Read Kambera BELINGU 10 Bible Online

BELINGU 10 - Kambera bible

BELINGU 10

¹“Tunaka nu panii-nanyaka i MIRI lai nyungga, ‘Muha, kahebi-wa dua mbàla kapapa watu hama tuda la kawunga-na, dàngu kau pandoi-mbu hau pàti ai patuu wànguha, hàla kau mai lai Nyungga la pinu palindi.

²Napa ku-tulihu-ha la kapapa watu da pulungu hamada la watu da pambàda tulihu-nggu la kapapa watu da pambàda beramu; hàlaka nu màta kau patama-nja daa la pàti,’ wàna.

³Tunaka nu pandoi-nggunyaka hau pàti ai akahia dàngu hi ku-kahebi dua mbàla kapapa watu hama tuna la wungana, hi kungàndi-ha la pinu palindi.

⁴Nu la kapapa watu tulihu-nahaka i MIRI da Hakambulu Pareta hama-mada da ma-wungangu, nu da pareta pawua-nanggai nyimi, ba jiaya na paniina welingu la padua epi lai nyimi, la lodu pauhi-mi la kambu palindi. Hàlaka hi nawua-ngganja lai nyungga da kapapa watu nuda

⁵hàla beli-nggunyaka ba kupuru welingu la palindi. Tunaka nu, pa-jàngapungu na pareta-na i MIRI, nuda ba dua mbàlada da watu hi ku-patama-nja daa la pàti da pambàda pandoi-nggu — dàngu piti welingu la rehi nuna lundu nàhu, nuda da watu ni bia-njapa lai nu,” wàna. (

⁶Ka hadangu-danyaka da tau Ihirailu welingu la humuru tau Yaakàngu, hi dalaku la Muhera. Lai nu meti-nanyaka i Harungu hi taninya, i Eliahàru na anana jiaya na mahilu-ya nyuna la paratu.

⁷Welingu lai nu laku-danyaka la Nggutunggutu, hàla hi da-pangalangu la Yòtumbata, na ngaba lai nu dangu waina.

⁸La palindi lai nu[10] i MIRI nakahau-nya na kabihu Lewi la pa-paloku-ya na Pàti Pa-ràndingu dàngu la palumu-nya i MIRI, hamanai la papeka-nya kanyuru wànya na tamuna. Nuna-yaka na ngerada lundu nàhu.

⁹Jia-duyaka ba tuna nu na kabihu Lewi hi nda na-ngalangu tana kangeha hama tuna da kabihu - kabihu hawiangu; nadu ba jiaya i MIRI na kangeha ndumada nyuda, hama tuna na papanii-na i MIRI Alami lai nyuda.)

¹⁰“Patu kambulu lodu patu kambulu rudunggu ba ningga la palindi, hama tuna na pawàngu la kawunga-na. Hili handàkangui i MIRI ba na patingi-ngga, ba na-orangu-mbuduka la panda pamolu-nggai nyimi.

¹¹Hàla paràha-nanggaka palaku la pairu ngàndikai nyimi ka peku ngalangu-mi la pamàngi-nya na tana na pambàda ràndina i MIRI la boku la mangilu-mu,” wàna.

¹²“Nàhu, angu dedi, eti wànyawa jàka nggàraya na pa-karuhi-na i MIRI welingu lai nyimi: Maraku-nyawa i MIRI Alami dàngu namatu-ha mbuu ndàbada da pareta-na. Mbuha-manya Nyuna, lumu weli eti-manya Nyuna wàngu tolu ndewami.

¹³Dàngu nunju-maha mbuu ndàbada da pareta-na i MIRI da pa-pakata-nggunggai la lodu nàhu, lumuna na pahàmu wàmi nyimi.

¹⁴I MIRI Alamu na mamangu-nya na awangu marihi jangga; na pinu tanambu mangu-nanya hamanai mbuu ndàbada da ihina.

¹⁵Ba tuna na mbuha-nanja i MIRI da boku la mangilu-mi nda ningu hama bokulu-na, hi lupa napindi-kai nyimi welingu la mbuu ndàba banjaru, dàngu lundu nàhumbu nyimi banjaru pa-pindina-nggai.

¹⁶Jia-duya piti welingu la lodu nàhu màtawa nyimi kai manundu lai MIRI dàngu àmbu hili tongguru-dupa.

¹⁷I MIRI Alami la ditada mbuu ndàbada da pa-alangu dàngu nahipu-ha mbuu ndàbada da kuaha. Nyuna Ala ma-bokulu-ya dàngu ma-kuaha-ya dàngu màta ka karadaku-nya. Nyuna nda na-mbuhangu pali hapapa dàngu nda na keimbu mali hambeli.

¹⁸Nyuna nawai angunja da ana mila dàngu da kawini ndonangu, ka peku pa-deningu-na na pawàngu la wai ngerada; Nyuna nambuha-nja da tau hangàdangu da maluri la angu banjaru-nda, dàngu nawua-nja pangangu dàngu papaki-da.

¹⁹Jia-duya màta nyimi kai pa-itangu mbuha-minja da tau hangàdangu, nadu àmangu nyimi ba tau hangàdangu-madukai dimi la Mehiru.

²⁰Maraku-nyawa i MIRI Alami, dàngu lumunya Nyuna-a. Màta kai pa-daingu la pa-tuturu lai Nyuna dàngu kai harangu wànya na tamuna Nyuna-a.

²¹Wotunya Nyuna, ba jiaya Nyuna na Alami. Wàngu mata wiki-mami bai itaha da paraï da paruku-na da malalu mbanada dàngu da pa-hangàtarungu da patuna tunggumi nyimi.

²²Ba jiaya na lakuda la Mehiru da boku la mangilu-mi ana tau pihu kambulu-ada nggubulu-da. Tàka i MIRI Alami nabonja-yaka na dangumi hi hama kandunu la awangu kai nggubulu-mi,” wànanja.