Read Kambera BELINGU 26 Bible Online

BELINGU 26 - Kambera bible

BELINGU 26

¹“Jàka mbàda tama-minyaka na tana na pawua-nanggai i MIRI Alami dàngu mbàda ngiangu-mika lai nu,

²da ihi kawunga-na na tana da pambàda pauhi-mika lupangu-ma kai tuha la hau mbola, kai ngàndiha la pangia papindi-na i MIRI Alami.

³Luawa la ratu na ma-talànga paloku la rehi nuna, hàla kai paniinya, ‘Peka-nggunyaka i MIRI Alamu, ba mbàda tama-ngguka la tana na paràndi-nanja da boku la mangilu-nda la pa-wuangu-ya lai nyuta,’ ka wàmu.

⁴Nu na ratu nanggepi-ya na mbola welingu la limamu dàngu ka na-bànjalu-ya la hangga ngia pawotu maraku-nya i MIRI Alami.

⁵Tunaka nu, la hanggana i MIRI Alami màta kai pekaha yiada, ‘Ou MIRI, na boku la mangilu-nggu tau Aràmu ma-njadangu-ya. Na karia-nja da ihi umana la Mehiru tangguna patau ma-lelingu-ya. Ba jiaya nalaku-da lai nàhu na danguda nda pira-ada, tàka na nyuna dalua-yaka la pa-banjaru bokulu dàngu ma-kapàru.

⁶Da tau Mehiru da-palua-nggama lima wàngu mbana etida dàngu da-pambana-kama la paràma hama tuna ata.

⁷Hàla warangu-manyaka pakarai pa-ndulangu lai Nyumu, MIRI Alada da boku la mangilu-ma. Murongu-ya na warama dàngu muita-ya na-mayila-ma, na-handuka-ma dàngu na-jàrama.

⁸Wàngu kuaha dàngu kapàru-mu na ma-bokulu mu-pahàla-kama welingu la Mehiru. Mutuha da tanda mbiha dàngu da pa-hangàtarungu, mu-pahada-nja da matumbu - matumbu da ma-pakanggupuku-ya na muhu.

⁹Tunaka nu hi mu-karia-nggama lai yiahu tàka hi muwua-nggamanya yiana na tana wulu dàngu na ma-kamboka.

¹⁰Jia-duyaka nu, ou MIRI, nàhu wotu-ngguhaka lai yiahu da ihi kawunga-na na tana na pawua-mungga nyungga,’ ka wàna. Hàlaka nu, bànjalu-ya nuna na mbola lai nu, la hanggana i MIRI Alamu, dàngu kau marubuku-nya Nyuna.

¹¹Pamalangu-nya rukuda mbuu ndàbada da ràka ngangu ràka ngunungu-mu da pa-ngalangu da pawua-na i MIRI Alami lai nyimi dàngu kuru umami. Wàndaha da tau Lewi dàngu da tau hangàdangu da ma-ngiangu la hongami ka da-kikungu la paremi.

¹²Nimbihu-na la ndaungu patailu wàna lupangu-ma kai wotu tanda maraku da hangia la hakambulu, nu da hangia la hakambulu welingu la ihi tanamu nduma ratu Lewi, da tau hangàdangu, da ana lalu dàngu da kawini ndonangu, hi lupa da-ngalangu pangangu ràka pawàngu la nimbihu-da da paraingu-mi. Jàka hàlaka nu,

¹³pekanya i MIRI Alamu, ‘Nu da hangia la hakambulu welingu la ihi tananggu da pawotu-manggu bàdi lai Nyumu, MIRI, nda ana hawutu-apa ma-ndàdiku la umanggu; kuwua hàla-mahaka la tau Lewi, tau hangàdangu, da ana lalu dàngu da kawini ndonangu, hama tuna na lii pareta-na i MIRI Alanggu lai nyungga. Welingu la lii pareta-na i MIRI rukuda da tanda maraku da ma-hangia-da la hakambulu nda ningu-a pahili-nggu.

¹⁴Welingu la tanda maraku nuda nda ana hawutu-ma duku panganggu ba talànga hawina-nggu, jàka ndia nda kungàndi-a la hambeli uma ba talànga iraku-nggu, jàka ndia la pawua-ha ka uhu mameti-ha. Mbàda manundu-mangguka duku lai Nyumu, ou MIRI; mbuu ndàbada da lii pareta-mu mbàda namatu-manggu-haka duku.

¹⁵Welingu la pangia-mu na ma-matua la awangu màla àru kau panauya dàngu kau pa-kanyuru-ya na banjaru-mu na Ihirailu; pa-kanyuru-mbuya na tana wulu dàngu kamboka na pambàda wuamu-nggama, nunjuya na paràndi-mu la boku la mangilu-ma,’ ka wàmi,” wànanja.

¹⁶“La lodu nàhu i MIRI Alami na-pareta-kai nyimi kai patundu-nja mbuu ndàbada da pareta nuda; patundu hàla-manja wàngu tuturu-mi dàngu wàngu weli eti weli puhumi.

¹⁷La lodu nàhu peka-minyaka i MIRI ba Ala-minya. Ba pa-ràndingu-minyaka la pamanundu lai Nyuna, dàngu la pawànja mbuu ndàbada na ukuna dàngu da pareta-na.

¹⁸La lodu nàhu i MIRI kataku-nanggaika ba banjaru wiki-nanggai, hama tuna na pambàda ràndina lai nyimi, dàngu hi na-pareta-kai la pa-patundu hàlanja da lii pareta-na.

¹⁹I MIRI napa na-parihi bokulu-kai welingu la banjaru hawiangu na pambàda padika-na, dàngu nyimi napa pa-wotungu-kai dàngu patembi-kai.[23] Nyimi napa banjaru-na i MIRI-kai na Alami hama tuna na pambàda ràndina,” wàna.