Read Kambera BELINGU 23 Bible Online

BELINGU 23 - Kambera bible

BELINGU 23

¹“Na haàtu na pambàda kalaa jàka ndia na tau na pambàda bota pamini wàna nda ukua panjadi nua banjaru-na i MIRI.

²Na tau na ma-padedi ana wuku rumbangu, dàngu mbuu ndàbada da wàlana lundu la ndalihu hakambulu, nda ukua panjadi nua banjaru-na i MIRI.

³Da tau Amungu dàngu Muapu dàngu da wàlada lundu la ndalihu hakambulu nda ukua panjadi nua banjaru-na i MIRI,

⁴hi kiri tuna nu nadu nyuda ba nda dabihu pawua-nggai pangangu dàngu wai ba jiaya na lakumi bai luhu welingu la Mehiru. Màlai ba dahewa-ya i Mbiliamu anana i Mbeuru la paraingu Patoru la Mahupatamia, la paràtu-nggai nyimi.

⁵Na nyuna ba tuna i MIRI Alami nda nabihu parongu-ya i Mbiliamu. Tàka na nyuna na-panjilu-kinyaipa na ràtungu hi natuya kanyuru, nadu ba nambuha-nggai nyimi.

⁶La ngala lurimi dàngu lundu nu - nu àmbi ndula-duha da banjaru nuda jàka ndia la pa-pahia-nja pa-mbokaru.

⁷Àmbi pawawa-duha da tau Endumu nadu nyuda ba angu dedi-minja. Àmbi pawawa-duha da tau Mehiru, nadu nyimi ba mbàda handàkangu-mika pa-ngiangu la tanada.

⁸Piti welingu la ndalihu tailu lupa pa-ngalangu da wàlada pekuda la panjadi nua banjaru-na i MIRI,” wàna.

⁹“Ba talànga pabera-mi lupangu-ma mi-wiliru-nya mbuu ndàbana na ma-pawiti-nggainya na iraku.

¹⁰Era ningu haàtu tau mini na ma-iraku rukuna ba nambungu na wai barana ba talànga katuda-na, nyuna naluhu bàdi welingu la kotaku maü tera ka na-ngiangu ningu la hambeli kotaku maü tera.

¹¹Ba mereni malingu-nanyaka lupangu-ma naihu tàka ba natama-ka na lodu, peku-naka ba natama beli la kotaku maü tera.

¹²Lupangu-maka bàdi ka ningu padua pangia ngia pa-hambelingu la hambeli kotaku maü tera.

¹³Jàkai lua lai nu, hinggilu-da da ngara pawàngu, ngàndima hapungu ai paàki wàngu lambongu ngia pa-hambelingu dàngu la pa-hungguru beli wànya na lambongu.

¹⁴I MIRI Alami naangu-manggai daa la kotaku maü terami la pa-hanggubu-nggai dàngu la pawua-nggai patalu wàngu hanggangu la muhu - muhumi. Ba tuna mangga-manya ka pa-daingu ilina na kotaku maü terami. Ka àmbu jia ningu ngga - nggàra manda lingu la hongami nyimi, ka àmbu nalaku wàrunggai paraïna i MIRI,” wàna.

¹⁵“Era ningu haàtu tau ata mapalai welingu la mirina hàla namai lai nyimi pakarai la pa-kahiri-ya, àmbi paràha-dunya pabeli.

¹⁶Pekuna nyuna ka na-ndàdiku la hau paraingu-mi tundunya na papindi-na, dàngu àmbi mbana etidu hanggangu lai nyuna.

¹⁷Na haàtu tau Ihirailu, ka miniya ka kawini-ya, nda uku la patau pahunda la uma - uma lumungu.

¹⁸Hamanai da àmahu da pa-ngalangu ruku pahunda nda ukua pangàdi-ha la Umana i MIRI Alami, la pa-palundungu wàngu njanjimi, nadu i MIRI Alami ba huda-mananja da tau pahunda la uma lumungu dàngu da àmahu wunda pahunda.

¹⁹Jàkai wua parutangu àmahu la tau hangàdangu peku-mana la pakarai-nja anada. Tàka jàkai wua parutangu àmahu jàka ndia pangangu jàka ndia malanja hangia la tau angu banjaru-mi, lupangu-ma kai wua parutangu nda ningu anangu. Patundu-manya na pareta yiana, napa i MIRI Alami na-pakanyuru-nggai la mbuu ndàbana na paràma-mi la tana na pa-mandapu-mi.

²¹Era ningu hau panjanji-mi lai MIRI Alami, àmbi pamalai - laiduya la pa-palundu-nya na pambàda njanjimi, nadu i MIRI ba daingu pahuru-nanya, tàka nyimi minjala-duka jàka ndai pinuya.

²²Ndai njala-a nyimi jàka ndai njanjiya i MIRI.

²³Tàka jàka wàngu weli etimi nyimi la patu njanji lai MIRI Alami wai ngera-minya la pa-patutu-nya.

²⁴Era limi la hau ànda la woka angguru tau hawiangu, pekuna bai ngangu wua angguru hama dangu da pa-mangàba-mi, na nyuna àmbi kabua-duha la kanaingu.

²⁵Era limi la hau ànda la woka uhu nggàndumu tau hawiangu, pekuna nyimi bai ngangu uhu nggàndumu pa-urutu wàmi limami, na nyuna àmbi wàngu pakaü-duha wàngu ketu,” wàna.