Read Kambera BELINGU 12 Bible Online

BELINGU 12 - Kambera bible

BELINGU 12

¹“Yiada-haka da uku màta nyimi kai patundu-manja bàdi lundu njàpu lurimi la tana na pawua-nanggai i MIRI, na Alada da boku la mangilu-mi.

²Jàkai tamaka la tana nuna lupangu-maka bàdi kai pa-kaweraku-ha da pangia ngia pa-lumungu-da, la pinuda da palindi jangga, la tandula - tandula dàngu la lumbu ai marumbingu, na ngia pa-lumungu-da kamàla alada na banjaru na ma-ngiangu lai nu.

³Panjoru-ha da ngia pawotu - ngia pawotu maraku-da dàngu pa-làjaru-ha da andu watuda da mahàri ba wàda. Tunu-maha da pa-paninu maü wàdanya i Ahera marapuda, dàngu pa-làjaru-ha da kahala hada marapu-da, hi nda pahili lumu-anjapa lai nu nuda da kamàla ala.

⁴La rehi lumu-minya i MIRI Alami, àmbi kiku-dunya na hurida da tau nuda, ba da-lumunja da kamàla alada.

⁵Welingu la nggubulu tana ngabada da kabihu Ihirailu, napa i MIRI Alami napindi hau pa-ngiangu ka peku hurungu-na na banjaru-nda la hanggana la palumu-nya Nyuna.

⁶La pa-ngiangu lai nu lupangu-ma kai ngàndiha da kameti maraku patunu, hamanai da kameti maraku hawiangu da tanda maraku hangia la hakambulu hamanai da tanda maraku hawiangu, da kameti pa-lundungu njanji, da kameti wàngu etimi dàngu da hapi jàka ndia da mbimbi da ma-kawunga dedi.

⁷La pa-ngiangu lai numbu, la hanggana i MIRI Alami nyimi dàngu angu kuru umami napa kai ngangu dàngu kai hawola rukuna na paràma-mi na maningu rukungu ba na-pakanyuru-kai i MIRI Alami.

⁸Jàka toma-yaka na rehi nuna, àmbi hili wàngu-dupa hama tuna nàhu. Lundu nàhu àtalu eti biami nyimi bai lumungu,

⁹nadu ba ndedi-dupa itamanya na tana na pawua-nanggai nyimi i MIRI Alami na ngia paluri mànjaku ningumi.

¹⁰Bai hàlaka papala-ya na Luku Yorundangu, napa i MIRI nandula-kai la pa-mandapu-nya dàngu la pangia-nya nuna na tana la hapapa luku. Nyuna napa na-kahiri-kai welingu la mbuu ndàbada da muhumi, dàngu nyimi napa miluri mànjaku.

¹¹Tunaka nu napa i MIRI Alami napindi hau pangia na ngia palumu-nya Nyuna. Lupangu lai numaka bàdi bai ngàndi niha mbuu ndàbaha da pambàda panii-nggunggai, nu da kameti maraku patuna dàngu da kameti maraku hawiangu, da tanda maraku hangia la hakambulu dàngu da tanda maraku pa-nudangu da panjanji-mi lai MIRI.

¹²Hawola-wa la hanggana i MIRI Alami, hamanai da anami, da atami dàngu da tau Lewi da ma-ngiangu la parai - paraingu-mi nadu da tau Lewi ba nda da-ngalangu tana kangeha-da la tanami nyimi.

¹³Àmbi àtalu wotu biami kameti maraku-mi la pangia na papindi wikimi,

¹⁴tàka mbulungu-ana la pangia papindi-na i MIRI la tana ngabana na hau kabihu lai nyimi. Lai nua bàdi na ngia pawotu-mi kameti maraku patunu dàngu kai paloku-ha hawiangu da papanii-nggunggai nyimi.

¹⁵Na nyuna wàngu eti biami dimi la parupu bandami dàngu bai nganja da toluda la nggi bia ingiangu ningu. Wàngu eti biami dimi la panga padangu da pawua-na i MIRI lai nyimi. Nyimi mbuu ndàbami, ka tau ma-yahangu-ya ka tau manda yahangu-ya tundunya na lii lumungu pekuna la panganya na tolungu nuna, hama tuna ba pekuna la pangangu tolu kinjangu jàka ndia tolu ruhakai.

¹⁶Tàka da riada nuda da banda màta ndokungu panganja, bu bianja la tana hama tuna wai.

¹⁷La ngia pa-ngiangu-mi nda peku-ami la panganja da tanda maraku hangia la hakambulu welingu la uhu nggàndumu-mi, angguru-mi, mina haitungu-mi, hapimi jàka ndia mbimbi kamàmbi-mi da ma-kawunga dedi, da kameti maraku pa-lundungu njanji, da kameti maraku pawàngu etimi jàka ndia da tanda maraku hawiangu-kai.

¹⁸Nyimi dàngu da anami, hamanai da atami dàngu da tau Lewi da ma-ngiangu la paraimi, màta kai nganja nuda da tanda maraku la hanggana i MIRI Alami, la pangia papindi-na i MIRI Alami. Dàngu la pa-ngiangu lai nu lupangu-ma kai hawola bàdi rukuda da paràma-mi.

¹⁹Mangga pa-hàmungu ka àmbi lànjanja da tau Lewi la ngala lurimi la paraingu lai nu.

²⁰Jàka na palera-nyaka i MIRI Alami na padira tanami hama tuna na pambàda ràndina, pekuna nyimi la pawàngu etimi bai ngangu tolungu.

²¹Jàka lalu marauna na pangia papindi-na i MIRI Alami welingu la pangia-mi, pekuna bai rupu heu hapi jàka ndia mbimbi jàka ndia kamàmbi da pambàda wua-nanggai i MIRI lai nyimi, tàka na toluna kai nganya la pangia-mi bai wàngu etimi, hama tuna ba mbàda wànggunggai.

²²Nimbihu-na na tau, ka na-yahangu jiapa ka nda na-yahangu-kai tundunya na lii lumungu, pekuna ba danganya nuna na tolungu, hama tuna ba pekuna bai ngangu tolu ruha jàka ndia kinjangu.

²³Na nyuna na tolungu maningu riangu nda uku nyimi panganya, nadu na lurina ba ninya daa la riana, jia-duya nda uku nyimi panganya na lurina papohu-nya na toluna.

²⁴Màtangu ailulu nyimi pangangu ria, tàka bunya la tana hama tuna wai.

²⁵Jàka mi-patundu-nya na pareta nuna, nahàmu wànya na etina i MIRI, tàka nyimi dàngu da wàla wuami napa mi-mànjaku.

²⁶Mbuu ndàbada da kameti maraku dàngu da tanda maraku dan pambàda ràndi-minya i MIRI, màta kai ngàndiha la pangia papindi-na i MIRI.

²⁷Da kameti maraku patunu pa-lundungu dàngu da kameti maraku pangangu toluda, lupangu-ma bàdi kai wotuha la pinu ngia pawotu maraku dàngu na riana kai buriya la pinuna nu na ngia pawotu maraku.

²⁸Etiwa pahàmu-manya mbuu ndàbana na pambàda panii-nggunggai nyimi, jia-yaka hi tuminya mahàmu dàngu na paora-na i MIRI Alami, jia-duyaka nyimi dàngu da wàla wuami hi mi-mànangu dàngu hi mànjaku lundu nu - nu,” wànanja.

²⁹“Napa i MIRI Alami na-pamolu-nja da ba - banjaru da ma-ngiangu la tana nuna hi peku mandapu-minya tàka hi mingia-nya.

³⁰Ba hàlaka pa-pamolu-nja nuda da ba - banjaru pananjarungu-ma ka àmbu jia kiku-minja nyuda la pa-lumungu kamàla ala, nadu na matungu nu paruu-minya na manjurangu.

³¹Na huri lumungu-da kamàla alada nuda da ba - banjaru, àmbi kiku-dunya bai lumunya i MIRI Alami, nadu la lumungu-da ba dawunda-ya na ma-iraku na pahuda etina i MIRI. Jiapa-kingu da ana wikida datunu biaha la ngia pawotu maraku ka kameti maraku-ha la kamàla alada.

³²Màtawa kai wànja mbuu ndàbada da pambàda paretangu-kai; jàmangu patunja anguda dàngu jàmangu paàlingu hawutu,” wànanja.