Read Kambera LUKAHU 8 Bible Online

LUKAHU 8 - Kambera bible

LUKAHU 8

¹Tunaka nu ndedi nggi mandai, i Yehu nalaku la parai - paraingu dàngu la kota - kotaku, la pa-bobaru-ya na lii mànangu, ba pareta-ama-naka ba Hanganji-ya i Ala. Da tau hakambulu madua ma-kikungu karia-mada.

²Tuna numbu ba mapira-ha da tau kawini da pambàda pamàlaru welingu la wàndi akatu dàngu la hidu. Nyuda jia-duhaka i Maria, i Mandalena ba wàda-mbunya (pihuda da wàndi akatu da maluhu welingu lai nyuna);

³màlai i Yuhana, papaha-na i Kuha, tau la umana na hanganji Harondi; i Huhana, dàngu dangu-maipa kawini hawiangu. Malanja wiki-mada duda ba datula-nya i Yehu dàngu da makiku-nya.

⁴Pa-nutakungu bia-nanya na tau pamai lai Yehu welingu hau parai - hau paraingu. Tàka ba nadangu-ka na tau na ma-pauhi, peka-nanjaka nyuda yiana na pangerangu i Yehu,

⁵“Na haàtu na matungu woka nalua pa-hàbarungu wini. Ba talànga hàbarungu-naka nu, ningu wini ma-kanabu la ànda. Hawiangu nadili-ya tau dàngu hawiangu nanganja ma-hawurungu.

⁶Nimbunjai da ma-kanabu la ma-pawatungu. Datumbu-ka da kahuluku-da malaï-danyaka nadu ba namàdu na tana.

⁷Ningumai wini ma-kanabu la padua rii madàka. Na rii madàka natumbu pa-kariangu na wini, ka nggàpi-nanyaka lundu metina.

⁸Tàka ningu-madui wini ma-kanabu la tana hàmu na ma-kamboka, ka tumbu-danyaka hi datuu wuada da-pahangahu wundangu,” wàna. Ba na-panjàpu-yaka na pangerangu, panii-nanyaka i Yehu, “Jàka ningu kahilu-mi kai rongu!” wàna.

⁹Da makiku-nya i Yehu da-paàra-nya àndana nuna na pangerangu.

¹⁰Napaya i Yehu, “Nyimi pa-wuangu-kaika kanandingu la papinya na pa-winingu ngerana jàka nggikina i Ala ba na-pareta ba Hanganji-ya. Tàka na tau hawiangu pa-ajaru wàngu pangerangu-ha, ka peku eti wàdanya, tàka nda dapinya jàka nggàraya na madedi; dàngu darongu, tàka nda da-jàngapu-aya,” wàna.

¹¹“Yiana-yaka na àndana nuna na pangerangu: Na wini jia-yaka na puluna i Ala.

¹²Na wini na ma-kanabu la ànda beri jia-haka da tau da marongu-ya na pulungu. Tàka nàmu-nyaka i Kambàliku na mawàhi-ya na pulungu welingu la etida, ka àmbu dapawai dàngu ka àmbu pamàna-nja.

¹³Da wini da ma-kanabu la ma-pawatungu, beri jia-haka datau da marongu-ya na pulungu, tàka manyamalu kataku hàmu eti-ma-adanya. Ba tuna na lii nuna nda na paamu daa la etida. Na pawaida nyuda ana ha-yitilu-ana, na tàkaka na ma-pakamangu, kandulingu-ma-adanya.

¹⁴Da wini da ma-kanabu la wuku rii madàka beri jia-haka da tau da marongu-ya na lii, tàka na-kadiku-nya na lurida dàngu na-mataru-danya la paluri borakungu dàngu la pambabu la pinu tana yiana. Nuda mbuu ndàbada jia-duhaka da ma-kapidihu-ha hi nda datuu wuada ma-matua.

¹⁵Da wini da ma-kanabu la tana kamboka, pangera jia-duhaka da tau da marongu lii hi da-pakàpa-maya daa la etida da mahàmu dàngu da matànji. Nyuda dapajàrungu hi lupa datuu wuada,” wàna.

¹⁶“Nda ningu-a tau ma-paroka palita, tàka hi na-pandàbi-nyai mbàlu jàka ndia hi natuyai la lumbu ngia pa-katuda. Natu-mayaka duna napa la tandai palita, ka pekuna na tau na matama ka naita-ya na handaraku-na.

¹⁷Nda ningua pa-winingu napa na manda wuwa; dàngu nda ningua pa-kàpingu napa na manda ta-bunggahu dàngu papingu.

¹⁸Jia-duya nu patingi pahàmu-nya jàka nggàraya na parongu-mi. Nadu na tau na mambàda ningungu, ba pahili wua padangu-duyai-pa; tàka na tau na manda ningungu, na ma-hawutu-na na mani-kinyapa lai nyuda ba papiti-mbuyapa,” wàna.

¹⁹Na inana dàngu da angu dedina i Yehu mai-danya lai Nyuna làti, tàka nda peku tomada lai Nyuna ba lalu danguna na tau.

²⁰Ninya na haàtu na tau mapanii-nya i Yehu, “Umbu, ninya na inamu dàngu da angu dedimu lua la hambeli. Ka ma-pahàmburu dànya wàdanggau,” wànanya.

²¹Tàka i Yehu hi napeka-nja nyuda, “Da tau da ma-patingi-nya na puluna i Ala dàngu na ma-patundu-nya, jiaha duku da inanggu dàngu da angu dedinggu,” wànanja.

²²La hau na lodu i Yehu dàngu da makiku-nya da hei tena. “Màla ka talua la hapapa tàma,” wàna i Yehu lai nyuda. Ka laku-danyaka.

²³Ba talànga pa-lirungu-daka nu, mahuru-nanyaka i Yehu. Hi jia tungu biana na ngilu bokulu na ma-làndahu-nya na tàma. Ka tama-nanyaka na wai la tena, na matika pa-hanggàmaru hàlaha nyuda mbuu ndàbada.

²⁴Ka lua-danyaka da makiku-nya i Yehu lai Nyuna hi dabengi-nya, “Umbu Ngguru, Umbu Ngguru, hanggàmaru-ndanyaka!” wàdanya. Hadangu-nanyaka i Yehu hi na-kabàla-ya na ngilu dàngu na ngalingu ba dàngu mbokaru-na. Ka kamàndalu-madua-nanyaka na ngilu dàngu na ngalingu, hi lupa kahàna nda ukuya na tehiku.

²⁵Ka panii-nanjaka i Yehu da makiku-nya, “Ka nggikina nyimi hi ndai waika Nyungga?” wànanja. Ka hangàtaru-danyaka dàngu mangàdatu-danyaka. Hi dapanii dàngga anguda, “Nggamu-mayaka ihu na tau yiana hi na-pareta biaya na ngilu dàngu na ngalingu, dàngu da-patundu-manya?” wàda.

²⁶I Yehu dàngu da makiku-nya paliru pangalangu-danyaka la ngabana la Nggaraha[9] la hapapa tàma Nggalilia.

²⁷Ba napuru-ka i Yehu la mara, mai-nanyaka na haàtu na tau mini na pa-huruku wàndi akatu. Nyuna welina la paraingu. Mandai-manaka ba nda ningu pakina dàngu ba nda nabihu pa-ndàdiku la uma. Enga-ma-ana duna la kubu liangu pangia reti.

²⁸Ba naita-yaka i Yehu, kaladaku-nanyaka hi na-patika la hanggana i Yehu ba na-warangu, “Dou Yehu, Ana Ala Hupu Majangga! Ka nggiki wànggunya wàmu-nggaka nu? Ku-kamahi-nggau àmbu pa-mayila-duka!” wàna.

²⁹Hi napanii tuna nu, nadu i Yehu ba na-paràha-dunya na wàndi akatu paluhu welingu la tau nuna. Kàli tuna numaka ba narunda-ya wàndi akatu, hi lupa jiapa da limana da wihina ka hondu wànja nggili bàhi dàngu ka mangga pa-jàritu-nya, peku biana la pa-ràmbitu-ha hi nalaku ngàndiya wàndi akatu la maràda telangu.

³⁰I Yehu na-paàra-nya na tau nuna, “Nggamuya na tamumu?” wànanya. “Na tamunggu ‘Lenggiu-ya’,” wàna ba nahema — nadu ba dadangu da wàndi akatu da mambàda tama daa lai nyuna.

³¹Nuda da wàndi akatu kamahi nda uku-danya i Yehu, ka àmbu nawàngga àruha la Njuruku meti.[10]

³²La lihina lai nu kanjupu danguha da wei ba talànga ma-nguringu-da la karaha tundala. Nuda da wàndi akatu kamahi nda uku-danya i Yehu, puli àru-nggama ka matama ningu la wei wàda. Jiaya ka wànaka i Yehu.

³³Ka luhu-danyaka da wàndi nuda welingu la tau nuna hi datama-nja da wei. Hàla ka palai-danyaka da wei hi da-linjungu la hingi ngambangu hu daa la tàma, nu ka mumuhu-danyaka.

³⁴Da ma-pawangu wei daita-maya nuna na madedi. Ka palai-danyaka hi da-bobaru-ya na lii nuna la paraingu dàngu la ndeha ma-winggiru-nya.

³⁵Ka luhu-nanyaka na tau pa-tàngaru-ya nuna na madedi. Hi damai lai Yehu, lai nu toma-danyaka na tau na mambàda pa-hàlangu welingu la wàndi - wàndi akatu, ba mandapu-na padua-ka la lihi wihina i Yehu. Nyuna mbàda ninguka pakina dàngu nakanandingu-na warahu-mananyaka. Mangàdatu wàngu-danyaka.

³⁶Nyuda da maita-ya nuna na madedi, wàlahu-danyaka la tau dangu, jàka nggikina na tau nuna ba na-màlaru.

³⁷Hàla nggubulu-na na tau na mangia-nya la ngabana la Nggaraha karai mbana eti-danyaka i Yehu ka na-dunjaku-nya lai nu, nadu nyuda ba lalu mangàdatu-ha. Ka hei-nanyaka i Yehu la tena, beli wànaka.

³⁸Na tau na pambàda pahàla-da da wàndi akatu, na-kamahingu lai Yehu ka peku kikungu-nggu wàna. Tàka i Yehu hi na-paràha-nya palaku,

³⁹“Beliwa dàngu bobaru-ya jàka nggiki-nanggau i Ala nyumu,” wànanya. Na tau nuna laku-nanyaka hi na-bobaru-ya la nggubulu pa-ngiangu la paraingu lai nu, na pambàda raï rukuna i Yehu lai nyuna.

⁴⁰Ba nabeli-ka i Yehu la hapapa tàma, nggepi hawola-nanyaka tau dangu nadu ba patia-danya padua-ka.

⁴¹Ka mai-nanyaka na haàtu na ama bokulu la uma bungguru lai nu. Na tamuna Yairu-ya. Na-patika la hanggana i Yehu hi nakarai pa-mbanangu ka peku li àruna la uma wàna,

⁴²nadu ba jiaya nuna-ma-a na anana kawini ba haàtu-na, hakambulu dàmbu-naka na umuru-na, natika pameti-ka-amangu-ka. Ba talànga laku-naka i Yehu la umana i Yairu, da - dàhiku-mananya tau dangu welingu la nggi - nggi.

⁴³La hongada ninya na haàtu na tau kawini ba mbàda hakambulu dàmbu ndau-naka ba nahidu mbungu ria, na ma-panuangu na hauna katàri. Dambuta-ka da malanja-na paraï patungu muru la ndotiru,[11] tàka nda ningu ndoku ma-patahu la pa-pamàlaru-ya.

⁴⁴Na kawini nuna na-pamukarungu palihi-nya i Yehu welingu la kajia, hi na-jonggaru-ya na hupu kalembi-na. Ndedi mbàdiku-na kamàndalu-madua-nanyaka na mbungu riana.

⁴⁵Na-paàrangu i Yehu, “Nggamuya na ma-jonggaru-ka?” wàna. Na-pahiningu hàla na tau. Hi napanii i Peturu, “Umbu, dangu langatàka na tau maweli winggiru-nggau; nyudaka da ma-dàhiku-kau!” wàna.

⁴⁶Napaya i Yehu, “Ningu dumu ma-jonggaru-ka. Kupinya, ba ningu àtalu maluhu welingu la ihinggu,” hi wàna.

⁴⁷Na kawini nuna na-pàdangu wikina ba pinyaka na paula-na. Jia-duyaka hi na-hurungu ba nda - ndàndana, hi na-maràbaku la hanggana i Yehu. Ka wàlahu-nanyaka la hangga tau mbuu ndàbada, jàka nggikina hi kiri jonggaru-nanya i Yehu, dàngu nu ba hàngu màlaru-ma-ananya na pahidu wàna.

⁴⁸Hi napanii dànya paraïna i Yehu, “Ananggu, ruku waimungga Nyungga jiaya hiu màlaru. Kabeli mànangu-wa dumu,” wànanya.

⁴⁹Ba talànga panii-i-napa i Yehu, tàka-nanyaka na haàtu tau pa-paràhangu welingu la umana i Yairu, “Umbu, na-yàmihu-ka naanamu. Àmbu hilu panjili-duyapa i Umbu Ngguru,” wàna.

⁵⁰Narongu-yaka nuna i Yehu, hi napanii dànya i Yairu, “Àmbu mangàdatu. Pawai biawa, napa na-màlaru na anamu,” wànanya.

⁵¹Ba datàka-ka la umana i Yairu, nda na-pahiangu-a haàtu matama karia-nya mbulungu i Peturu, i Yuhani, i Yakombu dàngu da ina amana na anakeda-ma-a.

⁵²Mbuu ndàbada da tau hii-danya dàngu hawina-danya ba nameti-ka nuna na anakeda. Tàka napaya i Yehu, “Àmbi hiidu yiana na anakeda nda meti-ananya, mahuru-ananya!” wànanja.

⁵³Ka riki-danyaka i Yehu, nadu ba pi-mada-nyaka nuna na anakeda kawini ba mbàda metina-ka.

⁵⁴Tunaka nu i Yehu hi nayàpa-ya na limana na anakeda hi napanii dànya, “Hadangu anakeda!” wànanya.

⁵⁵Ka beli-nanyaka na lurina na anakeda dàngu ndedi mbàdiku-na ka hadangu-madua-nanyaka. Hàlaka nu i Yehu hi na-paràha-nja pawua-nya pangangu na anakeda.

⁵⁶Hangàtaru-danyaka da ina amana na anakeda. Tàka i Yehu nahiri-nja papanii-ya na rukuna nuna lai ngga - nggamu-yakai.