Read Kambera BELINGU 3 Bible Online

BELINGU 3 - Kambera bible

BELINGU 3

¹“Tunaka nu ta-hanggangu hu dia la ngabana la Mbahàngu. I Onggu, hanganji Mbahàngu, na-hadangu dàngu nggubulu ndàbada da tanatara-na la pabera-ta nyuta la lihi paraingu Endirei.

²Tàka napanii-ngga nyungga i MIRI, ‘Àmbu mangàdatu-dunya, Muha. Napa Nyungga kupuli-nya lai nyumu, da tanatara-na dàngu nggubulu-na na tana ngaba tanana lai nyumu. Muwà-manya hama tuna ba tumunya nu i Hihungu, hanganji Amori na ma-pareta la Hehimbungu.’ wànangga.

³Jiaduya i MIRI napuli-mbunya na Hanganji Onggu dàngu na tauna-ka lai nyuta, dàngu nyuda mbàda pakàku ndàba-ndahaka.

⁴La rehina nunamai ba tawàhi ndàbaha da paraingu-na, nda ningu hau paraingu pa-màtangu. Nggubulu-da nomu kambulu mbuada da paraingu da pawàhi-nda la ngabana la Àrunggòpu mbutana, na pa-pareta-na i Hanganji Onggu welingu la Mbahàngu.

⁵Mbuu ndàbada nuda da paraingu pa-kapingatu wàngu kangeli janggaha, da pindu bokulu-da dàngu da habàtalu-da da pabita wàdanja da pinduda. Hinggilu-da nuda ningumai paraingu hawiangu manda ningu kangelingu.

⁶Ta-weharu ndàbaha nuda da paraingu, dàngu ta-pameti hàlaha da tau mini, kawini, dàngu da anada, hama-mana ba tundanja nu da paraingu-na i Hihungu hanganji Hehimbungu.

⁷Tapiti-ha da bandada dàngu hi taramba-nja da paraingu-da.

⁸La rehi nuna tapiti-ha welingu la tau madua hanganji Amori nuda na ngabana la pahunga lodu Luku Yorundangu, dàngu Luku Àrunongu lundu la Palindi Herumungu. (

⁹Na Palindi Herumungu, Hiriyungu wànanya paraï tau Hindungu dàngu Heniru wànanya paraï tau Amori.)

¹⁰Tapiti hàlaha da tana ngabana na Hanganji Onggu la Mbahàngu: da paraingu-na la ma-ndidaru dita, la ngaba Nggiliatu dàngu Mbahàngu, pangalangu la pahunga lodu lundu tàka la paraingu Hàlaka dàngu Endirei,” wàna. (

¹¹Na Hanganji Onggu tau Repayimu ma-malamiri dehi-yaka. Na pàti metina[2] watuya,[3] na madita-na patu metiru-na dàngu na mbàlaru-na dua metiru-na tundunya na hukutu pakàli wàngu. Lundu nàhu paita-mayapa la Ramba, paraingu tau Amungu.)

¹²“Hàlaka nu ba mangunda nyuta-yaka nuna na tana hi kuwua-ya la kabihu Rumbingu dàngu Nggàtu la mbara dia paraingu Arowiru la lihi Luku Àrunongu, dàngu hawiangu welingu la ngaba ma-palindingu la Nggiliatu, pa-kariangu da paraingu-na.

¹³La paradua-na na kabihu Manahi kuwua-nya na rihina la ngaba Nggiliatu, dàngumbu la ngaba Mbahàngu na pa-pareta-na i Onggu, nu na nggubulu-na na ngaba Àrunggòpu,” wàna. (La Mbahàngu nawuwa ba paraingu Repayimu-ya.

¹⁴I Yairu welingu la kabihu Manahi, napiti hàla-maya la ngaba Àrunggòpu, nu la Mbahàngu lundu la padira Nggehuru dàngu Maaka. Natunja tamuda da ndeha nuda tundunya na tamuna nyuna, dàngu lundu nàhu nawuwa wàma-nyapa da ndehana i Yairu ba wàdanja.)

¹⁵“La Nggiliatu kuwua-nya na biliku Makiru welingu la kabihu Manahi.

¹⁶Dàngu la kabihu Rumbingu dàngu Nggàtu kuwua-nya la ngaba manggawa Nggiliatu dàngu Luku Àrunongu. La padua luku jia-mayaka na padira-da la mbara luru tàka la mbara dia da-padirangu dàngu Luku Yambuku, na hawiangu ba padira tana tau Amungu-ya.

¹⁷La patama lodu, na ngabada nyuda na-tayilingu lundu toma la Luku Yorundangu, welingu la Tàma Nggalilia mbara dia lundu la Tehiku Meti la mbara luru, pangalangu lundu la kambu Palindi Pinggàhu la pahunga lodu.

¹⁸La rehi nu ku-pakata-nja yiada da pareta: I MIRI Alamu mbàda wua-mana-nggaika tana ngaba la pahunga lodu Luku Yorundangu kai ngianya. Na nyuna da-katangu-maka bàdi madaka da panjuri-mi dàngu ka da-mangilu papala-ya na Luku Yorundangu welingu la kabihu - kabihu Ihirailu hawiangu.

¹⁹Jiaha da anami da papaha-mi hamanai da banda papawa-mi da madangu, màta ka da-ndàdiku pàku la parai - paraingu da pambàda wua-nggunggai.

²⁰Pambapa dànja da angu banjaru-mi ka lundu da-mandapu-nya na tana na pawua-na napa i MIRI lai nyuda la hapapa patama lodu Luku Yorundangu, dàngu ka lundu na-pahia-nja paraïna i MIRI la paluri mànjaku, hama tuna ba tunanggai nu lai yiahu. Hina ba hàlaka patuna nu kai mangu pabeli la tana yiana na pambàda wua-nggunggai.

²¹Hàla hi kupanii-nya i Yuhua: Nyumu muita hàla-mayaka na paraï rukuna i MIRI Alamu hangganja i Hihungu dàngu i Onggu, da hanganji tau madua. Tuna numbu napa na paraï rukuna hangganja nimbihu-da da maràmba da pawàhi-mu tanada.

²²Àmbi mangàdatu-dunja, nadu ba i MIRI Alami napa na matungu ndumamu nyumu,” wànggunya.

²³“La rehi nuna kamahi-nggunyaka i MIRI:

²⁴Dou MIRI Mahupu jangga, kupi-manya yiana na pa-paita-mungga ba hina-apa pakiri-na na paraï rukumu na ma-bokulu dàngu na pa-hangàtarungu. Nda ningu hili hau pa-alangu ka la awangu ka la tanakai na mamàka pa-patumbu-ha da ma-wirungu hama tuna Nyumu.

²⁵Pahia àrungga ka kupala-ya na Luku Yorundangu, dou MIRI, ka ku-itangu tana kamboka la hapapa lai nu, na ngaba ma-palindingu na ma-manandangu dàngu na ma-patundulangu la Limbanongu, wànggunya.

²⁶Na nyuna nyimi-maka ma-pawiti-nya hi nahàngga-ngga nyungga i MIRI, hi nda na-kataku-ya na pa-kamahi-nggu. Na belingu-na panii-nanyaka i MIRI, ‘Jiaka-wa hi Muha, àmbu hili tiki-duyapa na rukuna nuna!

²⁷Lakuwa la pinu Palindi Pinggàhu dàngu kau tàngaru la mbara dia, la mbara luru, la pahunga dàngu la patama. Hamata pahàmu-manya jàka nggàraya na paita-mu, nadu nyumu, ba ndau pala-ayapa na Luku Yorundangu.

²⁸Pekanya ràka pawàngu - pawàngu i Yuhua. Pamàndu-nya na etina, ba nyunaka napa na mairu ngàndiya na banjaru yiana la hapapa la pa-mandapu-nya nuna na tana na paita-mu,’ wànangga.

²⁹Ka ndàdiku-ndanyaka la lolangu la papa paraingu Mbetu-Piuru,” wànanja.