Read Kambera BELINGU 30 Bible Online

BELINGU 30 - Kambera bible

BELINGU 30

¹“Nàhu nyimi màta kai pindi, jàka kanyuru, jàka ràtungu hama tuna na pambàda kaloka-nggu lai nyimi. Jàkai hunggu ràngga ndàba-haka mbuu ndàbada nuda da pa-mayila wàngu dàngu bai luri la hongada da banjaru hangàdangu la pangia ngia papai - iha-nanggai i MIRI Alami, namu beli-dimi-nyaka na pindi na pawua-nggunggai nyimi.

²Jàka era mbuhangu-mi nyimi dàngu da wàlami la pabeli lai MIRI Alami, dàngu ka weli eti-mami pa-manundu la pareta - pareta-na da pa-pakata-nggunggai la lodu nàhu,

³napa i MIRI Alami namila-nggai eti. Napa nangàndi belikai nyimi welingu la ba - banjaru ngia papai - iha-nanggai, tàka hi na pa-mbokaru belikai nyimi.

⁴Jiapakai kai tanyalangu la nggi - nggini la nggubulu pinu tana, napa i MIRI Alami na-pauhi-nggai dàngu hi nangàndi belikai.

⁵Napa nyimi mihili màngi belinya nuna na tana na ngia pa-ngiangu-da àmangu da boku la mangilu-mi. Dàngu na-parihi mbokaru-kaipa napa, tàka na dangumi nda hakudu rihina welingu la boku la mangilu-mi.

⁶Nyimi dàngu da wàlami napa pa-wuangu-kai eti manundu, hi lupa mimbuha-nya i MIRI Alami wàngu weli eti weli puhumi tàka hi peku ndàdiku pangalangu-mi la tana nuna.

⁷Mbuu ndàbada nuda da ràtungu na-patàka-nya la muhu - muhumi da ma-paumbi-nggai dàngu da ma-kapidihu-kai nyimi.

⁸Napa nyimi mi-manundu beli lai MIRI dàngu mi-patundu ndàbanja da pareta-na da pa-pakata-nggunggai la lodu nàhu.

⁹I MIRI Alami na-pawiti-nya napa na pa-ngalangu wàngu la mbuu ndàbana na paraï paruku-mi; napa mingala padangu anami dàngu banda dangu; da wokami da-wuangu ihida mabundu làndangu. Wàngu hawewa etina i MIRI ba na-pambokaru-kai, hama tuna ba wàngu hawewa eti-mbuna ba nawua-nja pa-mbokaru wàngu da boku la mangilu-mi.

¹⁰Na nyuna lupangu-ma kai manundu lai MIRI Alami dàngu kai nunjuha mbuu ndàbada da ukuna da pa-tulihu la mbuku yiana, na mbuku Ukuna i MIRI. Lupangu mibeli-maka bàdi lai Nyuna wàngu weli eti weli puhumi.

¹¹Na pareta na pawua-nggunggai nyimi, nda lalu kalutu-ana ndumami nyimi dàngu nda lalu marau-mbuna.

¹²Na pangia-na nda la awangu-aya, ka peku paàrangu-mi, ‘Nggamu-aka mahei lai nàhu palua papiti-ndanya ka peku rongu-ndanya dàngu ka peku tundu-ndanya?’ ka wàmi wàngu?

¹³Na pangia-na nda la hapapa tehiku-mbuya, ka peku paàrangu-mi, ‘Nggamu-aka mapala la hapapa tehiku dàngu na mangàndi-ndanya ka peku rongu-ndanya dàngu ka peku tundu-ndanya?’ ka wàmi wàngu.

¹⁴Àmbu tuna nudu na paàrangu-mi, nadu nuna na pareta la lihi ma-aminya. Mbàda pi-mami-nyaka dàngu peku kajuruku-mbuminya, ba tuna jiaya na-pahàra-anyaka duna.

¹⁵La lodu nàhu nyimi peku pindimi, jàka na mahàmu, jàka na ma-akatu, jàka na luri, jàka na meti.

¹⁶La lodu nàhu kuwua-nggai pareta la pambuha-nya i MIRI Alami dàngu kai manundu lai Nyuna dàngu kai namatu-ha mbuu ndàbada da ukuna dàngu da lii pareta-na ka peku mbokaru dàngu ka banjaru bokulu-kai. Napa i MIRI Alami napakanyurukai nyimi la tana na manda pira-anapa na mandapu-minya.

¹⁷Tàka jàka era nda manundu-mi dàngu ndai bihu pa-patingingu dàngu bai pa-jàmangu wikimi la pa-panjàra-nggai la palumu-nja da kamàla ala,

¹⁸jiangu-maka ba pa-tàlaru-kai dàngu nda namalai-apa na lurimi la tana na manda pira-anapa na mandapu-minya. Namu-maya! Mbàda panii-nggunyaka nuna lai nyimi la lodu nàhu.

¹⁹Nàhu mipindi-wa, jàka na luri, jàka na meti, jàka na kanyuru-na i MIRI jàka na ràtungu-na. Kupiti-ya na awangu dàngu na tana la pa-hakahii-nya na botangu-mi. Pindi-yawa na luri.

²⁰Mbuhanya i MIRI Alami, manundu-manya Nyuna, dàngu tuturu-ma lai Nyuna. Napa nyimi dàngu da wàlami namalai na ndaungu lurimi la tana na paràndi-na i MIRI la boku la mangilu-mi, i Ambarahàmu, i Ihàku dàngu i Yakupu,” wàna.