Read Kambera LUKAHU 6 Bible Online

LUKAHU 6 - Kambera bible

LUKAHU 6

¹La hau lodu Hangahu, ba talànga lina i Yehu la hau woka uhu nggàndumu, da makiku-nya da muti uhu nggàndumu. Dakuhi wànja limada da uhu nggàndumu, hi danganja.

²Ba mapira-ha da tau Parihi dapanii, “Nggikina nyimi hi mipangga-ha da uku anggama-nda bai wunda biaya na pa-hiringu la lodu Hangahu?” wàda.

³Nahema i Yehu, “Ndedi mi-handàkangu-ma ihi nyimi pambahaya na rukuna i Ndautu, ba jiaya na rimbangu-na nyuna dàngu da karia-na?

⁴Ba natama la Umana i Miri hi napiti-ha da roti da pambàda marakungu lai Ala, hi nanganja. Tunaka nu hi nawua-mbunja roti da tau karia-na. Làti duna na uku anggama-nda, mbulungu da ratua duda da mapeku la panganja da roti nuda,” hi wàna.

⁵Hàla hi napanii i Yehu, “Na Ana Tau na-kuaha-ya na lodu Hangahu!” wànanja.

⁶La hilu hau lodu Hangahu, lua-nanyaka i Yehu pa-ajaru la uma bungguru. Lai nu ninya na haàtu na tau na mameti lima hapapa-na.

⁷Ba mapira-ha da ngguru anggama dàngu tau Parihi da-patikingu pahimbu-ya na njalana i Yehu ka peku kàla-ndanya wàda. Jia-duyaka hi da-hamata mànuya jàka jia pamàlaru biana tau la lodu Hangahu.

⁸Tàka i Yehu napi-manya na pa-pangàda-da. Jia-duyaka hi napanii-nya na tau na mameti lima hapapa-na, “Mai kau ndolaku yiahu la hangga!” wànanya. Na tau nuna na-hadangu, hi na-ndolaku lai nu.

⁹Tunaka nu i Yehu hi na-paàranja da tau da maninja lai nu, “Tundunya na anggama, nggàra mapeku paràma-nda la lodu Hangahu? Taràma mahàmu jàka ndia ma-akatu? Pahàmu-ya na tau jàka ndia pa-hanggàmaru-ya?” wàna.

¹⁰I Yehu na-pawiliku-nja mata nyuda mbuu ndàbada, hàla hi napanii dànya[6] nuna na tau, “Pajola-ya na limamu,” wànanya. Na tau nuna na-pajola-ya na limana, ka màlaru-nanyaka.

¹¹Tàka da ngguru anggama dàngu da tau Parihi mbeni nda ukuha, hi da-batangu jàka nggikina wàdaka hangganya i Yehu.

¹²La rehi nuna hei-nanyaka i Yehu la hau tandula pa-hamayangu. Lai nu na-hamayangu lai Ala napinja-ya na rudungu.

¹³Ba naharii-ka na lodu, paau-nanjaka da makiku-nya, hi napindi tau hakambulu madua welingu lai nyuda. Natunja ngarada nuda da ma-hakambulu madua-da, pa-pahurungu, wànanja. Nyuda jia-duhaka:

¹⁴i Himungu (i Peturu ba wàna-mbunya) dàngu i Andaria angu dedina i Himungu; i Yakombu dàngu i Yuhani, i Pilipu dàngu Mbàratolumiu,

¹⁵i Matiu dàngu i Tomahu, i Yakombu anana i Àlapiu, dàngu i Himungu (Ma-kaborangu, ba wàdanya),

¹⁶i Yundahu anana i Yakombu dàngu i Yundahu Ihikariu, na ma-kaleka-nya i Yehu ngeru.

¹⁷Tunaka nu puru-nanyaka i Yehu welingu la tandula karia-da da pa-pahurungu, hi da-pànjangu dàngu hi da-ndolaku la hau pangia ma-linjaku. Lai nu nimbunja da tau ba hau danguda da makiku-nya hawiangu dàngu dadangu-mbu da tau mamai welingu la nggi - nggi la nggubulu Yundia dàngu Yeruhali, dàngu welingu la parai - paraingu Tiruhu dàngu Hindungu la hingi tehiku.

¹⁸Maidanya la parongu-ya i Yehu dàngu la pa-pamàlaru-ha da hidu - hidu-daka. Da tau pa-huruku wàndi akatu damaimbu hi pamàlaru-ha.

¹⁹Mbuu ndàbana na tau da-pamukarungu paràma-ya i Yehu, nadu ba ningu patahu-na maluhu welingu la ihina na ma-pamàlaru-ha nyuda mbuu ndàbada.

²⁰I Yehu na-panau-ha da makiku-nya hi napanii, “Oha-amika nyimi tau mila, nadu nyimi napa angu banjaru-na i Alakai!

²¹Oha-amika nyimi mamanjuu nàhu; nyimi napa pa-pambihu-kai! Oha-amika nyimi mahii nàhu; napa nyimi riki-minyaka!

²²Oha-amika nyimi jàka da-paumbinggai, jàka da-tulaku-kai, jàka da-paakanggai dàngu jàka dapulu-nggai rukuna na Ana Tau!

²³Da wunangu la àmangu tudanja numai. Jàka tomaka patuna nu, màtawa kai mbaha eti dàngu kai renja hawola, nadu ba na-bokulu taï na wundami na pa-payemangu-kai la awangu.

²⁴Ba tuna ura pàku-minyaka nyimi mawulu nàhu; nàdu ba mbàda pàda haha-minyaka na hàmuna!

²⁵Ura pàku-minyaka mambihu hahangu nàhu; nadu nyimi napa ba rimbangu-minyaka! Ura pàku-minyaka mariki hahangu nàhu; nadu napa ba hawina dàngu ba hii-minyaka!

²⁶Ura pàku-minyaka nyimi, ba nawotu hàlanggai tau; nadu ba tuna numaka àmangu da bokumi ba dawotu-nja da wunangu kabàli àmangu,” wàna.

²⁷“Tàka nyimi marongu-ka nyungga nàhu, kupeka hahanggai-nya yiana: Aïha da muhumi, dàngu hàmu bia la tau na ma-paumbi-nggai.

²⁸Pa-kanyuru-nya na tau na maràtu-nggai, dàngu hamaya-nya ndumana na tau na ma-akatu lai nyimi.

²⁹Jàka natàba-ya tau na papumu na hapapa, pajàma-kinya ka natàba-ya na papumu na hapapa-mbu. Jàka naramba-nya na kalembi liumu, wua-mbunya na kalembi dalumu.

³⁰Jàka nakarai-kau ngga - nggàra paraï tau, wua bianya; tàka jàka naramba-nya na mangumu, àmbu hili karai beli-duya.

³¹Timinya numai bàdi na tau hawiangu, màta ka tuna-nggama nu tau jàka wàmi.

³²Jàka imbuhanya na tau na mambuha-nggai nyimia, nggàraka lingumi? Na tau njalambu dambuha-nja da tau da mambuha-nja nyuda!

³³Jàkai tuu mahàmu la tau na matunggai mahàmu-a, nggàra lingu-mika? Da tau njalambu tuda numbu!

³⁴Dàngu jàkai wua parutangu àmahu la tau na mamàka pa-pabelingu-a, nggàra lingu-mika? Da tau njalambu dawua parutangu àmahu la tau njala, hi da-pahuru belinja!

³⁵Àmbu tuna nu bàdi! Nyimi màta kai wànya na njàngana, miaï-ya bàdi na muhumi dàngu kai tuu mahàmu lai nyuda. Nyimi miwua parutangu bàdi, dàngu àmbi monungu-du pangala belinja. Jàka timi nu-maduka, nabokulu-ka napa na wundami, dàngu nyimi napa anana i Ala Hupu Majangga-kaika. Nadu i Ala ba nahàmu la tau manda pingu pamalangungu, dàngu la tau akatu-mbu.

³⁶Màtawa kai mila etimi hama tuna na Amami ba namila etina!” wànanja.

³⁷“Àmbi patandangu-du ngera tau hawiangu, ka àmbu patanda-mbunggai ngera nyimi paraïna i Ala. Àmbi hukungu-du tau hawiangu, ka àmbu nahuku-mbunggai nyimi paraïna i Ala. Jàmanya na tau hawiangu, ka najàma-mbunggai nyimi paraïna i Ala.

³⁸Wuanya na tau hawiangu, ka nawua-mbunggai nyimi paraïna i Ala; napa ingalanya na pawua-nggai na mabundu làndangu na pambàda takaru pano - nokungu ndumami nyimi. Nadu na hukutu na pa-hukutu wàminya na tau hawiangu napa nawa-manyai duna i Ala lai nyimi,” wàna.

³⁹Tunaka nu i Yehu hi napeka-nja yiana na pangerangu, “Jàka tau poki malonda-ya na tau poki haàtu, jiangu-maka duna ba handàka kanabu-da la lambongu.

⁴⁰Nda ningua tau pa-ajaru marihi-nya na ngguruna. Tàka na tau pa-ajaru na ma-panjàpu-ya na pa-ajaru-na, jia hi nahama-nya na ngguruna.

⁴¹Nggikina nyimi hi mi-ita ni biaya na kawita ai la mata angumi, tàka na patengangu la mata wikimi hi ndai pàdanyai?

⁴²Nggiki peku-naka nyimi papanii-nya na angumi, ‘Màla ka ku-àlinya na kawita ai la matamu,’ ba wàminya na angumi, tàka na patengangu la mata wikimi ndai itayai? Ha ma-kapelu! Àli pàkunya bàdi na patengangu la mata wikimi. Hinaka duna hi peku ita hàmu-minya dàngu hi peku àli-minya na kawita ai la mata angumi,” wànanja.

⁴³“Na pingi ai na ma-kamboka nda natuu-a wua nda hàmu. Tuna numbu na pingi ai nda kamboka nda natuu-a wua hàmuna.

⁴⁴Hareti - hareti na pingi ai patanda weli wuanya. Da ai riipaketu nda datuu-a wua kapilitu, dàngu da lulu tara manu nda tuu-a wua angguru.

⁴⁵Na tau na mahàmu na-paluhu-ma hangia - hangia mahàmu, nadu na etina ba mbinu wàngu-nanya mahàmu. Na tau na ma-akatu na-paluhu-ma duna ma-akatu, nadu na etina ba mbinu wàngu-nanya ma-akatu. Nadu jàka nggàraya na maluhu welingu la ngaru ba ma-lembaru-duya welingu la eti,” wàna.

⁴⁶“Nggikina nyimi ‘Miri, Miri’ hi wàmingga, tàka hi ndai wànyai jàka nggàra wànggunggai?

⁴⁷Nggamu-yaka na pa-pahama wàndanya na tau na mamai lai Nyungga, dàngu na marongu-ya na pulunggu, tàka hi nawa-manyai? — Màta ka ku-paita-nggainya — .

⁴⁸Nyuna hama tuna na tau ba na-pahada-nya na umana ba naàki pamanjo - njolu-manya, hi na-palata-nya la watu na watu umana. Ba na-làndahu-nyaka iwa dàngu wai luku nuna na uma, nda jia koda-ananya nuna na uma, nadu ba pa-pahadangu la watu uma mahàmu-mayaka.

⁴⁹Tàka na tau na marongu-ya na pulunggu hàla hi nda nawànya, nyuna beri hama tuna na tau na ma-pahadangu uma dàngu nda ningu lata watu umana. Jàka na-làndahu-nyaka iwa, njoru pa-renggangu-mana-nyaka duna; dàngu ruha halawàla-nanyaka!” wàna.