Read Kambera BELINGU 21 Bible Online

BELINGU 21 - Kambera bible

BELINGU 21

¹“Ngera hama tuna la tana na pawua-nanggai i MIRI Alami, ka ningu haàtu tau mameti la woka dàngu nda papinya jàka nggamu na ma-pameti-ya,

²lupangu-ma da ma-pairungu dàngu da hakimu ka dalua pa-hukutu-ya nggi tuna marauna welingu la ngia pameti-na nu na tau hanggangu la nimbihu paraingu da malihi-nya lai nu.

³Hàla, da ma-pangora la paraingu marihi mareni, lupangu-ma ka dapindi heu kamboka hapi na pandedi handàkangu paràma wànya.

⁴Na hapi nuna lupangu-ma ka dangàndi-ya la hau pa-ngiangu na ma-lihingu wai luku laku, na mandedi handàkangu pamihi dàngu na tanana ba ndedi handàkangu pa-kabànda-ya dàngu patondu-nya. Lupangu-ma dapata-ya na nggoruna nuna na banda lai nu.

⁵Da ratu Lewimbu dalua-ma bàdi lai nu, nadu ba nyudadu bàdi da ma-wuangu botangu la palakara - palakara mawàngu hanggàritu tungu nu. Nyuda pambàda pindi-mana-haka i MIRI Alami la palumu-nya dàngu la papeka kanyuru wànya na tamuna Nyuna.

⁶Hàla, mbuu ndàbada da ma-pangora la paraingu nuna na marihi mareni, lupangu-ma ka dabaha limada la pinuna nuna na hapi,

⁷dàngu ka dapanii, ‘Nda nyuma-a duma ma-pameti-ya na tau nuna, dàngu nda mapimbunya jàka nggamu na matuna-nya nu.

⁸MIRI jàma àrunya na banjaru-mu na Ihirailu, na pambàda pahàla-mu welingu la Mehiru. Jàma àru-nggama nyuma, dàngu àmbu pangia-dunggama la patanggu hemaya na tau papameti dàngu nda ningu njalangu,’ ka wàda.

⁹Nuya, ba wàngu pawànya na pa-karuhi-na i MIRI, nyimi nda na-pangia-anggai-pa la patanggu hemaya nuna na pa-pameti,” wànanja.

¹⁰“Jàka era pabera-minya ka nawua-nggai patalu wàngu i MIRI Alami tàka nyimi hi mipiti tanawangu pabera,

¹¹talànga wanguna la anguda nyuda ningu haàtu kawini manandangu pambuha-mu ka kutuya papaha-nggu ba wàmu.

¹²Karia-nyawa nuna na kawini la umamu. Lai nu lupangu-ma nyuna ka nangguti-nya na lunggina,[20] nahula-ha da wuuna,

¹³dàngu ka na-hilungu pakina. Lupangu-ma ka na-ndàdiku la umamu dàngu lupangu-ma ka na-hawina-nja da inana da amana da mameti la dalu hau wulangu mandaina, hàlaka nu ka peku kanoma-munya.

¹⁴Napa la malamiri jàka nda muhili mbuha-nyapa, pekuna kau paràha-nya ka nabeli dàngu wàngu etina. Àmbu palua-nya lima hama tuna ata-munya dàngu àmbu danggambunya, nadu ba mbàda pambana-munyaka nyuna la pa-katuda angunggau nyumu,” wàna.

¹⁵“Ngera hama tuna na haàtu na tau ka na ka-duangu papaha-na dàngu nyuda ba dadua da-kawàra pa-anangu anakeda mini, tàka na anakeda na ma-kawunga dedi nda anana na papaha parihi namu-ananya na tau nuna.

¹⁶Era patikingu-na pa-paberi-nja da pawulu-na la ana - anana, nda uku nyuna la pa-hakapapa la ana papaha parihi namuna ba nawua-nya na anana nuna da manguna làti na anakeda na ma-kawunga dedi.

¹⁷Lupangu-ma nyuna ka nawuanya pandua wundangu na anana na ma-kawunga dedi, jiapa ka nda anana na kawini parihi panamu-na. Na ngabana na anakeda na ma-kawunga dedi na pajiaya bàdi paraïna amana, dàngu na anakeda nuna lupangu-ma ka wuanya ngabana na pamangu-mana duna tundunya na uku,” wàna.

¹⁸“Era ningu haàtu anakeda mini ma-tongguru etina, na makàli patula ngganggangu dàngu nda nabihu pa-patundungu la pulu ina amana jiapa-kadu ka mbàda huku-danya.

¹⁹Nu da ina amana lupangu-ma ka dangàndi-ya nyuna la hangga ma-pangora la paraingu ngia pa-ngiangu-da, ka dakarai la patimba-nya ngerana nuna na anakeda.

²⁰Lupangu-ma ka dapeka-nja da ma-pangora la paraingu nuna, ‘Yiana na anama na-tongguru etina, nakàli patula ngganggangu nda nabihu pa-patundungu lai nyuma; nahiru hàruha da àmahu dàngu nakàli maüku,’ ka wàda.

²¹Hàla, na tau mini lai nu la paraingu lupangu-ma ka da-nàhaku-nya watu nuna na anakeda ka lupa nameti. Ba timi nu nyimi pamolu-minyaka na ma-akatu. Mbuu ndàbana na tau Ihirailu napa narongu-ya na rukuna nuna na matumbu tàka hi namangà-datu,” wàna.

²²“Era ningu haàtu tau pambàda hukungu meti ruku tuna ma-akatu, tàka na metina pa-tiwalungu la andungu-ya,

²³nda uku pamàta-nya na metina ka na-kanjupu-ya na rudungu, tàka lupangu-ma ka tani mema-manya la lodu nunama. Na meti na pa-tiwalungu la andungu nangàndi ràtungu-na i MIRI Ala la paraingu nuna. Jia ba tuna tani-manya bàdi na meti nuna ka àmbu na-pairaku-ya na paraingu na pawua-nanggai i MIRI Alami lai nyimi.