Read Kambera BELINGU 29 Bible Online

BELINGU 29 - Kambera bible

BELINGU 29

¹Yiada-haka da pulungu pa-ràndingu nunjuya na hupu liina i MIRI na patura-na i Muha dàngu na banjaru Ihirailu la rehi ninja la tana Muapu. Na pa-ràndingu nuna jiaya na bonjana na pa-ràndingu na patura-na i MIRI dàngu nyuda la Palindi Hinai.

²I Muha na-paràha-nja mbuu ndàbada da tau Ihirailu pa-pauhi, hi napanii dànja, “Mbàda ita wiki-mami-nyaka nyimi jàka nggiki-nanya paraïna i MIRI na hanganji Mehiru, da tau bokulu-na dàngu na nggubulu tanana.

³Nyimi mbàda itambu-minjaka da ura pàda da ma-mbàringu, da tanda mbiha dàngu da pa-hangàtarungu da pa-patumbu-na i MIRI.

⁴Tàka lundu la lodu nàhu ndedi nawua-anggai peku nyimi la pa-jàngapu-ya mbuu ndàbana na pambàda hanggaumi.

⁵Patu kambulu ndaungu mandaina i MIRI ba nairu ngàndikai nyimi bai li ningu la maràda telangu, ba tuna da pakimi dàngu da halapa-mi nda damiri-a.

⁶Nda ningua rotimi nyimi kai ngangu, wai angguru jàka ndia pa-unungu mambana, tàka i MIRI hi nawua hàla-nggainja mbuu ndàbada da pakalana-mi kai pi wànya Nyuna ba Ala-minya.

⁷Tàka ba tatàka-ka lai yiahu, na Hanganji Hihungu welingu la Hehimbungu dàngu na Hanganji Onggu welingu la Mbahàngu damai pabera-ta. Tàka nyuda ta-pakàku-ha.

⁸Hi tawàhi-ya na tanada, hàla hi ta-paberi-nja la kabihu Rumbingu dàngu Nggàtu, dàngu hawiangu la beri mandua-na na kabihu Manahi.

⁹Màtawa kai tuturu panunju hàlaha yiada da pa-ràndingu, ka peku ngalangu-mi la mbuu ndàbana na paraï paruku-mi.

¹⁰La lodu nàhu nyimi mbuu ndàbami ndolaku-minyaka la hanggana i MIRI Alami, mbuu ndàbada da ngora kabihu, da liku uru, da parawira, mbuu ndàbada da mini,

¹¹da kawini, da anakeda dàngu mbuu ndàbada da tau hangàdangu da ma-ngiangu la hongami dàngu da ndulakai la papunggu-nggai ai dàngu la paitu-nggai wai.

¹²I MIRI Alami natura-ya na pa-ràndingu dàngu nyimi, tàka la lodu nàhu nyimi mbuu ndàbami pauhi-minyaka lai yiahu pa-jorutu-ya na pa-ràndingu dàngu la pa-kataku-ya na patanggu-na.

¹³Wànya na pa-ràndingu nuna nàhu i MIRI pamàndu-nanyaka nyimi ba banjaru-nanggaika, dàngu Nyuna ba Ala-minya hama tuna na paràndi-nanggai nyimi dàngu da boku la mangilu-mi i Ambarahàmu, i Ihàku dàngu i Yakupu.

¹⁴Na pa-ràndingu yiana, dàngu mbuu ndàbana na patanggu-na, natura-ya paraïna i MIRI nda mbulungu dàngu nyimi bia,

¹⁵tàka dàngu nimbihu tau ma-ndolaku nàhu lai yiahu la hanggana i MIRI Alanda dàngumbu da wàla wuanda la rehi na manàmu-nya,” wàna.

¹⁶“Nyimi minamu-mayapa jàka nggikina na ura dedinda la Mehiru dàngu jàka nggikina ba la wihita ba tali ningu la tana ba - banjaru hawiangu.

¹⁷Mbàda ita-mihaka da kahala hada marapu-da da pa-mayitangu da ma-welingu la ai, watu, àmahu bara dàngu àmahu rara.

¹⁸Jia ba tuna manggangu-ma ka àmbu ningu haàtu la hongami nyimi, ka miniya, ka kawini-ya, ka kuru umaya jàka ndia ka kabihu-ya na ma-ndolaku lai yiahu ma-taluru-nya i MIRI Alanda la pa-marubuku-nja da kamàla ala banjaru hawiangu. Na matuya na matuna nu beri hamana na amu na matumbu hi nadedi-ya pingi ai paita dàngu pameti wàngu.

¹⁹La hongami nyimi marongu-ya nuna na pa-karuhi na ma-mbangatu àmbu ningu ma-kanandi-nya ba pa-daingu hàmuna na urana, ka jiapa-kai ba kita-mananya na etina la pa-namatu-ya na ànda mehana. Na matuna nu patàlaru ndàba-nanggai nyimi mbuu ndàbami, ka tau ma-akatu-ha hamanai na tau hàmu.

²⁰I MIRI nda jia jàma-ananya na tau tungu nu. Tàka na nyuna napa nanggàna-ya hànggana i MIRI na ma-mbumbaru dàngu mbuu ndàbada da ura pàda pa-tulihu la mbuku yiana napa da-pinjalu-nya nyuna hi lupa na-patàlaru-ya paraïna i MIRI.

²¹I MIRI napa natuya nyuna ka ngerangu-ya nduma mbuu ndàbada da kabihu Ihirailu, dàngu hi hukunya nyuna wàngu ràtungu da patiki la pa-ràndingu pa-tulihu la mbuku yiana, na mbuku Ukuna i MIRI.

²²La lodu malamiri da wàlami dàngu da tau hangàdangu welingu la tana mamarau napa daita-ha da ura pàda dàngu da pa-mayila wàngu da pa-patàka-na i MIRI la tanami.

²³Da wokami napa dadedi-haka maràda mbila ba na-pandàda-nja tana lira dàngu mehi. Na tana nuna nda napeku-apa la patondu-nya dàngu da rumbambu nda dadikimbu lai nu. Na tanami hama-daka da paraingu Hondumu dàngu Nggomora, Àtama dàngu Hamboimu da pa-palàru-na i MIRI ba jiaya na-mbumbaru-na na hànggana.

²⁴Napa na ihi pa-nggubulu awangu da-paàrangu, ‘Nggikina i MIRI hi tunanya nu na tanada? Nggàra lumu-maka ihu hi nahàngga mbana tu-inaka nu?’ wàna.

²⁵Tàka na hemana, ‘Rukuna ba da-taluru-nya na pa-ràndingu-na i MIRI, na Ala boku la mangilu-da; na pa-ràndingu patura-na dàngu nyuda, ba jiaya nangàndi-nanja paluhu welingu la Mehiru.

²⁶Dalumu-njaka da kamàla ala da panda tandada, tàka làti wàmu nahiri-nja nyuda i MIRI la palumu-nja nuda da kamàla ala.

²⁷Nuna-duyaka hi kiri hàngga-nanya na banjaru-na i MIRI dàngu hi na-patàka-nya la tanada na ura pàda na pa-tulihu la mbuku yiana.

²⁸Na hànggana i MIRI na-hambumbatu halawàla, nu la dalu hàngga nda najaru-na na-butuhu-ya na banjaru Ihirailu welingu la tanada tàka hi na-kawuka-nja la tana tau hangàdangu hi kiri ninja lai nu,’ wàna.

²⁹Ninjapa ba nda pirada da pawini-na i MIRI Alanda; tàka da ukuna mbàda bowa-nanjaka lai nyuta, tàka nyuta hamanai da wàlanda ta-patundu-dunjaka bàdi lundu nu - nu,” wànanja.