Read Kambera BELINGU 27 Bible Online

BELINGU 27 - Kambera bible

BELINGU 27

¹Tunaka nu anguda da ma-pangora Ihirailu i Muha na-patàka-nya na lii yiana la banjaru nuna, “Patundu hala-manja da pareta da pa-pakata-nggunggai la lodu nàhu.

²La lodu bai palaya na Luku Yorundangu la patama la tana na pawua-nanggai i MIRI Alami lai nyimi, lupangu-ma bàdi kai pa-hadangu pi - pira watu bokulu hàla kai perinja kapu.

³Lai nu la watu kai tulihu ndàbaha da kareuku la uku - uku yiada. Jàka mbàda tama-mika la tana wulu dàngu kamboka na pambàda ràndi-nanggai i MIRI, na Alada da boku la mangilu-mi,

⁴dàngu jàka ninggaika nyimi la hapapa Luku Yorundangu, lupangu-ma kai lua la Palindi Embàlu. Lai nu lupangu-ma kai pa-hadangu watu dàngu kai perinja kapu, hama tuna na pa-pareta-nggu lai nyimi la lodu nàhu.

⁵Lai nu lupangu-mbu kai pa-hadangu hau ngia pawotu maraku ndumana i MIRI Alami welingu la watu - watu da pandedi jonggaru wàngu bàhi,

⁶nadu nimbihu-da da ngia pawotu maraku da pa-pahadangu ndumana i MIRI Alami lupangu-ma kai pandoi wànja watu mbulungu panda bera. La pinu ngia pawotu maraku nuna lupangu kai wotuha da kameti maraku patunu.

⁷Wotumbu kameti maraku papeku-mi dàngu nganguwa lai nu pa-kariangu hawola-wa la hanggana i MIRI Alami.

⁸La pinuda nuda da watu pa-peringu kapu lupangu-ma kai tulihu paloha-nja nimbihu-da da kareuku welingu la uku - ukuna i Ala,” wàna.

⁹Tunaka nu anguda da ratu Lewi, i Muha napanii dànya na banjaru Ihirailu mbuu ndàbana, “Angu dedi, tanaüya dàngu pa-tingingu-wa! La lodu nàhu nyimi banjaru-nanggaika i MIRI Alami.

¹⁰Jia-duya manundu-wa lai MIRI Alami dàngu patundu hàlanja da ukuna na pambàda pakata-nggunggai la lodu nàhu,” wànanja.

¹¹Hàla panii-nanyaka i Muha la banjaru Ihirailu,

¹²“Bai pala-yaka na Luku Yorundangu, na kabihu Hamiungu, Lewi, Yahunda, Ihakàru, Yuhupu dàngu Mbanyamingu, lupangu-ma ka da-ndolaku dita la pinu Palindi Nggerihimu ba jiaya na pekanja kanyuru na banjaru yiana.

¹³Ba jia-yaka na pekanja ràtungu, da kabihu Rumbingu, Nggàtu, Ahiaru, Hembulungu, Ndàngu dàngu Nàputali lupangu-ma ka da-ndolaku dita la pinu Palindi Embàlu.

¹⁴Lupangu-ma da tau Lewi ka datiki-ha da pulungu da ma-pandàkingu yiada, ba dawàngu pa-pakodungu tàka da tau Ihirailu lupangu-ma ka dahema: ‘Amingu’ ka wàda.

¹⁵Da tau Lewi, ‘Pa-ràtungu-ya na tau na ma-pandoi kahala hada welingu la watu, ai dàngu bàhi, hi da-marubuku wininya; i MIRI nahuda etinya na lumungu marapu!’ Mbuuna na rayatu: ‘Amingu!’ wàna.

¹⁶‘Pa-ràtungu-ya na tau manda tembi ina amana hi namàta-nja la panda ingaha’ ‘Amingu!’

¹⁷‘Pa-ràtungu-ya na tau na ma-pandàharu-ya na walaku padira tana angu ngiangu-na.’ ‘Amingu!’

¹⁸‘Pa-ràtungu-ya na tau na ma-panjàra-nya na tau poki.’ ‘Amingu!’

¹⁹‘Pa-ràtungu-ya na tau na maramba-nya na mangu tau hangàdangu, ana lalu dàngu kawini ndonangu.’ ‘Amingu!’

²⁰‘Pa-ràtungu-ya na tau na ma-pamakia-ya na amana ba na-katuda angunya na papaha haàtu-na na amana.’ ‘Amingu!’

²¹‘Pa-ràtungu-ya na tau na ma-angungu banda.’ ‘Amingu!’

²²‘Pa-ràtungu-ya na tau na ma-katuda angungu anawini wikina, jàka ndia ana wini angu amana, angu ina-nakai.’ ‘Amingu!’

²³‘Pa-ràtungu-ya na tau na ma-katuda angungu ina yerana.’ ‘Amingu!’

²⁴‘Pa-ràtungu-ya na tau na ma-pameti winingu anguna patau.’ ‘Amingu!’

²⁵‘Pa-ràtungu-ya na tau na makei hopa la pa-pameti tau manda njala.’ ‘Amingu!’

²⁶‘Pa-ràtungu-ya na tau na manda patundu-nja mbuu ndàbada da uku dàngu da lii papekangu-na i Ala la nggoda nggàduku lurina.’ ‘Amingu!’ ”