Read Kambera BELINGU 13 Bible Online

BELINGU 13 - Kambera bible

BELINGU 13

¹“Era ningu haàtu wunangu jàka ndia haàtu tau ma-mbuhangu pa-pakalokangu manggadipangu[12] ba naràndi-ya na hau tanda mbiha jàka ndia pa-hangàtarungu

²ba wuku-nanya ka peku marubuku-minja dàngu ka peku lumu-minja da kamàla alada na pandedi handàka-mi patanda-ha, jiapa-kadu ka na-patutungu langatàka na paràndi-na,

³àmbu eti wàdunya hawutu nyuna, i MIRI Alami wànanya na tau nuna la pakama-nggai, la paita-ya jàka tuba langata - tàkami bai mbuha weli etinya i MIRI jàka ndia.

⁴Na tau na matuna nu lupangu-ma huku pameti-ya, nadu ba na-mbuhangu pa-panjàra-nggai welingu la ànda na pa-pareta-nanggai i MIRI Alami lai nyimi. Na tau nuna na-akatu, nadu ba na-paràha-nggai pa-patula ngganggangu lai MIRI na mambàda pahàla-kai welingu la Mehiru, na ngia paata-mi. Jia-duya pameti-maya bàdi, ka peku podahu-ya nuna na ma-akatu. Na nyuna nyimi patundu-manya bàdi i MIRI Alami dàngu kai maraku-nya; manundu-ma lai Nyuna dàngu wahàla-manja da pareta-na. Pa-daingu-ma pa-tuturu dàngu palumu-nya Nyuna.

⁶Era ningu angumi paluhu jàka ndia anami mini jàka ndia kawini, jàka ndia papaha mbuhami, jàka ndia ariyaa mbuhami na ma-pamanda kangunguhu-nggai la pa-lumungu kamàla ala na panda tandami dàngu nda datanda-ha paraï boku la mangilu-mi, da kamàla alada da banjaru da ma-ngiangu la ma-mareni dàngu la mamarau,

⁸àmbu patingi-dunya dàngu àmbu pahiangu-du wikimi la pa-titiru-kai. Na tau nuna àmbu aï-duya jàka ndia àmbu kahiri-duya.

⁹Lupangu-ma nàhaku-nya watu lundu nameti. Nyumuma bàdi ma-mangilu pa-nàhaku-nya watu, hi napandutungu ndàba na rayatu. Nuna na tau njala pameti-maya bàdi, nadu ba na-mbuhangu pa-pamarau-kai welingu lai MIRI Alami na ma-pahàla-ta nyuta welingu la paata la Mehiru.

¹¹Nggubulu-na na banjaru Ihirailu napa narongu-ya na rukuna nuna na pa-pameti, napa nyuda da-mangàdatu, hi lupa nda haàtu-apa na matuya na ma-akatu tungu nu.

¹²Jàkai ndàdiku-ka napa la parai - paraingu na pawua-nanggai nyimi i MIRI Alami, talànga wanguna ningu lii pa-pakadangu

¹³ba ningu mapira-ya na tau akatu welingu la banjaru-mi na mambàda panjàra-nya na tau na ma-ngiangu la paraingu la palumu-nja da kamàla ala da panda tandami.

¹⁴Era ningu parongu-mi kareuku kangunguhu matungu nu, kanuturu pahàmu-manya. Jàka na-padeningu ba ningu langatàka matuna nu,

¹⁵lupangu-maka bàdi pameti ndàbaya na mangia-nya nuna na paraingu pa-kariangu da bandada. Lupanguma ka pamolu ailulu-nya nuna na paraingu.

¹⁶Nggubulu-da da banda da malanja-da da mangia-nya nuna paraingu lupangu-ma pauhi ndàbanja ka pabundu-nja la ma-wailangu, hàlaka, na paraingu nuna dàngu da banda da malanja-naka lupangu tunu-maha bàdi ka kameti maraku-ha ndumana i MIRI Alami. Hàlaka nu, nuda mbuu ndàba-daka dunjaku-nja ka danjadi kananda paraingu dàngu àmbi hili pahada beli-dunyapa.

¹⁷Nuda da banda da malanja pa-ràtungu màta ndokungu pa-pahàmu-ha nduma wikimi, tàka lupangu pamolu ailulu-manja bàdi. Napa na-malaru wànya na hànggana i MIRI, dàngu napa na-paitangu mila etina lai nyimi. Napa na-màjangu etina lai nyimi dàngu hi natukai banjaru bokulu, hama tuna na-pambàda ràndina la boku la mangilu-mi,

¹⁸mili kai patundu-nja mbuu ndàbada da pareta-na da pa-pakata-nggunggai la lodu nàhu, dàngu bai wà-hàlanja hama tuna da-pambuha-na,” wàna.