³⁵“Kandii!” hi wàna i Yehu ba na-bàtiru-nya na wàndi akatu “Luhuwa welingu la tau yiana!” wànanya. Ka luhu-nanyaka na wàndi akatu, ba na-yàbahu-nya na tau nuna la hanggada nyuda mbuu ndàbada, tunaka nu hi naluhu welingu la tau nuna dàngu nda pahidu-nanya.

³⁶Mbuu ndàbana na tau na-hangàtaru, hi dapanii dàngga anguda, “Manda tangeji-duha da paniina. Ba wàngu pa-mahumbarungu-ya dàngu da-patahu ba na-pareta-ha da wàndi akatu paluhu, hi lupa daluhu-ma!” wàda.

³⁷Na lii rukuna i Yehu na-kada-nyaka la nggubulu ngaba lai nu.

³⁸I Yehu na-dunjaku-nya na uma bungguru hi nalaku la umana i Himungu. Na ina yerana i Himungu talànga hidu pariti-na, hi dapanii-nya tau i Yehu na rukuna nuna.

³⁹I Yehu nalua la ngia pa-mahuru-na nuna na ina, hi nawàngga-ya na pariti-na. Ka-yilangu-nanyaka na pariti, ka ailulu hadangu-madua-nanyaka na ina yerana i Himungu hi nainga-ha nyuda.

⁴⁰Tamawa ba wànaka na lodu, mbuu ndàbada da tau ngàndi-danjaka lai Yehu da angu dedida da ma-pàdangu màtu - màtu mahidu. I Yehu na-padambaku-nja lima lai nyuda haàtu - haàtu hi na-pamàlaru-ha.

⁴¹Dadangu-mbu da tau da ngia paluhu-da da wàndi akatu ba la - ladada, “Nyumu na, Ana Alakau!” wàda. Ba tuna na-bàtiru-ma-anja paraïna i Yehu dàngu nda napuli-nja pa-kareuku, nadu ba dapi-dunya Nyuna ba Hanganji Mapamànanguya.

⁴²Hungawa ba wànaka na lodu dunjaku-nanyaka i Yehu na paraingu hi nalaku la hau pa-ngiangu ma-hinggilu. Ka pakiringu-nanyaka na tau pahimbu-ya, tàka ba dahunggu-yaka, wuku-danyaka ka àmbu na-dunjaku-nja nyuda.

⁴³Tàka napaya i Yehu, “Na Lii Mànangu rukuna jàka nggikina na pareta-na i Ala ba ku-bobaru-maya bàdi la hau parai - hau paraingu hawiangu, ma ba jiaya nunadu i Ala hi na-palewa-ka la pinu tana,” wàna.

⁴⁴Jia-duyaka i Yehu hi na-pabobarungu la uma bunggu - uma bungguru la nggubulu tana Yundia.