Read Kambera BELINGU 18 Bible Online

BELINGU 18 - Kambera bible

BELINGU 18

¹“Da kabihu Lewi nggubulu-da pa-wuangu waingaba-ha la paratu, jia ba tuna nda ukua pa-ngalangu tana ndumada nyuda la Ihirailu. Lupangu da patoma-ya na lurida welingu la tanda maraku - tanda maraku dàngu kameti maraku - kameti maraku hawiangu da pawua-nanja i MIRI.

²Nda ukua paningu tana manguda nyuda hama tuda da kabihu hawiangu, ba jiaya i MIRI-maka na kangeha ndumada nyuda, hama tuna na paràndi-na i MIRI lai nyuda.

³Jàka ningu haàtu tau mawotu kameti maraku hapi jàka ndia mbimbi, na wihi mangilu-na, na ngingina dàngu na kambuna nuna na banda lupangu-ma pa-wuangu-ha da ratu ba tanggu-danja.

⁴Da pa-kawunga ngalangu da uhu nggàndumu, da wai angguru, da mina haitungu dàngu da wulu mbimbi, tangguda nyuda-mbuha.

⁵Welingu la mbuu ndàbada da kabihu Ihirailu, i MIRI Alami napindi-mayaka na kabihu Lewi ka daratu lundu nu - nu.

⁶Era ningu haàtu tau Lewi la nggi paraingu Ihirailu biaya na ngia paweli-na ka namai la pangia papindi-na i MIRI dàngu ka na-mbuhangu pa-engangu lai nu,

⁷peku-mana duna nyuna palumu-nya i MIRI Alana ba ratuya, hama tuna da tau Lewi hawiangu da maràma lai nu.

⁸Lupangu-ma nyuna na-ngalangu pangangu hama danguda da pangala-da da ratu hawiangu; dàngu nggàra biaya na pangala-na welingu la kalembi-na, manguna nyuna-mbuha,” wàna.

⁹“Jàka mbàda tama-mika la tana na pawua-nanggai i MIRI Alami, àmbi kiku-dunja da akatu pawunda-da da banjaru da maninja lai nu.

¹⁰Àmbu ningudu la hongami nyimi ma-kameti maraku wànja da ana. Dàngu àmbu jia haàtu-du manjadi tau manyura, makàli pa-tandangu tanda, ma-kawanangu muru kabaïngu jàka ndia

¹¹na ma-palakungu alimuu, jàka ndia matama la patuna la pa-panua dànja da ndewa tau meti.

¹²Na tau na mawànja da pawunda - pawunda akatu nuda huda-mananya i MIRI Alami, dàngu rukuna na matungu numaka hi nawàngga-ha da ba - banjaru nuda welingu la hanggami.

¹³Jia-duya màtawa nyimi kai lumu weli eti weli puhunya i MIRI Alami,” wàna.

¹⁴Tunaka nu hi napanii i Muha, “Da ba - banjaru la tana na-pangia-mi napa da kikunya na panaungu tau manyura dàngu da ma-patandangu tanda. Tàka i MIRI Alami nda na-pahia-anggai la palaku-nya na ngerana nuna.

¹⁵Tàka na nyuna napa na-palewa-nggai haàtu wunangu hamanggu nyungga welingu la banjaru wikinda, tàka lupangu duka bàdi kai manundu lai nyuna.[17]

¹⁶La lodu nuna, ba jiaya na pauhi-mi la Palindi Hinai, nyimi mi-kamahingu ka àmbi hili ronguya i MIRI ba napanii, dàngu ka àmbi hili itaya ba ninya Nyuna daa la epi na makandulangu, nadu nyimi bai mangàdatu pameti.

¹⁷Jia-duyaka nu i MIRI hi napanii lai nyungga, ‘Nuna na pa-kamahi-da na-patubangu.

¹⁸Napa Nyungga ku-palewa-nja haàtu wunangu welingu la banjaru wikida hama tuna nyumu. Napa Nyungga kupanii-nya jàka nggàraya na pa-patàka-nanja, tàka nyuna[18] hi na-patàka-nya na banjaru nuna mbuu ndàbana na pa-paretanggu-nya.

¹⁹Napa nyuna napanii wànya na tamunggu, dàngu napa Nyungga kuhuku-nya[19] jàka nggamu na manda manundu lai nyuna.

²⁰Tàka jàka era ningu haàtu wunangu matoru mbeni pa-patàkangu lii wànya na tamunggu Nyungga, bundu nda Nyungga ma-paràha-nya la patuna nu, lupangu-ma nameti; tuna numbu da wuna - wunangu da mapanii wànya na tamuda da kamàla ala ba lupangu-ma dameti.’

²¹Talànga wanguna ningu paàrangu la etimi, ‘Nggiki hama pi bia-manya ba welina lai MIRI jàka ndia na pa-patàka-na na haàtu wunangu?’

²²Jàka ningu haàtu wunangu mapanii wànya na tamuna i MIRI, hàla hi nda na-patubangu bia hama tuna ba wàna, na manyura nuna nda ma-pawelingu lai MIRI-aya. Na wunangu nuna panii wàngu-nanya tamu wikima-ana duna, jàka tuna nu àmbi mangàdatu-dunya,” wàna.