Read Kambera BELINGU 25 Bible Online

BELINGU 25 - Kambera bible

BELINGU 25

¹Ngera hama tuna jàka ningu tau madua tau Ihirailu da malua la ma-timbangu la pa-palànyapu-ya na hau palakara, hàla hi pekanya na haàtu ba nda nanjala-a, tàka na haàtui nanjala.

²Jàka na-panggàna-nya hukungu palu paraïna hakimu nu na manjala, lupangu-ma na-paràha-nya hakimu ka na-panggubu. Na danguda da palu pa-namatu-nya na akatu na pa-pandoi-na,

³tàka àmbu narihi-du welingu la patu kambulu wundangu. Jàka narihi, tandana ba pa-makia-minya na tau nuna la mbabu.

⁴Àmbi katanga ngora-duya na ngaruna na hapi na matalànga ruruhu pa-urutu wàngu wili uhu nggàndumu,” wàna.

⁵“Jàka angu ngiangu-da la hau pangia da ma-paangu paluhu, tàka ka nameti na haàtu dàngu nda ningu anana mini, na papaha pameti wàruna àmbu na-mangoma-du la mini haàtu la hambeli kabihu-na na leina na mbàda meti. Na anguna paluhu na mameti wai ngera-mananya la pa-kanoma-ya nuna na kawini ndonangu.

⁶Na anakeda mini kawunga anada napa dareki-ya ba anana na tau na mameti-ya, ka peku ningu wàlana la honga tau Ihirailu.

⁷Tàka jàka era nda bihuna pa-kanoma-ya na kawini pameti wàruna na anguna paluhu, na kawini nuna màta ka nalua la ma-pangora la paraingu lai nu, ka napanii-nja, ‘Na balunggu nda na bihua pa-pahàra-nya na ngerana la pawua-nya wàlana na anguna paluhu la honga tau Ihirailu,’ ka wàna.

⁸Hàla da ma-pangora la paraingu ka dapaau-nya na tau nuna ka dapanii dànya. Jàka jiapa-ma jukaru-nanya la pa-kanoma-ya na balu pameti wàruna na anguna paluhu,

⁹na baluna na pameti wàruna na anguna paluhu, ka na-ndàharungu palihi-nya la hanggada da ma-pangora la paraingu, ka na-butuhu-ya na hapapa na halapa-na na baluna, ka na-pangànji-ya na matana, hi napanii, ‘Yiana-yaka na manggàna-ya na tau na manda bihu pawua-nya wàlana na anguna paluhu,’ wàna.

¹⁰Da kalembi-na na tau nuna natanda-ha tau la Ihirailu ba ‘Kalembi tau pa-butuhu halapa-ha,’ ” wàdanja.

¹¹“Jàka pa-udulungu-danya da tau madua tau mini tàka na papaha-na na haàtu na-pamukarungu patula-nya na mini leina ba nawàngu pa-hàkilu-ya na pamini wàna na haàtu,

¹²àmbi milanya eti na kawini nuna, kadipu-maya na limana.

¹³Àmbi palapingu-du bai wàngu timbangu dàngu hukutu manda pa-tubangu.

¹⁵Wànguma timbangu dàngu takaru ma-patubangu ka peku malaina na lurimi la tana na-pawua-nanggai i MIRI Alami lai nyimi.

¹⁶I MIRI huda eti-mananya na tau na makàli pa-lapingu,” wàna.

¹⁷“Namuya jàka nggiki-danggai da tau Amaliku ba jiaya na pamaingu-mi welingu la Mehiru.

¹⁸Nyuda nda da-mangàdatu-nya i Ala, dàngu jia-duyaka hi da-làndahu-nggai welingu la kajia, ba talànga njilimi dàngu manànjalu-mi, hàla da angu-mika da mangata la kajia, hi da-pameti mbutaha.

¹⁹Jia-duyaka ba tuna nu, jàka nawua-nggainyaka i MIRI Alami nuna na tana lai nyimi, dàngu bai nguduka welingu la muhu-mika da mangia winggiru-nggai, da tau Amaliku màta kai pameti mbutaha hi lupa nda pahili namu-ahapa. Àmbi maromba-dunya!” wànanja.