Read Kambera BELINGU 16 Bible Online

BELINGU 16 - Kambera bible

BELINGU 16

¹“Imbabunya na Pamangu Paha la wulangu Ambipu la pa-maraku-nya i MIRI Alami, nadu ba la wulangu nuna-duka, nu la rudungu, ba na-pahàla-kai welingu la Mehiru.

²Luawa la pangia papindi-na i MIRI kai rupu heu welingu la mbimbimi jàka ndia hapimi ka tanda maraku pamangu Pahaya la pa-maraku-nya i MIRI Alami.

³La Pamangu Paha màta kai nga wàngu roti nda patai wolungu. Pihu mbua lodu mandaina màta kai ngangu roti nda patai wolungu, hama tuna ba jiaya na dunjaku-minya na tana Mehiru ba nggu - ngguhami. Nganyawa na roti nuna na roti mayila ba wàminya ka pekuna la ngala lurimi kai namuya na lodu nuna, ba jiaya na dunjaku-minya la Mehiru, na ngia pa-pàdangu-mi mayila.

⁴La ngala pihu mbua lodu mandaina la nggubulu paraimi àmbu ningudu haàtu ma-pahàmu tai wolu la umana. Na tolu banda parupu la rudungu kawunga-na lupangu-ma kai nga pambuta memaya la rudungu nunama.

⁵Da banda da pawàngu la Pamangu Paha màta ka rupuha la pangia papindi-na i MIRI Alami, dàngu nda ukua la hau pa-ngiangu la pa-nggubulu tana na pawua-nanggai nyimi. Na ngerana nuna màta kai wundaya la rehi tama lodu, hama tuna la rehi dunjaku-minya na tana Mehiru.

⁷Manahu waiha nuda da tolungu, hàla màta kai nganja la pangia papindi-na i MIRI Alami, hàla kai beli la umami hadangu harii.

⁸La ngala nomu mbua lodu na manàmu-nya lupangu-ma kai ngangu roti nda patai wolungu. La lodu papihu wàna màta kai pauhi la pa-marubuku-nya i MIRI Alami. Àmbi ràmadu la lodu nuna,” wàna.

⁹“Pakiri welingu la lodu mutimi uhu nggàndumu, dihawa pihu mbua minggu,

¹⁰hàla mbabu-nyawa na Remi Muti ka maraku-nya i MIRI Alami. La lodu nuna ngàndi-nyawa maraku wàngu etimi lai Nyuna, nunjuya na danguna na pangala-mi na pawua-nanggai i MIRI lai nyimi.

¹¹Lupangu-ma kai hawola hàla la hanggana i MIRI Alami la pangia papindi-na dàngu da anami, da atami dàngu tau Lewi, da tau hangàdangu, da ana mila dàngu da kawini ndonangu da maninja la parai - paraingu-mi.

¹²Màtawa nyimi kai weli etingu la panunju-ha da pareta, àmbi mbula-dunya nyimi àmangu ba atakai la Mehiru,” wànanja.

¹³“Ba hàla ndàbaka pa-parina-ha da uhu nggàndumu, dàngu mbuu ndàbada da wua angguru ba hàlaka papohu-ha, màtawa kai mbabunya na Remi Maü Ma-paraungu pihu mbua lodu mandaina.

¹⁴Hanggela hawola-wa dàngu da anami, da atami, da tau Lewi, da tau hangàdangu, da ana mila dàngu da kawini meti lei da maninja la parai - paraingu-mi.

¹⁵Pihu mbua lodu mandaina màta kai mbabunya na remi yiana kai maraku wànya i MIRI Alami la pangia papindi-na i MIRI. Hawola-wa, nadu i MIRI Alami ba na-pakanyuru-duhaka da ihi tana paraï-mi dàngu da paràma-mi.

¹⁶Mbuu ndàbana na tau mini Ihirailu lupangu-ma ka namai pa-marubuku-nya i MIRI Alami la pangia papindi-na pandailu wundangu hau ndaungu, nu la lodu Remi Paha, la Remi Muti dàngu la Remi Maü Ma-paraungu. Nimbihu-na na tau lupangu-ma nangàndi maraku,

¹⁷tundunya na pamàka-na, pajàngapunya na danguda da pangala-mi da pawua-nanggai i MIRI Alami lai nyimi,” wàna.

¹⁸“La nimbihu paraingu na pawua-nanggai i MIRI Alami lupangu-ma kai wotuha da hakimu - hakimu dàngu da mapawai ngaba hawiangu, ka da-patanda-nya ngera na rayatu ba dawàngu ma-padeningu.

¹⁹Era bota-yawa jàka wàda, àmbu datungu àtalu eti biada jàka ndia àmbu dambotu hapapa. Àmbu dakei li hambeli, nadu na pa-wuangu li hambeli ba na-pahambala mata, jiapa-kadu ka tau pinguya dàngu ka tau pa-tutungu-ya hi lupa nda na-padeningu na botangu-da.

²⁰Lupangu-ma bàdi nyimi kai pa-deningu mànu ka peku pa-daingu dàngu luri mànjaku-mi la tana pawua-na i MIRI Alami lai nyimi.

²¹Jàkai pandoi ngia pawotu maraku ndumana i MIRI Alami, àmbi tudunya la papana kahala hada marapu ai ndumana na marapu Ahera,

²²dàngu màtangu-mbu pa-pahadangu andu watu na ngia pa-lumungu marapu, nadu i MIRI Alami ba na-pawutangu la matuya na matuna nu.