Read Kambera BELINGU 22 Bible Online

BELINGU 22 - Kambera bible

BELINGU 22

¹Era ningu hapi jàka ndia mbimbi angu banjaru-mi ma-njàrangu, àmbu harawuku la panda pinya, tàka ngàndi beliya nuna na banda la mamangu-nya.

²Tàka jàka namarau na umana na mamangu-nya, dàngu jàka ndai pinya jàka nggamu mamangu-nya, ngàndiya nuna na banda la umami. Era maina na mamangu-nya pahimbu-ya, pulinya na banda nuna lai nyuna.

³Wàmanya na hamana nuna jàka mihunggu-ya na heu kalandai jàka ndia na hawàla hinggi, jàka ndia ngga - nggàra bia na mangu angu banjaru-mi.

⁴Era ningu heu kalandai jàka ndia hapi mangu angu banjaru-mi manjoru la ànda, àmbu harawuku-du la panda pinya, tàka màta kai ndulaya pa-pahada belinya nuna na banda.

⁵Na tau kawini àmbu napaki-du hama tuna mini, tàka na tau mini àmbu napaki-du hama tuna kawini, nadu na matuna nu nahuda etinya paraïna i MIRI Alami.

⁶Jàka era hunggumi hau hibu ma-hawurungu la kapuka ai jàka ndia la tana tàka na baina na ma-hawurungu ba habunggutu-nanja da tiluna jàka ndia ka angu-nanja da anana, àmbi yàpa-duya nuna na bai ma-hawurungu.

⁷Pekuna kai pitiha da anana na ma-hawurungu, tàka màtanya na baina ka na-hawurungu, ka peku malaina na lurimi dàngu kai luri mbokaru.

⁸Era pa-hadangu-mi hau uma, lupangu-ma kai tunya oka winggiru-na la halinggi toku ndiduna. Ka ndai tanggu hema-ayapa dimi jàka ningu haàtu tau ma-kanabu welingu la toku ndiduna hi nameti.

⁹Àmbi pamula-du pa-pamula hangia la woka angguru-mi. Jàka mi-pamula-mai nda uku papiti-ha da ihina nuna na woka ka wua angguru-ha hamanai ka ma-welingu la pa-pamula hangia-hakai.

¹⁰Àmbi pa-perangu-du heu hapi dàngu heu kalandai la hapungu luku.

¹¹Àmbi pakidu paki tera hawulu dàngu tera linangu la hawàla pa-tinungu.

¹²Tumanja kawaiwaru-da la patu mbua kabihu pakimi,” wàna.

¹³“Ngera hama tuna na haàtu mini na-kanoma-ya na haàtu bidi kawini, tàka la lodu malamiri nda nahili mbuha-anyapa na kawini nuna.

¹⁴Ka puti ànga-nanyaka papulu wànanya na papaha-na, nda bidi kawini-ayapa ba ku-kanoma-ya ba wàna.

¹⁵La matuna nu, màta da ina amana nuna na tau kawini ka dapiti-ha da paki nikana na maningu kadutulu riangu na tandana na kawini nuna ba bidi kawini-mayapa duna ba na-kanoma-ya. Lupangu-ma ka da-pajiliku-nya na paki nuna la kuru ngia pa-timbangu la hanggada da ma-pangora lai nu la paraingu.

¹⁶Na amana nuna na bidi kawini lupangu-ma ka napanii-nja, ‘Na ananggu kawini kuwua-nyaka na tau yiana patu papaha-na, tàka nàhu nyuna nda nahili mbuha-anyapa.

¹⁷Pulu ànga-nanya na ananggu, nda bidi kawini-ayapa ba ku-kanoma-ya ba wàna ànga. Tàka yiana-ya na mbutina ba bidi kawini-mayapa duku na ananggu la rehi nu. Tàngaru-ha da kadutulu ria la paki nikana!’ ka wàna.

¹⁸Da ma-pangora la paraingu nuna lupangu-ma ka dapaau-nya nuna na tau mini ka dapalu-ya.

¹⁹Lupangu-mbu da-karuhi-ya pa-palohu hangahu àmahu bara ka nawua-ha nuda da àmahu la ama yerana, nadu ba na-paruha-ya na tamuna na haàtu kawini Ihirailu. Dàngumbu pa-daingu papaha-mananya nuna na kawini dàngu nda peku-ana la pawàru-nya la ngala lurina.

²⁰Tàka ngera hama tuna na-patubangu na papulu wànanya dàngu hi nda ningu mbutina ba bidi kawini-mayapa na papaha-na ba na-kanoma-ya,

²¹lupangu-ma karia-nya nuna na kawini la pindu uma amana. Lai nu lupangu-ma da tau mini la paraingu nuna ka da-nàhaku-nya watu ka lupa nameti. Na kawini nuna na-pandoi-yaka na hau na ma-pamakia-ya na banjaru-nda, nadu ba mbàda pa-mbulungu-naka la mini ba ndedi na-mangoma, ba la uma ama-nanyapa. Bai hukunya nyuna pamolu-minya na akatu nuna.

²²Era ningu haàtu tau mini na pa-tomangu ba dàngu angu-nanya na papaha tau haàtu, nyuda ba dadua lupangu-ma ka huku pameti-ha. Ba timi nu nyimi pamolu-minya na akatu nuna.

²³Ngera hama tuna na haàtu tau mini na pa-tomangu la paraingu ba dàngu angu-nanya na haàtu na bidi kawini na maningu tubangu tau haàtu.

²⁴La ngerana nuna lupangu-ma ka ngàndiha pa-kadua-da la hambeli paraingu ka nàhaku-nja watu ka lupa dameti. Na bidi kawini nuna pameti-maya bàdi nadu ba nda na-kaladaku pakarai pa-ndulangu, ba la paraingu pàku-duya làti nanjadi ningu, hi peku rongu-nanya tau ba na-kaladaku. Na tau mini pameti-maya bàdi, nadu ba naangu-nya na haàtu na bidi kawini na mambàda ningu tubangu. Ba timi nu nyimi pamolu-minyaka na akatu nuna.

²⁵Tàka hauya duna jàka ningu haàtu tau mini na maputa-ya la woka na haàtu na bidi kawini na mambàda ningu tubangu. La matungu nu mbulungu na tau minia duna na pahuku pameti.

²⁶Na bidi kawini nuna àmbi nggi - nggiki diminya, nadu ba nda na-pandoi-aya na ràka pa-pameti wànguya. Na palakara-na hama tumana na palakara haàtu tau na mahada ngàndiya na tau haàtu hi na-pameti-ya.

²⁷Nuna nu na paputa nanjadi ningu la woka, dàngu jiapa ka na-kaladaku-kai pakarai pa-ndulangu na bidi kawini, tàka nda ningua tau mamai pandula-ya.

²⁸Ngera hama tuna na haàtu na tau mini na patoma harabàndangu ba talànga puta-nanya na haàtu na bidi kawini na mandedi ningu tubangu.

²⁹La rukuna nuna na tau nuna màta ka na-wuangu la amana nuna na bidi kawini banda wili ma-bilangu lima kambulu àmahu bara, dàngu na bidi kawini nuna màta ka natuya papaha-na nadu na tau mini ba na-pambana-duyaka la pa-katuda angunya. Lundu metina nda peku pahewa da-ananya nuna na papaha-na.

³⁰Àmbu jia ningudu haàtu ma-pamakia-ya na amana ba na-katuda angunya na papaha haàtu-na na amana,” wàna.