Read Kambera BELINGU 15 Bible Online

BELINGU 15 - Kambera bible

BELINGU 15

¹“La njàpu nimbihu pihu mbua ndaungu lupangu-ma mi-paloku-ya na ngera podahu wutangu.

²Tuna nu na pawàngu. Nimbihu-na na tau Ihirailu na mambàda wua pa-rutangu àmahu la angu banjaru-na, lupangu-ma na-podahu-ha nuda da wutangu, nadu pa-namatu-nya na botangu-na i MIRI wiki pambàda podahu-haka nuda da wutangu, jia-duya àmbu pahuru dunjapa.

³Pekuna kai pahuru-nja da àmahu pa-paruta-mi la tau hangàdangu, na nyuna àmbu hili pahuru-dunjapa da àmahu pa-paruta-mi la angu banjaru-mi.

⁴Napa i MIRI Alami na-pakanyuru-nggai la paraingu na pawua-nanggai nyimi. La honga banjaru-mi napa nda ningu-a tau mila,

⁵mili mi-manundu lai MIRI Alami, dàngu bai niti hàla-maha la pawànja da pareta pawua-nggunggai la lodu nàhu.

⁶Napa nyimi na-pakanyuru-nggai i MIRI Alami, hama tuna na pambàda ràndina. Napa nyimi mi-paruta-nya àmahu na banjaru dangu, tàka nyimi wiki ndai karai parutangu-a; napa nyimi mi-kuaha-ya na banjaru dangu, tàka nyuda nda jia kuaha-adanggai nyimi.

⁷Jàka mingia-nyaka ngeru na tana na pawua-na i MIRI Alami lai nyimi, hàla la hauna na paraingu ningu tau angu banjaru-mi maningu ma-njakangu, àmbu jia biaya la pa-kanandi-nya na nduma wiki-ma-ami tàka hi ndai ngàdu la pandula-ya nyuna.

⁸Tàka làti duna lupangu-ma kai màjangu etimi kai wuanya pa-parutangu nuna na tau jàka pira pa-kalana-na.

⁹Àmbi hinggilu-du la pawua pa-rutangu lai nyuna, bai palata wànya na mareni-na na ndaungu podahu wutangu ba wàmi. Àmbi pahia-dunya na kanandingu akatu tungu nu patama la etimi. Jàka ndai bihu pawua paruta-nya, napa na tau nuna nawara-nya i MIRI ba napeka-kai nyimi, jiangu-maka napa ba pa-panjala-kai.

¹⁰Wàngu eti bia-miwa la pawua-nya dàngu mbaha etimi, napa i MIRI Alami na-pakanyuru-ha mbuu ndàbada da paraï parukumika.

¹¹La honga tau Ihirailu jiangu ba ningu mànu ana mapira-da da tau mila dàngu da tau maningu ma-njakangu. Jia-duya hi kuwua-nggai pareta nyimi kai màjangu etimi lai nyuda,” wàna.

¹²“Era ningu tau angu banjaru-mi, miniya ka kawini-ya na ma-danggangu wikina[14] la paata lai nyimi, pekuna nyuna ba nalumu-nggai la dalu nomu mbua ndaungu. La ndaungu papihu wàna, lupangu-ma kai pamara-ya nyuna.

¹³Na ata nuna na pa-pamara, àmbi palaku lima jua-duya.

¹⁴Wàngu màjangu etimi màta kai wuanya nggàraya na pawua-nanggai i MIRI Alami: kamàmbi mbimbi, uhu nggàndumu dàngu wai angguru.

¹⁵Ngàdaya, nyimi àmangu bai dedi ata la Mehiru dàngu nyimi ba na-pahàla-kaika paraïna i MIRI Alami; jia-duyaka na pareta yiana hi ku-pakata-nggainya lai nyimi.

¹⁶Tàka era nda bihuna nuna na ata palaku paraï ruku mbuha-nanggai hapa ihi kuru umami, dàngu na-mbuhangu paenga dànggai,

¹⁷karia-nya la pindu umamu dàngu kau bowa pandeha-nya na kahilu-na, ka ata lupa-munyaka la ngala lurina. Tuna numbu na pawàmu la atamu kawini.

¹⁸Era pahàla-minya na haàtu na ata, àmbu nahala wadunya na etimi, nadu ba nomu mbua ndau-manaka ba nalumu-nggai, ba beri mandua pàku pawua-minya welingu la wunda tau pahewa.[15] Laku-manya na pareta yiana, napa i MIRI na-pakanyuru-nggai la paràma - paràma-mika,” wàna.

¹⁹“Da ana hapi mini dàngu da mbimbi bumbu da ma-kawunga dedi màta kai maraku wànja lai MIRI Alami. Da hapi nuda àmbi yila wàdunja luku, dàngu da mbimbi nda uku pa-kikiru-ha.

²⁰Nimbihu ndaungu nyimi hapa ihi kuru umami màta kai nganja da toluda la hanggana i MIRI Alami la pangia na papindi-na i MIRI.

²¹Tàka jàka era ningu nyurana nuna na banda, hama tuna kanjiku dàngu poki jàka ndia jàka ningu nyura hauna ma-paihikungu na banda nuna àmbi maraku wàdunya lai MIRI Alami.

²²Nimbihu-na na tau, ka ma-yahangu-ya hamanai ka manda yahangu-ya, pekuda panganya la uma, hama tuna bai ngangu tolu ruha jàka ndia tolu kinjangu.

²³Na nyuna na riana àmbi ngadunya, tàka màta kai bunya la tana hama tuna wai,” wàna.