Read Kambera BELINGU 17 Bible Online

BELINGU 17 - Kambera bible

BELINGU 17

¹Àmbi maraku wàngudu hapi jàka ndia mbimbi maningu nyurangu lai MIRI Alami, ba wuta eti-nanya na matuna nu.

²Jàka era rongumi la hau paraingu ba ningu tau manjala la hanggana i MIRI Alami ruku pangga-nanya na pa-ràndingu,

³dàngu na pareta-na ba nawàngu pa-lumungu dàngu pa-atangu-na wikina la kamàla ala jàka ndia la mata lodu, wulangu dàngu da kandunu,

⁴lupangu-maka bàdi kai kanuturu pahàmu-nya. Jàka tuba pa-deningu-na ba nanjadi langatàka-maka na akatu nuna la Ihirailu,

⁵lupangu-ma karia-nya la hambeli paraingu na tau na manjala ka nàhaku-nya watu lundu nameti.

⁶Na nyuna hi pameti-ya mbulungu-ana jàka ningu hakahii madua jàka ndia marihi-kai; jàka haàtu-ana na hakahii nda uku la pa-pameti-ya.

⁷Lupangu-maka bàdi da-nàhaku mangilungu watu ba hapajia-ha da hakahii, hi namangu papandutungu nggubulu-na na rayatu. Ba wàngu patimi-nu payila-minyaka nuna na akatu.

⁸Jàka era ningu palakara na panda màka parata-da da hakimu la pa-ngiangu lai nu, nadu ba lalu kalutu-na, hama tuna na pameti tau na pa-harawuku dàngu na panda harawuku, na pa-hilitu ruku manguda jàka ndia maràngga pa-manua dua wiki, lupangu-ma milua la pangia papindi-na i MIRI Alami.

⁹Patàka-nya na palakara-mi nuna la ratu - ratu Lewi dàngu la hakimu na ma-talànga paloku la rehi nuna, hàla puli bianja ka dabota-ya na palakara nuna.

¹⁰Nyudaka duda napa da ma-wuangu botangu, tàka nyimi lupangu-ma inamatu pahàmu-nya jàka nggàra wàda lai nyimi.

¹¹Kataku-maya na pabota-da dàngu namatu-maha jàka nggàraya na pa-kawuku-da lundu la maana ku - kuduna.

¹²Nggamu biaya na matoru mbeni pa-ndubaku hakimu jàka ndia ratu ma-talànga pawai ngaba lupangu-ma huku pameti-ya; ba wàngu patimi nu payila-minyaka nuna na akatu welingu la Ihirailu.

¹³Mbuu ndàbana na tau napa narongu-ya na rukuna nuna na matumbu tàka hi na-mangàdatu, hi lupa nda ningu-apa matoru mbeni la patuna nu,” wàna.

¹⁴“Jàkai mangu-nyaka na tana na pawua-nanggai nyimi i MIRI Alami, dàngu ba mbàda ngiangu-mika lai nu, napa nyimi hi mi-mbuhangu bia paningu hanganjingu, hama tuna da ba - banjaru da ma-ngiangu la winggiru-mi.

¹⁵Eti pahàmu-manya na tau na pawotu-mi la pa-hanganji ka jiaya na tau na papindi-na i MIRI Alami. Nyuna màta ka tau la banjaru wiki-minya; na tau hangàdangu màtangu àmbi wotu-duya la pa-hanganji-nggai.

¹⁶Na hanganji nda uku pa-mangungu njara dàngu ndumada da tanatara-na. Nda uku pa-paràha-nya yiana na banjaru pabeli la Mehiru palua pakei njara[16] la Mehiru, nadu ba mbàda panii-manaka i MIRI ba nda hidama na banjaru-na la pahili beli la tana nuna.

¹⁷Na hanganji àmbu ningudu papaha danguna, ka àmbu na-taluru-nya i MIRI. Àmbu na-kehangu-du pawulu wàngu la pa-mangungu àmahu bara àmahu rara.

¹⁸Jàka katua-ya na haàtu la pa-hanganji, lupangu-ma kai wuanya hau mbuku na ma-ihingu uku kalaratu, huri pangerangu welingu lai Ala, da pa-haleli welingu la mbuku memangu, da pa-pahàmu-da da ratu Lewi.

¹⁹Na mbuku nuna lupangu-ma ka na-pahàmu-ya la lihina, ka nambaha-ya padua la ngala lurina, ka na-papekangu pa-maraku-nya i MIRI dàngu ka na-tuturu la pa-patundu-nja da pareta da pa-tulihu la mbuku nuna.

²⁰Jàka na-duruhungu-ma pambaha-ya na mbuku nuna, nda namuda-a la pakaka wikina ba narihi hàmupa nyuna welingu la angu banjaru-na dàngu nda jia pangga-ananya na pareta-na i MIRI jiapa nda nggikina. Ba tunaka nu napa nyuna dàngu ana umbuku-na da-pareta-ya na banjaru-na lundu la ha-ndalaru ha-ndàdiku,” wàna.