Read Kambera BELINGU 20 Bible Online

BELINGU 20 - Kambera bible

BELINGU 20

¹“Era luami pa-pabera palawa-nja da muhumi, àmbi mangàdatu-du jàka mi-itaha da kareta pabera dàngu da njarada da madangu, hamanai da tanatara mahipu-ha da dangumi nyimi nggubulu-mi. I MIRI Alami na ma-pahàla-kai welingu la Mehiru, napa nandula-kai.

²Ba ndedi mi-pakiringu pa-pabera, na haàtu na ratu lupangu-ma ka na-hurungu ka natunggai lii tuna yia,

³‘Angu dedi, pa-tingingu-wa! La lodu nàhu tiangu nyimi pabera-minyaka. Àmbi mangàdatu-du jàka ndia àmbi kudu eti jàka ndia àmbi mbingu wànya.

⁴I MIRI Alami napa nalaku karia-nggai la pandula-kai, dàngu napa nawua-nggai nyimi patalu wàngu,’ ka wàna.

⁵Tunaka nu lupangu-ma da parawira ka da-patàka-nggainya na kareuku yiana, ‘Ningu nu la hongami tau mabidi wulu umana tàka ndedia nambabu wànya? Jàka ningu, nabeli bia duna. Nadu jàka nameti la pabera, ka tau hawiangu-ka duna na mangia-nya na umana.

⁶Ningu nu la hongami tau mabidi pamula angguru la wokana dàngu ndedi peku pàpu-nanja da wuada? Jàka ningu, nabeli bia duna. Nadu jàka nameti la pabera, ka tau hawiangu-ka duna mapàda-nya na hàmuna na wai angguru-na.

⁷Ningu nu la hongami tau na mambàda ningu tubangu la palalei? Jàka ningu, nabeli bia duna. Nadu jàka nameti la pabera, ka tau hawiangu-ka duna na ma-kanoma-ya na tubana.’

⁸Da parawira lupangu-ma ka tuna yia na paniida lai nyimi, ‘Ningu nu la hongami tau ma-bàrangu etina dàngu ma-mangàdatu? Jàka ningu nabeli bia duna, ka àmbu na-pawadaru-ya na ringgitu tau hawiangu.’

⁹Ba dahàla papanii da parawira la tanatara, lupangu-ma ka dapindi ma-pairu - ma-pairungu nduma nimbihu juruda.

¹⁰Jàka era luami pabera-ya na hau paraingu, puli pàkunya na mangu paraingu ka da-pamopungu wikida.

¹¹Jàka da-bunggahu-ha da pindu bokulu-da dàngu ka damopu, lupangu-ma kai atanja mbuu ndàbada kai paràma-nja mambotu ndumami nyimi.

¹²Tàka jàka era nda bihuda pamopu da tau la paraingu nuna, dàngu darihi mbuhangu pa-pabera, lupangu-ma kai nggupulu-ya nuna na paraingu.

¹³Tunaka nu, era pahia-nanggai i MIRI Alami la pawàhi-ya nuna na paraingu lupangu-ma mbuu ndàbada da tau mini kai pameti ndàbaha.

¹⁴Tàka nyimi pekuna kai piti nduma wikimi tau kawini, anakeda, banda dàngu ngga - nggàra bia da maninja la paraingu nuna. Mbuu ndàbada da banda da malanja-da nuda da muhumi pekuna kai malanja wànja. Wua-mana-nggaihaka i MIRI Alami lai nyimi.

¹⁵Tuna numa bàdi bai palua-nja lima da parai - paraingu mamarau welingu la tana ngia pa-ngiangu-mi.

¹⁶Tàka jàka ninya la ngabana na tana pawua-nanggai MIRI-ya nuna na paraingu, lupangu-ma kai pameti-ha nggubulu-da da ma-ngiangu lai nu.

¹⁷Hama tuna na lii pareta-na i MIRI Alami lupangu-ma kai pamolu-nja da tau Heti, Amori, Kanaàngu, Perihu, Hewi dàngu Yembuhu.

¹⁸Pameti-maha nyuda ka àmbu da-pawiti-nya na panjala wàmi lai MIRI Alami ba dawàngu pa-ajaru-kai la pawunda-ya na pa-makinahungu ndumada da kamàla alada nyuda.

¹⁹Jàka era bera-minya na hau paraingu bai wàngu pamandai bai nggupulu-ya àmbi punggu-duha da pingi wua ai lai nu. Nga bianja duna da wuada, tàka na nyuna àmbi paruha-ha da pingida, nadu nuda da pingi ai nda muhu-aminja.

²⁰Pekuna nyimi bai pungguha da pingi ai hawiangu, kai tuha oka bai nggupulu wànya nuna na paraingu ka lupa nambera,” wàna.