Read Kambera LUKAHU 9 Bible Online

LUKAHU 9 - Kambera bible

LUKAHU 9

¹I Yehu napaau-nja da makiku-nya da tau hakambulu madua, hi nawua-nja kuaha la pawàngga wàndi akatu dàngu la pa-pamàlaru mahidu.

²Tunaka nu hi na-pahuru-nja palua pa-pamàlaru mahidu dàngu la pa-bobaru-ya na rukuna jàka nggikina i Ala napa ba na-pareta ba Hanganji-ya.

³“Àmbi ngàndidu ngga - nggàra nàhu bai laku,” wàna i Yehu lai nyuda. “Àmbi ngàndidu tokungu dàngu kanai hunggu, jàka ndia pangangu, jàka ndia àmahu, jàka ndia kadua mbàlangu paki ndiambu.

⁴La nggi bia na mainga-kai ndàdiku-ma lai nu ka lupa mi-dunjaku-nya nuna na paraingu.

⁵Tàka la nggi na manda ingakai, nu bai dunjaku-nyaka nuna na paraingu, kàmbahu-maha da aü la tàbalu wihimi, ka tandaya na pa-panamu wànja nyuda,” wànanja.

⁶Da makiku-nya i Yehu hadangu-danyaka, hi dalaku la hau ndeha - hau ndeha la pa-bobaru-ya na Lii Mànangu dàngu hi da-pamàlaru-ya na tau mahidu la nggi - nggi.

⁷Ba narongu-ka i Harondi, na ma-pareta la Nggalilia na rukuna nuna na matumbu-ka, hondaru-nanyaka. Nadu ba ningu mapanii, naluri belika i Yuhani Parunungu, wàda.

⁸Ningumbui mapanii ba ni beli-nyaka i Elia wàda. Napanii natau hawiangu, na haàtu welingu la wuna - wunangu-ka àmangu naluri belika, wàda.

⁹Na panii i Harondi, “Nyungga mbàda paràhangu-ngguka tau la pa-katiku-ya i Yuhani. Tàka na tau yiana, hilu nggamuyai ihu? Dangu-maka parongu-nggu rukuna Nyuna,” wàna. Ka patikingu-nanyaka i Harondi paita-ya i Yehu.

¹⁰Da tau papalewa-na i Yehu beli-danyaka, hi da-wàlahu hàlaya na pambàda ruku-daka. I Yehu nawànda-ha nyuda, hi dalaku kariangu pa-pamehangu la paraingu Mbetuhaida.

¹¹Tàka ba dapi-nyaka tau na rukuna nuna, ndutu-madua-danyaka i Yehu. Nanggepiha nyuda, hi napanii dànja nyuda rukuna jàka nggikina napa ba na-pareta i Ala ba Hanganji-ya. Dangu na-pamàlaru-mbuha da mahidu la hongada nyuda.

¹²Tama ba wàna na lodu, da tau hakambulu madua makiku-nya i Yehu mai-danyaka lai Nyuna papanii, “Umbu, lai yiahu pangia mahudi-ya. Nahàmu kau paràha-nja yiada da tau, ka dalaku pahimbu pangangu dàngu ngia patodu-da la kota - kotaku jàka ndia la ndeha - ndeha maweli winggiru-nya yiahu,” wàdanya.

¹³Tàka nahema i Yehu, “Nyimi bia naa kai wuanja pangangu,” wànanja. Napaha nyuda da makiku-nya i Yehu, “Lai nyuma nu ana lima mbua-ada da roti hi ana dua ngiu-ada da iyangu. Màla malua-ka bàdi pakeinya pangangu yiana na tau mbuu ndàbana?” wàda.

¹⁴(Ràkangu tau lima rataya na mini jua na maninya lai nu.) I Yehu napeka-nja da makiku-nya, “Paràha-nya na tau ka na-mandapu pa-kanguhurungu, rakangu lima kambulu - lima kambulu-ya hau kanguhuru,” wàna.

¹⁵Nu da ma-kikungu hi danunju-ya na paniina i Yehu lai nyuda.

¹⁶Hàla i Yehu hi napiti-ha da roti lima mbua dàngu da iyangu dua ngiu, tunaka nu hi na-tangara la awangu, ba na-pamalangu-nya i Ala. Hàlaka hi nakawita - witaha wàngu limana da roti dàngu da iyangu hi na-pakata-nja da makiku-nya la pa-paberi-nya na tau dangu.

¹⁷Ka ngangu-danyaka lundu mbihuda. Hàla da ma-kikungu lai Yehu hi dapauhi-nja da rihi nganguda hakambulu dàmbu mbolada.

¹⁸La hau lodu, ba talànga hamaya mehangu-naka i Yehu, mai-danyaka da ma-kikungu lai Nyuna. I Yehu hi na-paàra-nja nyuda, “Màla tundungu panii tau, nggamuka yia nyungga?” wàna.

¹⁹Dahema nyuda, “Ningu mapanii jiaya i Yuhani Parunungu na mawàna. Ningumbui mapanii jiaya i Elia na mawàna, nimbunyai hawiangu, na haàtu na wunangu àmangu na-hadangu belika, wàda,” hi wàda.

²⁰“Tàka nyimi wiki, nggamuka yia Nyungga?” wànanja. Nahema i Peturu, “Nyumu jiakau na Hanganji Ma-pamànangu na paràndi-na i Ala,” wàna.

²¹Hàla i Yehu napeka-nja da ma-kikungu, “Màtangu ailulu papeka-ya na rukuna yiana lai nggamu-kadu,” wàna.

²²Dàngumbu i Yehu napanii, “Na Ana Tau jiangu-maka bàdi ba na-pàdangu mayila, dàngu hi dapapanya paraï da ama bokulu, da ratu kapala, dàngu da ngguru anggama. Nyuna napa pa-pameti-ya, tàka la lodu patailu wàna hi pahada belinya,” wàna.

²³Tunaka nu i Yehu hi napanii-nya na tau mbuu ndàbana na maninya lai nu: “Na tau ka kukiku-nya Nyuna na mawàna-ngga, najàma pàkunya bàdi na nduma wikina, ka naduku-ya na harika-na hau lodu - hau lodu, ka namangu pakiku-ngga Nyungga.

²⁴Nadu na tau na ma-pamàndu-nya na lurina, napa na-yàmihu-ya na lurina. Tàka na tau na manda aï wikina ba nalumu-ngga Nyungga, jia hi na-pamàna-nya na lurina.

²⁵Nggàra lingunaka la tau jàka namàngi hàlanya na nggubulu pinu tana, tàka hi paruha-nanyai dàngu hi yàmihu-nanyai na lurina?

²⁶Jàka na-makia na tau papeka-ka Nyungga dàngu na pa-ajaru-nggu Nyungga, napa na Ana Tau na-makia-mai duna papeka-ya na tau nuna la rehi tàka wàngu kuaha-na, kuaha-na i Ama, hamanai kuaha-da da papalewa matua!

²⁷Kai pinya: welingu la angumi maninggai lai yiahu ningu napa mandedi meti jàka ndedi naita-ya i Ala ba na-pareta,” wàna.

²⁸Ràkangu hau minggu ma-palàngangu ngalana pa-ajaru wànja nuda i Yehu, karia-nanjaka i Peturu, i Yuhani dàngu i Yakombu la pinu hau palindi la pa-hamayangu.

²⁹Ba talànga hamayangu-naka nu lai nu i Yehu, ka panjilungu-nanyaka na hadana dàngu da pakina dabara kalilangu.

³⁰Hi jia pa-wuwangu biada wikida da tau madua, nu i Muha dàngu i Elia, wàngu handaraku welingu la awangu. Pabanjarungu-danya dàngu i Yehu rukuna napa na panjàpu wàna, nda namandai-apa ba na-pajàngapu-nya la Yeruhali.

³¹

³²La rehina nu i Peturu dàngu da anguna katuda-danya, tàka hi jia pawàla biada, hi daita-ya na hadana i Yehu ba na-handaraku dàngu nuda da tau madua da-ndolaku dànya.

³³Ka malaku-wa ba wàdaka nuda da tau madua, i Peturu napanii dànya i Yehu, “Umbu Ngguru, nahàmu ba ninda yiahu. Màta ka mawulu tailu mbua maü, hau ndumamu Nyumu, hau i Muha dàngu hau i Elia,” wàna. (I Peturu ba napanii tuna nu nda pi-ma-ananya jàka nggàraya na papanii-na.)

³⁴Ba talànga panii-i-napa nu i Peturu, tàka-nanyaka na karumangu, na ma-panggàbalu-nja, ka mangàdatu-danyaka.

³⁵Tunaka nu rongu-danyaka lii welingu la karumangu na mapanii, “Yiana-yaka na Ananggu na papindi-nggu. Patingi-nyawa Nyuna!” wàna.

³⁶Ba na-kamàndalu-ka na lii nuna, daita-ya i Yehu didi-kiaya-ka lai nu. Da makiku-nya i Yehu dakandii-ma-anya na rukuna nuna mbuu ndàbana, nda ningu papanii-da lai ngga - nggamu na rukuna nuna na paita-da.

³⁷Hadangu harii i Yehu dàngu da makiku-nya da tau madua haàtu puru-danyaka welingu la palindi, nadangu na tau na mamai lai Yehu.

³⁸Na haàtu na tau welingu la padua tau dangu na-kaladaku, “Umbu Ngguru, pa-ndulangu àru kau tàngaru-ya na ananggu — nyuna didi-ma-aya ba haàtu-na!

³⁹Era hada ngàndi-nanyaka wàndi akatu, yi - yinda-madua-naka hi lupa nawura na ngaruna. Nuangu-mana duna na wàndi ba na-pamayila-ya dàngu nda nabihu-ma paluhu welingu lai nyuna!

⁴⁰Kukarai-mahaka làti da makiku-nggau ka dawàngga-ya na wàndi, tàka nda da-duluku,” wàna.

⁴¹Napaya i Yehu, “Lalukai nyimi yia! Nyimi tau pa-hondarungu langatàka-kai ba ndai pawai! Pirangu-mapa bàdi ba kundengi-kai nyimi dàngu ba ku-patoru-nggai? Ngàndiya nàmu dumu na anamu!” wànanya.

⁴²Nu ba talànga laku-naka na anakeda hanggangu lai Yehu, na wàndi akatu na-yàbahu-nya dàngu hi yinda - yinda-nanya. Tàka i Yehu hi na-pareta-ya na wàndi akatu paluhu ka màlaru-nanyaka na anakeda. Hàla hi nawua belinya nuna na anakeda la amana.

⁴³Mbuu ndàbana na tau na-hangàtaru hàla ba naita-ya na kuaha-na i Ala na ma-bokulu. Ba dàngu hangàtaru bia-napa na tau ba naita-ya nuna na matumbu-ka, panii dànanjaka i Yehu da makiku-nya,

⁴⁴“Patingi pahàmungu dàngu àmbi mbula-dunja yiada da papanii-nggu: na Ana Tau napa papakatanguya la kuaha tau,” wàna.

⁴⁵Tàka da makiku-nya i Yehu nda dapi-anya na àndana na paniina. Na ngerana nuna pa-kàpingu-ya lai nyuda, ka àmbu dapinya àndana. Tàka nyuda da-mangàdatu pa-paàra-nya na rukuna nuna lai Nyuna.

⁴⁶La hongada da ma-kikungu lai Yehu tumbu-nanyaka na pa-tayaku rukuna jàka nggamu na marihi bokulu la hongada nyuda.

⁴⁷I Yehu napi-manya na pa-pangàda-da, jia-duyaka hi napiti haàtu anakeda kudu hi na-pandolaku-ya la karaha-na.

⁴⁸Hi napanii-nja da makiku-nya, “Na tau na mainga-ya na anakeda tungu yia lumunggu Nyungga, na àndana inga-nangga Nyungga-maka. Tàka na tau na mainga-ka Nyungga, inga-nanya Nyuna-maka na ma-palewa-ka Nyungga. Nadu na tau na ma-màrahu halawàla la hongami, jia-yaka na marihi bokulu!” wànanja.

⁴⁹I Yuhani napanii, “Umbu, nyuma maita tau mawàngga wàndi Kambàliku wànya na tamumu Nyumu, hi mahiri-nya, nadu ba nda angunda nyutaya,” wàna.

⁵⁰Napaya i Yehu, “Àmbi hiri-dunya, nadu na tau na manda ndubaku-kai, wai angu-danggai,” hi wànanya i Yuhani dàngu da makiku-nya hawiangu.

⁵¹Ba na-mareni-ka na rehi padita-ya i Yehu la awangu, bota-nanyaka la palaku la Yeruhali.

⁵²Ka paràhangu-nanyaka tau pa-mangilu-nya Nyuna. Da tau pa-paràha-na laku-danyaka, hi datama la hau kotaku la Hamaria la pa-payema hàlanya na patàka wàna i Yehu.

⁵³Tàka da tau la kotaku lai nu nda dabihu painga-ya i Yehu, nadu ba pi hàmu-mada-nyaka ba hanggangu-nanya la Yeruhali.

⁵⁴Ba dapi-nyaka paraï da makiku-nya i Yehu, nu i Yakombu dàngu i Yuhani, na rukuna nuna, panii-danyaka, “Miri, màla mu-mbuhangu nu Miri, ka makarai epi welingu la awangu ka na-patàlaru-ha da tau yiada?”[12] wàda.

⁵⁵Nambaili i Yehu hi nahàngga-nja.[13]

⁵⁶Hàlaka nu laku-danyaka la kotaku hau.

⁵⁷Ba talànga pangala-danyaka na lakuda i Yehu dàngu da makiku-nya, ninya na tau na mapanii lai Yehu, “Umbu, ka kukiku-nya Nyuna wànggunggau jiapa ka la nggikau!” wàna.

⁵⁸Napaya i Yehu, “Da ahu rumba ningu liangu-da, da ma-hawurungu ningu hibuda, tàka na Ana tau nda ningu-maki duna ngia pa-mahuru-na,” wàna.

⁵⁹Hàla i Yehu hi napanii-nya na haàtu, “Kikungga,” wànanya. Tàka napaya na tau nuna, “Umbu, puli kàdingga ka kubeli patani-nya na amanggu,” wàna.

⁶⁰Nahema i Yehu, “Màta-njaka da tau meti ka datani-nja da anguda da mameti. Tàka nyumu, lakuwa kau bobaru-ya na lii, i Ala ba pakiringu-nanyaka pa-pareta, ka wàmu,” wànanya.

⁶¹Nimbunyai na haàtu na mapanii, “Umbu, kikunya Nyuna wànggunggau, na nyuna puli pàkungga ka kubeli pa-pabelingu langu,” wàna.

⁶²Nanapa-ya i Yehu la tau nuna, “Na tau na mambàda pakiringu paluku, ka nambaili-pa la kajia-na, nda ràka jia-aya na angu banjaru-na i Ala,” wànanya.