Read Kambera BELINGU 19 Bible Online

BELINGU 19 - Kambera bible

BELINGU 19

¹“Ba na-hàlaka pa-pamolu-nya na ba - banjaru paraïna i MIRI Alami dàngu hi wua-nggainya nyimi na tanada, dàngu bai piti-haka da paraingu-da dàngu da umada tàka hi mi-ngiangu lai nu,

²na ngaba tana nuna lupangu-ma kai kawàri katailu-nya, la nimbihuda tunja hau paraingu ngia pamara na mamuda ba tomaya ka peku palai ninguna lai nu nimbihu-na na tau ma-pameti tau.

⁴Jàka ningu haàtu tau ma-pameti tau hawiangu dàngu nda hara wukuna tàka hi nda papa-mbunanyai, pekuna nyuna ka napalai la hau paraingu nuda dàngu ka pa-daingu lurina.

⁵Ngera hama tuna da tau madua da ma-pakariangu patama la omangu la papunggu ai. Ba talànga punggu-naka nu na haàtu, na-pahàlangu na ihina na kataka welingu la uluna, nanggàna-ya na haàtu na anguna hi lupa nameti wànya. Na tau na mambàda pameti anguna dàngu nda wukuna nda nanjala-a dàngu peku palaina la hau welingu la tailu mbua paraingu ngia pamara ka namara. Jàka ngera hau-ma-ana na paraingu ngia pamara na manggawa-na lalu marau-dunaka, tàka na angu kalembi-na matanggu paàra-nya la patungu hilu la ma-pameti-ya, peku yaulu-danya nyuna dàngu paraï pambeni da-pameti-duyaka nuna na tau na manda njala.

⁷Jia-duya hi kuwua-nggai pareta kai payema-nja nuda da tailu mbua paraingu.

⁸Jàka na-palera-nyaka i MIRI Alami na ngaba tanami hama tuna na pambàda ràndina la boku la mangilu-mi, dàngu jàka nawua hàla-nggainyaka nyimi nuna na tana nggubulu-na,

⁹lupangu-ma kai hili pindiki tailu mbua paraingu ngia pamara. (Na tana nuna napa nawua-nggainya jàka miwànya mbuu ndàbada da pareta pawua-nggu lai nyimi la lodu nàhu, dàngu jàka mimbuha-nya i MIRI Alami dàngu jàka miluri tundunya na pa-papeka-na.)

¹⁰Wànyawa yiana ka àmbu jia njalami nyimi rukuna bai pulinya na tau manda njala la pa-pameti-ya la tana na pawua-nanggai nyimi i MIRI Alami.

¹¹Tàka hauya duna jàka ningu haàtu na manàpu-nya na muhuna dàngu ba naharawuku la pa-pameti-ya wàngu karaü-nanya eti, hàla ka napalai la hau paraingu ngia pamara nuna, ka kahiri wàngga ba wàna.

¹²La ngerana nuna da ma-pangora lai nu la paraingu, lupangu-ma dapaau-nya na tau nuna, hàla ka dapuli-nya la nua kalembi da matanggu paàrangu la patungu hilu, ka peku puha-danya hukungu meti.

¹³Àmbi aï-duya na tau tungu nu. Pahàla-ya na Ihirailu welingu la tau ma-pameti tungu nu, ka peku mànjaku-mi,” wàna.

¹⁴“Jàka mbàda tàka-mika la tana na pawua-nanggai i MIRI Alami, àmbi paleli-dunja da walaku padira tana angu ngiangu-mi na pambàda tuda weli ndaingu,” wàna.

¹⁵“Haàtu-a hakahii ndedi natoma-a la pa-paloha-nya na njalana na tau pakàla; na wawana tau madua-maki bàdi hakahii pa-karuhi ndumana nuna.

¹⁶Jàka era ningu haàtu tau ma-mbuhangu papuha-ya na anguna ba nawàngu papulu-nya la ma-timbangu,

¹⁷nuda da tau madua lupangu-ma ka dalua la ngia pa-lumungu na pambàda padaina i MIRI ka da timbanya paraï da ratu dàngu da hakimu da ma-talànga paloku la rehi nuna.

¹⁸Da hakimu lupangu-ma ka da-manginjiru pahàmu-nya na palakara nuna, dàngu jàka na-patubangu ba napulu-nya na anguna pa-Ihirailu,

¹⁹lupangu-ma ka na-handepa-ya na hukungu manggàna-ya na tau pa-panjala-na làti. Ba wàngu patimi nu, pamolu dimi-nyaka na ma-akatu.

²⁰Napa mbuu ndàbana na tau narongu-ya na rukuna nuna tàka hi da-mangàdatu wànya. Nu ba tuna nu nda ningu-apa haàtu matoru mbeni pawunda ma-akatu tungu nu.

²¹La palakara - palakara ma-hamangu nuna màtangu àmbi aï-duya na matuna nu. Na hukungu-na jiaya: Na luri hilu wànya luri, na mata hilu wànya mata, na ngàndu hilu wànya ngàndu, na lima hilu wànya lima dàngu na wihi hilu wànya wihi,” wàna.