Read Kambera BELINGU 28 Bible Online

BELINGU 28 - Kambera bible

BELINGU 28

¹“Jàkai manundu lai MIRI Alami, dàngu kai tuturu pawànja mbuu ndàbada da pareta da pa-pakata-nggunggai la lodu nàhu, Nyuna i MIRI napa natukai hau banjaru ma-kanjupu kawulangu la pinu tana.

²Manundu-manya i MIRI Alami, mbuu ndàbada yiada da kanyuru nawua-nggainja lai nyimi:

³Pa-pakanyuru-ha da paraingu dàngu da wokami.

⁴Pa-pakanyuru-kai nyimi, hi lupa dadangu da anami, dabundu làndangu da ihi wokami dàngu daworu da hapi da mbimbi kamàmbi-mi.

⁵Pa-pakanyuru-ha da uhu nggàndumu pamuti-mi dàngu da pangangu da pa-pandoi-mi welingu la uhu nggàndumu.

⁶Pa-pakanyuru-ha mbuu ndàbada da paraï paruku-mi.

⁷Jàka ningu ma-hadanggai, i MIRI napa na-pakàku-ha da muhumi. Napa kanjupu màpiya natungu-da nyuda, tàka dapalai nda patuba.

⁸I MIRI Alami napa na-pakanyuru-ha da paraï paruku-mi dàngu napinu wànja uhu nggàndumu da dàndaku-mi. Napa Nyuna na-pakanyuru-kai la tana na-pawua-nanggai nyimi.

⁹Jàkai manundu lai MIRI Alami dàngu jàka miwànja mbuu ndàbada da pareta-na, napa natukai nyimi banjaru wikina, hama tuna na pambàda ràndina.

¹⁰Mbuu ndàbana na banjaru la pinu tana napa daita-ya ba banjaru papindi-na i MIRI-kai nyimi, dàngu napa nyuda da-mahumbaru-nggai nyimi.

¹¹Napa na-wuanggai nyimi ana dangu. Da bandami napa dadangu dàngu da ihi wokami dabundu làndangu la tana na paràndi-na i MIRI la boku la mangilu-mi la pawua-nggainya nyimi.

¹²I MIRI napa na-papuru-nggai urangu la rehina welingu la ngia pa-pahàmu-ya na mabundu làndangu la awangu. Napa Nyuna na-pakanyuru-ha mbuu ndàbada da paraï paruku-mi, hi lupa miwua parutangu la banjaru dangu, tàka nyimi ndai piti pa-rutangu-apa dimi.

¹³Napa i MIRI Alami natukai nyimi ma-pairungu la honga banjaru dangu, dàngu nda banjaru ma-pakiri-akai. Jàkai tuturu la panunju hàlaha da pareta-na i MIRI da-papakata-nggunggai la lodu nàhu, parukangu-minyaka pa-mbokaru dàngu nda ana kawawaku-ami.

¹⁴Ba tuna màtangu ailulu palànja-nja nuda da pareta jiapa ka wàngu panggiki hamana-kadu. Màtangu-mbu pa-maraku-nja dàngu palumu-nja da kamàla ala,” wànanja.

¹⁵“Tàka jàka era nda manundu-mi lai MIRI Alami, dàngu ba ndai tuturu la pawànja mbuu ndàbada da pareta-na dàngu da ukuna da pa-pakata-nggunggai la lodu nàhu, napa yiada mbuu ndàbada da ràtungu na-hanggàna-kai nyimi:

¹⁶Pa-ràtungu-ha da paraingu-mi dàngu da wokami.

¹⁷Pa-ràtungu-ha da uhu nggàndumu pamutimi dàngu da pangangu da pa-pandoi-mi welingu la uhu nggàndumu.

¹⁸Pa-ràtungu-kai nyimi hi lupa hawutu-ada da anami, da ihi wokami hamangui da hapi dàngu da mbimbi da kamàmbi-mi.

¹⁹Pa-ràtungu-ha mbuu ndàba da paraï paruku-mi.

²⁰Era pandoi-mi ma-akatu dàngu hi jukaru-nya i MIRI, napa Nyuna na-patàka-nggai ma-njurangu, pariu raüngu dàngu ma-kalutu la mbuu ndàbada da pa-paloku-mi, hi lupa la rehi na ma-dànggitu-a ba pamolu ailulu-nggai.

²¹Hidu mapandu - ndutungu mangganai-kai napa, hi lupa la hupu njàpuna nda hili ningu haàtu welingu lai nyimi ma-ndàdiku la tana na pa-mandapu-mi.

²²Napa i MIRI nahuku wànggai hidu pala, mbua ihi dàngu hidu pariti. Napa na-patàka-nggai wandu malai dàngu ngilu ma-pamarokutu, hi lupa daruha da ihi wokami. Mbuu ndàbada yiada da ura pàda napa danggàna-kai hi lupa mi-tàlaru.

²³Na urangu nda napuru, dàngu na tanami napa na-katàraku hama tuna bàhi.

²⁴I MIRI nda na-papurungu ura wai, mbulungu ura kumburu tana dàngu wara hi lupa mi-tàlaru hàla.

²⁵Jàka ndai manundu lai MIRI Alami, Napa Nyuna na-pahia-nja da muhumi patalu-kai nyimi. Napa nyimi wàngu màpimi bai tungu tàka napa mipalai nda pingu tuba. Mbuu ndàbana na banjaru la pinu tana napa na maringgingu hamangu-na ba daita-yaka na ura pàdami.

²⁶Jàkai meti, pangada da ma-hawurungu dàngu banda bohu-haka da metimi dàngu nda ningua mawàngga-ha da banda nuda.

²⁷Napa i MIRI nahuku wànggai manggàri, hama tuna ba tunanya nu na tau Mehiru. Na ihimi napa nambinu-nya pongu dàngu pakara koha mambàdi, tàka nda ningu muruda.

²⁸Napa i MIRI na-pawiti-nya hi katoba, poki dàngu mimbingu.

²⁹La tidu lodu ndidaru dàmaku - dàmaku-mi hama tuna tau poki, tàka ndai hunggua ànda. Mbuu ndàbada da daparaï paruku-mi nda dadiki-a. Napa nua naingu biana ba ningu ma-kapidihu-kai dàngu maramba-nggai, dàngu nda ningu ndoku haàtu mabihu pandula-kai.

³⁰Jàka ndai manundu lai MIRI Alami, yiada-haka napa da manggàna-kai: Napa ningu tubami, tàka tau hawiangu duna mapiti-ya na tubami. Napa nyimi mi-pahadangu uma tàka ndai ngia-anya. Napa nyimi mi-pamula woka angguru-mi tàka ndai nga-anja wuada.

³¹Da hapimi napa darupu-ha la hangga matami, ba tuna nyimi ndai nga-anya na toluna. Da kalandai-mi napa daweli-nja tàka nyimi kuki bia-minja dàngu nda pa-pabeli anjapa. Da mbimbimi napa pa-wuangu-haka la muhu - muhumi, dàngu nda ningumbu ma-pandulangu.

³²La hangga matami napa da anami pawua-ha hama tuna ata la tau hangàdangu. Nimbihu lodu da-malara da matami paraï pahimbu-ha da anami, tàka kahewa-ana, nadu ba nda dahili kabeli-apa.

³³Da tau hangàdangu napa da-ohuru hàlanja da daihi woka, da pangala-mi ba lundu dirakai la paràma, tàka nyimi wiki nda nggàra-apa pangala-mi, mbulungu ba da-kapidihu pangala-nggai ba dawànggai mbana eti.

³⁴Napa nyimi miwàngu pa-katoba ruku ita ura pàdami.

³⁵Napa i MIRI napinu-ha da wihimi wàngu pongu ma-katiu dàngu da mànda lànga; napa natukai manggàri nambinu piti welingu la wihimi lupa la pinu katikumi.

³⁶Napa i MIRI nangàndi-kai nyimi dàngu na hanganji-mi la tana tau hangàdangu da panda tandami dàngu nda datanda mbuha paraï boku la mangilu-mi. Lai nu napa lumu-minjaka da kamàla ala da-papandoi welingu la ai la watu.

³⁷La ta - tana ngia pa-paiha nggangga-nanggai i MIRI, napa da-maringgingu hamangu-da da tau da maita-kai nyimi; napa da-paaka-nggai dàngu dariki-nggai.

³⁸Dadangu-ma da wini pa-habaru-mi, tàka da pangala-mi ana hawutu-ada, nadu ba nanga pambuta-ha kabala da ihi wokami.

³⁹Napa nyimi mi-pamula-nja angguru da wokami tàka hi paloku-ha, tàka napa ndai pàpu-anja wuada jàka ndia ndai unu-anja waida, nadu da pingi angguru-mi ba na-hàlaha kataru.

⁴⁰Da pingi haitungu napa datumbu la nggubulu tanami, tàka da wuada napa damunju, hi lupa ndai ngalangu-a mina haitungu.

⁴¹Napa mi-ngalangu anami mini kawini, tàka papiti-ha ba tanawangu-ha la pabera, hi lupa da-mbulangu welingu lai nyimi.

⁴²Mbuu ndàbada da pingi aimi dàngu da patondu-mi napa na-pambuta-ha kataru.

⁴³Da tau hangàdangu da ma-ngiangu la paraimi parukangu-danyaka pa-kuaha, tàka da kuaha-mi nyimi parukangu-danyaka pamàli.

⁴⁴Ningu àmahu-da nyuda la pawua paruta-nggai nyimi, tàka nyimi nda nggàra-apa maningu-nggai la pawua paruta-nja nyuda. La hupu njàpuna nyuda kuaha-danggaika nyimi.

⁴⁵Mbuu ndàbada da ura pàda yiada napa da-hanggàna-kai dàngu nuangu-mana naula-nanggai hi lupa mi-tàlaru, nadu ba ndai manundu lai MIRI Alami dàngu ba ndai wànja mbuu ndàbada da uku da pambàda pa-katangu-kai.

⁴⁶Nuda da ura pàda jia-haka da mbuti huku-nanggai nyimi i MIRI dàngu wàlami lundu nu - nu.

⁴⁷Nyimi na-pakanyuru-nggaika i MIRI la mbuu ndàbana, tàka nyimi ndai lumu weli etinya wàngu pa-hanggela.

⁴⁸Jia-duyaka màta kai lumunja da muhumi napa da pa-paràha-na i MIRI la pa-papanggai nyimi. Napa nyimi mi-rimbangu, mimadau dàngu mi-kalulu ba nanjaka njàpunggai la hangia - hangia. Napa i MIRI na-kapidihu-kai[24] ba nawàngu mbàna eti hi lupa mi-tàlaru.

⁴⁹Na hau banjaru na panda pimi hiluna na-patàka-nggai napa i MIRI welingu la hupu tana la papapa-nggai nyimi. Hama tuna mbaku tehiku-ha ba dajàmba-kai nyimi.

⁵⁰Nyuda dambàna etida dàngu nda damila-nja eti da makaweda hamangui da anakeda.

⁵¹Napa da-pambuta-ha da banda dàngu da ihi wokami, dàngu nda dabili-anggai uhu, wai angguru, mina haitungu jàka ndia hapi dàngu mbimbi kamàmbi hi lupa mimeti rimbangu.

⁵²Napa da-nàhaku nimbihu-ha da paraingu la tana na pawua-nanggai i MIRI Alami hi lupa da-tanyungguru da kangeli jangga da pa-kapingatu da pamonu-mi làti.

⁵³Ba talànga nggupulu-danja muhumi da paraingu-mi, napa mihali ura dedi paraï pa-rimbangu, hi lupa minganja da ana wikimi, da ana da pawua-nanggami nyimi i MIRI Alami.

⁵⁴Jiapa-kingu na tau bokulu na ma-kanjupu hàmu hurina napa napeka halaera ba talànga nggupulu-kai, hi lupa nanganja da ana wikina ba nda ningupa pangangu hawiangu. Nda ana hawutu-mbu pawua-na la angu dedina jàka ndia la papaha-na na panamu-na jàka ndia la anana da maluri-ipa.

⁵⁵

⁵⁶Jiapa-kingu na kawini na tau bokulu na ma-kanjupu hàmu hurina dàngu na ma-kanjupu wuluya hi lupa nda ana limana la wihi, tuna numbu napa na pawunda-na. Ba talànga nggupulu-nanya muhu na paraingu, napa napeka halaera nuna na kawini paraï pa-rimbangu, hi lupa nanga kangunduhu-nya na anana na mabidi dedi dàngu na karia-na nu na ana rara. Nda ana hawutu-mbu pawua-na la leina na pambuha-na jàka ndia la a - anana.

⁵⁷

⁵⁸Jàka ndai tuturu la pa-manundu la mbuu ndàbada da ukuna i MIRI Alami da pa-tulihu la mbuku yiana dàngu jàka ndai maraku-nya i MIRI Alami na ma-mangunju dàngu na pa-hangàtarungu,

⁵⁹napa i MIRI na-patàka-nggai nyimi dàngu la wàlami da panyaki da manda peku la pahàmu dàngu da tàparu da manda peku la pa-papànja-nja.

⁶⁰Da panyaki da ma-pa-maringgingu hamangu da paita matami la Mehiru, napa dahili handauni-kai nyimi, dàngu nda peku hàmu-amipa.

⁶¹Napa i MIRI na-patàka-mbunggai màtu - màtu pahidu wàngu dàngu tàparu na panda tiki la mbuku yiana, na mbuku Ukuna i MIRI. Hàla, ka tàlaru-minyaka.

⁶²Jiapa-kai ka hama kandunu la awangu-ya na dangumi, hakudu-ma-ana la hongami nyimi na maluri-ipa, nadu ba ndai manundu lai MIRI Alami.

⁶³Hama tuna ba na-orangu la pawua-nggai pa-mbokaru wàngu i MIRI dàngu la pabonja-ya na dangumi, napa na-orangu-mbu la pa-patàlaru dàngu la pa-pamolu-nggai. Napa pa-butuhu-kai welingu la tana na manda pira mandai-anapa na mandapu-minya.

⁶⁴Napa i MIRI napai - ihanggai la honga ba - banjaru la nggubulu pinu tana. Lai nu napa mi-marubuku-nja da kamàla ala pa-pandoi welingu la ai dàngu welingu la watu, da kamàla ala panda tandami dàngu da panda tanda-mbuda da boku la mangilu-mi.

⁶⁵La hongada nuda da banjaru ndai hunggua mànjaku napa, dàngu nda ningua pa-ngiangu, mangu-nggunya ka wàmi; napa i MIRI napamaradapu halawàla-kai, nda ningu pa-monungu dàngu halaera-kika wàmi mànu-padua.

⁶⁶Napa na-pandapu mànunya hanggàmaru na lurimi. Lodu rudungu ba na-maringgingu na hamangu-mi dàngu bai mangàdatu pameti.

⁶⁷Nggàra biaya na paita-mi bàrangu-ma-ananya na etimi paraï pa-mangàdatu. La mba - mbaru mirinju-nya na rudungu, tàka la rudungu mirinju-nya na mbaru.

⁶⁸Napa i MIRI na-pangàndi belinggai la Mehiru wàngu kapalu, jiapa-kai ka mbàda ningu liina Nyuna,[25] ba ndai hili beli-apa napa lai nàhu. Lai nàhu napa mi-pamukarungu pa-danggangu wikimi hama tuna ata la muhumi tàka nda ningu ndoku haàtu mabihu pakeikai,” wàna.