Read Kambera LUKAHU 7 Bible Online

LUKAHU 7 - Kambera bible

LUKAHU 7

¹Ba nahàla papeka-ya na hangia - hangia la tau dangu, beli-nanyaka i Yehu la Kapinaumu.

²Lai nu ninya na haàtu parawira Roma, na maningu atangu na pambana mbuhana. Na ata nuna hidu-nanya, natika pameti.

³Nu ba narongu-ka na parawira na rukuna i Yehu, na-paràhangu ba mapira-ha da amabokulu Yahundi palua lai nyuna ka namai àru pa-pamàlaru-ya na atana.

⁴Ba datàka-ka lai Yehu, nuda da tau da-kamahi pambana-ya ka nandula àruya na parawira ba wàda. “Na Parawira yiana ràkana jàka mundula-ya Umbu,” wàdanya i Yehu,

⁵“nadu nyuna ba nambuha-nya na banjaru-nda dàngu na-pahadangu-maka uma bungguru ndumama nyuma,” wàdanya.

⁶Ka lua-nanyaka i Yehu kariangu dàngu nyuda. Ba mareni tàka-ama-naka i Yehu la uma, na parawira na-paràha-nja da anguna papanii-nya, “Màtangu-ka duna pa-lundungu la uma, nggàra hi na-pajàrangu wikina pamai la uma. Nyungga nda ràka-ana panapa-ya i Umbu la umanggu.

⁷Jiaya nuna-maka hi kiri nda toru mbeninggu pamai wikinggu patoma-kau. Jia ba tuna tungu bia paniimu na-màlaru-ma duku na atanggu.

⁸Nadu nyunggambu ba ku-patundungu-madui duku la mangia ditangga dàngu la wawanggu nyungga nimbunja da panjuri dama-patundu-nya na pareta-nggu. ‘Lua!’, jàka wànggunya na haàtu na panjuri, nàhu-manya; dàngu ‘mai!’ jàka wànggunya na haàtu, nàmu-manya. Tàka na atanggu ‘ràmaya yiana!’ jàka wànggunya, naràma-maya,” wàna.

⁹Na-hangàtaru i Yehu ba narongu-ya nuna. Nambaili hi napanii dànya na tau dangu na matundu-nya, “Mambana-duya na tau yiana. Jiapa la honga tau Ihirailu-mbu ndedi kuhunggu ma-bokulu pawai tungu nu!” wàna.

¹⁰Ba dabeli-ka nuda da tau papalewa la umana na parawira, nuna na ata mbàda màlaru-naka.

¹¹Ndedi nggi mandai[7] lua-nanyaka i Yehu la paraingu Naingu. Da makiku-nya dàngu na tau dangu laku karia-madanya.

¹²Ba natàka-ka i Yehu la lihi pindu paraingu, na tau talànga ngàndi-danya mameti la hambeli paraingu. Na mameti anakeda miniya, ana kamehangu-na na haàtu kawini meti lei. Nadangu na tau angu paraingu-na malaku karia-nya na inana.

¹³Ba naita-yaka nuna na inana paraïna i Yehu, mila-nanyaka eti, hi napanii dànya, “Àmbu hii, Ina!” wànanya.

¹⁴Tunaka nu i Yehu hi nalihi-nya na paduku wàngu mameti hi nadàma-ya. Ka ndàdiku-danyaka da maduku-ya na mameti. Hi napanii i Yehu, “Ha bidi mini, hadangu-wa wànggunggau!” wànanya.

¹⁵Nuna na bidi mini na mambàda meti hadangu-nanyaka hi na-mandapu, hi reu - reuna. Tàka i Yehu hi na-pakata-nya la inana.

¹⁶Na-mangàdatu hàla na tau, hi dawotu-nya i Ala. Dapanii, “Na haàtu na wunangu bokulu hunga-nanyaka la padua-nda nyuta! I Ala mai-nanyaka pa-pamàna-nya na banjaru-na!” wàda.

¹⁷Nu na rukuna i Yehu na-wewarungu-ka la nggubulu Yundia dàngu la ngaba weli winggiru-na.

¹⁸Da makiku-nya i Yuhani da-patàka hàlanya i Yuhani mbuu ndàbada da matumbu-ka. Ka paau-nanjaka da makiku-nya da tau madua nyuna i Yuhani,

¹⁹hi napalewa-ha lai Miri Yehu la pa-paàra-nya, “Jia-kauka nu Umbu na matàka napa tundunya na paràndi-na i Ala, jàka ndia hi ma-patia-manyaipa bàdi na haàtu? wàna wàminya,” wànanja.

²⁰Nu da tau madua papalewa-na i Yuhani lua-danyaka lai Yehu hi dapanii, “I Yuhani Parunungu na-palewa-kama la pa-paàra-nggau, jia-kauka nu Umbu na matàka napa tundunya na paràndi-na i Ala, jàka ndia hi ma-patiangu-maipa bàdi haàtu? wànanggau” wàdanya.

²¹Nu jia pàkuyai duna i Yehu ba na-pamàlaru tau dangu, dàngu ba nawàngga-ha da wàndi akatu, màlai ba hau danguda da tau poki da mangita.

²²Ka hema-nanjaka paraïna i Yehu, “Beliwa lai Yuhani kai pekanya jàka nggàraha da parongu-mi dàngu da pangita-mi: da tau poki daita-ka, da tau kaliparu dapangga-ka, da tau hidu manula pa-mayitangu[8] dalànga-ka, da tau kawanga darongu-ka, da tau meti daluri belika, tàka na Lii Mànangu welingu lai Ala pa-bobaru-yaka la tau milaka.

²³Oha-anaka na tau na manda tuu pelu pakangu pa-jukaru-ngga nyungga,” wàna.

²⁴Ba dalaku-ka da papalewa-na i Yuhani, wunda-nanyaka panii na tau dangu i Yehu rukuna i Yuhani, “Nu bai lua la maràda telangu nggàra pa-tàngaru-mi? Hawàla rumba pa-jiliru ngiluya?

²⁵Nu bai lua nggàra paita-mi? Tau mawotu paki manandangu-ya? Da tau da mapakai tungu nu dàngu da maluri boraku ma-ngiangu la uma hanganji-ha duda!

²⁶Jia ba tuna, bai luhu nu nggàra paita-mi? La paita-ya na haàtu na wunangu? Tubana, màlai narihi-pa welingu la haàtu wunangu.

²⁷Nadu ba jiaya i Yuhani yiana-duka na patiki daa la Huratu Matua, ‘Yiana jiaya na papalewa-nggu,’ wàna i Ala; ‘Nyungga napa ku-palewa-ya la pamangilu-nggau Nyumu, ka na-pakalongga-nggau ànda Nyumu!’ ” ba wàna.

²⁸“Namuya,” hilu wàna i Yehu, “la pinu tana yiana ndedi handàkangu paningu tau marihi-nya la pa-bokulu i Yuhani Pa-runungu. Ba tuna na tau na marihi màrahu la honga banjaru-na i Ala, narihi-pa pa-bokulu welingu lai Yuhani Pa-runungu,” wàna.

²⁹Mbuu ndàbana na tau — jia-mbuha da makei hilu katiku — darongu-ya i Yehu ba napanii tuna nu; nyudaka da tau da ma-patundu-nja mbuu ndàbada da pa-karuhi-na i Ala dàngu hi da-mbuhangu pa-parunu-nja paraïna i Yuhani.

³⁰Tàka da tau Parihi dàngu da ngguru anggama nda dabihu-a duda pa-kataku-ya na pa-pakaka-na i Ala nduma wikida nyuda. Nyuda nda dabihu-a pa-parunu-nja paraïna i Yuhani.

³¹Hàla hi nahili panii i Yehu, “Nggàraka ihu bàdi pa-pangera wànggunya na tau la rehi nàhu? Hama nggàra-haka ihu nyuda?

³²Nyuda hamada da anakeda da ma-mandapu la pahangu; da hau pauhi dawara-nja da pauhi hau, ‘Nyuma ma-paihinggai weliku hawola, tàka nyimi ndai bihu parenja! Nyuma mawunda-nggai ludu hawina, tàka nyimi ndai hii!’ wàda.

³³I Yuhani Parunungu namai — nyuna na-puaha dàngu nda na-unungu angguru — tàka na paniimi nyimi, ‘Huruku-nanya wàndi kambàliku!’ wàmi.

³⁴Namai na Ana Tau — nangangu na-ngunungu — napaya nyimi, ‘Tàngaru-ya na tau nuna! Na-malumbangu, na-maüku, angu tau kei hilu katiku dàngu angu tau njalaya’, wàmi.

³⁵Jiapa ka tuna nu, na manggàna-na i Ala na-pajia-ya paraï da tau ma-kataku-ya,” wàna.

³⁶Na haàtu na tau Parihi, na ma-tamungu Himungu, nadunda-nya i Yehu pangangu. I Yehu nalua la umana hi na-mandapu pangangu.

³⁷La paraingu lai nu ninya na haàtu na kawini, na maluri la manjala. Nu ba narongu-ya i Yehu ba talànga nganguna la umana na tau Parihi, mai-nanyaka ba nangàndi hau boti watu mina mbi kati.

³⁸Na-ndolaku la kajia-na i Yehu la lihi wihina dàngu hiina hi nabaha wànja wai matana da wihina i Yehu. Tunaka nu da wihina i Yehu hi na-langora wànja lunggina hàla hi na-puduku-ha, hi naburi-nja mina mbi kati.

³⁹Nu na tau Parihi na madunda-nya i Yehu pangangu, ba naita-yaka na matuna nu, pulungu-nanyaka la etina, “Na tau yiana jàka wunangu-ya làti napi-manyaka duna jàka nggamuya na kawini na ma-jonggaru-ya dàngu na kawini nina ba maluri la manjala-ya!” wàna.

⁴⁰Hàla i Yehu hi napanii-nya i Himungu, “Ha Himungu, ninya na hangia ka ku-pekanya wànggunggau,” wànanya. Nahema i Himungu, “Wua, Umbu Ngguru, pekaya nyuna,” wàna.

⁴¹Hi napanii i Yehu, “Ninja tau madua-ha da ma-wutangu la haàtu na mawua paruta-nja àmahu. Na haàtu lima ngahu àmahu bara tàka na haàtu lima kambulu àmahu bara.

⁴²Nu da tau madua nda damàka pahiulu-ha da wutada, ka podahu-duna-haka da wutada. Màla welingu nu da tau madua nggamu na marihi mbuhanya nuna na tau na mawua parutangu àmahu?” wàna.

⁴³“Ba kureki-ya na tau na pa-podahu padangu wutana!” wàna i Himungu. “Tubana na palaamu,” hi wàna i Yehu.

⁴⁴Hàla i Yehu hi na-tàngaru-ya nuna na kawini hi napanii-nya i Himungu, “Muita-ya yiana na tau kawini? Ba kutàka la umamu nyumu ndau pa-yemangu-a wai pabaha wànja da wihinggu; tàka na kawini yiana nabaha wànja wai mata da wihinggu dàngu hi na-langora wànja ru lunggina.

⁴⁵Nyumu ndau nggepi wàngga puduku, tàka na kawini yiana nda na-pànjangu ndoku pa-puduku-ha da wihinggu piti welingu ba kutàka lai yiahu.

⁴⁶Nyumu ndau buri-angga mina la katiku-nggu, tàka na kawini yiana naburi-njaka mina mbi kati da wihinggu.

⁴⁷Langatàka: na-bokulu mbuhangu-na tandana da njalana da madangu ba pa-jàmangu-haka! Na tau na pa-jàmangu hawutu, jia hi hawutu-ana na mbuhangu-na,” wàna.

⁴⁸Hàla i Yehu hi napanii-nya na tau kawini, “Da njalamu pa-jàmangu-haka,” wànanya.

⁴⁹Da tau hawiangu da manga dànya i Yehu panii-danyaka dàngga anguda, “Nggamuya na tau yiana hi na-ngalangu pa-jàmangu njala?” wàda.

⁵⁰Tàka i Yehu hi napanii-nya na tau kawini, “Ruku pawaimu lai Nyungga, nyumu papamànangu-kauka. Laku mànjaku-wa!” wànanya.